Tirhisa jw.org Loko U Ri eNsin’wini—“Vana Munghana Wa Yehovha”

Xiyenge lexi nge “Tidyondzo Ta Bibele” lexi nga eka jw.org xi ni xiphemu lexi endleriweke vana lexi nge, “Vana Munghana Wa Yehovha” lexi nga ni tinsimu, tivhidiyo ni switoloveto. Xana u tshame u xi tirhisa xiphemu lexi loko u ri ensin’wini? Loko u dyondza Bibele ni mutswari loyi a nga ni vana lavatsongo, ha yini u nga n’wi kombi xiphemu lexi? Leswi swi nga ha n’wi susumetela ku kambisisa ni swiyenge swin’wana swa Web site ya hina.

Loko makwerhu un’wana wa xinuna a ri karhi a fambisa Kingdom News No. 38, u nyike wansati un’wana xiphephana lexi ivi a namba a sungula ku xi hlaya. A a ri ni vana vo hlayanyana lava ha riki vatsongo lava na vona a va lava ku tiva swo tala malunghana na xona. Makwerhu loyi u va hlamusele katsongo malunghana na xona kutani a va komba adirese ya Web site ya hina eka tluka ro hetelela ra xona. Leswi wansati loyi a kombiseke ku tsakela, makwerhu loyi u tlangele wansati loyi ni vana vakwe yin’wana ya tivhidiyo ta Kalebe, a tirhisa foni yakwe.

Makwerhu un’wana wa xisati u byele mutirhi-kulobye loyi a nga ni vana lavatsongo hi Web site ya hina swin’we ni hi rungula leri yi nga na rona leri lunghiseleriweke mindyangu. Wansati loyi u nghene eka jw.org swin’we ni vana vakwe. Endzhakunyana, u byele makwerhu loyi wa xisati leswaku vana vakwe a va famba-famba endlwini va ri karhi va yimbelela va ku “Haxa Rito,” ku nga rin’wana ra tinsimu leti kumekaka eka xiyenge lexi nge “Vana Munghana Wa Yehovha.”

Titolovete ku nghena eka xiyenge lexi xa jw.org kutani u kopa yin’wana ya tivhidiyo, tinsimu kumbe switoloveto eka xitirhisiwa xa wena lexi kotaka ku nghena eka Internet. Loko u endla tano u ta lunghekela ku tirhisa xiyenge lexi xa jw.org ensin’wini. Wa nga vona xitirhisiwa xa nkoka lexi hi nga na xona xo hi pfuna ku va mahlonga ya Hosi!—Mint. 20:19.