Ntsako Wa Yehovha I Khokholo Ra Hina
“Siku leri hi le’ri hlawuleriweke hosi ya hina; mi nga hlunami, hikuv̌a ku ṭaka ka Yehova i matimba ya ṅwina.”—NEHEMIYA 8:10.
1, 2. (a) Khokholo i yini? (b) Xana Davhida u swi kombise njhani leswaku u chavela eka Yehovha?
YEHOVHA i khokholo leri nga pimekiki. Kambe xana khokholo i yini? I ndhawu leyi tiyisiweke, ya nsirhelelo ni ku pona. Davhida wa Israyele wa khale a a languta Xikwembu tanihi khokholo ra yena. Hi xikombiso, xiya risimu leri Davhida a ri yimbeleleleke La-nge-henhla-henhla “loko Yehova a ṅwi lwerile mav̌okweni ya v̌alala hikwav̌o v̌a yena, ne mav̌okweni ya Šaul,” hosi ya Israyele.—Pisalema 18, marito yo rhanga, NW.
2 Davhida u sungule risimu rero ro tsakisa hi marito lama nge: “Nḍi ta ku ranḍa ngopfu, wena Yehova, matimba ya mina! Oho Yehova! ribye ra mina, ni khokholo ra mina, ni mulweri wa mina! Oho Šikwembu ša nga! ribye ra mina leri nḍi tšhav̌elaka ka rona! Šitlhangu ša mina, ni matimba la’ma nḍi ponisaka, ni šitšhav̌elo ša mina!” (Pisalema 18:1, 2) Loko a vondzokiwa ni ku hlongorisiwa hi Hosi Sawulo, Davhida wo lulama u chavele eka Yehovha, tanihi loko munhu a tsutsumela endhawini leyi sirhelelekeke leswaku a pona khombo.
3. Ha yini Vayuda va le sikwini ra Ezra va ve ni ‘ntsako lowukulu’?
3 Ntsako lowu Yehovha a wu nyikaka i khokholo leri tiyeke eka lava fambaka endleleni yakwe tanihi vahlayisi va vutshembeki. (Swivuriso 2:6-8; 10:29) Ina, leswaku vanhu va kuma ntsako lowu humaka eka Xikwembu, va fanele va endla ku rhandza ka xona. Emhakeni leyi, anakanya hi leswi endlekeke eYerusalema hi 468 B.C.E. Ezra loyi a ri mutsari ni van’wana va kote ku twisisa hi ku hlaya Nawu va ri ni xikongomelo. Kutani vanhu va khutaziwe hi ndlela leyi: “Fambani mi dya tinyama le’ti noneke, mi nwa le’ŝo nanḍiha, mi rumela la’v̌a nga lungiseriwangiki ntšhumu e ŝakudya, hikuv̌a siku leri hi le’ri hlawuleriweke hosi ya hina; mi nga hlunami, hikuv̌a ku ṭaka ka Yehova i matimba ya ṅwina.” ‘Ku tsaka lokukulu’ a ku va kona loko Vayuda va tirhisa vutivi lebyi va byi kumeke ni ku endla Nkhuvo wa Mintsonga lowu tsakisaka. (Nehemiya 8:1-12) Lava ‘ntsako wa Yehovha a wu ri khokholo ra vona’ a va kuma matimba ya vugandzeri ni ntirho wakwe. Tanihi leswi ntsako wa Yehovha a wu ri khokholo ra vona, hi fanele ku langutela leswaku vanhu va Xikwembu na vona va tsaka namuntlha. Kutani, hi swihi swivangelo swin’wana leswi va nga na swona namuntlha swa ku tsaka?
‘Ku Tsaka Swinene’
4. Hi xihi xihlovo lexi xiyekaka xa ntsako wa vanhu va Yehovha?
4 Xivangelo xin’wana lexi xiyekaka xa ntsako i lunghiselelo leri Yehovha a ri endlaka ra ku hlengeletana. Tinhlengeletano ni mintsombano ya Timbhoni ta Yehovha, yi ti nyika ntsako namuntlha, hi laha Vaisrayele a va tsakisiwa ha kona hi minkhuvo leyi a yi endliwa lembe na lembe. Vanhu va le Israyele va byeriwe leswi: “Hi masiku ya ntlhanu na mambiri, u ta endlela Yehova, Šikwembu ša wena, e nkhuv̌o [wa mitsonga] e šiv̌andleni leši Yehova a nga ta ši hlawula, hikuv̌a Yehova, Šikwembu ša wena, ši ta ku katekisa e ku ṭhov̌eleni hikwaku ka wena, ne mitirweni hikwayo ya mav̌oko ya wena, hi kona u nga ta ṭaka ŝinene.” (Deteronoma 16:13-15) Ina, Xikwembu a xi lava leswaku va “ṭaka ŝinene.” Sweswo swi tano ni le ka Vakreste, hikuva muapostola Pawulo u khutaze vapfumeri-kulobye a ku: “Titsakeleni eHosini masiku hinkwawo; ndzi tlhela ndzi vurisa sweswo, ndzi ri: Titsakeleni!”—Vafilipiya 4:4.
5. (a) Ntsako i yini, naswona Vakreste va nga wu kuma njhani? (b) Xana hi nga wu kuma njhani ntsako ku nga khathariseki miringo?
5 Tanihi leswi Yehovha a lavaka leswaku hi tsaka, ntsako u wu endle wu va yin’wana ya mihandzu ya moya wa yena lowo kwetsima. (Vagalatiya 5:22, 23) Kambe ntsako i yini? I moya wa ku tsaka lowu vangiwaka hi ku langutela leswinene kumbe ku swi kuma. Ntsako i xiyimo xa ku tsaka ni nyanyuko wa ntiyiso. Mbhandzu lowu wa moya wo kwetsima wa Xikwembu wa hi tiyisa emiringweni. “[Yesu] loyi a nga chavangiki ku byarha [mhandzi ya nxaniso, NW], a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena; kutani sweswi ú tshamile evokweni ra xinene exiluvelweni xa Xikwembu.” (Vaheveru 12:2) Mudyondzisiwa Yakobo u tsarile: “Yi tekeni yi ri mhaka ya ku tsakisa swinene, vamakwerhu, loko mi hlangana ni miringo ya tinxaka-xaka, hikuva ma swi tiva leswaku loko ku pfumela ka n’wina ku tiya eku ringiweni, swi humesa ku tiyisela.” Kambe ku vuriwa yini loko hi nga swi tivi leswaku hi nga ku yini hi ndzingo wo karhi? Kutani hi xivindzi hi nga khongelela ku kuma vutlharhi byo langutana na wona. Ku endla hi ku pfumelelana ni vutlharhi bya le tilweni swi hi pfuna ku tlhantlha swiphiqo kumbe ku langutana ni miringo leyi tshamaka yi ri kona, handle ko lahlekeriwa hi ntsako wa Yehovha.—Yakobo 1:2-8.
6. Hi byihi vuxaka lebyi nga kona exikarhi ka ntsako ni vugandzeri bya ntiyiso?
6 Ntsako lowu Yehovha a hi nyikaka wona wu hi tiyisa leswaku hi yisa emahlweni vugandzeri bya ntiyiso. Sweswo hi swona leswi endlekeke emasikwini ya Nehemiya na Ezra. Vayuda va nkarhi wolowo lava ntsako wa Yehovha a wu ri khokholo ra vona va nyikiwe matimba ya ku yisa emahlweni swilaveko swa vugandzeri bya ntiyiso. Naswona loko va ya emahlweni va seketela vugandzeri bya Yehovha, ntsako wa vona wu kurile. Sweswo swi tano ni namuntlha. Tanihi vagandzeri va Yehovha, hi ni swivangelo swa ku tsaka swinene. Sweswi a hi kambisiseni swin’wana swa swivangelo swo tala leswi hi nga na swona swa ku tsaka.
Vuxaka Ni Xikwembu Ha Kreste
7. Malunghana na Yehovha, hi xihi xivangelo lexi Vakreste va nga na xona xa ku tsaka?
7 Vuxaka bya hina lebyikulu na Yehovha byi hi endla vanhu lava tsakeke swinene emisaveni. Hi nga si hundzuka Vakreste, a hi ri xiphemu xa vanhu vo biha lava nga ‘emunyameni wa mianakanyo ni lava nga ekule ni vutomi lebyi nga bya Xikwembu.’ (Vaefesa 4:18) Mawaku ntsako lowu hi nga na wona leswi hi nga ha riki kule na Yehovha! Kunene, swi lava matshalatshala leswaku hi tshama hi amukeleka eka yena. Hi fanele “ku tiya eku pfumeleni, [hi] yimile emasungulweni ya kona [hi] nga tsekatseki, [hi] nga hambani ni ku tshemba loku [hi] ku kumeke hi ku twa Evhangeli.” (Vakolosa 1:21-23) Hi nga tsaka leswi Yehovha a hi tshineteke eka N’wana wakwe hi ku pfumelelana ni marito ya Yesu hi yexe, lama nge: “A ku na munhu la nga taka ka mina loko a nga kokeriwi ka mina hi Tatana la ndzi rhumeke.” (Yohane 6:44) Loko hakunene hi tlangela vuxaka bya hina bya risima ni Xikwembu ha Kreste, hi ta tivonela eka xilo xihi na xihi lexi xi nga byi onhaka.
8. Xana Yesu u hoxe xandla eka xiyimo xa hina xa ntsako hi ndlela yihi?
8 Ku rivaleriwa swidyoho hi ku pfumela egandzelweni ra nkutsulo ra Yesu i xivangelo lexikulu xa ku tsaka hikuva hi rona leri endlaka leswaku hi kota ku va ni vuxaka ni Xikwembu. Kokwa wa hina Adamu, hi ku teka ndlela ya vudyoho hi vomu u vange rifu eka vanhu hinkwavo. Hambi swi ri tano, muapostola Pawulo u hlamusele leswaku: “Xikwembu xi kombisa erivaleni rirhandzu ra xona eka hina, hileswi Kriste a nga hi fela loko ha ha ri vadyohi.” Nakambe Pawulo u tsale a ku: “Kukotisa leswi nandzu wun’we wu dlayiseke vanhu hinkwavo leswaku va biwa, na wona ntirho wun’we wo lulama wu endla leswaku vanhu hinkwavo va ntshunxiwa, va kuma vutomi. Naswona, kukotisa leswi lavo tala va hundzuriweke vadyohi hikwalaho ka munhu un’we la nga yingisangiki, hi mukhuva wolowo, hi ku yingisa ka munhu un’we, vanhu lavo tala va ta hundzuriwa va va lava lulameke.” (Varhoma 5:8, 18, 19) Mawaku ndlela leyi hi faneleke hi tsaka ha yona leswi Yehovha Xikwembu a tsakelaka ku kutsula vatukulu va Adamu lava amukelaka lunghiselelo ro tano ra rirhandzu!
Ntshunxeko Ni Ku Voningeriwa Ka Vukhongeri
9. Ha yini hi ri ni ntsako malunghana ni vukhongeri?
9 Ku ntshunxeka eBabilona Lonkulu, mfumo wa misava wa vukhongeri bya mavunwa, i xivangelo xin’wana xa ku tsaka. Hi ntshunxiwe hi ntiyiso wa Xikwembu. (Yohane 8:32) Naswona ku ntshunxeka eka muoswi loyi wa vukhongeri swi vula leswaku a hi hlanganyeli eswidyohweni swa yena, a hi weriwi hi maxangu ya yena, naswona a hi nge lovisiwi na yena. (Nhlavutelo 18:1-8) Swi tsakisa ngopfu ku hambana ni swilo sweswo hinkwaswo!
10. Hi kwihi ku voningeriwa loku hi nga na kona tanihi vanhu va Yehovha?
10 Ku twisisa ni ku tirhisa Rito ra Xikwembu evuton’wini i swivangelo swin’wana swa ntsako lowukulu. Leswi hi ntshunxekeke enkucetelweni wa vukhongeri bya mavunwa, hi kuma vutlharhi byin’wana lebyi engetelekeke lebyi humaka eka Tatana wa le tilweni hi ku tirhisa “nandza la tshembekaka, wo tlhariha.” (Matewu 24:45-47) Eka vanhu hinkwavo lava hanyaka emisaveni, vanhu lava tinyiketeleke eka Yehovha hi vona ntsena lava nga ni moya wakwe lowo kwetsima ni nkateko wa ku twisisa Rito ra yena ni ku rhandza ka yena. Swi fana ni leswi Pawulo a swi vuleke: “Xikwembu xi hi pfuletele swilo leswi [swilo leswi xi swi lunghiseleleke lava xi rhandzaka] hi Moya; hikuva Moya wu lavisisa hinkwaswo, hambi swi ri swihundla leswi enteke swa Xikwembu.” (1 Vakorinto 2:9, 10) Hi nga nkhensa ni ku tsaka leswi hi yaka emahlweni hi kuma ku twisisa loku kombisiweke emaritweni ya Swivuriso 4:18: “Ndlela ya la’v̌o lulama yi kotisa ku v̌onakala, ku hatima ka kona ku engeteleka ku fikela nhlekanhi lo’wukulu.”
Ntshembo Wa Mfumo Ni Vutomi Lebyi Nga Heriki
11. Xana ntshembo lowu tsakisaka wa Mfumo wu twarisiwe njhani eka hina?
11 Ntshembo wa hina wa Mfumo na wona wu hi endla hi tsaka. (Matewu 6:9, 10) Tanihi Timbhoni ta Yehovha, i khale hi huwelela leswaku Mfumo wa Xikwembu hi wona ntshembo lowu tiyeke wa vanhu hinkwavo. Hi xikombiso, tsundzuka lembe ra 1931, loko hi amukela vito leri nge Timbhoni ta Yehovha hi xihlambanyo lexi twarisiweke hi ntsako emintsombanweni ya 51 emisaveni hinkwayo. (Esaya 43:10-12) Xihlambanyo xexo ni nkulumo ya nkoka ya ntsombano leswi nyikeriweke hi J. F. Rutherford (muungameri wa nkarhi wolowo wa Sosayiti ya Watch Tower) swi humesiwe exibukwanini lexi nge The Kingdom, the Hope of the World. Eka xona a ku katsiwe xihlambanyo xin’wana lexi endliweke entsombanweni wolowo, lexi kombisaka vugwinehi bya Vujagana ni ku delela ka byona ndzayo ya Yehovha. Xi tlhele xi vula leswi: “Ntshembo wa misava i mfumo wa Xikwembu, naswona ku hava ntshembo wun’wana.” Eka tin’hweti ti nga ri tingani, Timbhoni ta Yehovha ti hangalase tikopi to tlula ntlhanu wa timiliyoni ta xibukwana lexi etindhawini hinkwato ta misava. Ku sukela nkarhi wolowo, hi tiyisekise ko tala leswaku Mfumo hi wona ntsena ntshembo wa vanhu.
12. Hi kwihi ku langutela loku tsakisaka loku vekiwaka emahlweni ka lava tirhelaka Yehovha?
12 Nakambe, ha tsaka ku langutela vutomi ehansi ka vulawuri bya Mfumo. “Ntlhambinyana” wa Vakreste lava totiweke wu ni ntshembo lowu tsakisaka wa le tilweni. Muapostola Petro u tsarile a ku: “A ku nkhensiwe Xikwembu, Tata wa Hosi ya hina Yesu Kriste! Hi musa wa yena lowukulu ú hi tswarile ra vumbirhi, leswaku hi va ni ku tshemba loku hanyaka, hikwalaho ka ku pfuka ka Yesu Kriste exikarhi ka vafi, ni leswaku hi nyikiwa ndzhaka leyi nga boriki, leyi nga nyamisiwangiki, leyi nga vuniki. Mi vekeriwile yona ematilweni.” (Luka 12:32; 1 Petro 1:3, 4) Namuntlha, vunyingi lebyikulu bya Timbhoni ta Yehovha byi langutele vutomi lebyi nga heriki eParadeyisini ehansi ka Mfumo lowu. (Luka 23:43; Yohane 17:3) Ku hava vanhu van’wana emisaveni lava nga ni swilo leswi va nga swi ringanisaka ni ku langutela ka hina ka ntsako. Hi fanele ku ku tlangela hakunene!
Vumakwerhu Lebyi Katekisiweke
13. Hi fanele hi byi languta njhani vumakwerhu bya hina bya misava hinkwayo?
13 Ku va xiphemu xa vumakwerhu bya misava hinkwayo lebyi amukeriwaka hi Xikwembu na swona i xihlovo xa ntsako lowukulu. Lexi tsakisaka hi leswaku hi ni vanakulorhi lava rhandzekaka swinene emisaveni. Yehovha Xikwembu hi byakwe u vulavule hi nkarhi werhu a ku: “Nḍi ta ṭekaṭekisa ni matiko hikwawo, kutani le’ŝi ranḍekaka ŝa matiko hikwawo ŝi ta ta kwala, nḍi v̌a nḍi tata yindlu leyi hi ku kwetsima, ku v̌ula Yehova wa mav̌andla.” (Hagayi 2:7) Kunene, Vakreste hinkwavo a va hetisekanga. Hambi swi ri tano, Yehovha u tshinete vanhu vo tano eka yena ha Yesu Kreste. (Yohane 14:6) Tanihi leswi Yehovha a titshineteleke vanhu lava va rhandzekaka eka yena, ntsako wa hina wu ta kula loko hi va kombisa rirhandzu ra vumakwerhu, hi va xixima, hi khomisana na vona emintirhweni ya Xikwembu, hi va pfuna emiringweni ya vona ni ku va katsa eswikhongelweni.
14. Hi xihi xikhutazo lexi hi nga xi kumaka eka 1 Petro 5:5-11?
14 Hinkwaswo leswi swi ta hoxa xandla entsakweni wa hina. Hakunene, ntsako wa Yehovha hi wona lowu nga khokholo ra vumakwerhu bya hina bya moya emisaveni hinkwayo. Ina, hinkwerhu hi langutana ni nxaniso ni maxangu man’wana. Kambe leswi swi fanele ku hi hlanganisa ni ku hi nyika vun’we tanihi xiphemu xa nhlengeletano yin’we ya ntiyiso ya Xikwembu emisaveni. Hi laha Petro a vuleke ha kona, hi fanele hi titsongahata ehansi ka voko ra matimba ra Xikwembu, hi rhula ku vilela ka hina hinkwako eka xona hi ri karhi hi tiva leswaku xa hi khathalela. Hi fanele hi tivonela hikuva Diyavulosi u lava ku hi wonga, kambe a hi hina ntsena emhakeni leyi, hikuva Petro wa engetela: “N’wi aleleni, mi tiya eku pfumeleni ka n’wina, hi ku tiva leswaku vamakwenu emisaveni hinkwayo va hlangana ni maxangu yo fana ni lawa [mi] nga na wona.” Naswona vumakwerhu lebyi bya misava hinkwayo lebyi tsakisaka a byi nge pfuki byi herile, hikuva hi ni xitiyisekiso xa leswaku ‘endzhaku ko xaniseka nkarhinyana, Xikwembu xi ta hetisisa ku leteriwa ka hina naswona xi ta hi tiyisa ni ku hi nyika matimba.’ (1 Petro 5:5-11) Anakanya ha swona. Vumakwerhu bya hina lebyi tsakisaka byi ta tshama hi masiku!
Vutomi Lebyi Nga Ni Xikongomelo
15. Ha yini hi nga vulaka leswaku Timbhoni ta Yehovha ti ni vutomi lebyi nga ni xikongomelo?
15 Hi ni ntsako emisaveni leyi leyi nga ni maxangu hikuva hi ni vutomi lebyi nga ni xikongomelo. Hi nyikiwe vutirheli lebyi tsakisaka hina swin’we ni van’wana. (Varhoma 10:10) Hakunene i lunghelo leri tsakisaka ku va vatirhi-kulobye ni Xikwembu. Emhakeni leyi, Pawulo u te: “Apolosi i ncini? Na Pawulo i ncini? I malandza ntsena lawa mi pfumeleke hi mhaka ya wona; un’wana ni un’wana wa hina ú tirha leswi Hosi yi n’wi nyikeke ku swi tirha. Mina ndzi byarile, Apolosi ú cheletile; kambe Xikwembu hi xona xi miriseke. Hikokwalaho, loyi a byalaka a hi nchumu, hambi loyi a cheletaka, kambe i Xikwembu, hikuva hi xona xi mirisaka. Loyi a byalaka ni loyi a cheletaka va ringana, hambileswi un’wana ni un’wana a nga ta amukela hakelo ya yena hi mpimo wa ntirho wa yena. Hikuva hina hi vatirhi-kuloni eka Xikwembu, n’wina mi nsimu ya Xikwembu, mi yindlu ya Xikwembu.”—1 Vakorinto 3:5-9.
16, 17. Xana ku nga nyikeriwa swikombiso swihi leswi kombisaka leswaku vanhu va Yehovha va hanya hi ntsako, hi xikongomelo?
16 Ku nga nyikeriwa swikombiso swo tala leswi kombisaka leswaku ku tirhela Yehovha hi ku tshembeka swi tisa vutomi lebyi nga ni xikongomelo lebyi hi nyikaka ntsako. Xikombiso xin’wana i xa marito lawa: “Ndzi rhalarhale eHolweni ya Mfumo leyi a yi tele hi vanhu [hi siku ra nongonoko wa ku nyiketeriwa ka yona] kutani ndzi vona swirho swa nhungu swa ndyangu wa ka hina swi ri kona, ku nga mina ni nsati wanga ni vana va hina vanharhu ni vanghana va vona va vukati. . . . Mina ni nsati wanga hi ve ni vutomi lebyi tsakisaka ni lebyi nga ni xikongomelo hakunene entirhweni wa Xikwembu.”
17 Nakambe swa tsakisa ku xiya leswaku munhu a nga nghenela vutomi lebyi tsakisaka lebyi nga ni xikongomelo xa xiviri entirhweni wa Yehovha ku nga khathariseki leswaku u ni malembe mangani. Hi xikombiso, wansati loyi a dyondzeke ntiyiso wa Bibele emutini wa vadyuhari u khuvuriwe tanihi un’wana wa Timbhoni ta Yehovha a ri ni malembe ya 102. Xisweswo u fe a ri ni xikongomelo lexi tsakisaka, ‘ku chava Xikwembu xa ntiyiso ni ku hlayisa milawu ya xona.’—Eklesiasta 12:13.
Khokholo Leri Tiyeke
18. Xana hi nga endla yini leswaku hi hlula gome ni ku kurisa ntsako wa hina?
18 Ntsako wa Yehovha i khokholo leri tiyeke eka lavo tshembeka. Kambe, ku va ni ntsako lowu a swi vuli leswaku a hi nge tshuki hi langutana ni minkarhi yo nonon’hwa yo fana ni leyi susumeteleke Yesu ku vula marito lawa, eGetsemani: “Moya wa mina wu khomiwa hi gome lerikulu, gome ra ku fa.” (Marka 14:32-34) Swi nga ha endleka gome ri vangiwa hi ku pfumelela ka hina swilo swa vutianakanyi. Kutani a hi hundzuleni hanyelo ra hina. Loko ntsako wa hina wu hungutekile hikwalaho ko byarha ndzhwalo lowukulu wa vutihlamuleri bya Matsalwa handle ka vutianakanyi, kumbexana hi nga endla mindzulamiso leyi nga ta susa ntshikilelo ivi hi vuyisa moya wa ntsako. Tlhandla-kambirhi, Yehovha u ta hi katekisa hi ntsako loko hi lava ku n’wi tsakisa hi ku hambeta hi lwisana ni nyama ya vudyoho, misava yo biha na Diyavulosi.—Vagalatiya 5:24; 6:14; Yakobo 4:7.
19. Xana hi fanele ku ma teka njhani malunghelo lawa hi nga na wona enhlengeletanweni ya Xikwembu?
19 Hi ni ntsako lowukulu hikwalaho ka swivangelo leswi hi buleke ha swona, kun’we ni swin’wanyana swo tala. Ku nga khathariseki leswaku hi vahuweleri va vandlha kumbe hi hlanganyela entirhweni wo karhi wa nkarhi hinkwawo, hinkwerhu hi nga va ni swo tala swo swi endla entirhweni wa Hosi, naswona leswi hakunene swi ta engetela ntsako wa hina. (1 Vakorinto 15:58) Ku nga khathariseki leswaku hi ni malunghelo wahi enhlengeletanweni ya Yehovha, onge hi nga ma tlangela ni ku ya emahlweni hi ntsako hi endla ntirho wo kwetsima eka Xikwembu xa hina xa rirhandzu, lexi tsakeke.—1 Timotiya 1:11.
20. Hi rihi lunghelo ra hina lerikulu, naswona i yini lexi hi nga tiyisekaka ha xona?
20 Ngopfu-ngopfu hi ni xivangelo xa ku tsaka hi lunghelo ra hina ra ku vitaniwa hi vito lerikulu ra Yehovha tanihi Timbhoni takwe. Ina, a hi hetisekanga naswona hi langutana ni miringo yo tala, kambe a hi tsundzukeni mikateko leyi tsakisaka leyi hi nga na yona tanihi Timbhoni ta Yehovha. Naswona tsundzuka, Tata wa hina wa le tilweni la rhandzekaka a nge hi khomisi tingana. Hi nga tiyiseka leswaku nkarhi hinkwawo hi ta katekisiwa loko ntsako wa Yehovha wu ri khokholo ra hina.
A Wu Ta Hlamurisa Ku Yini?
◻ “Ku ṭaka ka Yehova” i yini?
◻ Vakreste va ntiyiso va wu kuma njhani ntsako wa ntiyiso?
◻ Hi swihi swivangelo swin’wana leswi endlaka Timbhoni ta Yehovha ti tsaka?
◻ Ha yini ntsako wa Yehovha wu ri khokholo leri tiyeke?