Ntila Lowu Faneleke Ku Landzeleriwa Swinene
1 Handle ko kanakana Yesu a a ri nghwazi leyi tshameke yi hanya. U vekele vadyondzisiwa va yena xikombiso lexi hetisekeke. Hambi leswi hi nga ta ka hi nga ku fikeleli ku hetiseka ka yena, hi khutaziwa ku “n’wi landzelela.” (1 Pet. 2:21) Hi fanele ku navela ku fana na Yesu hi laha hi nga kotaka ha kona, hi avela van’wana ntiyiso hi ku hiseka.
2 Yesu a nga ri muchumayeri ntsena; a a ri mudyondzisi la tlakukeke. “Mintshungu a yi hlamele hi ku dyondzisa ka yena.” (Mt. 7:28) Ha yini a humelela swinene? A hi kambisiseni “ku dyondzisa ka yena” hi vukheta.
3 Ndlela Leyi Hi Nga Landzelaka Yesu Ha Yona: Yesu u dyondzisiwe hi Tata wa yena. (Yoh. 8:28) Xikongomelo xakwe a ku ri ku dzunisa Yehovha ni ku kwetsimisa vito ra Yena. (Yoh. 17:4, 26) Eku chumayeleni ni le ku dyondziseni ka hina, na hina hi fanele ku va ni xikongomelo xo dzunisa Yehovha ku nga ri ku endlela ku voniwa.
4 Hinkwaswo leswi Yesu a swi dyondziseke a swi sekeriwe eRitweni ra Xikwembu. U hambete a hlamusela leswi a swi tsariwe eMatsalweni lama huhuteriweke. (Mt. 4:4, 7; 19:4; 22:31) Hi lava ku kongomisa vayingiseri va hina eBibeleni; xisweswo hi va kombisa leswaku leswi hi swi chumayelaka ni ku swi dyondzisa swi sekeriwe eka vulawuri lebyi tlakukeke.
5 Yesu u tirhise marito yo koma, lama fanelaka ni lama olovaka. Hi xikombiso, loko a hlamusela ndlela leyi hi nga kumaka ndzivalelo wa Xikwembu ha yona, u hi khutaze leswaku hi rivalelana. (Mt. 6:14, 15) Hi fanele ku ringeta ku hlamusela rungula ra Mfumo hi marito yo olova ni lamanene.
6 Hi vutshila Yesu u tirhise swifaniso ni swivutiso leswaku a pfuxa mianakanyo ya van’wana. (Mt. 13:34, 35; 22:20-22) Swifaniso leswi vulavulaka hi timhaka leti tolovelekeke, ta siku na siku swi nga pfuna vanhu leswaku va twisisa tidyondzo ta Bibele leti nonon’hwaka. Hi fanele ku vutisa swivutiso leswi khutazaka vayingiseri va hina leswaku va anakanyisisa hi leswi va swi twaka. Swivutiso leswi kongomisaka swi nga va pfuna leswaku va vona mongo wa mhaka.
7 Yesu u tinyike nkarhi a hlamusela timhaka to nonon’hwa eka lava a va kombela rungula leri engetelekeke. Lava a va tsakela hi xiviri, tanihi vadyondzisiwa va yena, va kote ku kuma mongo wa leswi Yesu a swi dyondziseke. (Mt. 13:36) Hi laha ku fanaka hi fanele ku pfuna loko swivutiso swi vutisiwa hi ku tshembeka. Loko hi nga ti tivi tinhlamulo, hi nga lavisisa mhaka kutani hi vuya ni rungula endzhaku.
8 Yesu a a dyondzisa hi tindlela leti kongomeke. Xikombiso xa mhaka leyi a ku ri ku hlantswa milenge ya vadyondzisiwa va yena, hambi leswi a ri N’wini wa vona. (Yoh. 13:2-16) Loko hi kombisa moya wa ku titsongahata, lava dyondzisiwaka va ta susumeteleka ku tirhisa leswi va swi dyondzaka.
9 Yesu u khumbe timbilu ta vanhu ni rirhandzu ra vona ra leswo lulama. Na hina hi lava ku fikelela timbilu. Hi ringeta ku fikelela ku navela ka ntumbuluko ka vanhu hinkwavo ko gandzela munhu la tlakukeke ni ku hanyisana ni van’wana hi ku rhula ni ntsako.
10 Hi December hi nga avela van’wana swilo leswi hi swi dyondzeke malunghana na Yesu hi ku fambisa buku leyi nge Nghwazi Leyi Tshameke Yi Hanya. Ku tekelela ka hina tindlela ta Yesu to dyondzisa ku nga susumeta vanhu lavanene leswaku va yingisela loko hi hlamusela leswi a swi dyondziseke.—Mt. 10:40.