Bokisi Ra Swivutiso

◼ Xana varindzi va nga va pfuna njhani vatswari leswaku va pfuna vana va vona va tikhoma kahle loko va ri eminhlanganweni?

Vana hi ntumbuluko va ni migingiriko, a va swi tolovelanga ku tshama nkarhi wo leha. Endzhaku ka nhlangano, vana va ni matimba lama nga ha va endlaka leswaku va tsutsumisana ni ku hlongorisana eHolweni ya Mfumo kumbe endhawini yihi na yihi leyi ku hlanganyeriwaka eka yona, endhawini yo yimisa mimovha, kumbe endleleni leyi nga etlhelo ka gondzo. Hambiswiritano, xi vurisile xivuriso lexi nge: ‘N’wana la tshikiweke a ntshunxekile u ta khomisa mutswari wa yena tingana.’—Swiv. 29:15.

Lexi vavisaka, vamakwerhu van’wana lava dyuhaleke, va vaviseke ngopfu, hikwalaho ko tlumbiwa hi vana, va va wisa. Leswi swi vangele ku xaniseka loku nga fanelangiki swin’we ni ku humesiwa ka timali loku nga fanelangiki, eka vatswari swin’we ni vandlha. Leswaku ku sirheleriwa vana hi voxe ni vanhu van’wana, vana a va fanelanga va pfumeleriwa ku tsutsuma-tsutsuma ni ku tlangela endzeni kumbe ehandle ka Holo ya Mfumo.

Vatswari va ni vutihlamuleri bya Matsalwa byo letela vana va vona leswaku va xixima tindhawu ta hina ta vugandzeri hi ndlela leyi faneleke. (Ekl. 5:1a) Eminhlanganweni ya hina ya Vukreste, etinhlengeletanweni ni le mintsombanweni, varindzi va averiwe ku vona leswaku “swilo hinkwaswo [swi endliwa] hi ku tenga” ni leswaku ku va ni ‘nhleleko lowunene.’ (1 Kor. 14:40; Kol. 2:5) Va fanele va tshama va xalamukile loko nongonoko wu nga si sungula, loko wu ya emahlweni ni loko se wu herile, endzeni ni le handle ka laha ku hlanganyeriwaka kona. Loko n’wana a tsutsuma-tsutsuma kumbe a nga lawuleki, murindzi a nga ha yimisa n’wana hi ku rhula naswona a nga ha hlamusela n’wana xivangelo xa ku va swiendlo swoleswo swi nga amukeleki. Hi ndlela ya musa, mutswari wa n’wana na yena u fanele a byeriwa malunghana ni xikarhato lexi, na hi xilaveko xa leswaku a langutela n’wana wa yena. Mutswari u fanele a angula hi ndlela leyi faneleke.

Swa endleka leswaku minkarhi yin’wana, tincece ni tindzumulo ti rila kumbe ti kavanyeta hi nkarhi wa minhlangano. Varindzi, lava fikaka ka ha sele timinete ta 20 leswaku nongonoko wu sungula, va nga ha siva tindhawu ta le ndzhaku eholweni, va ti siyela vatswari lava nga rhandzaka ku tshama kwalaho ni vana va vona lavatsongo. Hinkwerhu hi fanele hi tirhisana na vona, hi ku ka hi nga tshami eka switshamo leswi vekeriweke vona.

Loko n’wana a kavanyeta, mutswari u fanele a endla xo karhi. Loko mutswari a nga endli nchumu naswona n’wana a kavanyeta swinene, hi tintswalo, murindzi u fanele a kombela mutswari leswaku a humela ehandle ni n’wana loyi. Loko hi rhamba vanhu lavantshwa lava nga ni vana lavatsongo leswaku va ta eminhlanganweni ya hina, hi fanele hi tshama na vona naswona hi va pfuna hi vana va vona loko va rila kumbe loko va kavanyeta hi tindlela tin’wana.

Swa hi tsakisa loko hi vona vana va malembe hinkwawo eHolweni ya Mfumo ni ku xiya ku tikhoma ka vona lokunene endyangwini wa Xikwembu. (1 Tim. 3:15) Hi ku xixima ka vona lunghiselelo ra Yehovha ro gandzela, va tisa ku dzuneka eka yena naswona vanhu hinkwavo evandlheni va tinyungubyisa ha vona.