U Nga Va Mudyondzisi!
1. Hi rihi lunghelo ro hlawuleka leri muhuweleri un’wana ni un’wana a nga na rona?
1 Nchumu wun’wana lowu hi tsakisaka swinene ensin’wini i ku dyondzisa munhu ntiyiso. Ha tsaka loko hi n’wi vona a amukela rungula ra Mfumo niloko hi n’wi pfuna leswaku a tshinela eka Hosi leyi Lawulaka ya vuako hinkwabyo. (Yak. 4:8) Pakani ya muhuweleri un’wana ni un’wana wa Mfumo ku fanele ku va ku dyondzisa munhu ntiyiso kutani a cinca vumunhu byakwe, ndlela leyi a anakanyaka ha yona ni mahanyelo yakwe.
2. I yini leswi nga endlaka leswaku van’wana va kanakana ku fambisa dyondzo ya Bibele, naswona i yini lexi nga va pfunaka leswaku va hlula xiphiqo lexi?
2 Tshembela Eka Yehovha: Enkarhini lowu hundzeke malandza yo tshembeka ya Yehovha a ma tivona ma nga faneleki ku endla ntirho lowu a ma nyikeke wona. Ku tshembela eka Yehovha Xikwembu swi pfune Muxe, Yeremiya, Amosi ni vanhu van’wana leswaku va hlula ku kanakana loku a va ri na kona kutani va endla ntirho wa nkoka lowu va averiweke wona. (Eks. 4:10-12; Yer. 1:6, 7; Amo. 7:14, 15) Muapostola Pawulo na yena u ‘kume vurhena.’ Hi ndlela yihi? U vule leswaku a a pfuniwa ‘hi Xikwembu xa hina.’ (1 Tes. 2:2) Hinkwerhu ka hina hi nga tshembela eka Yehovha leswaku a hi pfuna, a hi nyika vutlhari ni matimba lawa hi ma lavaka leswaku hi fambisa tidyondzo ta Bibele leti endlaka nhluvuko.—Esa. 41:10; 1 Kor. 1:26, 27; 1 Pet. 4:11.
3, 4. Hi wihi ndzetelo lowu hi nga na wona lowu hi pfunaka leswaku hi dyondzisa Rito ra Xikwembu?
3 Amukela Ndzetelo: Yehovha Xikwembu i Muleteri wa hina Lonkulu, nkarhi na nkarhi u hi nyika ndzetelo lowu sekeriweke eBibeleni leswaku hi hloma hi ku helela tanihi vadyondzisi. (Esa. 54:13; 2 Tim. 3:16, 17) Amukela ndzetelo lowu hi ku endla hinkwaswo leswi u nga swi kotaka leswaku u ya twisisa swinene Matsalwa ni ku antswisa vuswikoti bya wena byo dyondzisa ntiyiso wa Bibele. Hambileswi xikongomelo-nkulu xa Xikolo xa Vutirheli bya le Tilweni ni Nhlangano wa Ntirho ku nga ku hi letela ku dyondzisa Rito ra Xikwembu, minhlangano leyin’wana hinkwayo na yona ya hi pfuna emhakeni leyi.
4 Tikarhatele ku dyondza ku tirhisa tindlela to olova loko u dyondzisa ntiyiso wa Bibele lowu dzikeke. Buku leyi nge Xikolo Xa Vutirheli eka tluka 227 yi ri: “U fanele u yi twisisa kahle mhaka ya wena loko u ta endla leswaku ni van’wana va yi twisisa.” Ku hlamula eminhlanganweni swi endla leswaku tinhla ta nkoka ti tshama emianakanyweni ya hina leswaku hi kota ku ti tirhisa hi ku famba ka nkarhi. Kutani lunghiselela kahle leswaku u antswisa vuswikoti bya wena byo dyondzisa.
5. Hi wihi ndzetelo wun’wana lowu hi nga na wona evandlheni lowu nga hi pfunaka leswaku hi antswisa madyondziselo ya hina?
5 A swi kanakanisi leswaku ku sukela eku sunguleni Vakreste a va dyondza eka Vakreste-kulobye loko va ri entirhweni wo endla vadyondzisiwa. (Luka 10:1) Loko swi koteka, famba ni vahuweleri lava nga ni ntokoto loko u ya entirhweni wo dyondzisa vanhu Bibele, ku katsa ni maphayona, vakulu swin’we ni valanguteri va miganga ni va swifundzha. Xiya ndlela leyi va swi tirhisaka ha yona swikombiso swo olova ni swipfuneto swin’wana swo dyondzisa ha swona leswi kumekaka eminkandziyisweni ya hina leswaku va hlamusela mintiyiso ya le Matsalweni. Va kombele va ku byela swiringanyeto swin’wana leswi u nga swi tirhisaka leswaku u va mudyondzisi la nga ni vutshila. (Swiv. 1:5; 27:17) Wu tlangele swinene ndzetelo wolowo tanihi leswi wu humaka eka Xikwembu.—2 Kor. 3:5.
6. I yini leswi lavekaka leswaku munhu a va mudyondzisi wa Rito ra Xikwembu?
6 Tshembela eka Yehovha leswaku u vuyeriwa eka ndzetelo lowu a hi nyikaka wona. Yi katse eswikhongelweni swa wena mhaka leyi. (Ps. 25:4, 5) Na wena u nga tokota ntsako wo pfuna munhu un’wana leswaku a va mudyondzisi wa Rito ra Xikwembu ku fana na wena!