Leswi Faneleke Swi Tsundzukiwa Malunghana Ni Xitsundzuxo

Nkhuvo wa Xitsundzuxo lembe leri wu ta va hi Sonto, April 4. Vakulu va fanele va nyikela nyingiso eka timhaka leti landzelaka:

◼ Loko mi hlela nkarhi wa nhlangano, tiyisekani leswaku swifanekiselo swi nga fambisiwi loko dyambu ri nga si pela.

◼ Un’wana ni un’wana, ku katsa ni xivulavuri, va fanele va tivisiwa nkarhi lowu xitsundzuxo xi nga ta khomiwa ha wona ni ndhawu ya kona.

◼ Ku fanele ku kumiwa muxaka lowu faneleke wa xinkwa ni vhinyo swi tlhela swi lulamisiwa kahle.—Vona Xihondzo xo Rindza xa February 15, 2003, matluka 14-15.

◼ Tipuleti, tinghilazi, tafula ni lapi ro funengeta tafula swi fanele swi tisiwa eholweni swi tlhela swi vekiwa kahle ka ha ri ni nkarhi.

◼ Holo ya Mfumo kumbe ndhawu yin’wana leyi ku nga ta hlanganiwa eka yona yi fanele yi basisiwa kahle ka ha ri ni nkarhi.

◼ Varindzi ni lava nga ta fambisa swifanekiselo va fanele va hlawuriwa ni ku leteriwa ka ha ri emahlweni malunghana ni ntirho wa vona, maendlelo lama nga ta landzeriwa ni xilaveko xo ambala ni ku tilunghisa hi ndlela leyi xiximekaka.

◼ Ku fanele ku endliwa malunghiselelo yo yisa swifanekiselo eka vatotiwa hinkwavo lava tsandzekaka ku va kona hikwalaho ka mavabyi.

◼ Loko mavandlha yo tlula rin’we ma ta tirhisa Holo yin’we ya Mfumo, ma fanele ma tirhisana kahle leswaku ku nga vi ni ku kwetlembetana enyangweni, ehandle ni laha ku pakiwaka kona timovha.