Xiyenge 4
Xikwembu I Mani?
VANHU va gandzela swikwembu swo hambana-hambana. Kambe Matsalwa yo Kwetsima ma dyondzisa leswaku ku ni Xikwembu xin’we ntsena xa ntiyiso. Xi hlawulekile, xi tlakukile naswona a xi na makumu. Xi tumbuluxe swilo hikwaswo ematilweni ni laha misaveni naswona xi hi nyike vutomi. Hikwalaho hi xona xi faneriwaka hi ku gandzeriwa.
Xikwembu xi ni swithopo swo tala kambe xi ni vito rin’we ntsena—YEHOVHA. Xi byele Muxe xi ku: “U ta byela vana va Israyele u ku, ‘Yehovha Xikwembu xa vatata wa n’wina, Xikwembu xa Abrahama, Xikwembu xa Isaka ni Xikwembu xa Yakobe u ndzi rhume eka n’wina.’ Leri i vito ra mina ra hilaha ku nga riki na makumu, naswona lexi i xitsundzuxo xa mina ku suka eka xitukulwana xin’wana ku ya eka xitukulwana xin’wana.” (Eksoda 3:15) Vito leri nge Yehovha ri humelela minkarhi leyi ringanaka 7 000 eMatsalweni yo Kwetsima. Pisalema 83:18 yi vula leswi mayelana ni Xikwembu: “Wena u ri wexe u La nge Henhla-henhla emisaveni hinkwayo.”
Ku hava munhu la nga tshama a vona Xikwembu. Xikwembu xi byele Muxe xi ku: “A swi koteki leswaku u vona xikandza xa mina, hikuva a ku na munhu la nga ndzi vonaka ivi a hanya.” (Eksoda 33:20) Xi tshama ematilweni naswona vanhu a va nge xi voni. Swi hoxile ku khongela Xikwembu hi ku tirhisa xifaniso. Yehovha Xikwembu u lerisile hi ku tirhisa muprofeta Muxe a ku: “U nga tshuki u tiendlela xifaniso lexi vatliweke kumbe xivumbeko lexi fanaka ni xilo xihi ni xihi lexi nga ehenhla ematilweni kumbe lexi nga ehansi emisaveni kumbe ematini ehansi ka misava. U nga tshuki u swi nkhinsamela kumbe u yengiwa ku swi tirhela, hikuva mina Yehovha Xikwembu xa wena ndzi Xikwembu lexi lavaka ku tinyiketela loku hlawulekeke.” (Eksoda 20:2-5) Hi ku famba ka nkarhi, u tirhise muprofeta Esaya a ku: “Hi mina Yehovha. Rero i vito ra mina; naswona ku vangama ka mina a ndzi ku nyiki un’wana, ni ku dzunisa ka mina a ndzi ku nyiki swifaniso leswi vatliweke.”—Esaya 42:8.
Vanhu van’wana va xi tshemba Xikwembu kambe va vona onge a swi koteki ku xi tiva, ku va ekusuhi na xona naswona xa chavisa. U anakanya yini? Xana Xikwembu xi na mhaka na wena? Xana u nga xi tiva hakunene u tlhela u tshinela eka xona? A hi voneni leswi Matsalwa ma swi vulaka hi timfanelo ta Xikwembu.
U Nga Hlamula Njhani?
• Ha yini hi fanele hi gandzela Xikwembu?
• Vito ra Xikwembu i mani?
• Ha yini hi nga fanelanga hi tirhisa swifaniso loko hi gandzela Xikwembu?
• Xana Xikwembu xi wu tirhisa njhani moya wa xona wo kwetsima ni tintsumi leswaku xi hetisisa xikongomelo xa xona?
[Bokisi leri nga eka tluka 11]
Moya Lowo Kwetsima Wa Xikwembu Ni Tintsumi Ta Xona
Xana Xikwembu xi xi hetisisa njhani xikongomelo xa xona? Xi tirhisa moya wa xona lowo kwetsima. Moya wa Xikwembu a hi munhu kumbe ntsumi kambe i matimba ya xona lama nga vonakiki, lama nga pimekiki, lawa xi ma tirhisaka ku hetisisa xikongomelo xin’wana ni xin’wana xa xona. Xikwembu xi tirhise matimba lawa leswaku xi tumbuluxa matilo ni misava. “Matilo ma endliwe hi rito ra Yehovha, Hi moya wa nomu wakwe u endle vuthu ra wona hinkwaro.” (Pisalema 33:6) Genesa 1:2 yi vula leswaku loko misava ya ha funengetiwe hi mati naswona Xikwembu xa ha lunghiselela vanhu ndhawu yo tshama eka yona, “matimba lama tirhaka ya Xikwembu a ma ya hala ni hala ehenhla ka vuandlalo bya mati.” Kutani xi tirhise moya wa xona lowo kwetsima leswaku xi tumubuluxa swilo hinkwaswo leswi nga kona emisaveni.
Xikwembu xi tlhela xi tirhisa tintsumi leswaku xi hetisisa xikongomelo xa xona. Xi vumbe tintsumi leswaku ti tshama na xona etilweni. Tintsumi ti ni matimba swinene. Ti hundzisa marungula ya nkoka swinene ti tlhela ti endla mintirho ya nkoka. Hi xikombiso, Matsalwa ma vula leswaku Nawu lowu hundziseriweke hi ku tirhisa Muxe wu fana ni “rito leri vuriweke hi ku tirhisa tintsumi.” Nakambe tintsumi ta Xikwembu ti pfuna malandza ya xona laha emisaveni. Entiyisweni, Matsalwa ma vula leswaku tintsumi ta Xikwembu i “mimoya ya ntirho wa le rivaleni, leyi rhumiweke ku ya tirhela lava nga ta dya ndzhaka ya ku ponisiwa.”—Vaheveru 1:14; 2:2.
[Xifaniso lexi nga eka tluka 10]
Buku-nsongwa ya le Lwandle leri Feke ya khale leyi kombaka vito ra Xikwembu
[Xifaniso lexi nga eka tluka 10, 11]
Nawu wu hundziseriwe hi ku tirhisa muprofeta Muxe ku fana ni “rito leri vuriweke hi ku tirhisa tintsumi”