Swikombo Swa Minkandziyiso Leyi Nga Eka Xiyimiso Xa Minhlangano Xa Mahanyelo Ni Ntirho
APRIL 3-9
it-2 776 ¶4
Ku Hundzuka
Muvumbi a nga ha sungula ku endla xibya ivi a cinca xivumbeko xa xona loko xibya xa kona “xi onhiwe hi voko ra muvumbi. (Yr 18:3, 4) Loko Yehovha a tirhisa xikombiso lexi, a nga kombisi leswaku u fana ni muvumbi wa xiviri ‘la onhaka hi voko rakwe’ kambe u ni vulawuri eka vanhu, byo va a cinca ndlela leyi a endlaka swilo ha yona hi ku pfumelelana ni ndlela leyi va angulaka ha yona kumbe hi ku va va tsandzeka ku angula eka swiendlo ni musa wakwe. (Ringanisa na Esa 45:9; Rhm 9:19-21) A nga ha “tisola hikwalaho ka khombo leri [a] ehlekete ku ri tisa eka” tiko kumbe a ‘tisola hikwalaho ka vunene lebyi a vuleke leswaku u ta byi endla hikwalaho ka vunene bya rona,’ hi ku ya hi ndlela leyi tiko ri angulaka ha yona loko a tirhisana na rona. (Yr 18:5-10) Hikokwalaho, leswi a swi vuli swona leswaku Muvumbi Lonkulu ku nga Yehovha u endla xihoxo, kambe munhu tanihi “vumba” a nga ha “cinca” (ndlela leyi a hanyaka ha yona) hi ku pfumelelana ni leswi a swi lavaka, leswi swi nga ha vanga khombo kumbe ku va a tsakeriwa hi Yehovha.
it-1 524 ¶3-4
Ntwanano
Ntwanano Lowuntshwa. Yehovha u vulavule ka ha ri emahlweni hi ntwanano lowuntshwa lowu a wu endleke hi ku tirhisa muprofeta Yeremiya emalembeni ya va-601 ku ya eka 700 B.C.E., leswaku a wu nga ta fana ni ntwanano wa Nawu lowu vaisrayele va wu tluleke. (Yr 31:31-34) Hi vusiku bya le mahlweni ko va Yesu a fa hi Nisani 14, 33 C.E., loko a simeka ku tlangeriwa ka Xilalelo xa Hosi, u tivise hi ta ntwanano lowuntshwa leswaku a wu ta endliwa wu tirha hi ku tirhisa xitlhavelo. (Lk 22:20) Hi siku ra vu-50 endzhaku ka loko a pfuxiwile ni hi siku ra vu-10 endzhaku ka loko a tlhandlukele eka Tata wakwe, u chululele vadyondzisiwa vakwe moya lowo kwetsima lowu a wu huma eka Yehovha lava a va hlengeletane eka kamara ra le henhla eYerusalema.—Min 2:1-4, 17, 33; 2Ko 3:6, 8, 9; Hv 2:3, 4.
Lava katsekaka eka ntwanano lowuntshwa i Yehovha na “Israyele wa Xikwembu” ku nga lava totiweke hi moya ku katsa na Kreste ivi va vumba vandlha. (Hv 8:10; 12:22-24; Ga 6:15, 16; 3:26-28; Rhm 2:28, 29) Ntwanano lowuntshwa wu tirha hikwalaho ka ku halatiwa ka ngati ya (xitlhavelo xa ) Yesu Kreste naswona nkoka wa yona wu nyikeriwe eka Yehovha endzhaku ka loko Yesu a tlhandlukele etilweni. (Mt 26:28) Loko munhu a hlawuriwe hi Xikwembu leswaku a ya hanya etilweni (Hv 3:1), Xikwembu xi endla leswaku munhu wa kona a va eka ntwanano wa Xona hi ku tirhisa xitlhavelo xa Kreste. (Ps 50:5; Hv 9:14, 15, 26) Yesu Kreste i Muhlanganisi wa ntwanano lowuntshwa (Hv 8:6; 9:15) naswona hi yena Mbewu yo sungula ya Abrahama. (Ga 3:16) Yesu tanihi muhlanganisi wa ntwanano lowuntshwa, u pfuna lava nga eka wona leswaku va va swirho swa xiviri swa mbewu ya Abrahama (Hv 2:16; Ga 3:29) hi ku va va rivaleriwa swidyoho swa vona. Yehovha u va teka va ri lava lulameke.—Rhm 5:1, 2; 8:33; Hv 10:16, 17.