Tlangela Yindlu Ya Xikwembu
1 Eminkarhini ya Bibele Yehovha u lerise vanhu vakwe leswaku nkarhi na nkarhi va hlengeletana kun’we endlwini ya yena. (Levh. 23:2) Ku hlangana loku ku hlayise mianakanyo ya vona yi ri eritweni ra Xikwembu, ku va nyike nkarhi wo anakanyisisa, wo tolovelana ni wo burisana hi Nawu wa Yehovha. Mianakanyo ya vona yi tatiwe hi marito ya Xikwembu, lama tiseke mikateko leyi fuweke ya moya. Hakunene leyi a yi ri minkarhi ya ntsako. Lunghiselelo leri ri hlohlotele vun’we ni vugandzeri lebyi baseke. Ku hlengeletana endlwini ya Xikwembu namuntlha i ka nkoka hi laha ku fanaka.
2 Xana Hi Nga Swi Kombisa Njhani Leswaku Ha Yi Tlangela Minhlangano? Mavandlha man’wana ma vika nhlayo ya le hansi ya lava vaka kona eminhlanganweni. Minkarhi yin’wana xiyimo xa munhu xi nga n’wi sivela ku va kona eminhlanganweni. Kambe xana u tshame u pfumelela swiphiqo leswitsongo swi ku sivela ku va kona eminhlanganweni nkarhi na nkarhi? Van’wana va nga ha kunguhata ku tshama ekaya loko va pandziwanyana hi nhloko kumbe va titwa va karhele endzhaku ka siku ro tika. Van’wana va titwe va boheka ku hungasa maxaka lama nga riki vapfumeri lama lavaka ku va endzela. Van’wana va hundziwe hi minhlangano leswaku va ta hlalela nongonoko wo tsakisa wa le ka TV kumbe ntlango wo karhi. Mpimo wa ku tlangela minhlangano lowu kombisiwaka eka swiyimo leswi swi le rivaleni leswaku a wu ringani ni ku navela loku humaka embilwini loku phofuriweke hi vana va Kore lava nge te: “Moya wa mina wu hisekela ni ku nav̌ela rikupakupa ra yindlu ya Yehova.”—Ps. 84:2.
3 Hambi leswi ku nga ni ndzalo ya swakudya swa moya leswi phameriwaka eminhlanganweni, van’wana lava nga kona swa va nonon’hwela ku rhiya ndleve. Va nga ha tikuma va ri karhi va lorha dyambu ri lo hosi, va ehleketa hi swivilelo swa siku rero hambi ku ri ku khudzehela. Vo tala va kume leswaku ku tsala tinotsi to koma swi va pfuna leswaku va tshama va xalamukile ni ku rhiya ndleve eka leswi vuriwaka. Nakambe ku tsala swilo ehansi swi endla leswaku rungula ri dzika emiehleketweni. Ku engetela kwalaho, ku lunghiselela ka ha ri emahlweni swi pfuna leswaku hi vuyeriwa hi xitalo. Loko hi lunghiselela kahle, hi ta kota “ku yingiserisisa swinene.”—Hev. 2:1.
4 Vana kun’we ni lavakulu va fanele ku kuma swiletelo leswi nyikeriwaka eminhlanganweni. Vana a va nge dyondzi swo tala loko vatswari va va nyika swo tlangisa kumbe tibuku to dirowa swifaniso ku endlela leswaku va tshamiseka ni ku miyela. A swi koteki ku nyika ndzayo leyi faneleke loko vana va pfumeleriwa ku tlanga, ku vulavula, ku rila kumbe ku endla swilo swin’wana leswi nga kavanyetaka lava tshameke ekusuhi. Ku tshamela ku ya exiyindlwanini ni ku ya nwa mati swi nga fanelanga hi nkarhi wa minhlangano, hakanyingi swa hunguteka loko n’wana a tiva leswaku un’wana wa vatswari vakwe u ta hamba a n’wi heleketa.
5 Ku Hlayisa Nkarhi I Swa Nkoka: Minkarhi yin’wana, swiyimo leswi nga papalatekiki swi nga hi sivela ku fika hi nkarhi eminhlanganweni, kambe ku tolovela ku fika endzhaku ka risimu ni xikhongelo xo pfula swi kombisa ku nga xiximi xikongomelo xo kwetsima xa minhlangano ni vutihlamuleri bya hina bya ku papalata ku kavanyeta van’wana. Tsundzukani leswaku ku yimbelela ni ku khongela ni vamakwerhu eminhlanganweni ya vandlha i xiphemu xa vugandzeri bya hina. Ku tshamela ku hlwela hakanyingi swi vangiwa hi ku tsandzeka ku hleleka kumbe ku kunguhata swilo ka ha ri ni nkarhi. Ku hlayisa nkarhi swi kombisa leswaku hi xixima minhlangano ya hina ni ku yi tlangela.
6 Tanihi leswi siku ri yaka ri tshinela, xilaveko xo hlangana ndhawu yin’we xi ya xi kula swinene. (Hev. 10:24, 25) A hi kombiseni ku tlangela ka hina hi ku va kona nkarhi hinkwawo, hi lunghiselela ka ha ri emahlweni, hi fika hi nkarhi, hi rhiya ndleve kutani hi tirhisa leswi hi swi dyondzaka.