Tirhela Yehovha Hi Mbilu Leyi Tsakeke

“Makhombo lawa ma ta ta henhla ka wena . . . hikuv̌a a ku tirelanga Yehova, Šikwembu ša wena, hi ku ṭaka, ni mbilu hikwayo.”—DETERONOMA 28:45-47.

1. Hi byihi vumbhoni lebyi kombisaka leswaku lava tirhelaka Yehovha va ni ntsako, ku nga khathariseki leswaku va tirha kwihi?

MALANDZA ya Yehovha ma ni ntsako, ku nga khathariseki leswaku ku rhandza ka yena ma ku endla etilweni kumbe emisaveni. “Tinyeleti ta v̌uša” ta tintsumi ti be huwa ya ntsako loko ku vumbiwa misava, naswona a swi kanakanisi leswaku mintshungu ya tintsumi ta le tilweni yi ‘hetisisa rito ra Xikwembu’ hi ntsako. (Yobo 38:4-7; Pisalema 103:20) N’wana wa Yehovha, Yesu Kreste la tswariweke a ri swakwe a a ri ‘mutirhi lonkulu’ la tsakeke etilweni naswona u tsakele ku endla ku rhandza ka Xikwembu loko a ri munhu wa nyama emisaveni. Tlhandla-kambirhi, “a nga chavang[a] ku byarha [mhandzi ya nxaniso, NW], a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena; kutani sweswi ú tshamile evokweni ra xinene ra xiluvelo xa Xikwembu.”—Swivuriso 8:30, 31; Vaheveru 10:5-10; 12:2.

2. I yini lexi a xi ta kombisa loko Vaisrayele va ta kuma mikateko kumbe makhombo?

² Vaisrayele a va tsaka loko va endla leswi tsakisaka Xikwembu. Kambe ku vuriwa yini loko va nga xi yingisi? Va tsundzuxiwile: “[Makhombo ma] ta v̌a ŝikombiso ni masingita henhla ka wena ni v̌atukulu v̌a wena hi masiku ni masiku. Hikuv̌a a ku tirelanga Yehova, Šikwembu ša wena, hi ku ṭaka, ni mbilu hikwayo ya wena, hikwalaho ka nḍalo ya ŝilo hikwaŝo, u ta tirela v̌alala v̌a wena lav̌a Yehova a nga ta v̌a rumela ka wena, u ri ni ndlala ni tora, ni v̌uŝeti, ni ku pfumala hikwaŝo; o ta ku v̌ekela džoko ra nsimbi e naṅwini, u ko u herisiwa hi yena.” (Deteronoma 28:45-48) Mikateko ni makhombo swi kombise lava a va ri malandza ya Yehovha ni lava a va nga ri wona. Makhombo yo tano ma tlhele ma tiyisa leswaku misinya ya milawu ya Xikwembu ni swikongomelo swa xona a swi deleriwi, ni leswaku a swi soriwi. Hikwalaho ka leswi Vaisrayele va aleke ku yingisa switsundzuxo swa Yehovha swa ku lovisiwa ni ku yisiwa evukhumbini, Yerusalema ri ve “šilo le’šo rukaniwa hi matiko hikwawo ya misav̌a.” (Yeremiya 26:6) Kutani hina a hi yingiseni Xikwembu ivi hi amukeriwa hi xona. Ntsako i wun’wana wa mikateko ya Xikwembu leyi kumiwaka hi lava xi chavaka.

Ndlela Yo Tirha Hi ‘Mbilu Leyi Tsakeke’

3. Mbilu yo fanekisela i yini?

³ Vaisrayele a va fanele ku tirhela Yehovha “hi ku ṭaka, ni mbilu hikwayo.” Malandza ya Xikwembu ya manguva lawa na wona ma fanele ku endla tano. Ku khana i “ku tsaka; ku tala ntsako.” Hambi leswi eMatsalweni ku boxiwaka mbilu ya xiviri, a yi ehleketi kumbe ku anakanya hi ku kongoma. (Eksoda 28:30) Ntirho wa yona lowukulu i ku fambisa ngati leyi tiyisaka tisele ta miri. Hambi swi ri tano, hakanyingi Bibele yi vulavula hi mbilu yo fanekisela, leyi nga xisekelo xa moya wa rirhandzu, nsusumeto ni vutlharhi ni swin’wana. Ku vuriwa leswaku yi yimela “xiphemu xa le xikarhi, vundzeni naswona yi yimela munhu wa le ndzeni hi laha a tikombisaka ha kona hi mintirho yo hambana-hambana, eku naveleni ka yena, moya wa rirhandzu, mintlhaveko, nyanyuko, swikongomelo, miehleketo yakwe, matwisiselo, mianakanyo, vutlharhi bya yena, vutivi, vuswikoti, leswi a swi pfumelaka ni ndlela leyi a anakanyaka ha yona, ku tsundzuka ka yena ni vuxiyaxiya byakwe.” (Journal of the Society of Biblical Literature and Exegesis, 1882, tluka 67) Mbilu ya hina yo fanekisela yi katsa mintlhaveko ya hina, kun’we ni ntsako.—Yohane 16:22.

4. I yini lexi nga hi pfunaka ku tirhela Yehovha Xikwembu hi mbilu leyi tsakeke?

⁴ I yini lexi nga hi pfunaka ku tirhela Yehovha hi mbilu leyi tsakeke? Langutelo lerinene ni ra ku tlangela mikateko ya hina swin’we ni malunghelo lama humaka eka Xikwembu ra pfuna. Hi xikombiso, hi nga anakanya hi ntsako hi lunghelo ra hina ra ku ‘tirha ntirho wo kwetsima’ eka Xikwembu xa ntiyiso. (Luka 1:74) Ku ni lunghelo leri yelanaka ni leri ra ku vitaniwa hi vito ra Yehovha tanihi Timbhoni takwe. (Esaya 43:10-12) Eka leswi hi nga engetela ntsako wa ku tiva leswaku loko hi landzela Rito ra Xikwembu ha xi tsakisa. Naswona hi kuma ntsako lowukulu swinene loko hi vangamisa ku vonakala ka moya, xisweswo hi pfuna vo tala leswaku va huma emunyameni!—Matewu 5:14-16; ringanisa 1 Petro 2:9.

5. Hi xihi xihlovo xa ntsako lowu humaka eka Xikwembu?

⁵ Kambe, ku tirhela Yehovha hi mbilu leyi tsakeke a swi lavi mianakanyo leyinene ntsena. I swinene leswaku hi va ni mavonelo lamanene. Kambe ntsako wa Xikwembu a hi wu kumi hikwalaho ko vumba mahanyelo. I mbhandzu wa moya wa Yehovha. (Vagalatiya 5:22, 23) Loko hi nga ri na wona ntsako wo tano, hi nga ha boheka ku endla mindzulamiso leswaku hi papalata ku anakanya kumbe ku endla swilo hi ndlela leyi nga riki ya Matsalwa, leyi yi nga khomisaka moya wa Xikwembu tingana. (Vaefesa 4:30) Hambi swi ri tano, tanihi vanhu lava tinyiketeleke eka Yehovha hi nga tshuki hi hela mongo hi ku ehleketa leswaku loko hi pfa hi pfumala ntsako lowu humaka embilwini swi kombisa leswaku a hi amukeleki eka Xikwembu. A hi hetisekanga naswona minkarhi yin’wana hi langutana ni nhlomulo, ku tsana ni gome, kambe Yehovha wa hi twisisa. (Pisalema 103:10-14) Hikwalaho a hi khongeleleni moya wa yena lowo kwetsima, hi tsundzuka leswaku mbhandzu wa wona wa ntsako wu huma eka Xikwembu. Tata wa hina wa le tilweni wa rirhandzu u ta swi hlamula swikhongelo swo tano naswona u ta hi pfuna leswaku hi n’wi tirhela hi mbilu leyi tsakeke.—Luka 11:13.

Loko Ntsako Wu Pfumaleka

6. Loko hi pfumala ntsako entirhweni wa Xikwembu, hi fanele ku endla yini?

⁶ Loko ntsako wu pfumaleka entirhweni wa hina, hi nga hetelela hi hele matimba entirhweni wa Yehovha kumbe hi nga ha tshembeki eka yena. Hikwalaho, swi nga va swinene leswaku hi ku titsongahata ni hi vuenti hi anakanyisisa hi minsusumeto ya hina ni ku endla mindzulamiso leyi faneleke. Leswaku hi kuma ntsako lowu humaka eka Xikwembu, hi fanele hi tirhela Yehovha hi rirhandzu ni hi mbilu ya hina hinkwayo, moya-xiviri hinkwawo ni ku anakanya hinkwako. (Matewu 22:37) A hi fanelanga hi tirha hi moya wa mphikizano, hikuva Pawulo u tsale a ku: “Leswi Moya wu hi nyikeke vutomi, a hi hanyeni hi ku letela ka wona. Hi nga tshuki hi titiva ngopfu; a hi chaveni ku pfukana ni ku vondzokana.” (Vagalatiya 5:25, 26) A hi nge wu kumi ntsako loko hi tirha hi ku lava ku tlula van’wana kumbe hi lava ku tlakusiwa.

7. Xana hi nga wu pfurhetela njhani ntsako wa mbilu ya hina?

⁷ Hi nga kuma ntsako loko hi hetisisa ku tinyiketela ka hina eka Yehovha. Loko ha ha ku tinyiketela eka Xikwembu, hi sungule ndlela ya Vukreste ya vutomi hi ku hiseka. A hi dyondza Matsalwa naswona a hi va kona nkarhi hinkwawo eminhlanganweni. (Vaheveru 10:24, 25) Hi kume ntsako loko hi hlanganyela evutirhelini. Kambe, ku vuriwa yini loko ntsako wa hina wu hungutekile? Dyondzo ya Bibele, ku va kona eminhlanganweni, ku hlanganyela evutirhelini—ina, ku katseka hi xitalo eka xiphemu xin’wana ni xin’wana xa Vukreste—swi ta hi nyika matimba ya moya evuton’wini ni ku pfurhetela rirhandzu leri a hi ri na rona eku sunguleni ni ku pfuxa mbilu ya khale leyi tsakeke. (Nhlavutelo 2:4) Kutani a hi nge fani ni lava va nga riki na ntsako ni lava hakanyingi va lavaka mpfuno wa moya. Vakulu va swi tsakela ku pfuna, kambe hi fanele hina vini hi hetisisa ndzhwalo wa hina eka Xikwembu. Ku hava un’wana loyi a nga hi endlelaka leswi. Hikwalaho a hi swi endleni pakani ya hina ku landzela ntila lowu faneleke wa Vukreste leswaku hi hetisisa ku tinyiketela ka hina eka Yehovha ni ku kuma ntsako wa ntiyiso.

8. Ha yini swi ri swa nkoka ku va ni ripfalo leri baseke leswaku hi va ni ntsako?

⁸ Leswaku hi kota ku va ni ntsako lowu wu nga mbhandzu wa moya wa Xikwembu, hi fanele hi va ni ripfalo leri baseke. Hosi Davhida wa le Israyele u tshame a ri ni nhlomulo loko a tumbeta xidyoho xakwe. Kahle-kahle, ndzhongo wakwe wa vutomi a wu tikomba wu oma, naswona swi nga ha endleka a a vabya enyameni. U ve ni ntshunxeko lowukulu swinene loko a kombise ku hundzuka, a tisola! (Pisalema 32:1-5) A hi nge vi na wona ntsako loko hi tumbeta xidyoho xo karhi lexikulu. Sweswo swi nga vanga leswaku hi tshama hi karhatekile. Kunene, yoleyo a hi yona ndlela yo kuma ntsako. Kambe ku tiphofula ni ku hundzuka swi tisa ntshunxeko ni ku vuyisa moya wa ntsako.—Swivuriso 28:13.

Ku Rindza Hi Ntsako

9, 10. (a) Hi xihi xitshembiso lexi Abrahama a xi amukeleke, kambe ripfumelo ni ntsako wa yena swi nga ha va swi ringiwe njhani? (b) Hi nga pfuneka njhani eka swikombiso leswinene swa Abrahama, Isaka na Yakobo?

⁹ Swi olova ngopfu ku va ni ntsako loko u sungula ku dyondza hi swikongomelo swa Xikwembu, kambe swa tika ku tshama u tsakile loko malembe ma ri karhi ma famba. Leswi swi nga kombisiwa hi mhaka ya Abrahama wo tshembeka. Endzhaku ka loko a ringete ku nyikela n’wana wakwe Isaka hi ku lerisiwa hi Xikwembu, ntsumi yi vule leswi: “Nḍi hlambanyile ha mina, ku v̌ula Yehova, nḍi ri: Leŝi u endliseke ŝeŝo, u nga nḍi alelanga ṅwana wa wena, loyi a nga ŝakwe, nḍi ta ku katekisa kunene, nḍi anḍisa v̌atukulu v̌a wena ngopfu-ngopfu, v̌a ta kotisa tinyeleti ta le tilweni, ni sav̌a ra le ribuweni ra lwandle, kambe rišaka ra wena ri ta fuma nyangwa ya v̌alala v̌a rona. Kutani matiko hikwawo ya misav̌a ma ta tinkhensa ha [mbewu ya, NW] wena, hikuv̌a u yingisile rito ra mina.” (Genesa 22:15-18) A swi kanakanisi leswaku Abrahama a tsakile swinene hi xitshembiso lexi.

¹⁰ Swi nga endleka leswaku Abrahama a langutele leswaku Isaka u ta va “mbewu” leyi mikateko leyi tshembisiweke a yi ta ta ha yena. Kambe loko malembe ma ri karhi ma famba ku nga endleki nchumu xo hlamarisa hi Isaka, swi nga ha va swi ringe ripfumelo ni ntsako wa Abrahama swin’we ni ndyangu wakwe. Xitiyisekiso xa Xikwembu xa xitshembiso xa Isaka ni le ka n’wana wakwe Yakobo endzhaku ka nkarhi swi va tiyisekise leswaku ku ta ka Mbewu a ka ha ta endleka, kutani leswi swi va pfune leswaku va hlayisa ripfumelo ni ntsako wa vona. Hambi swi ri tano, Abrahama, Isaka na Yakobo va fe va nga si vona ku hetiseka ka switshembiso swa Xikwembu eka vona, kambe a va nga ri malandza ya Yehovha lama pfumalaka ntsako. (Vaheveru 11:13) Na hina hi nga hambeta hi tirhela Yehovha hi ripfumelo ni ntsako loko hi rindzele ku hetiseka ka switshembiso swa yena.

Ku Va Ni Ntsako Ku Nga Khathariseki Nxaniso

11. Ha yini hi fanele hi va ni ntsako hambi hi xanisiwa?

¹¹ Tanihi malandza ya Yehovha, hi nga tirhela Yehovha hi mbilu leyi tsakeke, hambi loko hi xaniseka. Yesu u vule leswaku va tsaka lava xanisiwaka hikwalaho ka vito ra yena, kasi muapostola Petro u te: “Tsakani hileswi mi averiwaka ku vaviseka ka Kriste, leswaku siku a humelelaka eku kwetsimeni ka yena, na n’wina mi ta tsaka mi tsakisisa. Loko mi soriwa hikwalaho ka vito ra Kriste, mi katekile, hikuva Moya lowu kwetsimaka, lowu nga wa Xikwembu, wu le ka n’wina.” (1 Petro 4:13, 14; Matewu 5:11, 12) Loko u langutane ni nxaniso naswona u xanisiwa hikwalaho ka ku lulama, moya wa Yehovha ni ku amukeriwa hi yena swi na wena, kutani sweswo swi engetela ntsako hakunene.

12. (a) Ha yini hi nga kotaka ku langutana ni miringo ya ripfumelo hi ntsako? (b) Hi yihi dyondzo ya xisekelo leyi yi nga dyondziwaka emhakeni ya Mulevhi loyi a ri evuhlongeni?

¹² Hi nga langutana ni miringo ya ripfumelo hi ntsako hikuva Xikwembu i Vuchavelo bya hina. Leswi swi vekiwa erivaleni eka Tipisalema 42 na 43. Hi xivangelo xo karhi, Mulevhi un’wana a ri evuhlongeni. A navela swinene ku gandzela exikwetsimisweni xa Xikwembu lerova a titwa ku fana ni mhunti kumbe ntswele ya mhunti leyi nga ni tora, leyi lavaka mati endhawini leyi omeke, ya kwandzasi. A ri ni “tora,” kumbe a navela, Yehovha ni lunghelo ra ku gandzela Xikwembu exikwetsimisweni xa xona. (Pisalema 42:1, 2) Ntokoto lowu wa hlonga leri wu fanele wu hi susumetela ku kombisa ku nkhensa vunakulorhi lebyi hi nga na byona ni vanhu va Yehovha. Loko xiyimo xo tanihi ku pfaleriwa hikwalaho ka nxaniso xi hi endla hi nga swi koti ku va na vona nkarhi wo karhi, a hi anakanyeni hi ntsako wa nkarhi lowu hundzeke entirhweni wo kwetsima naswona hi khongela leswaku hi tiyisela, hi ri karhi hi “ṭhemba Šikwembu” leswaku xi hi tlherisela entirhweni wa nkarhi na nkarhi swin’we ni vagandzeri va xona.—Pisalema 42:4, 5, 11; 43:3-5.

“Tirelani Yehova Hi Ku Ṭaka”

13. Pisalema 100:1, 2 yi swi kombisa njhani leswaku ntsako wu fanele wu va mhaka leyikulu loko hi tirhela Xikwembu?

¹³ Ntsako wu fanele wu va mhaka ya nkoka entirhweni wa hina wa Xikwembu. Leswi swi kombisiwe hi risimu ro nkhensa laha mupisalema a yimbeleleke a ku: “Huwelelani ka Yehova hi ku ṭaka, ṅwina hikwenu v̌aaki v̌a misav̌a! Tirelani Yehova hi ku ṭaka, mi ta e mahlweni ka yena hi ku ṭaka lo’kukulu!” (Pisalema 100:1, 2) Yehovha i ‘Xikwembu lexi tsakeke’ naswona xi lava leswaku malandza ya xona ma kuma ntsako eku hetisiseni ka ku tinyiketela ka wona eka xona. (1 Timotiya 1:11) Vanhu va matiko hinkwawo va fanele va tsakela Yehovha, naswona marito ya hina yo dzunisa ma fanele ma tiya, ku fana ni ‘huwa ya ku hlula’ ya vuthu leri hlulaka. Tanihi leswi ku tirhela Xikwembu ku phyuphyisaka, ku fanele ku fambisana ni ntsako. Hikwalaho, mupisalema u khutaze vanhu leswaku va ta eka Xikwembu “hi ku ṭaka lo’kukulu.”

14, 15. Pisalema 100:3-5 yi tirha njhani eka vanhu va Yehovha lava tsakeke namuntlha?

¹⁴ Mupisalema u engeterile a ku: “Mi pfumela [lemuka, tiva] leŝaku yena Yehova i Šikwembu! Hi yena l’a nga hi endla, a hi hina; hi tiko ra yena, ni ntlhambi lowu a wu risaka.” (Pisalema 100:3) Tanihi leswi Yehovha a nga Muvumbi wa hina, i n’wini wa hina ku fana ni murisi wa tinyimpfu. Xikwembu xi hi hlayisa kahle lerova hi xi dzunisa hi moya wo nkhensa. (Pisalema 23) Malunghana na Yehovha, mupisalema u tlhele a yimbelela a ku: “Nghenani tinyangweni ta yena hi minkhenso, ne makupakupeni ya yena hi tinsimu; ṅwi ḍuniseni, mi v̌onga v̌ito ra yena! Hikuv̌a o ni tintŝalo, v̌unene bya yena [i] bya masiku, ni ku ṭhembeka ka yena e tinšakeni ta tinšaka.”—Pisalema 100:4, 5.

¹⁵ Namuntlha, vanhu lava tsakeke va matiko hinkwawo va nghena eswivaveni swa xikwetsimiso xa Yehovha leswaku va n’wi nkhensa ni ku n’wi dzunisa. Hi dzunisa vito ra Xikwembu hi ntsako hi ku hamba hi vulavula kahle hi Yehovha, naswona timfanelo ta yena letikulu ti hi susumetela leswaku hi n’wi dzunisa. U lulamile hi ku helela, naswona musa wakwe wa rirhandzu kumbe ntwela-vusiwana eka malandza ya yena swa tshembeka nkarhi hinkwawo, hikuva swi tshama swi ri kona hi masiku. “E tinšakeni ta tinšaka,” Yehovha u kombisa rirhandzu hi ku tshembeka eka lava endlaka ku rhandza ka yena. (Varhoma 8:38, 39) Kutani, entiyisweni hi ni xivangelo lexinene xo ‘tirhela Yehovha hi ku tsaka.’

Tsaka Eku Languteleni Ka Wena

16. Xana Vakreste va nga kuma ntsako eka mintshembo ni ku langutela kwihi?

¹⁶ Pawulo u tsarile: “Tsakani eku languteleni.” (Varhoma 12:12) Valandzeri va Yesu Kreste lava totiweke va tsaka hi ntshembo lowu vangamaka wa ku hanya etilweni handle ka ku fa, lowu Xikwembu xi va nyikeke wona hi N’wana wa xona. (Varhoma 8:16, 17; Vafilipiya 3:20, 21) Vakreste lava nga ni ntshembo wa vutomi lebyi nga heriki eParadeyisini emisaveni na vona va ni xisekelo xo tsaka. (Luka 23:43) Malandza hinkwawo yo tshembeka ya Yehovha ma ni xivangelo xa ku tsaka hi ntshembo wa Mfumo, hikuva ma ta va xiphemu xa hulumendhe yoleyo ya le tilweni kumbe ma hanya ehansi ka yona emisaveni. Mawaku nkateko lowu tsakisaka swonghasi!—Matewu 6:9, 10; Varhoma 8:18-21.

17, 18. (a) I yini leswi vhumbhiweke eka Esaya 25:6-8? (b) Xana vuprofeta lebyi bya Esaya byi hetiseka njhani sweswi, naswona ku vuriwa yini hi ku hetiseka ka byona ka nkarhi lowu taka?

¹⁷ Esaya na yena u vhumbhe vumundzuku lebyi tsakisaka bya vanhu lava yingisaka. U tsarile: “Yehova wa tinyimpi o ta lungisela matiko hikwawo e nṭhav̌eni leyi, e ŝakudya ŝa tinyama le’ti noneke, ni ŝakunwa ŝa tivinyo le’ti tengeke, le’ti kumiwaka henhla ka šisese; ti ri tinyama le’ti noneke, le’ti teleke, ni mafura, ni tivinyo ta khale le’ti tengisiweke. E nṭhav̌eni leyi, o ta hanḍula turu le’yi sireleke matiko hikwawo, ni nkumba lo’wu funengetaka matiko hikwawo. O ta lov̌isa rifu hi laha ku nga heriki: Hosi, Yehova o ta hlangula mihloti e mimombyeni hikwayo; o ta sula tingana ta tiko ra yena hikwaro, hikuv̌a Yehova o v̌urisile.”—Esaya 25:6-8.

¹⁸ Nkhuvo wa moya lowu hi nga eka wona namuntlha tanihi vagandzeri va Yehovha i ndzalo leyi tsakisaka hakunene. Entiyisweni, hi khapa hi ntsako loko hi tirhela Xikwembu hi ku hiseka hi ri karhi hi langutele ndzalo ya swilo leswinene swa xiviri leswi xi swi tshembiseke, swa misava leyintshwa. (2 Petro 3:13) Hi gandzelo ra Yesu, Yehovha u ta susa “nkumba” lowu funengetaka vanhu hikwalaho ka xidyoho xa Adamu. Swi ta tisa ntsako lowukulu hakunene ku vona xidyoho ni rifu swi susiwa! Swi ta tisa ntsako lowukulu swinene ku amukela varhandziwa lava pfuxiweke, ku vona mihloti yi nga ha ri kona, ni ku hanya emisaveni ya paradeyisi, laha vanhu va Yehovha va nga taka va nga sandziwi kambe laha va nga ta nyika Xikwembu marito yo hlamula muhehli lonkulu, Sathana Diyavulosi!—Swivuriso 27:11.

19. Hi fanele hi ku teka njhani ku langutela loku Yehovha a ku vekeke emahlweni ka hina tanihi Timbhoni takwe?

¹⁹ Xana a wu tali hi ntsako ni ku nkhensa hikwalaho ko tiva leswi Yehovha a nga ta swi endlela malandza yakwe? Hakunene, ku langutela ko tano lokukulu ku engetela ntsako wa hina! Ku tlula kwalaho, ntshembo wa hina lowu katekisiweke wu hi endla hi languta Xikwembu xa hina lexi tsakeke, xa rirhandzu ni lexi hananaka, hi marito yo kota lawa: “V̌onani, hi šona Šikwembu ša hina; hi ṭhembile šona, kutani ši hi ponisile! Hi yena Yehova loyi hi ṅwi ṭhembeke; a hi ṭakisiseni hi ṭakela ku ponisa ka yena!” (Esaya 25:9) Hi ri karhi hi dzikise ntshembo wa hina wo tsakisa emianakanyweni, a hi tikarhateleni ku endla matshalatshala yo tirhela Yehovha hi mbilu leyi tsakeke.

A Wu Ta Hlamurisa Ku Yini?

◻ Xana hi nga n’wi tirhela njhani Yehovha hi ‘mbilu leyi tsakeke’?

◻ Hi nga endla yini loko hi pfumala ntsako entirhweni wa Xikwembu?

◻ Ha yini vanhu va Yehovha va nga vaka ni ntsako hambi va xanisiwa?

◻ Xana hi ni swivangelo swihi swo tsaka eku languteleni ka hina?

[Swifaniso leswi nga eka tluka 17]

Ku hlanganyela emintirhweni hinkwayo ya vutomi bya Vukreste swi ta engetela ntsako wa hina