Bokisi Ra Swivutiso

◼ Xana swi fanerile ku xavisa swiambalo swa khale kumbe swilo swin’wana leswaku ku ta hlengeletiwa mali yo pfuna evandlheni?

Swi tolovelekile ku vona tinhlengeletano ta vukhongeri ti seketela swiendlakalo swo hlengeleta mali, swo kota ku xavisa swakudya swo lalela, ku xavisa swilo swin’wana kumbe ku hlela minkhuvo yo hlengeleta mali. Hambiloko van’wana va teka swiendlakalo leswi swi nga hoxanga, kambe i ndlela yin’wana yo kombela mali. Eka Timbhoni ta Yehovha yoleyo a hi ndlela leyinene yo kuma mali.

Loko nkandziyiso wa vumbirhi wa Xihondzo xo Rindza (xa Xinghezi) xa August 1879, wu vulavula hi mhaka ya ku ala ka hina ku tekelela mikhuva ya tikereke swin’we ni ku kombela mali, wu te: “Hi tshemba leswaku ‘Zion’s Watch Tower’ yi seketeriwa hi YEHOVHA, hikwalaho a yi nge pfuki yi lave mpfuno hi ku kombela mali kumbe yi lava ku seketeriwa hi vanhu. Loko loyi a vuleke a ku: ‘Nsuku hinkwawo ni silivhere ya le tintshaveni i swa mina,’ a tsandzeka ku humesa mali leyi lavekaka, hi ta swi tiva leswaku i nkarhi wa leswaku hi tshika ku kandziyisa magazini lowu.”

Hi hambeta hi landzela nsinya lowu wa nawu wa Matsalwa, lowu nge: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Kor. 9:7) Ku ni mabokisi ya munyikelo eHolweni ya Mfumo leswaku munhu ha un’we a hoxa munyikelo wa ku tirhandzela hilaha a lavaka hakona. (2 Tih. 12:9) Minyikelo a yi fambi yi komberiwa hi tindlela tin’wana; naswona lava yi humesaka a va yi humeseli leswaku va ta kuma swo karhi.