Tivekele Pakani Yo Fambisa Dyondzo Ya Bibele
1 “Tlakusani mahlo ya n’wina mi languta masimu, ma basile leswaku ma tshoveriwa.” (Yoh. 4:35) A swi kanakanisi leswaku marito wolawo lama vuriweke hi Yesu Kreste, ma tirha eka xiyimo lexi Vakreste va langutaneke na xona entirhweni wa vona wo chumayela.
2 Va ha tele vanhu va timbilu letinene lava navelaka ku dyondzisiwa tindlela ta Yehovha. Sweswo swi vonaka eka nhlayo ya vanhu lava khuvuriwaka lembe ni lembe. Loko u swi tsakela hi mbilu hinkwayo ku fambisa dyondzo ya Bibele, xana u fanele u endla yini?
3 Tivekele Pakani: Rhanga hi ku tivekela pakani yo sungula dyondzo ya Bibele kutani u hambeta u yi fambisa. Tshama u ri karhi u anakanya hi pakani ya wena loko u ri ensin’wini. Tanihi leswi ntirho wa hina Vakreste wu katsaka ku dyondzisa ni ku chumayela, hinkwerhu hi fanele hi lava tindlela leti engetelekeke to kuma tidyondzo ta Bibele leti hi nga ti fambisaka.—Mat. 24:14; 28:19, 20.
4 Tinhla Tin’wana Leti U Nga Anakanyisisaka Ha Tona: Vachumayeri va Mfumo va fanele va titoloveta ku khongela swi huma embilwini. Minkarhi yin’wana hi kuma vanhu lava khongeleke va kombela ku twisisa Bibele. I lunghelo ku tirhisiwa hi Yehovha leswaku hi kuma vanhu vo tano hi tlhela hi va dyondzisa!—Hag. 2:7; Mint. 10:1, 2.
5 Makwerhu un’wana wa xisati u khongerile a kombela dyondzo ya Bibele, kutani a veka tikopi ta xiphephana lexi nge Xana U Lava Ku Tiva Swo Tala Hi Bibele? laha a tirhaka kona. Wansati un’wana u teke xiphephana xin’we kutani a xi hlaya, kuteloko a sungula ku tata laha swi lavaka a tsala vito ni adirese ya yena, makwerhu loyi u vulavule na yena kutani u kote ku sungula dyondzo ya Bibele na yena.
6 Vakreste-kuloni lava nga ni vuswikoti byo sungula dyondzo ya Bibele ni vanhu, va nga ku pfuna leswaku u kota ku fikelela pakani ya wena yo fambisa dyondzo ya Bibele. Khongela eka Yehovha, u kombela leswaku a ku pfuna eka matshalatshala ya wena yo sungula dyondzo ya Bibele naswona u amukela mpfuno wun’wana ni wun’wana lowu u nyikiwaka wona leswaku u ta fikelela pakani ya wena.