Ntshunxeko Lowu Humaka Eka Xikwembu Wu Tisa Ntsako
“Ku ṭaka ka Yehova i matimba ya nwina.”—NEHEMIA 8:10.
1. Ntsako i yini, naswona ha yini wu kumiwa hi lava tinyikeleke eka Xikwembu?
YEHOVA u tata timbilu ta vanhu vakwe hi ntsako. Xiyimo lexi xa ntsako lowukulu kumbe nyanyuko xi va kona hikwalaho ko kuma kumbe ku langutela leswinene. Vanhu lava tinyiketeleke eka Xikwembu va nga ha titwa hi ndlela yoleyo hikuva ntsako i mbhandzu wa moya lowo kwetsima, kumbe wa matimba lama tirhaka. (Vagalatiya 5:22, 23) Kutani hambi loko hi weriwa hi miringo leyi karhataka, hi nga tsaka tanihi malandza ya Yehova lama kongomisiwaka hi moya wakwe.
2. Ha yini Vayuda va tsakile eka xiendlakalo xo hlawuleka esikwini ra Ezra?
2 Eka xiendlakalo xo hlawuleka eka lembe xidzana ra vuntlhanu B.C.E., Vayuda va tirhise ntshunxeko wa vona lowu humaka eka Xikwembu leswaku va khoma Nkhuvo wa Mitsonga wo tsakisa eYerusalema. Endzhaku ka loko Ezra ni Valevhi van’wana va va hlayerile ni ku va hlamusela Nawu wa Xikwembu, “tiko hikwaro ri suka ri ya dya, ni ku nwa, v̌a rumela v̌aṅwana ŝakudya, v̌a endla nkhuv̌o lo’wukulu, hikuv̌a a v̌a twisisile marito lawa v̌a ma byeriweke.”—Nehemia 8:5-12.
Ntsako Wa Yehova I Khokholo Ra Hina
3. “Ku ṭaka ka Yehova” ku nga va khokholo ra hina ehansi ka swiyimo swihi?
3 Hi nkarhi wa nkhuvo, Vayuda va wu xiyile ntiyiso wa marito lawa: “Ku ṭaka ka Yehova i matimba ya ṅwina.” (Nehemia 8:10) Ntsako lowu na wona i khokholo ra hina loko hi yima hi tiyile eka ntshunxeko lowu humaka eka Xikwembu tanihi Timbhoni ta Yehova leti tinyiketeleke, ni leti khuvuriweke. Va nga ri vangani va hina va totiwe hi moya lowo kwetsima ni ku amukeriwa endyangwini wa Xikwembu tanihi vadyandzhaka va le tilweni na Kriste. (Varhoma 8:15-23) Vo tala va hina namuntlha va ni ntshembo wa ku hanya eparadeyisini ya le misaveni. (Luka 23:43) Mawaku ndlela leyi hi faneleke hi tsaka ha yona!
4. Ha yini Vakriste va nga tiyiselaka ku nonon’hwa ni nxaniso?
4 Hambi leswi hi nga ni mintshembo leyi hlamarisaka, a swi olovi ku tiyisela ku nonon’hwa ni nxaniso. Hambi swi ri tano, hi nga endla tano hikuva Xikwembu xi hi nyika moya wa xona lowo kwetsima. Ha wona hi ni ntsako ni ku tiyiseka leswaku ku hava lexi xi nga hi wutlelaka ntshembo wa hina kumbe rirhandzu ra Xikwembu. Ku tlula kwalaho, hi nga tiyiseka leswaku Yehova u ta va khokholo ra hina loko hi n’wi rhandza hi mbilu, moya-xiviri, matimba ni mianakanyo ya hina hinkwayo.—Luka 10:27.
5. Hi nga swi kuma kwihi swivangelo swo tsaka?
5 Vanhu va Yehova va tsakela mikateko leyi fuweke naswona va na swivangelo swo tsaka. Swivangelo swin’wana swo tsaka swi boxiwa epapileni ra Pawulo leri yaka eka Vagalatiya. Swin’wana swi kombisiwa eka Matsalwa man’wana. Ku kambisisa mikateko yo tano leyi tsakisaka, swi ta engetela ntsako wa hina.
Nkoka Wa Ntshunxeko Lowu Humaka Eka Xikwembu
6. Hikwalaho ka yini Pawulo a khutaze Vakriste va bandlha ra Galatiya leswaku va yima va tiyile?
6 Tanihi Vakriste, hi ni nkateko lowu tsakisaka wa ku va ni xiyimo lexi amukelekaka eka Xikwembu. Tanihi leswi Kriste a tshunxeke valandzeri vakwe eNawini wa Muxe, Vagalatiya va khutaziwe ku yima va tiyile naswona va nga nghenisiwi eka ‘joko rero ra vuhlonga.’ Ku vuriwa yini hi hina? Loko hi ringeta ku vuriwa lava lulameke hi ku hlayisa Nawu, hi ta hambanisiwa na Kriste. Hambi swi ri tano, hi ku pfuniwa hi moya wa Xikwembu hi rindzele vululami lebyi tshembisiweke lebyi humaka eka ripfumelo leri susumetiwaka hi rirhandzu, ku nga ri hi ku yimba ka nyama kumbe mintirho yin’wana ya Nawu.—Vagalatiya 5:1-6.
7. Hi fanele hi wu langutisa ku yini ntirho wo kwetsima wa Yehova?
7 I nkateko ku tirhisa ntshunxeko lowu humaka eka Xikwembu leswaku hi “[tirhela, “NW”] Yehova hi ku ṭaka.” (Psalma 100:2) Hakunene, i lunghelo leri nga pimanisekiki ku endla ntirho wo kwetsima eka “Yehova Xikwembu, xa Matimba Hinkwawo,” ni “Hosi leyi nga riki na ku hela”! (Nhlavutelo 15:3) Loko u tshamela ku va ni mintlhaveko ya ku titwa u nga ri nchumu, swi nga pfuna ku xiya leswaku Xikwembu xi ku tshinetile eka xona ha Yesu Kriste naswona xi ku nyike xiphemu eka “ntirho wo kwetsima wa mahungu lamanene ya Xikwembu.” (Varhoma 15:16; Yohane 6:44; 14:6) Mawaku swivangelo swonghasi swa ntsako ni ku khensa Xikwembu!
8. Mayelana na Babilona Lonkulu, vanhu va Xikwembu va na xivangelo xihi xa ntsako?
8 Xivangelo xin’wana xa ntsako i ku ntshunxiwa hi Xikwembu eka Babilona Lonkulu, mfumo wa misava wa vukhongeri bya mavunwa. (Nhlavutelo 18:2, 4, 5) Hambi leswi muoswi loyi wa vukhongeri hi ndlela yo fanekisela a “tshamiseke henhla ka mati layo tala” leswi vulaka “swivongo, ni vunyingi, ni matiko, ni tindzimi,” a nga tshami ehenhla ka malandza ya Yehova, kumbe ku ma kucetela ni ku ma lawula hi tlhelo ra vukhongeri. (Nhlavutelo 17:1, 15) Ha tsaka eku vonakaleni ka Xikwembu loku hlamarisaka, loko vaseketeri va Babilona Lonkulu va ri emunyameni wa moya. (1 Petro 2:9) Ina, swi nga ha nonon’hwa ku twisisa “swihundla leswi enteke swa Xikwembu.” (1 Vakorinto 2:10) Kambe swikhongelo swo kombela vutlhari ni mpfuno wa moya lowo kwetsima swi hi pfuna ku twisisa ntiyiso wa Matsalwa lowu endlaka lava wu kumaka va tshunxeka hi tlhelo ra moya.—Yohane 8:31, 32; Yakobo 1:5-8.
9. Hi fanele hi endla yini leswaku hi tsakela nkateko wa ntshunxeko lowu hambetaka wo huma eka xidyoho xa vukhongeri?
9 Hi tsakela nkateko wa ntshunxeko lowu hambetaka wo huma eka xihoxo xa vukhongeri, kambe leswaku hi hlayisa ntshunxeko wolowo, hi fanele hi papalata vugwinehi. Vagalatiya a va wu tsutsuma kahle mpfhuka wa Vukriste, kambe van’wana a va va sivela ku yingisa ntiyiso. Nkucetelo wo tano wo biha a wu nga humi eka Xikwembu kutani a wu fanele ku siveriwa. Tanihi leswi comela lexitsanana xi kukumuxaka mbila hinkwayo, vadyondzisi va mavunwa kumbe ku voyamela eka vugwinehi ku nga onha bandlha hinkwaro. Pawulo a a lava leswaku vahlohloteri va ku yimba lava lavaka ku hundzula ripfumelo ra Vagalatiya va yimbisiwa va tlhela va tsheniwa. I ririmi leri tikaka hakunene! Kambe hi fanele hi tiya swinene eku siveleni ka vugwinehi loko hi ta hlayisa ntshunxeko lowu humaka eka Xikwembu hi huma eka xihoxo xa vukhongeri.—Vagalatiya 5:7-12.
Tirhelanani Hi Rirhandzu
10. Hi byihi vutihlamuleri bya hina tanihi leswi hi nga xiphemu xa vumakwerhu bya Vukriste?
10 Ntshunxeko lowu humaka eka Xikwembu wu hi nghenisa eka vumakwerhu bya rirhandzu, kambe hi fanele hi endla xiphemu xa hina xo kombisa rirhandzu. Vagalatiya a a va nga fanelanga va tirhisa ntshunxeko wa vona tanihi ‘nsusumeto wa nyama’ kumbe tanihi ku landzula vutianakanyi byo pfumala rirhandzu. A va fanele ku tirhelana hi ku susumetiwa hi rirhandzu. (Levitika 19:18; Yohane 13:35) Na hina hi fanele hi papalata ku hlevana ni rivengo leri endlaka leswaku hi dlayana. Kavula, leswi a swi nge endleki loko hi kombisa rirhandzu ra vumakwerhu.—Vagalatiya 5:13-15.
11. Hina hi nga va nkateko eka van’wana hi ndlela yihi, naswona vona va nga hi katekisa njhani?
11 Loko hi tirhisa ntshunxeko wa hina lowu humaka eka Xikwembu hi ku pfumelelana ni minkongomiso ya moya wa Xikwembu, hi ta kombisa rirhandzu hi tlhela hi va nkateko eka van’wana. Hi fanele hi tolovela ku tipfumelela hi lawuriwa ni ku kongomisiwa hi moya lowo kwetsima. Kutani a hi nge voyameli eku eneriseni ka nyama ya hina ya vudyoho hi ku pfumala rirhandzu hikuva “ku navela ka nyama ku lwa ni Moya.” Loko hi kongomisiwa hi moya wa Xikwembu, hi ta endla leswinene, hayi hi leswi milawu yi lavaka ku landzeleriwa ni leswi yi lavaka leswaku vadyohi va xupuriwa. Hi xikombiso, rirhandzu—ku nga ri nawu ntsena—ri ta hi sivela ku lumbeta van’wana. (Levitika 19:16) Rirhandzu ri ta hi susumetela ku vulavula ni ku hanya hi tindlela ta vunene. Hikwalaho ka leswi hi kombisaka mbhandzu wa moya wa rirhandzu, van’wana va ta hi katekisa kumbe va hi bumabumela. (Swivuriso 10:6) Ku tlula kwalaho, ku hlangana ka vona na hina ku ta va nkateko eka vona.—Vagalatiya 5:16-18.
Mbhandzu Lowu Hambanisaka
12. Hi yihi mikateko yin’wana leyi hlanganeke ni ku papalata “mintirho . . . ya nyama” ya vudyoho?
12 Mikateko yo tala leyi hlanganeke ni ntshunxeko lowu humaka eka Xikwembu yi endla leswaku hi papalata “mintirho ya . . . nyama,” ya vudyoho. Hina tanihi vanhu va Xikwembu hi ntolovelo hi papalata gome lerikulu hikuva a hi byi endli vuoswi, thyaka ni ku tikhoma ko biha. Hi ku papalata ku gandzela swifaniso, hi na ntsako hi ku tiva leswaku hi tsakisa Yehova emhakeni yoleyo. (1 Yohane 5:21) Tanihi leswi hi nga byi tirhisiki vungoma, hi tshunxekile eku lawuriweni hi mademona. Vumakwerhu bya hina bya Vukriste a byi onhiwi hi rivengo, timholovo, mavondzo, ximbilwambilwana, ku lwetana, ku avana, mimpambukwa ni vukwele. Naswona ntsako wa hina a wu lahlekanga eka vudakwa ni makapfu. Pawulo u tsundzuxe leswaku lava tirhisaka mintirho ya nyama va nga ka va nga dyi ndzhaka ya Mfumo wa Xikwembu. Hambi swi ri tano, leswi hi yingisaka marito ya yena hi nga khomelela eka ntshembo wa Mfumo lowu tsakisaka.—Vagalatiya 5:19-21.
13. Moya lowo kwetsima wa Yehova wu humesa mbhandzu wihi?
13 Ntshunxeko lowu humaka eka Xikwembu wu hi nyika ntsako hikuva Vakriste va kombisa mbhandzu wa moya wa Yehova. Emaritweni ya Pawulo lama yaka eka Vagalatiya, swa olova ku vona leswaku mitirho ya nyama ya vudyoho yi fana ni mitwa, yi hambana ni mbhandzu wo saseka wa moya, wa rirhandzu, ntsako, ku rhula, ku lehisa mbilu, tintswalo, vunene, ripfumelo, vunene ni ku tikhoma loku simekiweke etimbilwini leti chavaka Xikwembu. Leswi hi tiyimiseleke ku hanya hi ku hambana ni ku navela ka nyama ya vudyoho, hi rhandza ku kongomisiwa hi moya wa Xikwembu ni ku hanya ha wona. Moya wu hi endla hi titsongahata naswona hi va ni ku rhula, “hi nga tshuki hi titiva ngopfu; [hi chava] ku pfukana ni ku vondzokana.” A swi hlamarisi leswi ku nga ntsako ku hlangana ni lava kombisaka mbhandzu wa moya!—Vagalatiya 5:22-26.
Swivangelo Swin’wana Swa Ntsako
14. I matlhari wahi lawa hi ma lavaka eku lwisaneni ka hina ni matimba ya moya lowo biha?
14 Ntshunxeko wa hina wa moya lowu humaka eka Xikwembu wu hlangane ni nkateko wo sirheleleka eka Sathana ni mademona. Leswaku hi ta humelela eku lwisaneni ka hina ni matimba ya moya lowo biha, hi fanele hi ambala “swisirhelelo ni matlhari hinkwawo ya Xikwembu.” Hi lava vamba ra ntiyiso ni xitlhangu xa ku lulama. Milenge ya hina yi fanele yi havaxela hi mahungu lamanene ya ku rhula. Lexi lavekaka nakambe, i xitlhangu lexikulu xa ripfumelo, xa ku sivela miseve leyi pfurhaka ya lowo homboloka. Hi fanele hi ambala xihuku xa ku ponisiwa ivi hi tlakusa “tlhari ra moya,” Rito ra Xikwembu. Nakambe a hi ‘hambeteni hi khongela nkarhi hinkwawo hi moya.’ (Vaefesa 6:11-18) Loko hi ambala matlhari ya moya naswona hi ala vungoma, hi nga ka hi nga chavi kutani ha tsaka.—Ringanisa Mintirho 19:18-20.
15. Hi ku tikhoma hi ku pfumelelana ni Rito ra Xikwembu, i nkateko wihi lowu hi nga na wona wo tsakisa?
15 Hi ni ntsako hikuva mahanyelo ya hina ma fambisana ni Rito ra Xikwembu, naswona hi tshunxekile eka xidyoho lexi karhataka vunyingi bya lava endlaka swo biha. Hi ‘titoloveta ku va ni ripfalo ra ku va hi nga endli xihoxo eka Xikwembu ni vanhu.’ (Mintirho 24:16) Kutani ke, a hi fanelanga hi chava hakelo ya Xikwembu eka vadyohi lava nga kona lava endlaka hi vomu, lava nga hundzukiki. (Matewu 12:22-32; Vaheveru 10:26-31) Hi ku tirhisa ndzayo ya Swivuriso 3:21-26, hi kota ku xiya ku hetiseka ka marito lawa: “Hlayisa v̌utlhari ni ku twisisa. Ŝi ta v̌a v̌utomi e moyeni wa wena, ni ŝibombiso e nhaṅwini ya wena. Hi kona u nga ta famba u tiyile ndleleni ya wena, kutani nenge wa wena wu nga ka wu nga khunguv̌anyeki. Loko u ya ku etleleni, u nga ka u nga tšhav̌i, ni loko u tilatile, v̌urongo bya wena byi ta nanḍiha. U nga ka u nga tšhav̌i ntšhav̌o wa šipuku, ni loko si ri šidzedze le’si nga ta lov̌isa la’v̌o biha. Hikuv̌a Yehova o ta v̌a siṭhembo sa wena, o ta ponisa nenge wa wena e ntlhaṅwini.”
16. Xikhongelo i xivangelo xa ntsako hi ndlela yihi, naswona moya wa Yehova wu endla xiphemu xihi emhakeni leyi?
16 Xivangelo xin’wana xa ntsako i ntshunxeko lowu humaka eka Xikwembu wo tshinelela Yehova hi xikhongelo hi tiyiseka leswaku hi ta twiwa. Ina, swikhongelo swa hina swa hlamuriwa hikuva hi “tshav̌a Yehova” swinene. (Swivuriso 1:7) Ku tlula kwalaho, ha pfuneka leswaku hi tihlayisa hi ri erirhandzwini ra Xikwembu hi ‘ku khongela hi moya lowo kwetsima.’ (Yuda 20, 21) Leswi hi swi endla hi ku kombisa xiyimo xa mbilu lexi amukelekaka eka Yehova na hi ku khongela hi ri ehansi ka nkucetelo wa moya wa swilo leswi pfumelelanaka ni ku rhandza ka yena ni Rito rakwe, leri hi kombisaka ndlela yo khongela ni leswi hi nga swi kombelaka hi xikhongelo. (1 Yohane 5:13-15) Loko hi ringiwa ngopfu kutani hi nga swi tivi leswi hi nga swi khongelelaka, ‘moya wa hi pfuna eku tsaneni ka hina, wa hi khongelela loko hi konya hi nga humesi marito.’ Xikwembu xa swi hlamula swikhongelo swo tano. (Varhoma 8:26, 27) A hi khongeleleni moya lowo kwetsima naswona hi wu pfumelela leswaku wu humesa mihandzu yin’wana ya wona eka hina, ngopfu-ngopfu leyi lavekaka leswaku hi langutana ni miringo yo karhi. (Luka 11:13) Nakambe hi ta kurisa ntsako wa hina loko hi xikhongelo ni hi vutlhari hi dyondza Rito ra Xikwembu leri huhuteriweke hi moya, ni tibuku ta Vukriste leti lunghiseleriweke ehansi ka nkongomiso wa moya.
Ku Katekisiwa Hi Mpfuno Lowu Tshamaka Wu Ri Kona
17. Mintokoto ya Muxe ni marito ya Davhida ma swi kombisa njhani leswaku Yehova u na vanhu va Yena?
17 Hi ku tirhisa ntshunxeko lowu humaka eka Xikwembu hi ndlela leyinene, hi ni tsako wo tiva leswaku Yehova u na hina. Loko swiyimo swo nonon’hwa swi endle Muxe leswaku a suka aEgipta, hi ripfumelo “u tiyiserile onge hi loko a ri karhi a vona loyi a nga voniwiki.” (Vaheveru 11:27) Muxe a a nga fambi a ri yexe; a a swi tiva leswaku Yehova a a ri na yena. Hi ku fanana, vana va Kore va yimbelerile: “Šikwembu i v̌utshavelo bya hina ni matimba ya hina, i ku pfuna lo’ku kumiwaka kusuhi e mapfalweni. Hikwalaho a hi tšhav̌i ntšhumu loko misav̌a yi hunḍuluka, ni loko tinṭhav̌a ti ṭekaṭeka e šikari ka malwandle, hambi magandlati ya wona ma pfuma, ma endla boboma, hambi tinṭhav̌a ti rurumela hikwalaho ka ku tlakuka ka wona.” (Psalma 46:1-3) Loko u ri na ripfumelo ro tano eka Xikwembu, xi nga ka xi nga ku tshiki. Davhida u te: “Hambi loko tatana na manana v̌a nga nḍi ṭhika, Yehova o ta nḍi rola.” (Psalma 27:10) Swa tsakisa swonghasi ku tiva leswaku Xikwembu xi ma khathalela ngopfu malandza ya xona!—1 Petro 5:6, 7.
18. Hikwalaho ka yini vanhu lava nga ni ntsako wa Yehova va ri ni ntshunxeko lowu humaka eka Xikwembu eka ku vilela loku hlulaka?
18 Leswi hi nga ni ntsako wa Yehova, hi ni ntshunxeko lowu humaka eka Xikwembu eka ku vilela loku hlulaka. Pawulo u te: “Mi nga vileli ha nchumu; kambe etimhakeni hinkwato, khongelani, mi tivisa Xikwembu leswi mi swi pfumalaka, mi kombela mi ri karhi mi nkhensa; kutani ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina eka Kriste Yesu.” (Vafilipiya 4:6, 7) Ku rhula ka Xikwembu i nchavelelo lowu nga pimanisekiki hambi ku ri eka swiyimo swa ndzingo lowukulu. Ha wona, timbilu ta hina ti tshama ti chavelelekile—nchumu lowunene eka hina hi tlhelo ra moya, ra mintlhaveko ni ra nyama. (Swivuriso 14:30) Ku tlhela ku hi pfuna leswaku hi tshama hi ringanisela emianakanyweni, hikuva ha swi tiva leswaku Xikwembu a xi nge pfumeleli nchumu xi hi vavisa hi ku helela. (Matewu 10:28) Ku rhula loku ku endliwaka hi vuxaka lebyikulu ni Xikwembu ha Kriste i ka hina hikuva hi tinyikele eka Yehova naswona hi titsongahatela nkongomiso wa moya wakwe, lowu humesaka mihandzu yo tanihi ntsako ni ku rhula.
19. Hi nga tsaka loko hi hlayisa timbilu ta hina ti khomelele eka yini?
19 Ku hlayisa timbilu ta hina ti khomelele eka ntshunxeko lowu humaka eka Xikwembu ni ntshembo wa Mfumo swi ta hi pfuna leswaku hi tsaka. Hi xikombiso, kumbexana ku nga endliwa swo karhi ehenhleni ka rihanyo leri tsaneke, kambe hi nga khongelela vutlhari ni xivindzi xo langutana na rona naswona hi nga kuma nchavelelo hi ku anakanya hi rihanyo ra moya leri hi ri tsakelaka sweswi ni ku tshunguriwa ka miri loku nga ta endleka ehansi vulawuri bya Mfumo. (Psalma 41:1-3; Esaya 33:24) Hambi loko hi boheka ku tiyisela ku pfumaleka ka swilo namuntlha, swilaveko swa vutomi swi nga ka swi nga kayiveli emisaveni ya Paradeyisi leyi nge kusuhi swinene. (Psalma 72:14, 16; Esaya 65:21-23) Ina, Tata wa hina wa le tilweni u ta hi seketela sweswi ivi eku heteleleni a endla leswaku ntsako wa hina wu hetiseka.—Psalma 145:14-21.
Tlangela Ntshunxeko Wa Wena Lowu Humaka Eka Xikwembu
20. Hi ku ya hi Psalma 100:1-5, hi fanele hi tisa ku yini emahlweni ka Yehova?
20 Tanihi vanhu va Yehova, hakunene hi fanele hi tlangela ntshunxeko lowu humaka eka Xikwembu lowu hi tiseleke ntsako ni mikateko yo tala swonghasi. A swi hlamarisi leswi Psalma 100:1-5 yi hi khutazaka ku ta emahlweni ka Yehova ‘hi nkulungwana.’ Yehova i n’wini wa hina naswona wa hi khathalela tanihi Murisi wa rirhandzu. Ina, “hi tiko ra yena, ni ntlhambi lowu a wu risaka.” Vuvumbi ni timfanelo takwe letinene swi hi nyika nsusumeto wo nghena eswivaveni swa vukwetsimelo bya yena hi ku dzunisa ni ku nkhensa. Hi susumeteleka ku “v̌onga v̌ito rakwe,” ku twarisa Yehova Xikwembu. Ku tlula kwalaho, hi nga hamba hi titshega hi musa wa yena wa rirhandzu, kumbe ntwela-vusiwana lowu a nga na wona eka hina. “E tinsakeni hi tinsaka” Yehova wa tshembeka, a nga tshiki ku kombisa rirhandzu eka lava endlaka ku rhandza kakwe.
21. I xikhutazo xihi lexi nyikeriweke enkandziyisweni wo sungula wa magazini lowu, naswona hi fanele hi endla yini hi ntshunxeko lowu humaka eka Xikwembu?
21 Tanihi vanhu lava nga hetisekangiki, hi nga ka hi nga poni miringo hinkwayo sweswi. Hambi swi ri tano, hi mpfuno wa Xikwembu, hi nga va Timbhoni ta Yehova leti nga ni xivindzi ni leti tsakeke. Nchumu wa nkoka emhakeni leyi i marito lama kumekaka enkandziyisweni wo sungula wa magazini lowu (July 1879): “Vana ni xivindzi . . . makwerhu wa mina wa xinuna kumbe wa xisati wa Vukriste, n’wina lava mi tsutsumaka endleleni yo lala hi magoza lama tiyeke. Mi nga vi na mhaka ni ndlela leyi nga ni maribye; yi tiyisiwile naswona yi kwetsimisiwile hi milenge leyi katekisiweke ya N’wini. Mutwa wun’wana ni wun’wana wu tekeni wu ri xiluva; ribye rin’wana ni rin’wana leri karihaka tanihi ribye ro sila, n’wina tsutsumani mi ya epakanini. . . . Hlayisani tihlo ra n’wina ri langute ehakelweni.” Timiliyoni leti sweswi ti tirhelaka Yehova ti hlayisa mahlo ya tona ma langute ehakelweni naswona ti na swivangelo swo tala swo va ni xivindzi ni ntsako. Yima u tiya eka ntshunxeko lowu humaka eka Xikwembu, swin’we na vona. U nga kayeli xikongomelo xa wona, naswona onge ntsako wa Yehova wu nga va khokholo ra wena nkarhi hinkwawo.
A Wu Ta Hlamula Njhani?
◻ “Ku ṭaka ka Yehova” ku nga va khokholo ra hina hi ndlela yihi?
◻ Hi tlhelo ra vukhongeri, xana ntshunxeko lowu humaka eka Xikwembu wu va nyike mikateko yihi vanhu va Yehova?
◻ Ha yini hi tirhelana hi rirhandzu?
◻ Hi yihi mikateko leyi hlanganeke ni ntshunxeko lowu humaka eka Xikwembu?
◻ Vanhu va Xikwembu va nga tshamisa ku yini va tsakile?
[Xifaniso lexi nga eka tluka 23]
“Mutwa wun’wana ni wun’wana wu tekeni wu ri xiluva; ribye rin’wana ni rin’wana leri karihaka tanihi ribye ro sila, n’wina tsutsumani mi ya epakanini”