Yima U Tiya Eka Ntshunxeko Lowu Humaka Eka Xikwembu!

“Hi ntshunxiwile hi leswi Kriste a hi ntshunxeke. Hikokwalaho, yimani mi tiya, mi nga ha tlheli mi tiveka ehansi ka [joko ra, “NW”] vuhlonga.”—VAGALATIYA 5:1.

1, 2. Ntshunxeko lowu humaka eka Xikwembu wu lahliwe njhani?

VANHU va Yehova va ntshunxekile. Kambe a va byi lavi vutifumi eka Xikwembu, hikuva sweswo a a swi ta va endla mahlonga eka Sathana. Va byi tlangela vunghana bya vona lebyikulu na Yehova naswona va tsakisiwa hi ntshunxeko lowu a va nyikaka wona.

² Vatswari va hina vo sungula, Adamu na Evha, va lahle ntshunxeko lowu humaka eka Xikwembu hi ku dyoha kutani va ve mahlonga ya xidyoho, rifu na Diyavulosi. (Genesa 3:1-19; Varhoma 5:12) Phela, Sathana u nghenise misava hinkwayo endleleni ya vudyoho ya ndzoviso! Kambe lava yimaka va tiyile eka ntshunxeko lowu humaka eku Xikwembu va famba endleleni leyi yisaka evuton’wini lebyi nga heriki.—Matewu 7:13, 14; 1 Yohane 5:19.

Ku Ntshunxeka eVuhlongeni

3. I ntshembo wihi lowu Xikwembu a xi ri na wona aEdeni?

³ Yehova u kunguhate leswaku vanhu lava xiximaka vito rakwe va ntshunxiwa evuhlongeni bya Sathana, xidyoho ni rifu. Ntshembo wolowo wu nyikeriwile loko Xikwembu xi byele nyoka leyi tirhisiweke hi Sathana aEdeni, xi ku: “Nḍi ta v̌eka ku v̌engana e šikari ka wena ni wansati, ni šikari ka rišaka ra wena ni rišaka ra wansati; ri ta ku faya nhloko, wena u ri luma širenḍe.” (Genesa 3:14, 15) Yesu Kriste, Mbewu leyi humaka eka nhlengeletano ya Yehova ya le tilweni, u lumiwe xirhendze loko a fa emhandzini, xiswewo Xikwembu xi nyikele gandzelo ra nkutsulo leswaku xi kutsula vanhu lava nga ni ripfumelo eka xidyoho ni rifu. (Matewu 20:28; Yohane 3:16) Hi ku famba ka nkarhi, Yesu u ta faya nhloko ya Sathana, Nyoka ya khale.—Nhlavutelo 12:9.

4. I ntshunxeko wihi lowu tsakeriweke hi Abrahama, naswona Yehova u n’wi tshembise yini?

⁴ Malembe ya kwalomu ka 2 000 endzhaku ka loko xitshembiso xi nyikeriwile aEdeni, Abrahama “munghana wa Yehova,” u yingisele Xikwembu ivi a suka etikweni ra Uri a ya endhawini yin’wana. (Yakobo 2:23; Vaheveru 11:8) Xisweswo u amukele ntshunxeko lowu humaka eka Xikwembu kutani a nga ha tlhelanga a hanya tanihi hlonga ra misava ya Sathana ya vukhongeri bya mavunwa, tipolitiki leti thyakeke ni bindzu ra makwanga. Eka vuprofeta bya le Edeni, Xikwembu xi engetele xitshembiso xa leswaku mindyangu ni matiko hinkwawo a ma ta tikatekisa hi Mbewu ya Abrahama. (Genesa 12:3; 22:17, 18) Abrahama a ri hava xisolo hikuva ‘u tshembele eka Yehova, loyi a swi tekeke swi ri ku lulama.’ (Genesa 15:6) Namuntlha, hi ku fanana vunghana lebyikulu na Yehova byi tisa ntshunxeko lowu humaka eka Xikwembu eka xisolo ni vuhlonga emisaveni leyi nge hansi ka matimba ya Sathana.

Drama Yo Fanekisela Leyi Nyanyulaka

5. Ku velekiwa ka Isaka a ku hlangene ni swiyimo swihi?

⁵ Leswaku Abrahama a ta va ni mbewu, Sara, nsati wa yena wa mhika, u n’wi nyike Hagari, nandza wa yena wa xisati, tanihi loyi a nga ta tswala vana. Ha yena, Abrahama u tswale Iximayele, kambe Xikwembu a xi n’wi hlawulanga tanihi Mbewu leyi tshembisiweke. Ku ri na sweswo, loko Abrahama a ri na malembe ya 100 hi vukhale na Sara a ri na 90, Yehova u endle leswaku va va ni n’wana la thyiweke Isaka. Loko Iximayele a sandze Isaka, Hagari ni n’wana wakwe va hlongoriwile, va siya n’wana wa Abrahama na Sara nsati wakwe wa xitekwa tanihi mbewu leyi nga kanakanisiki ya Abrahama. Tanihi Abrahama, Isaka na yena u ve ni ripfumelo kutani a kuma ntshunxeko lowu humaka eka Xikwembu.—Genesa 16:1-16; 21:1-21; 25:5-11.

6, 7. Vadyondzisi va mavunwa va va khorwise yini Vakriste van’wana va Galatiya, kambe Pawulo u hlamusele yini?

⁶ Swiendlakalo leswi swi vhumbe swilo swa nkoka eka varhandzi va ntshunxeko lowu humaka eka Xikwembu. Leswi swi xiyiwile eka papila leri muapostola Pawulo a ri tsaleleke mabandlha ya le Galatiya kwalomu ka 50 ku ya eka 52 C.E. Enkarhini wolowo huvo leyi fumaka a yi bohe leswaku ku yimba a ku nga laveki eka Vakriste. Kambe vadyondzisi va mavunwa va sindzise Vagalatiya van’wana leswaku a a ku ri xivumbeko xa nkoka xa Vukriste.

⁷ Pawulo u byele Vagalatiya: Munhu u vuriwa la lulameke hi ku pfumela eka Kriste, hayi hi mintirho ya Nawu wa Muxe. (1:1–3:14) Nawu a wu xi tiyisanga xitshembiso lexi hlanganeke ni ntwanano wa Abrahama kambe wu endle swidyoho swi vonaka naswona wu tirhe tanihi murisi la yisaka eka Kriste. (3:15-25) Hi rifu rakwe Yesu u ntshunxe lava nge hansi ka Nawu a endla leswaku va va vana va Xikwembu. Hikwalaho, ku tlhelela endleleni yo hlayisa masiku, tin’hweti, tinguva ni malembe a a swi ta vula ku tlhelela evuhlongeni. (4:1-20) Kutani Pawulo u tsarile:

8, 9. (a) Hi marito ya wena, hlamusela hi ku komisa leswi Pawulo a swi vuleke eka Vagalatiya 4:21-26. (b) Eka drama leyi yo fanekisela, i mani kumbe i yini leswi a swi faniseriwa hi Abrahama na Sara, naswona Mbewu leyi tshembisiweke i mani?

⁸ “Ma nga ndzi byela, n’wina lava tsakelaka ku va ehansi ka Nawu: Xana a mi swi twi leswi Nawu wu vulaka swona ke? Hikuva Matsalwa ma vula leswaku Abrahama a a ri ni vana vambirhi va xinuna, un’wana [Iximayele] a velekiwile hi nsati wa yena wa hlonga [Hagari], un’wana [Isaka] hi nsati wa yena wa xitekwa [Sara] wo ka a nga ri hlonga. Kambe n’wana wa nsati lowa hlonga, u velekiwile ku fana ni vanhu hinkwavo; kasi n’wana wa nsati lowa xitekwa u velekiwile hikwalaho ka xitshembiso. Timhaka leti [drama yo fanekisela, NW]: Vavasati lavambirhi i mintwanano mimbirhi; un’wana [ntwanano wa Nawu], a nga yena [Ha]gara, u huma entshaveni ya Sinayi [laha Xikwembu xi sunguleke ntwanano wolowo kona ni Vaisrayele], vana va yena va velekeriwe vuhlonga. [Ntwanano lowun’wana hi wona lowu endliweke na Abrahama malunghana ni Mbewu ya yena]; [Ha]gara i ntshava ya Sinayi, etikweni ra Arabiya, kutani u fanisa muti wa sweswi wa Yerusalema, hikuva wu le vuhlongeni swin’we ni vana va wona [vatukulu va Abrahama, Isaka na Yakobo]. Kambe Yerusalema wa le tilweni u ntshunxekile, kutani hi yena mana wa hina.”—Vagalatiya 4:21-26.

⁹ Eka drama leyi yo fanekisela, Abrahama a a yimela Yehova. “Nsati wa xitekwa,” Sara, u fanekisele “wansati” wa Xikwembu, kumbe nhlengeletano yo kwetsima ya vuako hinkwabyo. Yi humese Kriste, Mbewu ya wansati yoloye wo fanekisela ni ya Abrahama Lonkulu. (Vagalatiya 3:16) Leswaku a komba vanhu ndlela yo ntshunxeka evukhongerini lebyi thyakeke, xidyoho na Sathana, Yesu u dyondzise ntiyiso naswona u paluxe vukhongeri bya mavunwa, kambe Yerusalema ni vana va yona yi tshame evuhlongeni bya vukhongeri hikuva va n’wi arile. (Matewu 23:37, 38) Valandzeri va Yesu va Vayuda va ntshunxekile eNawini, leswi kombiseke vuhlonga bya vona eka ku nga hetiseki, xidyoho ni rifu. Hakunene va ntshunxekile vanhu hinkwavo lava amukelaka Yesu tanihi Loyi a tisiweke hi “wansati” wa Xikwembu leswaku a ta va Hosi ya Vumesiya ni Mukutsuri la ‘twarisaka ntshunxeko wa lava khotsiweke’!—Esaya 61:1, 2; Luka 4:18, 19.

Papalata Joko Ra Vuhlonga

10, 11. Kriste u ntshunxe valandzeri vakwe eka joko rihi ra vuhlonga, naswona i ku fana kwihi loku nga voniwaka namuntlha?

¹⁰ Eka lava vumbaka mbewu ya Abrahama swin’we na Kriste, Isaka Lonkulu, Pawulo u ri: “Yerusalema wa le tilweni u ntshunxekile, kutani hi yena mana wa hina. . . . Sweswi ke, n’wina vamakwerhu, mi vana va xitshembiso ku fana na Isaka. Naswona, ku fana na leswi, enkarhini wolowo, n’wana wo velekiwa kukota vanhu hinkwavo [Iximayele] a nga xanisa n’wana wo velekiwa hi matimba ya Moya [Isaka], ni sweswi swa ha ri tano. . . . Vamakwerhu, hina a hi vana va hlonga, kambe hi vana va nsati wa xitekwa la nga riki hlonga. Hi ntshunxiwile [eNawini] hileswi Kriste a hi ntshunxeke. Hikokwalaho, yimani mi tiya, mi nga ha tlheli mi tiveka ehansi ka [joko ra, NW] vuhlonga.”—Vagalatiya 4:26–5:1.

¹¹ Un’wana ni un’wana wa valandzeri va Yesu a a ta va a nghene ejokweni ra vuhlonga loko a a landzele Nawu. Vukhongeri bya mavunwa i joko ra vuhlonga ra sweswinyana, kasi Vujagana byi fana na Yerusalema wa khale ni vana vakwe. Kambe vatotiwa i vana va Yerusalema wa le henhla, nhlengeletano ya Xikwembu ya le tilweni leyi ntshunxekeke. Vona ni vapfumeri-kulobye lava nga ni ntshembo wa la misaveni a hi xiphemu xa misava naswona a a hi mahlonga ya Sathana. (Yohane 14:30; 15:19; 17:14, 16) Leswi hi ntshunxiweke hi ntiyiso na hi gandzelo ra Yesu, a hi yimeni hi tiya eka ntshunxeko lowu hi wu nyikiweke hi Xikwembu.

Ku Yimela Ntshunxeko Lowu Humaka Eka Xikwembu

12. I ndlela yihi leyi tekiwaka hi vapfumeri, naswona i yini lexi nga ta hlamuseriwa sweswi?

¹² Sweswi timiliyoni ti tsakela ntshunxeko wa ntiyiso tanihi Timbhoni ta Yehova. Tidyondzo ta Bibele ta khomiwa swin’we ni timiliyoni tin’wana, vo tala va vona va ‘faneriwa hi vutomi lebyi nga heriki.’ Loko va ta va vapfumeri, va ta yimela ntshunxeko lowu humaka eka Xikwembu hi ku khuvuriwa. (Mintirho 13:48; 18:8) Kambe i magoza wahi lama lavekaka emahlweni ka nkhuvulo wa Vukriste?

13. Hi byihi vuxaka lebyi nga kona exikarhi ka vutivi ni nkhuvulo?

¹³ Munhu u fanele a kuma ni ku hanya hi ku ya hi vutivi lebyi kongomeke bya Matsalwa, a nga si khuvuriwa. (Vaefesa 4:13) Xisweswo, Yesu u byele valandzeri vakwe: “Yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra n’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona.”—Matewu 28:19, 20.

14. Ku khuvuriwa hi vito ra Tatana, N’wana ni moya lowo kwetsima swi lava vutivi byihi?

¹⁴ Ku khuvuriwa hi vito ra Tatana swi vula ku xiya xikhundlha ni matimba ya Yehova tanihi Xikwembu ni Hosi ya Vuako Hinkwabyo. (Genesa 17:1; 2 Tihosi 19:15; Nhlavutelo 4:11) Ku khuvuriwa evitweni ra N’wana swi vula ku xiya xikhundlha ni matimba ya Kriste tanihi xivumbiwa xa moya lexi tlakukeke, Hosi ya Vumesiya ni loyi Xikwembu xi n’wi endleke “mukutsuri.” (1 Timotiya 2:5, 6; Daniel 7:13, 14; Vafilipiya 2:9-11) Munhu la khuvuriwaka hi moya lowo kwetsima wa swi xiya leswaku i matimba ya Xikwembu lama tirhaka, lama tirhisiwaka hi Yehova eka swivumbiwa ni ku huhutela vatsari va Bibele, na hi tindlela tin’wana. (Genesa 1:2; 2 Petro 1:21) Kavula, swi tele ngopfu swa ku swi dyondza hi Xikwembu, Kriste ni moya lowo kwetsima.

15. Ha yini munhu a fanele a kombisa ripfumelo a nga si khuvuriwa?

¹⁵ Munhu u fanele a va ni ripfumelo leri sekeriweke eka vutivi lebyi kongomeke, emahlweni ka nkhuvulo. “Ehandle ka ku pfumela a swi endleki ku tsakisa [Yehova].” (Vaheveru 11:6) Munhu loyi a pfumelaka eka Xikwembu, Kriste ni xikongomelo xa Xikwembu u ta swi tsakela ku va un’wana wa Timbhoni ta Yehova, a hanya hi ku pfumelelana ni Rito ra Xikwembu naswona a hlanganyela hi xitalo eku chumayeleni ka mahungu lamanene. U ta vulavula hi ku vangama ka vuhosi bya Yehova.—Pisalema 145:10-13; Matewu 24:14.

16. Ku hundzuka i yini, naswona ku yelana njhani ni nkhuvulo wa Vukriste?

¹⁶ Ku hundzuka i xilaveko xin’wana xa le mahlweni ka nkhuvulo. Ku hundzuka swi vula ku “cinca mianakanyo ya munhu eka swiendlo kumbe mahanyelo ya khale (kumbe leswi a a swi ehleketile), hikwalaho ka ku tisola kumbe ku nga eneriseki,” kumbe “ku titwa u tisola, u nyenya kumbe u karhatiwa hi leswi u swi endleke kumbe leswi u nga swi endlangiki.” Vayuda va lembe xidzana ro sungula a va fanele ku tisola loko va dyohele Yesu Kriste. (Mintirho 3:11-26) Vapfumeri van’wana eKorinto va tisorile eka vuoswi, ku gandzela swikwembu swa hava, vumbhisa, vusodoma, ku yiva, makwanga, vudakwa, ku rhuketela ni ku dyelela. Hikwalaho ka sweswo va “basisiwile” engatini ya Yesu, va ‘kwetsimisiwile’ tanihi lava hlawuleriweke ntirho wa Yehova, naswona “va endliwile . . . lava lulameke” evitweni ra Yesu Kriste na hi moya wa Xikwembu. (1 Vakorinto 6:9-11) Kutani ku hundzuka i goza leri yisaka eka ripfalo lerinene ni ntshunxeko lowu nyikiweke hi Xikwembu eku karhatekeni loku khomisaka gome ka xidyoho.—1 Petro 3:21.

17. Ku tivula swidyoho swi vula yini, naswona ku laveka yini eka munhu loyi a kunguhataka ku khuvuriwa?

¹⁷ Ku tivula swidyoho ku fanele ku va kona munhu a nga si khuvuriwa tanihi wun’wana wa Timbhoni ta Yehova. Ku tivula swidyoho ka munhu la hundzukaka ku va kona endzhaku ka loko a tshike ndlela ya yena yo biha naswona a tiyimisele ku endla leswi lulameke. Maendli ya Xiheveru ni Xigriki lama yelanaka ni ku tivula swidyoho ma vula “ku hundzuka, ku tlhela kumbe tlhelela.” Loko ma tirhisiwa hi mongo lowunene hi tlhelo ra moya, ma vula ku hundzukela eka Xikwembu ku suka endleleni leyi hoxeke. (1 Tihosi 8:33, 34) Ku tivula swidyoho ku yelana ni “mintirho leyi fambelanaka ni ku hundzuka,” leswaku hi endla leswi Xikwembu xi hi lerisaka swona, hi tshika vukhongeri bya mavunwa, naswona hi yisa timbilu ta hina hi laha ku tiyeke eka Yehova leswaku hi tirhela yena ntsena. (Mintirho 26:20; Deuteronoma 30:2, 8, 10; 1 Samuel 7:3) Leswi swi lava “timbilu le’tintŝha ni mimoya le’yintŝha,” mianakanyo, ku tsana ni xikongomelo xa vutomi leswi cinciweke. (Ezekiel 18:31) Vumunhu lebyintshwa lebyi vaka kona byi pfala mimboyamelo yo biha hi timfanelo ta ku chava Xikwembu. (Vakolosa 3:5-14) Ina, ku hundzuka ka xiviri ku endla munhu a ‘hundzuluka.’—Mintirho 3:19.

18. Ha yini hi tinyikela eka Xikwembu hi xikhongelo, naswona hi wihi nkoka wa goza leri?

¹⁸ Ku tinyikela eka Xikwembu hi xikhongelo ku fanele ku rhangela nkhuvulo. (Ringanisa Luka 3:21, 22.) Ku tinyikela swi vula ku vekela ntirho wo kwetsima etlhelo. Goza leri i ra nkoka swinene lerova hi fanele hi phofula eka Xikwembu hi xikhongelo xiboho xa hina xo tinyikela eka xona ntsena ni ku xi tirhela hi laha ku nga heriki. (Deuteronoma 5:8, 9; 1 Tikronika 29:10-13) Kavula, a hi tinyiketeli entirhweni kambe eka Xikwembu hi xoxe. Yinhla yoleyo yi tshame yi vekiwa erivaleni, enkosini wa muungameri wo sungula wa Sosayiti ya Watch Tower, Charles Taze Russell. Eka xiendlakalo xexo hi 1916, matsalani, tlhelo mukhomi wa mali, wa Sosayiti, W. E. Van Amburgh, u te: “Ntirho lowu wa misava hinkwayo i wukulu, a hi wa munhu un’we. I wukulu swinene ku ri na sweswo. I ntirho wa Xikwembu naswona a wu cinci. Xikwembu xi tirhise malandza yo tala enkarhini lowu hundzeke naswona handle ko kanakana xi ta tirhisa yo tala enkarhini lowu taka. A hi tinyiketelanga eka munhu kumbe entirhweni wa munhu, kambe ku endla ku rhandza ka Xikwembu, tanihi leswi xi nga ta hi paluxela hi ku tirhisa Rito ra xona ni minkongomiso ya vutlhari. Xikwembu xa ha ri xona lexi lawulaka.” Kambe i yini swin’wana leswi faneleke swi endliwa mayelana ni ku tinyikela eka Xikwembu?

19. (a) Vanhu va byi nyikela njhani vumbhoni bya le rivaleni bya ku tinyikela eka Yehova? (b) Nkhuvulo wa mati i mfungho wa yini?

¹⁹ Vumbhoni bya le rivaleni bya ku tinyikela eka Yehova byi nyikeriwa loko munhu a khuvuriwa. Nkhuvulo i mfungho lowu kombisaka leswaku munhu loyi a nghenisiwaka ematini u tinyiketele eka Yehova Xikwembu hi laha ku tiyeke, ha Yesu Kriste. (Ringanisa Matewu 16:24.) Loko munhu la khuvuriwaka a nghenisiwa ematini ivi a humesiwa, hi ndlela yo fanekisela wa fa endleleni ya yena ya khale ya vutomi kutani u pfuxeriwa endleleni leyintshwa ya vutomi, leswaku sweswi a endla ku rhandza ka Xikwembu hi laha ku heleleke. (Ringanisa Varhoma 6:4-6.) Loko Yesu a khuvuriwile, u tinyikele eka Tata wa yena wa le tilweni hi ndlela leyi heleleke. (Matewu 3:13-17) Matsalwa ma kombisa hi ku phindha-phindha leswaku vapfumeri lava fanelekaka va fanele va khuvuriwa. (Mintirho 8:13; 16:27-34; 18:8) Hikwalaho, leswaku munhu a ta va un’wana wa Timbhoni ta Yehova namuntlha, u fanele a va mupfumeri loyi a nga ni ripfumelo hakunene naswona a khuvuriwa.—Ringanisa Mintirho 8:26-39.

Yima U Tiya!

20. Hi swihi swikombiso swin’wana swa Bibele leswi kombisaka leswaku hi ta katekisiwa loko hi teka xiyimo xa ntshunxeko lowu humaka eka Xikwembu tanihi Timbhoni leti khuvuriweke ta Yehova?

²⁰ Loko u teke xiyimo lexi tiyeke xa ntshunxeko lowu humaka eka Xikwembu hi ku va Mbhoni leyi khuvuriweke ya Yehova, xi ta ku katekisa hi laha xi katekiseke malandza ya xona enkarhini lowu hundzeke. Hi xikombiso, Yehova u katekise Abrahama na Sara lava dyuhaleke hi Isaka, n’wana la chavaka Xikwembu. Hi ripfumelo muprofeta Muxe u hlawule ku khomiwa hi ndlela yo biha ni vanhu va Xikwembu “ku ri na ku titsakisa nkarhinyana hi ku hanya eku dyoheni. U ehleketile leswaku ku rhuketeriwa hikwalaho [ko vuriwa] Mesiya [kumbe Mutotiwa wa Xikwembu] i rifuwo leri tlulaka vukosi hinkwabyo bya Egipta.” (Vaheveru 11:24-26) Muxe u ve na lunghelo ro tirhisiwa hi Yehova leswaku a rhangela Vaisrayele va huma evuhlongeni bya Egipta. Ku tlula kwalaho, leswi a tirheleke Xikwembu hi ku tshembeka, u ta pfuxiwa naswona u ta tirha tanihi un’wana wa “tihosana e misav̌eni hikwayo” ehansi ka Yesu Kriste, Muxe Lonkulu.—Psalma 45:16; Deuteronoma 18:17-19.

21. I swikombiso swihi leswi khutazaka leswi nyikeriwaka hi vavasati lava chavaka Xikwembu va nkarhi wa khale?

²¹ Vakriste lava totiweke namuntlha va nga khutaziwa nakambe hi ku xiya vavasati lava ntshunxekeke ni ku tsaka hakunene. Un’wana wa vona a a ku ri Rhuti wa Mumowabu, loyi a tweke ku vava ka ku va noni, swin’we ni ntsako wa ku ntshunxiwa hi Xikwembu eka vukhongeri bya mavunwa. U namarhele n’wingi wakwe loyi a a ri noni, Nahumi, a tshika vanhu va ka vona ni swikwembu swa yena. Rhuti u te: “Nḍi ya laha u yaka kona, nḍi ta ṭhama laha u nga ta ṭhama kona; tiko ra wena ri ta v̌a tiko ra mina, Šikwembu ša wena ši ta v̌a Šikwembu ša mina.” (Ruti 1:16) Tanihi nsati wa Bowazi, Rhuti u ve mana wa Obede kokwana wa xinuna wa Davhida. (Ruti 4:13-17) Phela, Yehova u nyike wansati loyi wo titsongahata la nga riki Muisrayele, “hakelo le’yi hetisekeke” hi ku n’wi pfumelela leswaku a va kokwana wa Yesu, Mesiya! (Ruti 2:12) Mawaku ndlela leyi Rhuti a nga ta tsaka ha yona loko a pfuxiwa ivi a twa leswaku u ve ni lunghelo ro tano! Handle ko kanakana ntsako lowu fanaka wu ta tata mbilu ya Rahava khale ka muoswi loko a pfuxiwa, loyi a ntshuxiweke eka ku tikhoma ko biha ni vugandzeri bya mavunwa, kun’we na Bati-xeba la dyoheke kambe a tlhela a hundzuka, hikuva na vona va ta swi tiva leswaku Yehova u va pfumelele leswaku va va vakokwana wa Yesu Kriste.—Matewu 1:1-6, 16.

22. I yini leswi nga ta kambisisiwa eka xihloko lexi landzelaka?

²² Vanhu lava amukeleke ntshunxeko lowu humaka eka Xikwembu ku hlaya vona i ku xurha. Hi xikombiso, nhlayo ya vona yi katsa vavanuna ni vavasati va ripfumelo lava boxiweke eka Vaheveru ndzima 11. Va xanisiwile ni ku kayakayisiwa, “naswona misava a yi nga va fanelanga.” Valandzeri va Kriste vo tshembeka va lembe xidzana ro sungula ni van’wana vo tshembeka ku sukela enkarhini wolowo, ku katsa ni timiliyoni leti tirhelaka Yehova sweswi tanihi Timbhoni takwe, va engetela nhlayo ya vona. Hi laha hi nga ta vona ha kona enkarhini lowu taka, loko u teke xiyimo xa ntshunxeko lowu humaka eka Xikwembu, u na swivangelo swo tala swa leswaku u tsaka.

A Wu Ta Hlamula Njhani?

◻ I ntshembo wihi lowu Xikwembu xi wu nyikeleke loko ntshunxeko lowu humaka eka Xikwembu wu lahliwile?

◻ Hi rihi “joko ra vuhlonga” leri Yesu a ntshunxeke valandzeri vakwe eka rona?

◻ I magoza wahi lama lavekaka emahlweni ko khuvuriwa tanihi un’wana wa Timbhoni ta Yehova?

◻ Hi swihi swikombiso swa Matsalwa leswi kombisaka leswaku hi ta katekisiwa loko hi yimela ntshunxeko lowu humaka eka Xikwembu?

[Xifaniso lexi nga eka tluka 16]

Xana wa ma tiva magoza lama lavekaka emahlweni ko khuvuriwa tanihi un’wana wa Timbhoni ta Yehova?