Bokisi Ra Swivutiso

◼ Xana un’wana ni un’wana wa hina a nga hoxa xandla hi ndlela yihi leswaku minhlangano ya vandlha yi va ndhawu leyinene yo dyondzela eka yona? (Det. 31:12)

Ku kombisa leswaku hi xixima Yehovha ni lunghiselelo rakwe ra minhlangano ya vandlha, hinkwerhu hi khutaziwa ku fika hi nkarhi naswona hi lunghekela ku dyondzisiwa hi yena. I swinene ku tshama eswitulwini swa le mahlweni hi siya swa le ndzhaku leswaku lava va nga ni vana lavatsongo ni lava minkarhi yin’wana va fikaka minhlangano se yi sungurile, va ta kota ku tshama eka swona. Loko minhlangano yi nga si sungula, hi fanele hi tiyiseka leswaku swilo swa hina vini swa elektroniki a swi nge va kavanyeti vayingiseri. Swikavanyeto swona swi ta va kona, kambe a swi nge tali loko hinkwavo lava nga kona va kombisa xichavo hi nkarhi wa minhlangano.—Ekl. 5:1; Filp. 2:4.

Loko vanhu lavantshwa va sungula ku va kona eminhlanganweni ya hina, un’wana loyi a va toloveleke a nga ha tshama na vona. Leswi swi ta va pfuna swinene, ngopfu-ngopfu loko va ri ni vana lavatsongo lava ha faneleke va leteriwa. Ku va kona eminhlanganweni ku nga va nchumu lowu hlamarisaka eka ndyangu lowu taka ro sungula eminhlanganweni ya hina. Kutani va ta swi tlangela swinene ku tshamela endzhaku laha va nga ta ka va nga va kavanyeti ngopfu van’wana, hambiloko swi ta lava leswaku va humela ehandle swa xinkarhana leswaku va ya pfuna vana va vona. (Swiv. 22:6, 15) Mindyangu leyi nga ni vana lavatsongo a yi fanelanga yi tshama ekamareni ra le tlhelo laha vana va nga ta titwa va ntshunxekile ku ba pongo. I swinene leswaku loko vatswari va lava ku tshinya vana va vona kumbe va lava ku va pfuna hi swin’wana va huma na vona ehandle ka holo kutani endzhaku ka sweswo va tlhelela na vona endzeni.

Varindzi va hoxa xandla eku endleni ka leswaku swilo swi hleleka endlwini ya vugandzeri. Va pfuna mindyangu ni lava minkarhi yin’wana va fikaka minhlangano se yi sungurile leswaku va kuma ndhawu yo tshama. Varindzi va tirhisa vutlhari ni vuxiya-xiya loko va pfuna van’wana leswaku va kuma ndhawu leyinene yo tshama eka yona handle ko kavanyeta van’wana swi nga fanelanga. Va anakanyela loko va fanele va tamela swiyimo leswi nga languteriwangiki leswi kavanyetaka. Loko n’wana a kavanyeta van’wana, varindzi va nga ha ringeta ku n’wi pfuna hi musa.

Hinkwavo lava vaka kona eminhlanganweni ya vugandzeri, va nga hoxa xandla eku endleni ka leswaku minhlangano yi va ndhawu leyinene yo dyondza hi Yehovha eka yona ni hi xikongomelo xakwe xa misava leyintshwa ya ku rhula ni leyo lulama.—Hev. 10:24, 25.