Ku Endla Malunghiselelo Hinkwawo Ya Xitsundzuxo

Hakunene i lunghelo eka valandzeri va Kreste ku va lembe na lembe va endla malunghiselelo ya leswaku va tsundzuka rifu ra Yesu Kreste! (Luka 22:19) Hi swihi swilo swa nkoka leswi hi faneleke hi swi tsundzuka leswaku hi lunghiselela Xitsundzuxo?

◼ Nkarhi Ni Ndhawu: Un’wana ni un’wana u fanele a wu tiva kahle nkarhi ni ndhawu leyi Xitsundzuxo xi nga ta khomeriwa eka yona. Loko ku ri leswaku Holo ya Mfumo yi ta tirhisiwa hi mavandlha yo tlula rin’we, i swa nkoka leswaku hi fika hi nkarhi naswona hi hatla hi famba endzhaku ka Xitsundzuxo hikuva nkarhi lowu hi nyikiweke wona wu komile. I swa nkoka leswaku hi papalata ku kwetlembetana enyangweni, ehandle ni laha ku pakiwaka kona timovha.

◼ Swirhambo: Xana vahuweleri hinkwavo se va swi kumile swirhambo naswona va swi tiva leswaku swi vulavula hi yini? Xana se u ti tolovetile xingheniso lexi u nga ta xi tirhisa loko u fambisa xirhambo lexi? Xana se wa va tiva vanhu lava u faneleke u va nyika xona? Hi fanele hi tikarhata swinene ku tiyiseka leswaku swirhambo hinkwaswo swa fambisiwa.

◼ Swo Famba Ha Swona: Vanhu van’wana lava tsakelaka swin’we ni vamakwerhu van’wana swi nga ha endleka leswaku va ta lava swo famba ha swona kumbe mpfuno wun’wana. Xana ma kona malunghiselelo lama nga endliwa leswaku ku fikeleriwa swilaveko swa vona?

◼ Swifanekiselo: Tiyisekani leswaku swifanekiselo a swi fambisiwi dyambu ri nga si pela. Ku fanele ku endliwa malunghiselelo yo yisa swifanekiselo eka vatotiwa hinkwavo lava tsandzekaka ku ta hikwalaho ka mavabyi. Ku fanele ku tirhisiwa xinkwa ni vhinyo ya muxaka lowu faneleke naswona swi fanele swi vekiwa minhlangano yi nga si sungula.—Vona Xihondzo xo Rindza xa February 15, 2003, matluka 14-15, tindzimana 14, 17.

◼ Holo Ya Mfumo: Holo yi fanele yi basisiwa kahle ka ha ri ni nkarhi. Tipuleti, tinghilazi, tafula ni lapi ro andlalela tafula swi fanele swi tisiwa eholweni swi tlhela swi vekiwa kahle ka ha ri ni nkarhi. Loko mi ta tirhisa muako wun’wana, tiyisekani leswaku ku ni mpfumawulo lowu ringaneke lerova vanhu hinkwavo va ta kota ku twa xivulavuri. Varindzi ni lava nga ta fambisa swifanekiselo va fanele va hlawuriwa ka ha ri emahlweni va tlhela va leteriwa ntirho wa vona ni maendlelo lawa ku nga ta landzeriwa wona naswona va fanele va ambala hi ndlela leyi xiximekaka.

Eka xiendlakalo lexi xa nkoka swinene xa ku tsundzuka rifu ra Yesu Kreste, hinkwerhu ka hina hi lava ku tikuma hi lunghekile tanihi vandlha. Ha tiyiseka leswaku Yehovha u ta katekisa vanhu hinkwavo lava swi tlangelaka hi mbilu hinkwayo swilo hinkwaswo leswi a nga hi endlela swona hi ku tirhisa gandzelo ra nkutsulo ra N’wana wakwe loyi a rhandzekaka Yesu Kreste.