Xana U Nga Hlanganyela eNtirhweni Wa Nsimu Hi Sonto?
1. Xana hi nga dyondza yini eka Pawulo ni vanghana vakwe loko va ri eFilipiya?
1 Vayuda vo tala eFilipiya a va wisa hi siku ra Savata. Pawulo ni vanghana vakwe a va endzele muti wolowo eka rin’wana ra maendzo ya vona ya vurhumiwa. Ku hava ni un’we loyi a a ta va sola hi siku rero hileswi na vona va nga wisa evutirhelini bya vona. Hambiswiritano, a va swi tiva leswaku Vayuda a va hlengeletane ehandle ka muti leswaku va khongela, kutani va tirhise nkarhi wolowo leswaku va va chumayela. Wa nga vona ntsako lowu Pawulo ni vanghana vakwe va veke na wona loko Lidiya ni vandyangu wakwe hinkwavo va yingisa kutani va khuvuriwa! (Mint. 16:13-15) Leswi vanhu vo tala va wisaka hi Sonto, hikwalaho ka yini u nga tinyiki nkarhi wo va chumayela hi siku leri?
2. Hi yihi mintlhontlho leyi vanhu va Yehovha va langutaneke na yona ku endlela leswaku va kota ku chumayela hi Sonto handle ko xanisiwa?
2 Ku Kavanyetiwa Ka Ntirho Wo Chumayela Hi Sonto: Hi 1927, vanhu va Yehovha va khutaziwe leswaku va tinyika nkarhi wo hlanganyela entirhweni wa nsimu Sonto yin’wana ni yin’wana. Leswi swi endle leswaku va kanetiwa. Vo tala va khomiwile eUnited States hikwalaho ko tlula milawu ya Savata, va kavanyeta ku rhula ni ku xavisa handle ka mpfumelelo. Kambe vanhu va Yehovha a va tshikanga ku chumayela. Hi va-1930, va hlele “matsima yo hambana-hambana,” laha vahuweleri va le mavandlheni ya le kusuhi a va hlangana leswaku va hlanganisa nsimu. Hi nkarhi lowu vahuweleri a va khomiwa, ku ni vo tala lava valawuri va tsandzekeke ku va tshikisa ku chumayela. Xana hakunene wa ma tlangela matshalatshala lawa vamakwerhu volavo va ma endleke leswaku na hina hi ta kota ku chumayela hi Sonto handle ko xanisiwa?
3. I yini leswi endlaka leswaku Sonto ku va siku lerinene ro hlanganyela entirhweni wa nsimu?
3 Siku Ra Kahle Ro Chumayela Ha Rona: Hi Sonto vanhu vo tala va kumeka emakaya. Hakanyingi va va va tiwiserile. Hi siku leri, vanhu van’wana lava nghenaka kereke va nga ha va va tiyimisele swinene ku vulavula hi Xikwembu. Loko hi ri ni minhlangano hi Sonto, hi va se hi ambale kahle tanihi leswi hi nga ta ya ensin’wini, kutani hikwalaho ka yini hi nga hleli ku ya entirhweni wa nsimu hi nga si ya emimhlanganweni kumbe endzhaku ka yona? Loko swi koteka, famba ni swo miyeta nyoka.
4. Hi wihi ntsako lowu hi nga vaka na wona loko hi tinyika nkarhi wo hlanganyela entirhweni wa nsimu hi Sonto?
4 Loko hi tinyika nkarhi wo hlanganyela entirhweni wa nsimu hi Sonto, ha ha ta va na wona nkarhi lowu hi wu lavaka wo wisa. Naswona ku wisa ka hina ku ta landzeriwa hi ku eneriseka loku tisiwaka hi ku hlanganyela eka ntirho wo kwetsima. (Swiv. 19:23) Hi nga tlhela hi va ni ntsako loko hi kuma un’wana la fanaka na Lidiya!