Yehovha U Hi Letela Ku Endla Ntirho Lowu

1. Loko Yehovha a nyika vanhu xiavelo, i yini leswi a tlhelaka a swi endla?

¹ Loko Yehovha a nyika vanhu xiavelo, u tlhela a va nyika mpfuno lowu va wu lavaka leswaku va xi hetisisa. Hi xikombiso, loko Yehovha a byela Nowa leswaku a aka ngalava, ku nga nchumu lowu Nowa a nga si tshama a wu endla, U tlhele a n’wi byela ndlela leyi a nga ta yi aka ha yona. (Gen. 6:14-16) Loko murisi wo rhula Muxe a rhumiwa leswaku a ya eka vakulukumba va le Israyele ni le ka Faro, Yehovha u n’wi tiyisekise a ku: “Mina ndzi ta va ni nomu wa wena, ndzi ta ku dyondzisa leswi u faneleke ku swi vula.” (Eks. 4:12) Loko swi ta eka xiavelo xa hina xo chumayela mahungu lamanene, Yehovha u tlhela a hi nyika ndzetelo wa ndlela leyi hi nga xi endlaka ha yona. U hi letela ku endla ntirho lowu hi ku tirhisa Xikolo xa Vutirheli bya le Tilweni ni Nhlangano wa Ntirho. Xana hi nga vuyeriwa njhani eka ndzetelo lowu?

2. Xana hi nga vuyeriwa njhani eka Xikolo xa Vutirheli bya le Tilweni?

² Xikolo Xa Vutirheli Bya Le Tilweni: Kambisisa rungula leri nga eka xiyimiso u nga si ya eka nhlangano wun’wana ni wun’wana. Kutani loko u ri karhi u vona ndlela leyi swichudeni swi tirhisaka rungula leri eka tinkulumo ta swona, u ta hambeta u dyondza ndlela yo dyondzisa. (Swiv. 27:17) Tana ni buku ya wena ya Xikolo Xa Vutirheli eminhlanganweni naswona yi tirhise tanihi buku yo tsalela tinhla. Loko mulanguteri wa xikolo a kombetela eka buku leyi endzhaku ka nkulumo yin’wana ni yin’wana ya xichudeni, khwatihata tinhla ta nkoka leti u lavaka ku ti tirhisa naswona tirhisa laha ku nga tsariwangiki nchumu leswaku u tsala tinhla. Hambiswiritano, ndlela ya nkoka yo vuyeriwa eka xikolo lexi, i ku hlanganyela. Xana wa hlanganyela? Loko u averiwa nkulumo, yi lunghiselele kahle naswona u tirhisa ndzayo leyi u nyikiwaka yona. Loko u ri evutirhelini, tirhisa leswi u swi dyondzeke.

3. I yini leswi nga ta hi pfuna leswaku hi vuyeriwa eka Nhlangano wa Ntirho?

³ Nhlangano Wa Ntirho: Swi ta va swinene leswaku hi tsundzuka swiringanyeto leswi nyikeriweke eka nhlangano lowu hi ku hlaya rungula ka ha ri emahlweni naswona hi tiyimisela ku hlamula. Loko hi komisa tinhlamulo ta hina, vanhu vo tala va ta kota ku hlamula. Rhiya ndleve eka minkombiso naswona tirhisa swiringanyeto swin’wana ni swin’wana leswi u vonaka onge swi ta endla leswaku vutirheli bya wena byi va lebyi humelelaka. Loko Vutirheli Bya Hina Bya Mfumo byi ri ni swihloko leswi nga ta ku vuyerisa eka ntirho wa wena, swi hlayise leswaku swi ta ku pfuna enkarhini lowu taka.

4. Ha yini hi fanele hi wu tirhisa kahle ndzetelo wa le tilweni?

⁴ Ku fana ni swiavelo leswi a swi nyikiwe Nowa na Muxe, xileriso xa hina xo chumayela mahungu lamanene emisaveni hinkwayo leyi akiweke i ntlhontlho. (Mat. 24:14) Hi nga va lava humelelaka loko hi titshega hi Yehovha, Muleteri wa hina Lonkulu, kutani hi wu tirhisa kahle ndzetelo lowu a hi nyikaka wona.—Esa. 30:20.