U Nga Tinyaji—U Nga Swi Kota Ku Hlula Ku Nga Titshembi
1. Ha yini van’wana va papalata ku fambisa dyondzo ya Bibele?
1 Xana u papalata ku fambisa dyondzo ya Bibele hikwalaho ka leswi u nga byi tshembiki vuswikoti bya wena byo fambisa dyondzo ya Bibele leyi humelelaka? Minkarhi yin’wana malandza yo tshembeka ya nkarhi lowu nga hundza, yo tanihi Muxe na Yeremiya ma titwe ma nga faneleki eka xiavelo xa wona. (Eks. 3:10, 11; 4:10; Yer. 1:4-6) Hikwalaho, ku titwa hi ndlela yoleyo swi tolovelekile. Xana swi nga hluriwa njhani?
2. Ha yini hi nga fanelanga hi enerisiwa ntsena hi ku endla ntirho wa yindlu ni yindlu kutani hi tshikela van’wana ntirho wo fambisa dyondzo ya Bibele?
2 Hi fanele hi tsundzuka leswaku Yehovha a nge hi kombeli ku endla swilo leswi hi nga ta ka hi nga swi koti. (Ps. 103:14) Xisweswo hi nga swi kota ku hetisisa ntirho lowu hi nyikiweke wona wo “endla vanhu vadyondzisiwa” ni ku “va dyondzisa.” (Mat. 28:19, 20) Lunghelo leri Yehovha a nga ri nyikanga lava nga ni ntokoto ntsena kumbe lava dyondzekeke ngopfu exikarhi ka hina. (1 Kor. 1:26, 27) Hikwalaho, a hi fanelanga hi enerisiwa ntsena hi ku endla ntirho wa yindlu ni yindlu kutani hi tshikela van’wana ntirho wo fambisa dyondzo ya Bibele.
3. Yehovha u hi endla hi fanelekela ntirho wo fambisa dyondzo ya Bibele hi ndlela yihi?
3 Yehovha U Hi Endla Hi Faneleka: Timfanelo ta hina to endla vadyondzisiwa ti huma eka Yehovha. (2 Kor. 3:5) U hi dyondzise ntiyiso wa Bibele hi ku tirhisa nhlengeletano yakwe, lowu hambi ku ri vanhu lava dyondzekeke ngopfu emisaveni leyi va nga wu tiviki. (1 Kor. 2:7, 8) U hi komba ndlela yo dyondzisa hi ku tirhisa Mudyondzisi Lonkulu ku nga Yesu, loyi hi faneleke hi n’wi tekelela naswona u hambeta a hi letela ku va vadyondzisi hi ku tirhisa nhlengeletano yakwe. Ku engetela kwalaho, Yehovha u hi nyike minkandziyiso leyi hi yi lavaka leswaku hi fambisa dyondzo ya Bibele ha yona. U hi nyike switirhisiwa swo tanihi buku leyi nge Leswi Bibele Yi Swi Dyondzisaka, leyi dyondzisaka ntiyiso lowu twisiseka wu tlhela wu olova. Ku fambisa dyondzo ya Bibele swi nga ha olova ku tlula ndlela leyi hi anakanyaka ha yona.
4. Ha yini hi tshemba leswaku Yehovha u ta hi pfuna?
4 Yehovha u pfune Muxe na Yeremiya leswaku va hetisisa xiavelo xa vona. (Eks. 4:11, 12; Yer. 1:7, 8) Na hina hi nga kombela mpfuno eka Yehovha. Tlhandlakambirhi, loko hi fambisa dyondzo ya Bibele, hi va hi dyondzisa munhu ntiyiso malunghana na Yehovha, leswi swi tsakisaka Xikwembu. (1 Yoh. 3:22) Hikwalaho, tivekele pakani yo fambisa dyondzo ya Bibele, ku nga ntirho wa nsimu lowu tsakisaka ni lowu vuyerisaka.