Ndlela Leyi U Nga Kotaka Ku Hanya eMisaveni Leyintshwa Ha Yona

Tinhlokomhaka leti nga hundza ti kombise leswaku ku nga ri khale Xikwembu xi ta herisa vanhu vo homboloka ni swiphiqo swa vona hinkwaswo. Ha tiyiseka leswaku leswi swi ta endleka. Hikwalahokayini? Hikuva Rito ra Xikwembu, ku nga Bibele ri tshembise ri ku:

“Misava ya hundza.”—1 YOHANE 2:17.

Hi nga tiyiseka leswaku ku ta va ni lava nga ta pona hikuva ndzimana ya Bibele leyi nga laha henhla yi tlhela yi tshembisa yi ku:

“Loyi a endlaka ku rhandza ka Xikwembu u tshama hilaha ku nga heriki.”

Hikwalaho, loko hi lava ku pona, hi fanele hi endla ku rhandza ka Xikwembu. Leswaku hi ta kota ku tiva ku rhandza ka Xikwembu, hi fanele hi rhanga hi xi tiva.

PONA MAKUMU HI KU “KUMA VUTIVI” HI XIKWEMBU

Yesu u te: “Va ta kuma vutomi lebyi nga heriki loko va ya emahlweni va kuma vutivi hi wena Xikwembu xi ri xin’we xa ntiyiso.” (Yohane 17:3) Leswaku hi pona makumu kutani hi hanya hilaha ku nga heriki, hi fanele hi “kuma vutivi” hi Xikwembu. Sweswo a swi vuli ku pfumela leswaku Xikwembu xi kona kumbe ku tshemba swilo swi nga ri swingani hi xona ntsena. Hi fanele hi va vanghana va xona. Loko hi lava leswaku vunghana bya hina byi tiya, hi fanele hi heta nkarhi ni vanghana va hina. Swi tano ni hi ku va munghana wa Xikwembu. Xiya ntiyiso wa risima lowu hi wu dyondzaka eBibeleni lowu hi pfunaka ku va vanghana va Xikwembu ni ku hlayisa vuxaka byolebyo.

HLAYA RITO RA XIKWEMBU, BIBELE SIKU NI SIKU

Nkarhi ni nkarhi hi dya swakudya leswaku hi ta kota ku hanya. Kambe Yesu u te: “Munhu a nga fanelanga a hanya hi xinkwa ntsena, kambe u ta hanya ni hi rito rin’wana ni rin’wana leri humaka enon’wini wa Yehovha.”—Matewu 4:4.

Namuntlha, hi kuma marito ya Yehovha eBibeleni. Loko u ri karhi u hlaya buku yoleyo yo kwetsima, u ta dyondza ntiyiso wa risima hi leswi Xikwembu xi swi endleke enkarhini lowu nga hundza, leswi xi nga eku swi endleni sweswi ni leswi xi nga ta swi endla enkarhini lowu taka.

KHONGELELA KU PFUNIWA HI XIKWEMBU

U nga endla yini loko u lava ku yingisa nkongomiso wa Xikwembu kambe swi ku tikela ku tshika ku endla leswi xi vulaka leswaku swi hoxile? Loko swi te tano, swi nga ku pfuna swinene loko u xi tiva kahle Xikwembu.

Anakanya hi wansati loyi hi nga ta n’wi vitana Sakura, loyi a a tikhoma ku biha hi swa masangu. Loko a sungula ku dyondza Bibele, u dyondze hi xileriso xa Xikwembu xa ku ‘balekela ku tikhoma ko biha hi swa masangu.’ (1 Vakorinto 6:18) Sakura u khongele eka Xikwembu leswaku a va ni matimba naswona u kote ku tshika mukhuva lowu wo biha. Kambe wa ha fanele a lwisana ni miringo. U ri: “Loko ndzi ehleketa swilo leswi thyakeke, ndzi byela Yehovha hinkwaswo hi xikhongelo hikuva ndza swi tiva leswaku nyimpi leyi a ndzi nge yi lwi ndzi ri ndzexe. Matimba ya xikhongelo ma endle leswaku ndzi tshinela ekusuhi na Yehovha.” Ku fana na Sakura, vanhu va timiliyoni va le ku dyondzeni hi Xikwembu. Xi va nyika matimba yo hundzula vutomi bya vona kutani va hanya hi ndlela leyi xi tsakisaka.—Vafilipiya 4:13.

Loko u ya u xi tiva kahle Xikwembu, u ta ya u ‘tiviwa hi xona’ tanihi munghana wa risima. (Vagalatiya 4:9; Pisalema 25:14) Kutani u ta kota ku pona leswaku u ya hanya emisaveni leyintshwa ya Xikwembu. Kambe, xana misava yoleyo leyintshwa yi ta va njhani? Nhlokomhaka leyi landzelaka yi ta hlamusela.