Xiyenge 6: Loko Xichudeni Xi Vutisa Xivutiso Xo Karhi

Ku Fambisa Tidyondzo Ta Bibele Leti Endlaka Nhluvuko

¹ Loko dyondzo ya Bibele yi sungurile, i swinene ku dyondzisa xichudeni tidyondzo ta Bibele hi ku landzelelana ka tona ematshan’weni yo ti tlovatlova. Leswi swi ta pfuna xichudeni leswaku xi aka masungulo ya vutivi lebyi kongomeke ni ku endla nhluvuko hi tlhelo ra moya. (Kol. 1:9, 10) Kambe, hakanyingi swichudeni swi vutisa swivutiso swo hambana-hambana loko mi ri karhi mi dyondza. Xana ku fanele ku endliwa yini hi swivutiso swo tano?

² Xalamuka: Swivutiso leswi fambisanaka ni dyondzo leyi mi nga eka yona swi nga hlamuriwa xikan’we-kan’we. Loko xivutiso xa kona xi ta hlamuleka eka tindzimana leti landzelaka, swa antswa u xi byela. Hambiswiritano, loko xivutiso xa kona xi nga fambisani ni rungula leri dyondziwaka kumbe xi ta lava leswaku u endla ndzavisiso, leswaku xi ta hlamuleka kahle, swi nga antswa xi vekeriwa etlhelo mi xi hlamula endzhaku ka dyondzo kumbe hi nkarhi wun’wana. Van’wana va vona swi antswa ku tsala xivutiso xa xichudeni ehansi leswaku xi ta swi vona leswaku xi tekeriwa enhlokweni, naswona sweswo swi pfuna leswaku mi nga humi eka leswi mi dyondzaka swona hi nkarhi wolowo.

³ Tidyondzo to tala ta Bibele ti hlamuseriwe hi ku komisa etibukwini leti hi dyondzisaka ha tona. Xana ku nga endliwa yini loko xichudeni xi nga yi pfumeli dyondzo yo karhi kumbe xa ha namarhele tidyondzo ta xona ta mavunwa? Swi nga pfuna ku kambisisa rungula rin’wana leri ri swi hlamuselaka hi vuenti leswi Bibele yi swi vulaka hi dyondzo yoleyo. Loko xichudeni xi nga si khorwiseka, swa antswa mhaka ya kona u yi vekela nkarhi wun’wana ivi mi ya emahlweni ni dyondzo ya n’wina. (Yoh. 16:12) Loko xichudeni xi ya xi kula hi vutivi bya Bibele naswona xi endla nhluvuko emoyeni, xi nga hetelela xi yi twisisile dyondzo liya a xi nga khorwiseki ha yona.

⁴ Ringanisela: Loko u nga tiyiseki hi nhlamulo ya xivutiso xa kona, papalata ku byela xichudeni mavonelo ya wena. (2 Tim. 2:15; 1 Pet. 4:11) Xi byele leswaku wa ha ta endla ndzavisiso hi mhaka ya kona ivi u xi vuyela ni nhlamulo. U nga ha vhela u xi dyondzisa ndlela yo endla ndzavisiso. U xi komba hakatsongo-tsongo ndlela leyi xi nga yi tirhisaka ha yona minkandziyiso yo hambana-hambana leyi hi nyikiwaka yona hi nhlengeletano ya Yehovha. Hi ndlela yoleyo xi ta hetelela xi swi kota ku tikumela tinhlamulo ta swivutiso swa xona.—Mint. 17:11.