Ndlela Leyi Muvumbi A Hlamuselaka Switshembiso Swa Yena Ha Yona

Ku sukela loko vanhu va vumbiwile, Muvumbi a vulavula ni vanhu hi ku tirhisa tintsumi ni vaprofeta. Ku engetela kwalaho, u endle leswaku rungula rakwe ni mikateko leyi a hi tshembisaka yona swi tsariwa ehansi. Switshembiso swa Xikwembu swi nga ku vuyerisa na wena. U nga swi kuma kwihi switshembiso swa Xikwembu namuntlha?

Rungula ra Xikwembu ri hlengeletiwe eka Matsalwa yo Kwetsima. (2 Timotiya 3:16) Xana Xikwembu xi va tirhise njhani vaprofeta leswaku va tsala rungula ra xona? (2 Petro 1:21) Xikwembu xi byele vatsari rungula leri va faneleke va ri tsala naswona va ri tsale ehansi. Mhaka leyi yi tano ninamuntlha. Loko n’wamabindzu a byela matsalana leswaku a tsala papila, papila rolero a hi ra matsalana kambe i ra n’wamabindzu. Hilaha ku fanaka, Xikwembu xi tirhise vavanuna vo karhi leswaku va tsala rungula ra xona kambe hi xona Mutsari wa Matsalwa yo Kwetsima.

RITO RA XIKWEMBU RA KUMEKA EMISAVENI HINKWAYO

Rito ra Xikwembu i ra nkoka ngopfu lerova xi lava leswaku vanhu hinkwavo va ri hlaya va tlhela va ri twisisa. Namuntlha “mahungu lamanene lama nga heriki” ma kumeka “ni le ka matiko hinkwawo ni tinyimba hinkwato ni tindzimi hinkwato.” (Nhlavutelo 14:6) Xikwembu xi endle leswaku Matsalwa yo Kwetsima ya kumeka hi tindzimi to tlula 3 000, leyi i nhlayo leyikulu ku tlula tibuku leti tshameke ti hundzuluxeriwa emisaveni hinkwayo.