I Yini Vuprofeta?

Nhlamulo ya Bibele

Vuprofeta i mahungu lama humaka eka Xikwembu ku nga nhlavutelo ya ku rhandza ka xona. Bibele yi vula leswaku vaprofeta “a va vulavula leswi humaka eka Xikwembu va kongomisiwa hi moya lowo kwetsima.” (2 Petro 1:​20, 21) Muprofeta i munhu loyi a kumaka rungula eka Xikwembu kutani a ri hundzisela eka van’wana.​—Mitirho 3:​18.

Xana vaprofeta a va ma kuma njhani mahungu lama humaka eka Xikwembu?

Xikwembu xi tirhise tindlela to hambanahambana ku hundzisela rungula eka vaprofeta va xona:

• Ku tsala. Xikwembu xi tirhise ndlela leyi kan’we loko xi tsalela Muxe Milawu ya Khume hi ku kongoma eka swiphepherhele.​—Eksoda 31:18

• Ku vulavula hi ku tirhisa tintsumi. Hi xikombiso, Xikwembu xi tirhise ntsumi ku byela Muxe rungula leri a fanele a ri hundzisela eka Faro wa le Egipta. (Eksoda 3:​2-4, 10) Loko ku laveka rungula leri kongomeke, Xikwembu a xi tirhisa ntsumi ku hundzisa rungula ra xona hilaha xi endleke hakona loko xi byela Muxe, xi ku: “Tsala marito lawa ehansi hikuva ndzi endla ntwanano na wena ni Vaisrayele hi ku pfumelelana na wona.”​—Eksoda 34:27.a

• Swivono. Mikarhi yin’wana muprofeta a a kombiwa swivono hi nkarhi lowu a xalamukile naswona a nga etlelanga. (Esaya 1:1; Habakuku 1:1) Swivono swin’wana a swi vonaka swi ri swa xiviri lerova muprofeta a kota ku tlhela a katseka eka swona. (Luka 9:​28-​36; Nhlavutelo 1:​10-​17) Mikarhi yin’wana vaprofeta a va kombiwa swivono hi nkarhi lowu a va biwe hi riphume. (Mitirho 10:10, 11; 22:17-​21) Xikwembu xi tlhele xi hundzisela rungula eka vaprofeta hi ku tirhisa milorho hi nkarhi lowu a va etlele.​—Daniyele 7:1; Mitirho 16:​9, 10.

• Ku kongomisa mianakanyo ya vona. Xikwembu xi kongomise mianakanyo ya vaprofeta leswaku va kota ku hundzisa rungula ra xona. Bibele yi vula leswi: “Matsalwa hinkwawo ma huhuteriwe hi Xikwembu.” Xiga lexi nge, “ma huhuteriwe hi Xikwembu” xi nga tlhela xi vekiwa hi ndlela leyi nge, “ma hefemuriwe hi Xikwembu.” (2 Timotiya 3:​16 The Emphasised Bible) Xikwembu xi tirhise moya wo kwetsima kumbe matimba ya xona ku “hefemulela” mianakanyo ya xona eka miehleketo ya malandza ya xona. Rungula a ri huma eka Xikwembu kambe muprofeta hi yena loyi a vulavula.​—2 Samuwele 23:​1, 2.

Xana vuprofeta byi vulavula hi swilo swa nkarhi lowu taka ntsena?

Doo, vuprofeta bya le Bibeleni a byi vulavuli hi swilo swa nkarhi lowu taka ntsena. Hambiswiritano, rungula ro tala leri humaka eka Xikwembu ri vulavula hi swilo swa nkarhi lowu taka hambiloko ri nga hi nyiki vuxokoxoko lebyi engetelekeke hi ku kongoma. Hi xikombiso, vaprofeta va Xikwembu va lemukise Vaisrayele hi ku phindhaphindha hi tindlela ta vona to homboloka. Swilemukiso sweswo swi hlamusele mikateko leyi a va ta yi kuma loko vo swi yingisa ni makhombo lama a ma ta va wela loko va nga yingisi. (Yeremiya 25:​4-6) Vuyelo bya kona a byi titshege hi leswi Vaisrayele a va ta hlawula ku swi endla.​—Deteronoma 30:19, 20.

Swikombiso swa vuprofeta bya le Bibeleni lebyi nga vulavuliki hi swilo swa nkarhi lowu taka

• Eka xiendlakalo xin’wana loko Vaisrayele va kombele mpfuno eka Xikwembu, xi rhumele muprofeta a ya va byela leswaku a xi va pfunanga hileswi va aleke ku yingisa swileriso swa xona.​—Vaavanyisi 6:​6-​10.

• Loko a ri karhi a vulavula ni wansati wa Musamariya, Yesu u boxe timhaka ta wansati loyi leti a a ta titiva ntsena loko a kongomisiwe hi moya. Wansati loyi u vule leswaku Yesu i muprofeta hambileswi a nga vulavulangiki hi timhaka ta nkarhi lowu taka.​—Yohane 4:​17-​19.

• Loko Yesu a yisiwa endlwini ya muprista lonkulu, valala vakwe va n’wi funengete xikandza, va n’wi ba kutani va ku: “Profeta! I mani loyi a nga ku ba?” A va nga lavi leswaku Yesu a vulavula hi swilo swa nkarhi lowu taka kambe a va lava leswaku hi ku tirhisa moya, a vula loyi a nga n’wi ba.​—Luka 22:63, 64.