Mhaka Leyi U Fanelaka Ku Lava Ku Fambisa Dyondzo Ya Bibele Ha Yona
1 Wun’wana wa mintokoto leyi vuyerisaka swinene eka Mukriste i ku tirhisiwa hi Yehova ku pfuna un’wana leswaku a va mudyondzisiwa wa Kriste. (Mat. 28:19, 20; 1 Vakor. 3:6, 9) Eka lava hi va pfunaka hi ndlela leyi swi nga vula vutomi lebyi nga heriki.
2 Vuxaka bya le kusuhi swinene bya kula exikarhi ka mudyondzisi ni loyi a dyondzisiwaka. Ku kula ka moya ka xichudeni hakunene i xihlovo xa ntsako lowukulu. (1 Vates. 2:11, 19, 20) Hikwalaho, ku fanele ku va pakani ya Mukriste un’wana ni un’wana ku fambisa hambi ku ri dyondzo yin’we ya le kaya ya Bibele ni un’wana loyi a nga riki wa ndyangu wa ka vona. Kavula, i vutihlamuleri bya nhloko yin’wana ni yin’wana ya dyangu ku fambisa dyondzo ya Bibele leyi tiyeke, ya nkarhi na nkarhi ni ndyangu wa yona n’wini. Eka mindyangu leyi tatana a nga riki mupfumeri, manana wa Mukriste u ta fanela ku endla malunghiselelo lama faneleke yo dyondza Bibele ni vana.
KHONGELELA TIDYONDZO
3 Tanihi leswi hi nga eku heleni ka nkarhi lowu wa makumu, hinkwerhu hi fanele hi endla matshalatshala yo fambisa tidyondzo ta Bibele leti humelelaka. Xikhongelo xa nkarhi na nkarhi eka Yehova emhakeni leyi xi kombisa ku navela ka hina loku humaka embilwini ko fambisa dyondzo ya Bibele. Swi kombisa leswaku hi vona mphikamakaneta ya vutomi na rifu leyi katsekaka. (Ezek. 33:7-9, 14-16) Hi nga tiyisekisiwa hi nkateko wa Yehova eka matshalatshala ya hina lama tiyeke.—1 Yoh. 5:14, 15.
4 Leswaku hi va lava humelelaka eku endleni ka vadyondzisiwa, hi fanele ku lunghiselela kahle. Nakambe swa pfuna swinene ku xiya van’wana lava va nga ni vuswikoti eku fambiseni ka tidyondzo ta Bibele. Etin’hwetini leti taka, hi ta hundzisela swiringanyeto leswi humaka eka valanguteri lava famba-fambaka ni van’wana lava humeleleke eku endleni ka vadyondzisiwa. Nxaxamelo wa swihloko wu ta kandziyisa mianakanyo yo karhi leyi tirhaka ehenhleni ka ndlela yo sungula ni ku fambisa tidyondzo ta Bibele leti tswalaka mihandzu ha yona.
SWIHLOKO SWA NKARHI LOWU TAKA
5 Xana hi yihi yin’wana ya mianakanyo leyi leyi nga ta kambisisiwa eminkandziyisweni leyi taka ya Vutirheli Bya Hina Bya Mfumo? Hi ta hlamusela hi ndlela leyi vahuweleri ni maphayona yo hambana-hambana va sunguleke tidyondzo ta Bibele ha yona ni leswaku hi tihi tindlela to dyondzisa leti va ti tirhiseke leswaku va fikelela timbilu ta swichudeni swa vona. Nakambe hi ta avela swiringanyeto ehenhleni ka ku aka ku tlangela nhlengeletano ya Yehova ni ku hlakulela ku navela ku hlanganyela entirhweni wa nsimu. Nakambe ku ta va ni swiringanyeto leswi nga hi malunghana ni ndlela yo endla leswaku dyondzo ya ndyangu wa wena ya Bibele yi va leyi nga ni ntikelo swinene leswaku vana va wena va ta kurisa vuxaka lebyikulu bya munhu hi xiyexe na Yehova.
6 Eka malembe ya mune ya ntirho lama hundzeke, 959 834 wa vanhu va khuvuriwile emisaveni hinkwayo, naswona 12 683 wa vona a va ri emabandlheni ya Afrika Dzonga. Vunyingi lebyikulu bya vanhu lava byi fikelele yinhla ya nkhuvulo hi mpfuno wa un’wana loyi a fambisaka dyondzo ya Bibele na vona. Nhlayo ya lava va vaka kona eXitsundzuxweni ni le mintsombanweni ya hina ya muganga yi kombisa leswaku ku na vo tala lava engetelekeke lava nga pfuniwaka ku endla nhluvuko lowu yisaka enkhuvulweni. Hi ku hambetisa matshalatshala ya hina yo sungula ni ku fambisa tidyondzo ta Bibele ni vanhu vo tano, hi nga swi kota ku pfuna lava engetelekeke swinene leswaku va va vadyondzisiwa ivi eku heteleleni va tsakela vutomi lebyi nga heriki.—1 Tim. 6:12, 19.