Swikombo Swa Minkandziyiso Leyi Nga Eka Xiyimiso Xa Minhlangano Xa Mahanyelo Ni Ntirho
NOVEMBER 7-13
LESWI HI SWI DYONDZAKA EBIBELENI | SWIVURISO 27-31
it-2 1183
Nsati
Nsati loyi a a sirheleriwa hi Nawu. Hambileswi nuna a nga ni xikhundlha lexi tlakukeke eka lunghiselelo ra vukati, xikongomelo xa Xikwembu a ku ri leswaku a khathalela ndyangu wakwe ni ku wu dyondzisa hi xona. U ni vutihlamuleri byo tika swinene hikuva nchumu wun’wana ni wun’wana wo biha lowu nga endlekaka endyangwini ku langutiwa yena. Hambiloko a ri ni xikhundlha lexi tlakukeke ku tlula xa nsati, Nawu wa Xikwembu wu sirhelela nsati hi ku n’wi nyika malunghelo yo hlawuleka leswaku a ta hanya vutomi lebyi tsakisaka.
Swikombiso swi nga ri swingani swa lunghiselelo ra Nawu leswi a swi katsa ni nsati a ku ri leswaku: Ku nga khathariseki leswaku i nuna kumbe nsati a a ta dlayiwa hikwalaho ko endla vuoswi. Loko nuna a ehleketelela leswaku nsati wakwe u endle vuoswi, a a ta n’wi yisa eka vaprista leswaku Yehovha Xikwembu a avanyisa mhaka leyi naswona loko wansati a ri ni nandzu, swirho swakwe swa mbeleko a swi ta va swa hava; loko a nga ri na nandzu nuna wakwe a a fanele a n’wi tikisa leswaku vanhu va ta swi vona leswaku a nga na nandzu. (Tin 5:12-31) Nuna a a ta dlaya vukati ntsena loko a kume leswaku nsati wakwe u ni nandzu. Leswi a swi katsa ku va nsati a nga n’wi xiximi nuna wakwe kumbe loko a tisa xisandzu endlwini yakwe kumbe ya tata wakwe. Kambe nsati a a sirhelela hi lunghiselelo ra leswaku nuna a a fanele a tsala papila ro dlaya vukati. Loko swi ri tano a ntshunxekile ku tekana ni wanuna un’wana. (Dt 24:1, 2) Loko nsati a endla xihlambanyo xa leswaku nuna wakwe a nga endlanga xiboho xa vutlhari hi xikongomelo xo sirhelela vuhlayiseki bya ndyangu wakwe nuna a ta cinca xiboho xakwe. (Tin 30:10-15) Hambiswiritano, leswi a swi sirhelela nsati leswaku a nga endli nchumu lowu a wu ta n’wi vangela swiphiqo.
Ehansi ka Nawu wa Muxe a swi pfumeleriwa leswaku munhu a teka tshengwe kambe a ku ri ni swipimelo leswi a swi sirhelela nsati. Nuna a a nga ta hundzisela mfanelo yo va mativula ya n’wana wa jaha wa nsati loyi a nga rhandziwiki a yi nyika n’wana wa jaha wa nsati loyi a n’wi rhandzaka ngopfu. (Dt 21:15-17) Loko nhwana wa Muisrayele a xavisiwa hi tata wakwe leswaku a ya va hlonga kutani n’wini wakwe a n’wi endla nsati lontsongo, n’wini wakwe a ta n’wi pfumelela leswaku a tekiwa hi nuna un’wana loko ntsena a nga n’wi tsakisanga kambe a a nga ta n’wi xavisela vanhu vambe. (Eks 21:7, 8) Loko n’wini wakwe kumbe n’wana wakwe wa jaha o ya emahlweni a tshama na yena ivi endzhaku a teka nsati un’wana, a a fanele a khathaleriwa hi swakudya, swiambalo, yindlu ni hi mfanelo ya vukati.—Eks 21:9-11.
Loko nuna o hehla nsati wakwe hi ku vula leswaku loko a n’wi teka a nga ha ri nhwana kutani xihehlo xolexo ku nga vi ntiyiso, a a ta boheka ku hakela tata wa nhwanyana loyi mali leyi andzisiweke ka mbirhi leyi a yi hakeleriwa vanhwana naswona a nga fanelanga a n’wi tshika vutomi byakwe hinkwabyo. (Dt 22:13-19) Loko wanuna o xanisa nhwana la nga si vutiwaka hi timhaka ta masangu, a a fanele a hakela mali yo lovola eka tata wakwe naswona loko tata wakwe a pfumela a a ta n’wi teka kutani a a nga fanelanga a dlaya vukati bya vona vutomi byakwe hinkwabyo.—Dt 22:28, 29; Eks 22:16, 17.
Hambileswi xikhundlha xa nsati hi nkarhi wa Vaheveru xi hambaneke ni xa nsati wa minkarhi ya namuntlha, nsati lonene wa Muheveru a xi tsakela xikhundlha swin’we ni ntirho wakwe. A a pfuna nuna wakwe, a wundla ndyangu, a khathalela mintirho ya le mutini naswona a ku ri ni swo tala leswi a swi n’wi endla a tsaka ni hi leswi a kota ku kombisa vuswikoti byakwe tanihi nsati.
Ndlela leyi Nsati Lonene a hlamuseriwaka ha yona. Swivuriso 31 yi hlamusela hi ta mintirho leyi nsati lonene a yi endlaka. Ku vuriwa leswaku i wa nkoka swinene eka nuna wakwe ku tlula tikorala. Nuna wakwe wa n’wi tshemba. U tirha hi matimba—wa luka, u rhungela ndyangu wakwe swiambalo, wa tiyiseka leswaku leswi lavekaka ekaya swi xaviwile, u tirha ensin’wini ya vhinyo, u tirhisana ni malandza eka mintirho ya le kaya, u pfuna lava lavaka mpfuno, ndyangu wakwe wu ambala hi ndlela leyi xiximekaka, u endla swilo hi mavoko yakwe leswaku a swi xavisa, u lunghiselela ka ha ri emahlweni leswaku loko ko va ni mhangu va tshama va lunghekile, u tiphofula hi ndlela ya vutlhari hi ku va a chava Yehovha ni mintirho yakwe leyinene, hambiloko a kuma swibumabumelo eka nuna wakwe ni vana, wa n’wi xixima nuna wakwe naswona u rhangisa swilaveko swa ndyangu wakwe emutini. I ntiyiso leswaku la kumeke nsati lonene u kume nchumu lowunene ngopfu naswona u kuma vunene lebyi humaka eka Yehovha.—Swiv 18:22.
Evandlheni Ra Vukreste. Nkongomiso lowu nga kona evandlheni ra Vukreste hi leswaku nuna u fanele a va ni nsati un’we. (1Ko 7:2; 1Tm 3:2) Vasati va lerisiwa leswaku va tiveka ehansi ka vanuna va vona, ku nga khathariseki leswaku vanuna va vona i Vakreste kumbe doo! (Ef 5:22-24) Vasati a va fanelanga va tsona vanuna va vona mfanelo ya vukati hikuva wansati “a hi yena a lawulaka miri wa yena n’wini.” (1Ko 7:3, 4) Vasati va leteriwa leswaku ku tisasekisa ka vona ku fanele ku va ka le mbilwini leswaku ku ta tswala mihandzu leyi kumbexana hikwalaho ka matikhomelo ya vona yi nga ta endla leswaku vanuna va vona va va Vakreste.—1Pe 3:1-6.
Ndlela Leyi A Fanekiseriwaka Ha Yona. Hi ndlela yo fanekisela Yehovha u vulavule hi Israyele tanihi hi nsati wakwe hikwalaho ka ntwanano lowu a wu endle ni tiko. (Esa 54:6) Muapostola Pawulo u vulavula hi Yehovha tanihi Tata wa Vakreste lava totiweke naswona u tlhela a vulavula hi “Yerusalema wa le henhla” tanihi mana wa vona onge hiloko Yerusalema a tekane na Yehovha hi xikongomelo xo kuma Vakreste lava totiweke. (Ga 4:6, 7, 26) Vandlha ra Vakreste ku vulavuriwa hi rona tanihi mutekiwa kumbe nsati wa Yesu Kreste.—Ef 5:23, 25; Nhl 19:7; 21:2, 9.