Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swa mpfuxeto ku ta buriwa ha swona eXikolweni xa Vutirheli bya le Tilweni hi vhiki leri sungulaka hi December 25, 2006. Mulanguteri wa xikolo u ta fambisa mpfuxeto wa timinete ta 30 lowu sekeriweke eka rungula ra tinkulumo leti nyikeriweke ku sukela eka vhiki ra November 6 ku ya eka December 25, 2006. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. I yini lexi faneleke xi hi kongomisa loko hi hlawula ndlela leyi faneleke yo nghenisa tsalwa? [Nov. 6, be-TS tl. 148 ndz. 4–tl. 149 ndz. 1] Ku xixima Yehovha tanihi loyi a huhuteleke Bibele i swa nkoka. Ku twisisa mongo, loyi ku vulavuriwaka ha yena nileswaku i mani la vuleke marito wolowo ni leswi ku vulavuriwaka ha swona swi hi pfuna ku nghenisa tsalwa.
2. Hi tihi tindlela tin’wana leti hi nga ti tirhisaka ku tiyisekisa leswaku hi kandziyisa marito ni swiga leswi faneleke? [Nov. 27, be-TS tl. 151 ndz. 4–tl. 152 ndz. 3] (1) Ku cinca-cinca rito: Ku cinca-cinca rito swi hlawulekisa marito lama khomeke mongo exikarhi ka xiga. (2) Ku koka moya: Ku koka moya hi ndlela leyi faneleke u nga si hlaya xiyenge xo karhi xa tsalwa swi endla leswaku vayingiseri va langutela leswi landzelaka kasi ku koka moya endzhaku ko hlaya xiyenge xexo swi dzikisa mhaka leyi hlayiweke. (3) Ku phindha-phindha: Endzhaku ka loko hi hlaye tsalwa, ku phindha tinhla-nkulu kumbe swiga swi pfuna ku kandziyisa yinhla yo karhi. (4) Ku tshukatshukisa miri: Hakanyingi ku tshukatshukisa miri ni ku languteka ka nghohe swi nga pfuna ku kandziyisa rito kumbe xiga.
3. Tanihi leswi ku nga riki matlangwana ku dyondzisa van’wana Rito ra Xikwembu ku laveka yini leswaku hi ri “tamela khwatsi rito ra ntiyiso”? (2 Tim. 2:15) [Dec. 4, be-TS tl. 153 tindz. 1-3, bokisi; tl. 154 tindz. 1-2] Hi fanele hi tiyiseka leswaku nhlamuselo ya hina ya matsalwa ya fambisana ni mongo, leswi Bibele hi yoxe yi swi dyondzisaka ni leswi kandziyisiweke hi “hlonga ro tshembeka ni ro tlhariha.” (Mat. 24:45) Hi fanele hi papalata ku tinghenisela swa mianakanyo ya hina kumbe ku soholota tsalwa ri vula leswi hina hi lavaka leswaku ri vula swona. (Yer. 23:16) Ku tlula kwalaho, hi lwela ku tekelela Yesu Kreste, loyi a tirhiseke Rito ra Xikwembu ku aka ku nga ri ku himetela vanhu hi rona. (Mat. 11:28)
4. Hi tihi tindlela leti ha tona hi nga swi vekaka erivaleni leswi vuriwaka hi tsalwa leri hi ri hlayaka? [Dec. 11, be-TS tl. 154 ndz. 4–tl. 155 ndz. 3] Ndlela yin’wana leyi hi nga endlaka ha yona leswaku matirhelo ya tsalwa ma va erivaleni i ku ma humesela erivaleni marito lama khomeke mongo wa mhaka leyi khumbaka nhloko-mhaka leyi hi vulavulaka ha yona. Yesu u kandziyise xiga lexi nge “nyama yin’we” loko a hlamusela leswi Genesa 2:24 yi vulaka swona. (Mat. 19:3-6) Na hina hi nga vutisa swivutiso leswi nga ta kandziyisa tinhla-nkulu etsalweni leri hi lavaka ku ri hlaya. Pakani ya hina i ku endla leswaku vayingiseri va anakanyisisa hi xiphemu xa tsalwa rero lexi tirhaka eka leswi hi vulavulaka ha swona ku endlela leswaku va ku vona kahle ku fambisana ka mhaka leyi hi bulaka ha yona ni matsalwa lawa hi ma tirhisaka.
5. Ha yini swi ri swa nkoka ku yi veka erivaleni ndlela leyi mhaka ya hina yi tirhaka ha yona, naswona hi tihi tindlela tin’wana leti leswi swi nga endliwaka ha tona? [Dec. 25, be-TS tl. 157 tindz. 1-4, bokisi; tl. 158 ndz. 1] Loko vanhu va nga wu voni nkoka wa leswi hi swi vulaka, miehleketo ya vona yi nga ha tsendzeleka naswona a va nge vuyeriwi hi rungula leri hi vulavulaka ha rona. Hi khutaza van’wana leswaku va ehleketa hi ndlela leyi mhaka yi pfunaka ha yona hi ku va pfuna ku twisisa ndlela leyi ku chava Yehovha swi byi khumbaka ha yona vutomi bya vona. (Ps. 111:10; 1 Tim. 4:8) Hi endla leswaku rungula ra tinkulumo ta hina ri pfuna vayingiseri hi ku va languta ni ku tivutisa leswaku, ‘Rungula leri ndzi nga ta bula ha rona ri ta va vuyerisa njhani’?
NKULUMO NO. 1
6. Solomoni a a ri muhlengeleti hi ndlela yihi? [Nov. 13, si-TS tl. 112 tindz. 1-3] Solomoni a a ri murhangeri wa vanhu lava tinyiketeleke eka Yehovha. Hikwalaho u lave ku hetisisa vutihlamuleri bya yena byo hlanganisa vanhu va Xikwembu leswaku va tshama va tshembekile eku tinyiketeleni ka vona. Hi ku tirhisa xitsundzuxo xa vutlhari xa buku ya Eklesiasta, Solomoni u endle matshalatshala yo hlengeleta vanhu emintirhweni leyi pfunaka ni ku va susa emintirhweni ya misava ya hava, leyi nga hava mihandzu. (Ekl. 12:8-10)
7. Xana buku ya Eklesiasta yi pfumelelana ni tidyondzo ta Yesu hi ndlela yihi? [Nov. 20, si-TS tl. 114 ndz. 16] Buku ya Eklesiasta yi tamele swilo swo tala leswi fanaka ni tidyondzo ta Yesu. Hi xikombiso, Yesu u kandziyise ntirho lowukulu lowu Xikwembu xi wu endleke a ku: “Tata wa mina u ya emahlweni a tirha ku fikela sweswi, na mina ndzi ya emahlweni ndzi tirha.” (Yoh. 5:17) Solomoni na yena u vulavule hi mintirho ya Xikwembu, a ku: “Ndzi vone ntirho hinkwawo wa Xikwembu xa ntiyiso, ndlela leyi vanhu va nga swi kotiki ha yona ku kumisisa ntirho lowu endliweke ehansi ka dyambu; hambiswiritano, vanhu vo tala va ya emahlweni va tirha hi matimba leswaku va kuma swo karhi, kambe a va swi kumi. Hambiloko vo vula leswaku va tlharihe ngopfu leswaku va nga swi tiva, a va nge swi tivi.” (Ekl. 8:17)
8. Hi byihi vumbhoni lebyi nga kona bya leswaku buku ya Risimu ra Solomoni i xiyenge xa nxaxamelo wa tibuku to kwetsima? [Nov. 27, si-TS tl. 115 tindz. 3-4] Buku ya Risimu ra Solomoni yi nghenisiwile eka “Septuagint,” naswona Josephus u yi nghenisile enxaxamelweni wa yena wa tibuku leto kwetsima, leswi kombaka leswaku eminkarhini yo sungula a swi nga kanakaniwi leswaku i xiyenge xa tibuku to kwetsima. Ku tlula kwalaho, ku hlamusela ka yona mfanelo leyi heleleke ya rirhandzu lerikulu ro fana ni rirhandzu ra moya leri nga kona exikarhi ka Kreste ni “mutekiwa” wa yena, i vumbhoni bya leswaku buku ya Risimu ra Solomoni i xiyenge xa nxaxamelo wa tibuku ta Bibele. (Nhlav. 19:7, 8; 21:9)
9. Buku-songwa ya Lwandle leri Feke ya Esaya yi nyika vumbhoni byihi lebyi khorwisaka bya leswaku Bibele ya hina ya namuntlha yi tamele matsalwa yo sungula lama huhuteriweke? [Dec. 4, si-TS tl. 118 ndz. 6] Tsalwa ra Buku-songwa ya Lwandle leri Feke ya Esaya ri ni malembe ya kwalomu ka gidi hi vukhale ku tlula matsalwa ya khale swinene ya Masora naswona ri tamele dyondzo leyi fanaka ni ya matsalwa ya Masora. Loko matsalwa lawa ma pimanisiwa, ko va ni ku hambana kutsongo ntsena ka matsalelo ni ka mavekelo ya ririmi.
10. I yini leswi nga pfunaka xivulavuri leswaku xi nga boheki ku tsala tinotsi to leha? [Dec. 11, be-TS tl. 42 ndz. 2] Xivulavuri xi fanele xi hlela rungula ra xona leswaku ri nga vi ni tinhla-nkulu to tala, xi tshika rungula hinkwaro leri nga seketeliki tinhla leti naswona xi xaxameta tinhla ta xona hi ndlela leyi twisisekaka.
KU HLAYA KA BIBELE KA VHIKI NI VHIKI
11. Xana “lava va lavaka Yehovha va nga swi twisisa hinkwaswo” hi ndlela yihi? (Swiv. 28:5) Rito leri nge “hinkwaswo” ri kombetela eka hinkwaswo leswi lavekaka leswaku munhu a tirhela Yehovha hi ndlela leyi amukelekaka, ku katsa ni vutivi bya milawu ya Xikwembu ya mahanyelo. Lava lavaka Yehovha hi xikhongelo ni hi ku dyondza Bibele va twisisa leswi va faneleke va swi endla leswaku va tirhela Yehovha hi ndlela leyi amukelekaka. Kambe, lava endlaka swo biha a va swi twisisi leswi nga swinene naswona Xikwembu a xi va amukeli leswaku va va malandza ya xona. [Nov. 6, w06-TS 9/15 “Rito Ra Yehovha Ra Hanya—Tinhla-nkulu Ta Buku Ya Swivuriso”; w87-TS 5/15 tl. 30]
12. Xana “ntirho wa matimba wa swihunguki wu swi heta matimba” hi ndlela yihi? (Ekl. 10:15) Hakanyingi “swihunguki” swi vula ni ku endla swilo swa vuhunguki, leswi sekeriweke eka mianakanyo leyi hoxeke. (Ekl. 10:12-14) Swi lwa hi matimba swi ringeta ku kombisa leswaku matshalatshala ya swona a hi ya hava kambe sweswo hinkwaswo swo fana ni ku tirhela mbhongolo yo fa. Swi titikisela vutomi. [Nov. 20, w06-TS 11/1 “Rito Ra Yehovha Ra Hanya—Tinhla-nkulu Ta Buku Ya Eklesiasta”; w77 matl. 698-9]
13. Xana nhwanyana wa Muxulami u tikombise njhani a fana ni “ntanga lowu biyeriweke” naswona i xikombiso lexinene hi ndlela yihi eka vavasati lava nga Vakreste lava nga si tekiwaka? (Risim. 4:12) Rirhandzu ra nhwanyana wa Muxulami a ri fana ni ntanga wo saseka lowu biyeriweke hi rihlampfu kumbe rirhangu, lowu ku nga ngheniwaka eka wona hi nyangwa leyi lotleriweke ntsena, laha swigevenga swi nga kotiki ku nghena. A a nga rhandzani ni wanuna un’wana ni un’wana kambe a a rhandzana ni jaha leri a ri ta va nuna wa yena ntsena. Hakunene lexi i xikombiso lexinene xa mahanyelo lamanene eka vavasati lava nga Vakreste lava nga siki tekiwaka! [Nov. 27, w06-TS 11/15 “Rito Ra Yehovha Ra Hanya—Tinhla-nkulu Ta Buku Ya Risimu Ra Solomoni”]
14. Loko Yehovha a khutaza Vaisrayele ku ‘lulamisa timhaka,’ xana a a kombisa leswaku a a tiyimisele ku tshama hansi ni vanhu va yena va lulamisa timhaka? (Esa. 1:18a) Doo! Ndzimana leyi a yi vulavuli hi bulo ro nyiketana hi marito kumbe ku kanerisana exikarhi ka vanhu lava nga tintangha. Xikhutazo lexi a xi ya eka huvo leswaku yi tirhisa vululami bya Yehovha. Yehovha a a khutaza Vaisrayele leswaku va hundzuka kutani va basisiwa eka mahanyelo ya vona ni le ka swidyoho leswi a va swi endla hi tlhelo ra moya. (Esa. 1:16, 17) U va tshembise leswaku loko vo ‘lulamisa timhaka’ a a ta va rivalela. (Esa. 1:18b, 19) [Dec. 4, ip-1-TS matl. 26-9 tindz. 9-18]
15. Xana Esaya 11:6-9 yi hetiseke hi ndlela yihi eminkarhini ya khale, naswona yi hetiseka njhani hi ndlela leyikulu? Hi ku pfumelelana ni rito ra Yehovha, loko Vaisrayele va ri endleleni yo tlhelela eka rikwavo va huma evuhlongeni eBabilona ni loko va ri etikweni ra vona ku sukela hi 537 B.C.E., a va nga ta chavisiwa hi swivandzana kumbe vanhu vo kota swivandzana. Hilaha ku fanaka, ku sukela hi 1919, leswi vanhu va kumeke ‘vutivi bya Yehovha’ ni Rito ra yena, va hundzule vumunhu bya vona. (Kol. 3:9, 10) Hi xikombiso, vanhu lava khale a va ri ni vukarhi va hundzuke lavo rhula naswona sweswi va tiphina hi paradeyisi ya moya. Emisaveni leyintshwa leyi taka, vanhu va Xikwembu na vona a va nge titwi va xungetiwa hi munhu kumbe hi xiharhi xo karhi. [Dec. 18, ip-1-TS matl. 163-4 tindz. 12-15]