Hanyani Hi Mukhuva Lowu Fanelaka Mahungu Lamanene
1 Tanihi Timbhoni ta Yehovha, hi tsakela ku yisa ku dzuneka evitweni ra Yehovha. Ha swi tiva leswaku mahanyelo, mavulavulelo, ku tisasekisa ni swiambalo swa hina swi nga khumba ndlela leyi van’wana va langutaka vugandzeri bya ntiyiso ha yona. Leswi swi tano ngopfu-ngopfu loko hi ri eminhlanganweni ya hina. Hi lava ku tiyiseka leswaku hinkwaswo leswi vuriwaka ni ku endliwa eminhlanganweni swi fanela mahungu lamanene naswona swi yisa ku dzuneka eka Yehovha.—Flp. 2:4.
2 Mimpimanyeto yo tala ya misava ya maambalelo ni ku tisasekisa a yi amukeleki eka Vakreste. Leyi i mhaka leyi faneleke yi xiyisisiwa swinene hi vatirheli va mahungu lamanene. Xihondzo xo Rindza xa June 1, 1989, tluka 20 xi te: “Swiambalo swa hina a swi kali swi lava leswaku swi va leswi durhaka, kambe swi fanele swi va leswi baseke, leswi langutekaka ni ku xiximeka. Tintanghu ta hina ti fanele ku va exiyin’weni lexinene naswona ti languteka. Hi ku fanana, eminhlanganweni hinkwayo, ku katsa ni Dyondzo ya Buku ya Vandlha, mimiri ya hina yi fanele ku va leyi baseke, naswona hi fanele hi va lava baseke ni ku ambala hi ndlela leyi fanelekaka.”
3 Ku hlayisa nkarhi i mfungho wa rirhandzu ni ku anakanyela. Nkarhi na nkarhi, hikwalaho ka swiyimo leswi nga papalatekiki hi tsandzeka ku fika hi nkarhi eminhlanganweni. Kambe mukhuva wo hlwela wu nga ha kombisa ku pfumala xichavo eka xikongomelo xo kwetsima xa minhlangano ni ku tsandzeka ku tlangela vutihlamuleri bya hina byo papalata ku kavanyeta van’wana. Lava fikaka nkarhi wu hundzile hakanyingi va kavanyeta van’wana ni ku va sivela ku vuyeriwa swinene hi nongonoko. Ku hlayisa nkarhi ku kombisa ku xixima mintlhaveko ni ku tsakela ka hinkwavo lava nga kona.
4 Rirhandzu ra hina eka vaakelani va hina ri fanele ri hi endla hi xalamukela ku papalata ku kavanyeta van’wana eminhlanganweni. Ku hlevetela, ku dya, ku cakunha chungamu, ku endla vukhwaxakhwaxa, ku tshamela ku ya eswihambukelweni swi nga ha kavanyeta nyingiso wa van’wana ni ku susa xindzhuti xa ndhawu ya vugandzeri bya Yehovha. Mani na mani a nga fanelanga a lunghisa timhaka ta vandlha kumbe ku vulavula ni van’wana handle ka loko ku ri mhaka ya xihatla leyi nga endlaka leswaku makwerhu a suka laha a tshameke kona. Handle ka sweswo, hinkwavo va fanele va tshama ehansi va yingisela nongonoko leswaku ku pfuneka vona ni mindyangu ya vona. Mikhuva leyo biha a yi laveki eHolweni ya Mfumo hikuva “rirhandzu a ri hanyi hi ndlela yo soleka.”—1 Kor. 13:4, 5; Gal. 6:10.
5 Mahanyelo lamanene ya vana va hina loko va ri eminhlanganweni na wona ma dzunisa vito ra Yehovha. I swa nkoka leswaku vatswari va tiyisa voko. Vana va fanele ku dyondzisiwa ku yingisela ni ku hlamula. Vatswari vo tala lava nga ni swihlangi va hlawula ku tshama laha va nga ta kota ku hatla va humela ehandle va ya khathalela swilaveko swa swihlangi swa vona handle ko kavanyeta van’wana.
6 Pawulo u tsundzuxile: “Mahanyelo ya n’wina ma fanele ku fambelana ni Evhangeli.” (Flp. 1:27) Hikwalaho, a hi lweleni ku va ni mikhuva leyinene ni ku anakanyela van’wana loko hi ri eminhlanganweni. Ntirhisano wa hinkwavo wu ta tiyisekisa leswaku ku ta va na ku “tiyisana swin’we . . . hi ku pfumela loku . . . hi nga na kona.”—Rhom. 1:12.