“Vulavula Rito Ra Xikwembu Handle Ka Ku Chava”

¹ Xana minkarhi yin’wana wa kanakana ku vulavula hi ripfumelo ra wena loko u nyikiwa nkarhi wo endla tano exikolweni kumbe entirhweni? Xana swa ku tikela ku chumayela hi xitshuketa eka maxaka ni vaakelani va wena kumbe eka vanhu lava u va toloveleke? I yini lexi hinkwerhu xi nga ta hi pfuna leswaku hi tirhisa minkarhi leyi faneleke ku “vulavula rito ra Xikwembu handle ka ku chava”?—Filp. 1:14.

² U Nga Kanakani: Xana a wu ta kanakana ku yimelela munghana wa wena lonkulu kumbe xaka ra wena loko ri hehliwa hi mavunwa? Yehovha, Munghana wa hina lonkulu u lumbetiwe swinene ematin’wini hinkwawo ya vanhu. Hi ni lunghelo ro hlawuleka ro yimelela Xikwembu xa hina xa matimba! (Esa. 43:10-12) Ku rhandza Yehovha hi mbilu hinkwayo swi ta hi pfuna leswaku hi nga chavi nchumu, naswona swi ta hi susumetela ku yimelela ntiyiso, naswona hi nga kanakani ku vulavula ha wona hi xivindzi.—Mint. 4:26, 29, 31.

³ U nga rivali leswaku rungula ra hina i mahungu lamanene. Lava va ri yingisaka va ta kuma vuyelo lebyi nga heriki. Loko hi anakanyisisa hi nkoka wa ntirho wo chumayela ematshan’weni ya ku anakanyisisa hi hina vini kumbe hi vakaneti va hina sweswo swi ta hi pfuna leswaku hi chumayela hi xivindzi.

⁴ Swikombiso Swa Van’wana: Hi nga kuma matimba loko hi xiya ripfumelo ra vanhu van’wana lava chumayeleke rito ra Xikwembu hi xivindzi. Hi xikombiso, Enoko u twarise ta vuavanyisi bya Yehovha ehenhla ka vadyohi lava nga xi chaviki Xikwembu. (Yudha 14, 15) Nowa u chumayele vanhu lava a va nga tsakeli naswona a nga helanga matimba. (Mat. 24:37-39) Vakreste va lembe-xidzana ro sungula lava a va ri vanhu lava nga “dyondzekangiki, lava tolovelekeke” va hambete va chumayela hambiloko va kanetiwa hi ndlela ya tihanyi. (Mint. 4:13, 18-20) Ko tala timagazini ta Xihondzo xo Rindza ni Xalamuka! ti va ti tamele timhaka ta vutomi bya Vakreste va manguva lawa lava koteke ku hlula ku chava vanhu kutani va va vachumayeri lava hisekaka, hileswi va kombiseke ripfumelo eka Yehovha.

⁵ Hi nga va ni xivindzi hi ku hlaya timhaka ta vutomi bya malandza yo tshembeka ya le minkarhini ya khale lama langutaneke ni swiyimo swo tika. (1 Tih. 19:2, 3; Mar. 14:66-71) Ma ‘kume vurhena hikwalaho ka Xikwembu xa hina’ ma tlhela ma vulavula ma nga chavi nchumu. Kutani na hina hi nga endla tano!—1 Tes. 2:2.