Titolovete Ku Hlayisa Nkarhi
1. Yehovha u hi vekela xikombiso xihi malunghana ni ku hlayisa nkarhi?
1 Minkarhi hinkwayo Yehovha u hlayisa nkarhi. Hi xikombiso, u nyika malandza yakwe ‘mpfuno hi nkarhi wa kona.’ (Hev. 4:16) U tlhela a lunghiselela “swakudya swa [moya] hi nkarhi lowu faneleke.” (Mat. 24:45) Hikwalaho hi nga tiyiseka leswaku siku leri taka ra ku hlundzuka ka yena “a [ri] nge hlweli.” (Hab. 2:3) Ha vuyeriwa hakunene leswi Yehovha a hlayisaka nkarhi! (Ps. 70:5) Kambe leswi hi khomekeke naswona hi nga hetisekangiki, swi nga hi tikela swinene ku hlayisa nkarhi. Ha yini hi fanele hi titoloveta ku hlayisa nkarhi?
2. Ha yini ku hlayisa nkarhi swi yisa ku dzuneka eka Yehovha?
2 Emasikwini lawa yo hetelela, vanhu vo tala lava va tirhandzaka naswona va nga tikhomiki, a va ha wu hlayisi nkarhi. (2 Tim. 3:1-3) Hikwalaho loko Vakreste va fika hi nkarhi entirhweni, etindhawini leti va faneleke va ya hlangana ni vanhu vo karhi ni le minhlanganweni, van’wana va swi xiya naswona leswi swi yisa ku dzuneka eka Yehovha. (1 Pet. 2:12) Xana hi tolovele ku sungula ntirho wo tihanyisa hi nkarhi kambe eminhlanganweni ya Vukreste hi fika loko se yi sungurile? Ku fika hi nkarhi eminhlanganweni ya Vukreste, ku katsa ni ku va kona loko ku yimbeleriwa risimu ro pfula ni xikhongelo, swi kombisa leswaku hi navela ku tekelela Tata wa hina wa le tilweni la hlelekeke.—1 Kor. 14:33, 40.
3. Ha yini ku hlayisa nkarhi swi kombisa ku anakanyela van’wana?
3 Ku hlayisa nkarhi swi kombisa leswaku hi anakanyela van’wana. (Filp. 2:3, 4) Hi xikombiso, loko hi fika hi nkarhi eminhlanganweni ya Vukreste, ku katsa ni le minhlanganweni ya ntirho wa nsimu, vagandzeri-kulorhi a va kavanyetiwi swi nga fanelanga. Hi hala tlhelo, loko hi tolovele ku nga wu hlayisi nkarhi, van’wana va nga ha ehleketa leswaku hi teka nkarhi wa hina wu ri wa nkoka swinene ku tlula wa vona. Ku hlayisa nkarhi swi kombisa leswaku ha tshembeka naswona ha gingiriteka, ku nga timfanelo leti tsakeriwaka hi vanhu lava hi hanyaka na vona.
4. Loko minkarhi yo tala swi hi tsandza ku hlayisa nkarhi, hi nga antswisa njhani?
4 Loko minkarhi yo tala swi ku tsandza ku hlayisa nkarhi, tivutise leswaku ha yini swi ku tsandza. Tiendlele xiyimiso lexi nga ta endla leswaku u kota ku heta swilo hi nkarhi lowu faneleke. (Ekl. 3:1; Filp. 1:10) Kombela Yehovha leswaku a ku pfuna. (1 Yoh. 5:14) Ku hlayisa nkarhi i yin’wana ya tindlela to kombisa ku tlangela swileriso swimbirhi leswikulu swa Nawu—ku rhandza Xikwembu ni ku rhandza warikwerhu.—Mat. 22:37-39.