Swikombo Swa Minkandziyiso Leyi Nga Eka Xiyimiso Xa Minhlangano Xa Mahanyelo Ni Ntirho
OCTOBER 3-9
LESWI HI SWI DYONDZAKA EBIBELENI | SWIVURISO 1–6
it-2 180
Vutivi
Xihlovo Xa Vutivi. Entiyisweni Yehovha hi yena Xihlovo lexikulu va vutivi. I ntiyiso leswaku vutomi byi huma eka yena naswona vutomi i bya nkoka eka un’wana ni wun’wana la nga ni vutivi. (Ps 36:9; Min 17:25, 28) Ku engetela kwalaho, Xikwembu xi tumbuluxe swilo hinkwaswo kutani vutivi lebyi munhu a nga na byona byi titshege hi ku va a kambisisa ntirho wa Xikwembu. (Nhl 4:11; Ps 19:1, 2) Xikwembu xi tlhele xi huhutela Rito ra xona, laha vanhu va nga dyondzaka ku rhandza ka xona ni swikongomelo swa xona. Xihlovo xa vutivi bya ntiyiso i Yehovha naswona munhu loyi a byi lavaka u fanele a n’wi chava ni ku va ni vuxiyaxiya leswaku a nga endli nchumu lowu nga n’wi tsakisiki. Ku chava ko tano i masungulo ya vutivi. (Swiv 1:7) Ku chava Xikwembu hi ndlela yoleyo swi endla leswaku munhu a va ni vutivi, loko lava nga riki na vutivi bya Xikwembu va pfumela eka nchumu wun’wana ni wun’wana lowu va wu vonaka.
it-2 818 ¶4
Nhonga
Vutihlamuleri bya vatswari. Nakambe “nhonga” a yi tirhiseriwa ku fanekisela vutihlamuleri lebyi vatswari va nga na byona eka vana va vona. Buku ya Swivuriso yi nyikela tinhlamuselo to tala malunghana ni vulawuri lebyi, ku nga xiga lexi fanekiselaka mixaka hinkwayo ya ku tshinya leyi a yi tirhisiwa, ku katsa ni nhonga ya xiviri leyi a yi tirhiseriwa ku xupula. Xikwembu xi nyike mutswari vutihlamuleri byo tirhisa nhonga leswaku a tshinya n’wana wakwe. Loko mutswari a tsandzeka ku endla leswi, a nga endla leswaku n’wana wakwe a langutana ni swiphiqo, a fa, a n’wi khomisa tingana ni ku endla leswaku yena tanihi mutswari a nga tsakeriwi hi Xikwembu. (Swiv 10:1; 15:20; 17:25; 19:13) “Vuphukuphuku byi tsimbiwe embilwini ya mufana; nhonga ya ndzayo hi yona yi nga ta byi susa byi ya ekule na yena. “U nga tshiki ku nyika mufana ndzayo. Loko wo tshuka u n’wi ba hi nkhavi, a nge fi. U fanele u n’wi ba hi nkhavi, leswaku u kutsula moya-xiviri wakwe eSheol.” (Swiv 22:15; 23:13, 14) Entiyisweni, “loyi a nga tirhisiki nkhavi u venga n’wana wakwe, kambe loyi a n’wi rhandzaka wa n’wi lava leswaku a n’wi laya.”—Swiv 13:24; 19:18; 29:15; 1Sa 2:27-36.