Vanhu Lava Tsakeke—Ha Yini?

VAKRISTE va ntiyiso namuntlha i vanhu lava tsakeke. Kahle-kahle, hi tirhela ‘Xikwembu lexi tsakeke,’ Yehova. (1 Timotiya 1:11) U hi nyika moya wa yena, kutani muhandzu wa moya wolowo i ntsako.—Vagalatiya 5:22.

Ntsako wo tano lowukulu wa tiyisela ni ku hlula ntshikilelo. Hi xikombiso, Yesu u twisiwile ku vava hi ku vambiwa ni nhlomulo wa ku avanyisiwa tanihi murhukani. Kambe, ‘hikwalaho ka ku tsaka loku vekiweke emahlweni ka yena u tiyiserile mhandzi ya nxaniso.’ (Vaheveru 12:2) Yesu u swi tivile leswaku emahlweni ka yena ku na minkarhi ni malunghelo lamanene mayelana ni ntirho wakwe eka Yehova. Ku languta eka malunghelo lawa ya nkarhi lowu taka swi n’wi pfunile ku hlayisa ntsako wakwe exikarhi ka ku xaniseka.

Yesu u lava leswaku vadyondzisiwa vakwe va va lava tsakeke na vona. U te: “Ndzi mi byerile timhaka leti, leswaku ku tsaka ka mina ku va eka n’wina, ni leswaku ku tsaka ka n’wina ku va loku hetisekeke.” (Yohane 15:11) Leswi swi tikombe swi ri ntiyiso hi Timbhoni ta Yehova namuntlha. Swi tele swivangelo swa leswaku hi va vanhu lava tsakeke. Hi tiva ntiyiso, lowu hi ntshunxaka eka vukholwa-hava ni ripfumelo ra vukhongeri byo hemba. (Yohane 8:32) Kutani, hi tiva laha hi nga kona naswona hi tsakela ntshembo wa ku ponisiwa lowu nga ta ta hi ku anghwetla. (Luka 21:28) Nakambe hi sirheletiwile eka swirhalanganya swo tala—exikarhi ka swona ku na mavabyi lama tsemaka nhlana yo tluletana hi rimbewu—leswi swi welaka lava va nga tirhisiki mahanyelo lamanene lama sekeriweke eBibeleni. Hi tsakela vuxaka lebyinene ni vanhu lava tsakelaka ku endla ku rhandza ka Yehova. Naswona, hi na lunghelo lerinene ro hlanganyela eku chumayeleni ka mahungu lamanene ya Mfumo ni ku endla vadyondzisiwa hi vanhu lava fanaka ni tinyimpfu.—Matewu 24:14; 28:19, 20.

Kambe loko leswi ku ri ntiyiso hi Timbhoni ta Yehova, ku vuriwa yini hi wena ha wexe? Ha yini ku nga vuriwaka leswaku u na xivangelo xo tsaka kun’we ni vanhu hinkwavo va Yehova?

Ku Kuma Ntsako eNtirhweni Wo Twarisa Evangeli

Van’wana va kuma swi nonon’hwa ku nghenela ntirho wo chumayela hi yindlu na yindlu. Kumbexana swa va nonon’hwela ku tshinelela vanhu ivi va sungula mabulo. Kumbe va nga ha titwa va nga fanelekanga loko swi ta eku dyondziseni ka van’wana. Xana u titwa hi ndlela yoleyo hi minkarhi yin’wana? Loko swi ri tano, u nga kuma ntsako entirhweni wo twarisa evangeli hi ndlela yihi?

Xo sungula, hlayisa langutelo lerinene. Vanhu vo tala va ta tsaka loko va thoriwa hi van’wana lava tlangelaka kumbe van’wapolitiki lava tivekaka. Kambe mawaku ntsako wonghasi lowu hi faneleke ku wu kuma eku tirhisiweni hi “Hosi ya minkarhi hinkwayo,” Yehova Xikwembu!—1 Timotiya 1:17.

Nakambe, tsundzuka leswaku lowu i ntirho lowu nga ta ka wu nga ha phindhiwi nakambe. Anakanya hi swona! Tintsumi ti letela ni ku kongomisa Vakriste laha emisaveni eku ringeteni ka vona ku hlengeleta vanhu lava fanaka ni tinyimpfu. (Nhlavutelo 14:6) Xana leswi a swi tisi ntsako embilwini ya wena?

Ku Kuma Ntsako Hi Ku Andza Ka Mfumo

Xivangelo xin’wana xo va ni langutelo lerinene ra ntirho wa ku chumayela i mbuyelo lowunene lowu nga kona. Bibele yi vhumbile: “Lo’nṭongo o ta v̌a khume ra madzana, lo’nṭongo ngopfu, o ta v̌a tiko le’ra matimba. Mina, Yehova, nḍi hatlisisa ŝilo leŝi e mikarini ya ŝona.” (Esaya 60:22) Xitshembiso lexi xa Yehova xi ve ntiyiso hi minkarhi ya sweswinyana. Hi xikombiso, hi lembe ra ntirho ra 1986, 225 868 va khuvuriwile ku kombisa ku tinyiketela ka vona ka moya hinkwawo eka Yehova Xikwembu. A ku ri na ku andza ka tiphesente ta 6,9 eka avhareji ya nhlayo leyi hlanganyelaka eku hangalaseni ka mintiyiso ya Bibele eka van’wana.

Handle ko kanakana ku andza loku i vumbhoni ebandlheni kumbe xifundza xa ka n’wina. Vanhu lavantshwa va ta eminhlanganweni ni ku endla ku hundzuka loku faneleke evuton’wini bya vona leswaku va ta kota ku tirhela Xikwembu. Xana leswi a swi kombi swona leswaku ntirho wa ku chumayela wu katekisiwa hi Yehova? Ku hlanganyela eka ku andza loku xisweswo ku nga va xihlovo xa ntsako lowukulu eka wena. I ntiyiso, u nga ha va u nga dyondzanga na munhu ku fikela eyinhleni yo khuvuriwa. Kambe hi nga ka hi nga swi teki ku ri hakelo ku tisa munhu un’wana entiyisweni. ‘Xikwembu hi xona xi miriseke,’ hi ku vula ka Pawulo. (1 Vakorinto 3:6-9) Swirho hinkwaswo swa bandlha swa hlanganyela eku pfuneni ka vanhu lavantshwa. Hi ndlela yihi? Hi ku va kona eminhlanganweni, ku hlamula, ku xeweta lavantshwa hi malwandla ni ku hanya hi ndlela leyi endlaka leswaku ntiyiso wu ya emahlweni.

Hambi swi ri tano, ntsako lowukulu wu nga kumiwa loko u hlanganyela hi xitalo entirhweni wo chumayela ni ntirho wa dyondzo ya Bibele ya le kaya. N’waxemu, hi xiringaniso, ku fambisiwile 2 726 252 wa tidyondzo ta Bibele ta vhiki na vhiki. Hikwalaho ka yini u nga endli matshalatshala lama engetelekeke yo hlanganyela entirhweni lowu wo tsakisa? Nyikela dyondzo ya Bibele eka un’wana loyi u n’wi tivaka, kumbexana muakelani kumbe munhu loyi u n’wi fambiseleke buku. Kombela mpfuno eka Yehova eku hlengeleteni ka vanhu vo tano lava fanaka ni tinyimpfu.

Ku Hlula Swihinga Swa Ntsako

Kavula, loko munhu a titwa a nga faneriwi hi ku dyondzisa van’wana, leswi hakunene ku nga va xiphiqo eku kumeni ka yena ntsako evutirhelini bya nsimu. Kambe, tsundzuka leswaku “matimba ya hina ma huma eka Xikwembu.” (2 Vakorinto 3:5) Kutani hi ku tirhisa nhlengeletano ya yena Yehova u lunghiselele mimpfuno yo tala leyinene ku hi pfuna ku faneleka tanihi vatirheli lava humelelaka.

Xo sungula, ku ni vo tala exikarhi ka hina lava va tirheleke Xikwembu hi nkarhi wo leha naswona va tokote swo tala evutirhelini bya nsimu. Hi nga hlanganyela ni vatirheli lava nga ni ntokoto evutirhelini bya vona ivi hi dyondza eka vona. Ku tlula kwalaho, n’hweti na n’hweti miehleketo leyinene ya humelela eka Vutirheli Bya Hina Bya Mfumo. Kutani ku na buku leyi nge Reasoning From the Scriptures, leyi khomeke rifuwo ra vuxokoxoko ro lota vutshila bya hina byo chumayela. Tirhisa switirho leswi ivi u lunghiselela swinene evutirhelini bya nsimu. Anakanya hi tindlela letintshwa ni leti tsakisaka to ti tivisa ekaya ka munhu. Kumbe xiya tindlela leti hambaneke to kokela vini va tindlu eku vulavurisaneni. Loko u ri karhi u humelela ensin’wini, ku hiseka ka wena ni ntsako eku chumayeleni handle ko kanakana ku ta andza.

Vutirheli byi tsakisa swinene loko hi swi kota ku vulavula ni vanhu. Eka tinsimu tin’wana leswi swi tekiwa tanihi xirhalanganya. Xana u nga lunghiselela ku hlanganyela entirhweni wa nsimu hi nkarhi lowu vanhu vo tala va nga le makaya, yo tanihi nindzhenga? Vo tala va kuma ku endla tano swi humelela. Nakambe ku nga va ni migingiriko ni ku vulavula ni vanhu hinkwako laha va kumekaka kona—eswitarateni, va tshame eswitulwini swa phaka, va hlantswa mimovha ya vona. Tsundzuka leswaku vanhu va lava ntiyiso ni leswaku vutomi bya katseka. Leswi swi nga pfuna ku ku susumetela ku hlula mikhuva yo nyuma. Hambi ku ri ntiyiso leswaku vunyingi lebyikulu bya vanhu byi nga ka byi nga swi amukeri, lava va swi amukelaka va hi tisela ntsako wo tala.

Hambi swi ri tano, wun’wana wa mimpfuno leyikulu eku hlayiseni ka hina ka ntsako i xikhongelo. Kombela Yehova a ku nyika moya wa yena ku ku tiyisa ni ku ku khutaza. Pawulo u te: “Ndzi nga endla hinkwaswo hi matimba ya Loyi a ndzi tiyisaka.” (Vafilipiya 4:13) Na hina hi nga titwa hi ndlela yoleyo loko hi dyondza ku tiseketela hi Yehova hi xitalo.

Ku Tiyisela Tanihi Vanhu Lava Tsakeke

Vanhu vo tala a va wu tlangeli ntirho wa hina. Yesu a a swi tiva leswaku leswi a swi ta humelela. Kutani loko a rhume valandzeri vakwe ku ya chumayela, u va tsundzuxile: “Kutani loko va nga mi amukeri, kumbe loko va nga yingisi marito ya n’wina, humani endyangwini wolowo, kumbe emutini wolowo, mi phumunha ntshuri emilengeni ya n’wina. . . . Vonani, ndzi mi rhuma mi fana ni tinyimpfu exikarhi ka timhisi; hikwalaho ke tlharihani kukota tinyoka, mi va lavo rhula kukota magugurhwana.” Nakambe Yesu u te: “Hambi yi ri misisi ya tinhloko ta n’wina yi hlayiwile hinkwayo. Hikokwalaho mi nga chaveni.”—Matewu 10:11-16, 30, 31.

Marito lawa ma hi pfuna ku tiyisela hi ku tsaka. Ya hi pfuna ku tsundzuka leswaku loko hi hlangavetana ni vanhu lava nga tlangeriki matshalatshala ya hina eka vona, ha ha tivisa vito ra Yehova; ha ha n’wi dzunisa. (Psalma 100:4, 5) Hi laha ku tsakisaka, minkarhi yin’wana vini va muti lava alaka ku pfula nyangwa va nga ha twiwa va ku eka van’wana: “A ku ri Timbhoni ta Yehova.” Ina, handle ko vula ka hina rito, vito ra Yehova ri xiximiwile, naswona vanhu va kumile ndlela yo amukela kumbe ku ala ntiyiso. (Matewu 25:31, 32) Kutani hambi ya ri masimu lama nga hava mihandzu ma nga ha tiyiseriwa hi ku tsaka.

Handle ka sweswo, a hi swi tivi leswaku vanhu vo tano va ta hundzuka rini emalangutelweni ya vona. Siku rin’wana, wansati loyi a hlongoleke makwerhu wa xisati wa Mukriste ekaya kakwe hi makhamba yo tala u vutisile makwerhu loko a ri na buku yin’wana leyintshwa. Makwerhu wa xisati u hlamarile ivi a tsundzuka leswaku wansati wa kona a a nga si tshama a amukela buku ya Bibele. Wansati u hlamusele leswaku nuna wakwe a a tirha ni wanuna loyi a a dyondza Bibele ni Timbhoni ta Yehova. A a nyike yena ni nuna wakwe yin’wana ya tibuku ta Sosayiti ya Watch Tower. Hikwalaho ko lava ku tiva, wansati u yi hlayile naswona u xiyile mahungu ya kona tanihi ntiyiso. Kutani u anakanye kwalaho leswaku nkarhi lowu landzelaka loko Mbhoni yi ta u ta yi nghenisa. Dyondzo ya le kaya ya Bibele yi sunguriwile, kutani endzhaku wansati u vile mbhoni leyi tinyiketeleke ya Yehova!

Hina xisweswo hi na lunghelo lerikulu—lunghelo ra ku tsaka—ro twarisa mahungu ya ntshembo emisaveni leyi. Kutani ntirho wa ku chumayela i xiavelo lexi Xikwembu xi hi nyikeke xona emasikwini lawa ya makumu. Wu fanele ku endliwa makumu ma nga si ta. (Matewu 24:14) Swi ta teka nkarhi wo tanihi kwihi makumu ya mafambiselo yo biha ya Sathana ma nga si hela? Ha swi tiva leswaku makumu a ma nga hlweli. (Ringanisa Habakuk 2:3.) Sweswi, ka ha ri na nkarhi wa leswaku van’wana va dyondza ntiyiso. A hi tirhiseni nkarhi lowu saleke kutani hi ku hiseka hi va entirhweni wa hina wo chumayela. Kutani a hi veni ni langutelo lerinene, hi tirha hi matimba leswaku ‘hi ta tiponisa ni ku ponisa vayingisi va hina.’ (1 Timotiya 4:16) Hi ku endla tano, hi ta tshama hi ri vanhu lava tsakeke hi hlanganyela eku andzeni ka Mfumo.

[Xifaniso lexi nga eka tluka 23]

Ntirho wa hina wo twarisa evangeli i xihlovo xa ntsako wa ntiyiso—hambi loko vanhu va nga amukeli mahungu ya Mfumo