Rhanga U Ya Endla Ku Rhula Ni Makwenu—Njhani?

Tianakanye u ri karhi u hanya eGaleliya hi nkarhi wa Yesu. U teke riendzo ro ya eYerusalema leswaku u ya tlangela Nkhuvo Wa Mintsonga. Doroba ri lo hontlo, hi vagandzerikulobye lava humaka ematikweni yo hambanahambana. U lava ku nyikela eka Yehovha. U le xikarhi ka ntshungu lowu yaka etempeleni, u karhi u famba ni mbuti leyi u lavaka ku nyikela ha yona. Loko u fika, u kuma leswaku tempele yi tele hi vanhu lava na vona va lavaka ku nyikela. Sweswi se i nkarhi wa wena wa leswaku u yisa mbuti ya wena eka muprista. Hi nkarhi wolowo, u tsundzuka leswaku makwerhu loyi u tlulaneke milenge na yena swi nga endleka a ri kona exikarhi ka ntshungu wolowo. Yesu u ku byela leswi u faneleke u swi endla. (Hlaya Matewu 5:24.) I yini leswi wena ni makwerhu loyi u tlulaneke milenge na yena mi faneleke mi swi endla leswaku mi kondletela ku rhula? Eka swivulwa leswi xaxametiweke laha hansi fungha lexi nga ntiyiso.

U FANELE U . . .

• vulavula ni makwenu ntsena loko u vona onge ku ni xivangelo lexi twalaka xo va a hlundzukile

• lulamisa makwenu loko u vona onge u hlundzukisiwe hi mhaka leyi nga pfuniki nchumu kumbe u vona onge na yena u hoxe xandla emhakeni ya kona

• rhiya ndleve loko makwenu a tiphofula hambi loko u nga swi twisisi kahle leswi n’wi khunguvanyiseke, kombela ku rivaleriwa swi suka embilwini hikwalaho ka leswi a tweke ku vava kumbexana u n’wi khunguvanyise handle ko swi xiya

MAKWENU U FANELE A . . .

• byela van’wana evandlheni ndlela leyi u n’wi khunguvanyiseke ha yona leswaku va ta n’wi seketela

• ku holovela, a ku byeletela swilo leswi u n’wi khunguvanyiseke ha swona leswaku u ta pfumela xihoxo xa wena

• xiya ku titsongahata ni xivindzi lexi u veke na xona xo ya eka yena u ya kombela ku rivaleriwa ivi a ku rivalela hi mbilu yo basa

Hambileswi namuntlha hi nga ha nyikeriki hi swifuwo loko hi gandzela Xikwembu, leswi Yesu a swi dyondziseke malunghana ni kondletela ku rhula ni makwenu swi fambisana njhani ni ku amukeleka ka vugandzeri bya hina eka Xikwembu?