Ku Kuma Ntsako eNtirhweni Wa Wena Wo Kwetsima

¹ Va vuye va “tsakile.” Rungula ra Bibele ri hlamusela ndlela leyi vadyondzisiwa va 70 va titweke ha yona loko va vuyise xiviko eka Yesu endzhaku ka loko va chumayele endhawini yin’wana leyikulu. Va enerisekile hikwalaho ko endla ku rhandza ka Xikwembu. (Luka 10:17) I yini lexi nga ku pfunaka leswaku na wena u eneriseka ku fana na vona entirhweni wo kwetsima?

² Langutelo Lerinene: U ni lunghelo leri u ri nyikiweke hi Xikwembu ro tivisa vanhu xikongomelo lexikulu xa Yehovha. Hi ku chumayela ka wena, u nga ha pfuna munhu hi ku n’wi ntshunxa eka mikhuva ya misava leyi ya manyala ni le ka timpecana ta vukhongeri bya mavunwa. U nga nyika vanhu ntshembo wa ku hanya emisaveni leyi nga riki na mpfilumpfilu lowu nga kona namuntlha. Anakanya hi ntsako lowu Yehovha a vaka na wona loko u byala timbewu ta ntiyiso leti milaka embilwini leyi yingisaka. Tiyiseka loko u khongelela moya wa Xikwembu leswaku wu humesa mbhandzu wa ntsako eka wena loko u ri karhi u ya emahlweni ni vutirheli hi mbilu ya wena hinkwayo.

³ Ndzetelo Lowu Tirhaka: Nongonoko wo letela lowu Yesu a wu endleleke vadyondzisiwa va yena va 70 wu fanisiwa ni Nhlangano wa Ntirho wa manguva lawa. U va letele leswaku va ta hetisisa vutirheli bya vona hi ndlela leyi humelelaka. (Luka 10:1-16) Namuntlha, Nhlangano wa Ntirho wu ku letela hi tindlela leti u nga burisanaka ha tona ni vanhu, tindlela leti u nga sungulaka mabulo ha tona ni tindlela leti u nga sungulaka u tlhela u fambisa tidyondzo ta le kaya ta Bibele ha tona. Hi ku tinyiketela ni ku antswisa vutshila bya wena byo chumayela, u ta kuma leswaku ku nonon’hweriwa kumbe ku titwa u nga faneleki loku u nga ha vaka u ve na kona ku ta hela naswona ku ta siviwa hi ku va ni xivindzi ni ntsako.

⁴ Yisa Nyingiso Eka Vumundzuku: Yesu u kume ntsako eka ntirho wa yena wo kwetsima ku nga khathariseki ku xanisiwa loku a ku tiyiseleke. Ha yini? Hikuva u yise nyingiso wa yena swinene eka mikateko ni malunghelo lawa a a ma languterile. (Hev. 12:2) U nga endla leswi fanaka hi ku dzikisa mianakanyo ni mbilu ya wena eka vito ra Yehovha ni le ka mikateko leyi nga ta ta emisaveni leyintshwa ya Xikwembu. Hi ndlela leyi u ta kuma ntsako lowu engetelekeke u tlhela u va ni xikongomelo evutirhelini bya wena.

⁵ Ku endlela Yehovha ntirho wo kwetsima i lunghelo lerikulu ngopfu leri u nga vaka na rona namuntlha. Hikwalaho, onge u nga ku: “Oho Xikwembu xanga, ndzi tsakisiwe hi ku endla ku rhandza ka wena.”—Ps. 40:8.