Tindlela Ta Ntlhanu To Kuma Dyondzo Ya Bibele
1. Loko swi hi tikela ku kuma dyondzo ya Bibele ensin’wini ya hina, hi fanele hi endla yini naswona ha yini?
1 Xana swa ku tikela ku kuma munhu loyi u nga dyondzaka na yena Bibele? U nga wi mapa. Yehovha u katekisa lava hambetaka va endla ku rhandza ka yena. (Gal. 6:9) Laha hansi ku ni swiringanyeto swa ntlhanu leswi nga ku pfunaka.
2. Hi nga yi kombela njhani dyondzo ya Bibele hi ku kongoma?
2 Kombela Dyondzo Ya Bibele Hi Ku Kongoma: Vanhu vo tala va tiva leswaku hi va nyika Xihondzo xa Rindza ni Xalamuka! kambe swi nga endleka va nga swi tivi leswaku hi fambisa tidyondzo ta Bibele. Ha yini u nga ringeti ku kombela dyondzo ya Bibele hi kongoma loko u chumayela hi yindlu ni yindlu? U nga ha tlhela u kombela vanhu lava tsakelaka lava u va endzelaka leswaku u dyondza na vona Bibele. Loko va ala, u nga hambeta u va siyela minkandziyiso naswona u hlakulela ku tsakela loku va nga na kona. Makwerhu un’wana u hete malembe a ri karhi a fambisela mpatswa wo karhi timagazini. Endzhaku ko wu siyela timagazini ta sweswinyana, u lerile kambe endzhakunyana u wu vutise a ku: “Xana mi nga yi tsakela dyondzo ya Bibele?” U hlamarile loko wu vula leswaku wu nga yi tsakela. Sweswi wu khuvuriwile.
3. Xana hi fanele hi ehleketa leswaku vanhu lava taka eminhlanganweni va dyondzeriwa Bibele hi un’wana? Hlamusela.
3 Rhamba Lava Tsakelaka: U nga ehleketi leswaku vanhu lava tsakelaka lava taka eminhlanganweni ya vandlha se va dyondzeriwa Bibele. Makwerhu un’wana wa vika: “Ku tlula hafu ya vanhu lava a ndzi dyondza na vona Bibele, ndzi va kume eminhlanganweni.” Makwerhu un’wana wa xisati u ye eka wansati un’wana la nga ni tingana loyi vana vakwe va vanhwanyana lava khuvuriweke va hlanganyelaka evandlheni leri a nga eka rona. Wansati yoleyo a a ri ni malembe ya 15 a ri karhi a ya eminhlanganweni naswona minkarhi hinkwayo a a fika eHolweni ya Mfumo loko minhlangano ya ha ku sungula ivi a famba hi ku hatlisa loko minhlangano yi hela. Makwerhu wa xisati u tsale a ku: “Ndza tisola hileswi ndzi yimeke malembe ya 15 ku va ndzi n’wi kombela ku dyondza na yena Bibele!”
4. Swi nga hi pfuna njhani ku vutisa van’wana loko ku ri ni lava va va tivaka va nga tsakelaka ku dyondzeriwa?
4 Ndlela Yo Kuma Dyondzo Ya Bibele: Makwerhu un’wana wa xisati u tsakela ku famba ni van’wana eka tidyondzo ta vona ta Bibele. Endzhaku ka dyondzo ni loko a kume mpfumelelo eka mudyondzisi u vutisa xichudeni loko xi tiva van’wana lava nga tsakelaka ku va ni dyondzo ya Bibele. Loko u fambisela munhu loyi u n’wi endzelaka buku leyi nge Leswi Bibele Yi Swi Dyondzisaka, u nga ha n’wi vutisa u ku: “Xana u kona un’wana u n’wi tivaka loyi a nga swi tsakelaka ku kuma buku leyi?” Minkarhi yin’wana swiyimo a swi va pfumeleli vahuweleri ni maphayona ku va va fambisa dyondzo ni munhu wo karhi loyi va hlanganaka na yena ensin’wini. Hikwalaho, swi nga va swinene ku tivisa vamakwerhu volavo leswaku u nga swi kota ku va pfuna loko ku ri ni munhu wo karhi loyi a lavaka ku dyondzeriwa.
5. Ha yini hi fanele hi vutisa vanghana vukati va vamakwerhu lava hi hlanganyelaka na vona loko va ta swi tsakela ku dyondza Bibele?
5 Vanghana Va Vukati Lava Nga Riki Vapfumeri: Xana ku na vahuweleri lava tekaneke ni vanhu lava nga riki vapfumeri evandlheni ra n’wina? Vanhu van’wana lava nga riki vapfumeri va ala ku vulavula hi Bibele ni vanghana va vona va vukati lava nga Vakreste kambe swi nga endleka va tsakela ku dyondza Bibele ni munhu un’wana loyi a nga riki wa ndyangu wa vona. Hakanyingi swi nga va swinene ku sungula hi vulavula ni vanghana va vona va vukati lava nga Vakreste hi nga si ya burisana na vona.
6. Xana xikhongelo i xa nkoka ku fikela kwihi loko u lava ku kuma dyondzo ya Bibele?
6 Xikhongelo: U nga ma tekeli ehansi matimba ya xikhongelo. (Yak. 5:16) Yehovha u tshembisa ku yingisa swikombelo swa hina loko swi fambisana ni ku rhandza kakwe. (1 Yoh. 5:14) Makwerhu un’wana wa xinuna loyi a a tshama a khomekile, u sungule ku khongelela ku kuma dyondzo ya Bibele. Nsati wakwe u tivutisile loko nuna wakwe a ta va ni nkarhi wo khathalela xichudeni, ngopfu-ngopfu loko xichudeni xi ri ni swiphiqo swo tala. Mhaka leyi u yi katsile eswikhongelweni swakwe loko a kombela Yehovha leswaku a pfuna nuna wakwe a kuma dyondzo ya Bibele. Swikhongelo swa vona swi hlamuriwile endzhaku ka mavhiki mambirhi loko phayona rin’wana ra le vandlheni ra vona ri kume wanuna wun’wana loyi a tsakeleke ku dyondza Bibele kutani ri kombela makwerhu wa xinuna leswaku a dyondza na yena. Nsati wakwe u tsarile: “Un’wana ni un’wana la vonaka onge ku fambisa dyondzo ya Bibele swi nga n’wi tikela, ndzi ri: Bana nhloko ya mhaka loko u khongela naswona u nga tshiki ku khongela ha swona. A ndzi nga ehleketi leswaku leswi swi nga hi tisela ntsako lowukulu swonghasi.” Loko u tiyisela, na wena u nga yi kuma dyondzo ya Bibele naswona u ta kuma ntsako hikwalaho ko pfuna un’wana a nghena hi “nyangwa leyi yisaka evuton’wini.”—Mat. 7:13, 14.