Khathalela Van’wana—Hi Ku Vutisa Swivutiso Ni Hi Ku Yingisela
1 Vanhu vo tala va swi rhandza ku phofula ndlela leyi va titwaka ha yona kambe a va swi lavi ku byeleteriwa kumbe ku konanisiwa. Hikwalaho, leswi hi nga vachumayeri lava nga Vakreste, hi fanele hi dyondza vutshila byo vutisa swivutiso lerova vanhu va ntshunxeka ku vula leswi nga etimbilwini ta vona.—Swiv. 20:5.
2 Swivutiso swa hina swi fanele swi endla vanhu va anakanya, swi nga va khomisi tingana. Loko makwerhu un’wana a ri karhi a chumayela hi yindlu ni yindlu, u vutisa n’wini wa muti a ku, “Xana u ehleketa leswaku swi ta kala swi endleka leswaku vanhu va xiximana?” Loko n’wini wa muti a hlamurile, u ya mahlweni a ku, “Xana u vona onge i yini lexi lavekaka leswaku swi va tano?” kumbe a ku, “Ha yini u hlamula hi ndlela yoleyo?” Kasi makwerhu un’wana loko a chumayela hi xitshuketa niloko a chumayela etindhawini ta mani na mani, u vutisa vatswari a ku, “I yini lexi ku tsakisaka ngopfu hi ku va mutswari?” Ivi a ku, “Kambe i yini lexi ku vilerisaka ngopfu?” Xiya leswaku swivutiso leswi swi pfumelela munhu loyi u vulavulaka na yena leswaku a phofula ndlela leyi a titwaka ha yona u nga n’wi khomisanga tingana. Leswi swiyimo swa vanhu swi nga faniki, hi fanele hi endla leswaku mhaka leyi hi vulavulaka ha yona ni swivutiso leswi hi swi vutisaka, swi pfumelelana ni vanhu va nsimu leyi hi yi tirhaka.
3 Ku Endla Leswaku Vanhu Va Titwa Va Ntshunxekile: Loko vanhu va ku byela ndlela leyi va titwaka ha yona, rhiya ndleve, u nga va ngheni enon’wini. (Yak. 1:19) Nkhensa leswi va swi vuleke, hi musa. (Kol. 4:6) U nga ha ku, “Ndza tsaka ku twa sweswo. Inkomu.” Va bumabumele naswona u vula swi huma embilwini. Hi musa, va vutise swivutiso swin’wana leswaku u ta kota ku twa ndlela leyi va titwaka ha yona nileswaku ha yini va titwa hi ndlela yoleyo. Lava leswi mi pfumelelanaka ha swona. Loko u lava ku va hlayela tsalwa, u nga ha ku, “Xana u ehleketa leswaku mhaka leyi ndzi nga ta ku hlayela yona laha yi nga va mpfuno?” Papalata ku n’wi sindzisa leswaku a pfumela leswi u n’wi byelaka swona naswona u nga phikizani na yena.—2 Tim. 2:24, 25.
4 Ndlela leyi hi va yingiselaka ha yona vanhu yi ta endla leswaku va swi hlamula kahle swivutiso leswi hi va vutisaka swona. Vanhu va swi kota ku vona loko hi va yingiserile naswona hi ri ni mhaka ni leswi va swi vulaka. Mulanguteri la endzelaka mavandlha u te, “Loko u yingisela vanhu hi ku va lehisela mbilu, va ntshunxeka ku vulavula na wena naswona va swi vona leswaku wa khathala hi vona.” Ku rhiya ndleve loko va vulavula swi va endla va titwa va ri ni xindzhuti kutani sweswo swi nga endla leswaku va yingisa mahungu lamanene lawa hi va tiselaka wona.—Rhom. 12:10.