“Nyikela Vumbhoni Bya Rixaladza”
1. Hi xihi xikombiso lexinene lexi muapostola Pawulo a hi vekeleke xona ensin’wini?
1 “Hetisisa vutirheli bya wena hi xitalo.” (2 Tim. 4:5) Loko muapostola Pawulo a nyika Timotiya xikhutazo lexi a a ntshuxekile. Entiyisweni Pawulo u hete maendzo manharhu ya ntirho wakwe wa vurhumiwa emalembeni ya kwalomu ka va-47 na va-56 C.E. Buku ya Mintirho yi vulavula hi ku phindha-phindha hi ku va Pawulo a “nyikela vumbhoni bya rixaladza.” (Mint. 23:11; 28:23) Xana hi nga swi endlisa ku yini sweswo namuntlha?
2. Xana hi nga nyikela vumbhoni bya rixaladza hi ndlela yihi loko hi ri karhi hi chumayela hi yindlu ni yindlu?
2 Hi Yindlu Ni Yindlu: Loko hi ri karhi hi endla matshalatshala yo burisana ni n’wini wa muti loyi a nga si tshamaka a twa mahungu lamanene, hi nga ha boheka ku n’wi endzela hi nkarhi lowu hambaneke ni lowu hi talaka ku endza ha wona. Swi nga ha endleka n’wini wa muti a va a ri ekaya ni madyambu kumbe hi mahelo-vhiki. Hi fanele hi endla matshalatshala yo vulavula ni munhu ekaya rin’wana ni rin’wana leri hi kumaka ku nga ri na munhu, hi ku va hi endza hi ku phindha-phindha. Ku vuriwa yini loko matshalatshala ya wena ma hundzuka nyuku wa mbyana? Kumbexana ku tsala papila kumbe ku n’wi bela riqingho swi nga va ni vuyelo lebyinene.
3. Hi wihi nkarhi lowu ku pfulekelaka wa leswaku u nyikela vumbhoni erivaleni ni hi xitshuketa?
3 Erivaleni Ni Hi Xitshuketa: Malandza ya Yehovha namuntlha ma endla leswaku “vutlhari bya ntiyiso” byi tiviwa hi mani na mani la yingisaka. Minkarhi yin’wana ma endla tano “exitarateni” kumbe “emintsendzeleni.” (Swiv. 1:20, 21) Xana loko hi ri karhi hi tiendlela mintirho ya hina vini, ha khathala hi ku nyikela vumbhoni? Xana ku nga vuriwa leswaku hi “khomeka ngopfu hi rito”? (Mint. 18:5) Loko swi ri tano, hi hetisisa vutihlamuleri bya hina byo “nyikela vumbhoni bya rixaladza.”—Mint. 10:42; 17:17; 20:20, 21, 24.
4. Xana xikhongelo ni ku anakanyisisa swi hi pfuna njhani leswaku hi nyikela vumbhoni bya rixaladza?
4 Hambiswiritano, minkarhi yin’wana hi nga ha tshika ku nyikela vumbhoni hikwalaho ka ku tsana kumbe hileswi hi nga ni tingana. Leswi Yehovha a hi tivaka, wa ku twisisa ku tsana ka hina. (Ps. 103:14) Nilokoswiritano, loko hi titwa hi ndlela yoleyo, hi nga khongela eka yena leswaku a hi nyika xivindzi xo vulavula. (Mint. 4:29, 31) Nakambe, loko hi endla dyondzo ya munhu hi yexe hi tlhela hi anakanyisisa hi Rito ra Xikwembu, swi ta endla leswaku hi hambeta hi tlangela nkoka wa mahungu lamanene. (Filp. 3:8) Leswi swi ta hi susumetela ku chumayela hi xivindzi!
5. Hi nga hoxa xandla hi ndlela yihi eku hetisekeni ka vuprofeta bya Yuwele?
5 Vuprofeta bya Yuwele byi vule leswaku loko siku lerikulu ni leri chavisaka ra Yehovha ri nga si fika, vanhu va Xikwembu va ta “hambeta va famba” naswona va nga pfumeleli nchumu wu va sivela ku chumayela. (Yuw. 2:2, 7-9) Onge hi nga hoxa xandlha hi ku helela eka ntirho lowu nga taka wu nga ha endliwi!