A Hi Kombiseni Ku Tlangela—Xitsundzuxo Xi Ta Tlangeriwa Hi April 17
1. I ku titwa kwihi ka mupisalema loku kahle-kahle ku kombisiwaka hi nkarhi wa Xitsundzuxo?
1 Hi ku susumetiwa hi mintirho yo tala ya Yehovha ya tintswalo ni ya ku ponisa, mupisalema u vutisile a ku: “Xana ndzi ta tlherisela yini eka Yehovha hikwalaho ka hinkwaswo leswi pfunaka leswi a ndzi endleleke swona?” (Ps. 116:12) Namuntlha, malandza ya Xikwembu ma ni swivangelo swo tala swo tlangela. Endzhaku ka malembe yo tala marito lawa lama huhuteriweke ma tsariwile, Yehovha u nyike vanhu nyiko leyikulu swinene—ku nga nkutsulo. Loko hi ri karhi hi tilunghiselela ku tsundzuka rifu ra Kreste hi April 17, hi ni xivangelo lexi twalaka xo kombisa leswaku ha tlangela.—Kol. 3:15.
2. I swivangelo swihi swin’wana leswi endlaka hi fanele hi tlangela nkutsulo?
2 Mikateko Leyi Tisiwaka Hi Nkutsulo: Hikwalaho ka nkutsulo, hi kuma “ku rivaleriwa ka swidyoho swa hina.” (Kol. 1:13, 14) Leswi swi hi pfuna leswaku hi gandzela Yehovha hi ripfalo leri baseke. (Hev. 9:13, 14) Hi tsakela ntshunxeko wo vulavula na Yehovha loko hi titshineta eka yena hi xikhongelo. (Hev. 4:14-16) Lava kombisaka ripfumelo eka nkutsulo va ni ntshembo lowukulu wa vutomi lebyi nga heriki!—Yoh. 3:16.
3. Hi nga ku kombisa njhani ku n’wi tlangela ka hina Yehovha malunghana ni nkutsulo?
3 Kombisa Ku Tlangela: Ndlela yin’wana leyi hi kombisaka ku tlangela swinene ha yona i ku va siku ni siku hi fambisana ni ku hlaya ka Bibele ka Xitsundzuxo hi tlhela hi anakanyisisa hi leswi hi swi hlayeke. Xihloko lexi nge “Xana U Ri Lunghekerile Siku Ra Nkoka Swinene eLembeni” eka Xihondzo xo Rindza xa February 1, 2011 xi endleriwe ku hi pfuna leswaku hi endla tano. Nakambe hi nga tivisa Yehovha hi xikhongelo lexi humaka embilwini ndlela leyi hi tekaka nkutsulo ha yona. (1 Tes. 5:17, 18) Ku yingisa ka hina xileriso xa Yesu hi ku va kona eXitsundzuxweni, hi kombisa leswaku ha tlangela. (1 Kor. 11:24, 25) Nakambe, hi nga tekelela rirhandzu ra Yehovha hi ku rhamba vanhu hilaha hi nga kotaka hakona leswaku va ta hlanganyela na hina.—Esa. 55:1-3.
4. Xana xi fanele xi va xihi xikongomelo xa hina?
4 Malandza ya Yehovha lama tlangelaka a ma teki Xitsundzuxo tanihi minhlangano yin’wana. I nhlangano wa nkoka swinene elembeni! Tanihi leswi Xitsundzuxo xi nga kwala nyongeni, onge xikongomelo xa hina xi nga fana ni xa mupisalema loyi a tsaleke a ku: “Dzunisa Yehovha, Wena moya-xiviri wa mina, u nga swi rivali swiendlo swakwe hinkwaswo.”—Ps. 103:2.