Misava Yi Ta Lovisiwa Rini? Leswi Yesu A Swi Vuleke

XIYA SWILO SWIMBIRHI LESWI YESU A SWI VULEKE HI MAKUMU:

“Hikwalaho, tshamani mi rindzile, hikuva a mi ri tivi siku hambi ku ri nkarhi wa kona.”—MATEWU 25:13.

“Tshamani mi rindzile, tshamani mi xalamukile, hikuva a mi wu tivi nkarhi wa kona.”—MARKA 13:33.

Kutani ku hava ni un’we emisaveni loyi a swi tivaka leswaku makumu ya misava leyi ma ta fika rini. Hambiswiritano, Xikwembu xi veke “nkarhi,” ku nga “siku,” leswaku makumu ma fika. (Matewu 24:36) Xana leswi swi vula leswaku a swi koteki ku tiva loko makumu ma ri ekusuhi? Doo! Yesu u byele vadyondzisiwa vakwe leswaku va languta swiendlakalo swo hlayanyana leswi a swi ta kombisa leswaku makumu ma le kusuhi.

XIKOMBISO

Nxaxamelo lowu wa swiendlakalo wu ta va xikombiso xa ku “fika ka makumu.” Yesu u te: “Matiko ma ta hlaselana ni mifumo yi ta hlaselana, ku ta va ni ku kayivela ka swakudya ni ku tsekatseka ka misava etindhawini to hambanahambana.” (Matewu 24:3, 7) U tlhele a vula leswaku a ku ta va ni “mintungu.” (Luka 21:11) Xana wa swi vona swiendlakalo leswi Yesu a profeteke ha swona?

Namuntlha vanhu va xaniseka hikwalaho ka tinyimpi, ndlala ni ku tsekatseka ka misava ku katsa ni mavabyi yo tala. Hi xikombiso, hi 2004 ku tsekatseka lokukulu ka misava loku veke kona eLwandle ra Indian ku endle leswaku ku va ni tsunami leyi dlayeke vanhu va kwalomu ka 225 000. Ku tlula lembe rin’we, ntungu wa COVID-19 wu dlaye vanhu va kwalomu ka 2,6 wa timiliyoni emisaveni hinkwayo. Yesu u vule leswaku swiendlakalo swo fana ni leswi a swi ta kombisa leswaku ku lovisiwa ka misava leyi ku le kusuhi.

‘MASIKU YO HETELELA’

Bibele yi hlamusela nkarhi lowu nga ta rhangela makumu tanihi ‘masiku yo hetelela.’ (2 Petro 3:3, 4) Timotiya wa Vumbirhi 3:1-5, yi vula leswaku emasikwini yo hetelela vanhu a va nga ta va na mhaka ni mahanyelo lamanene. (Vona bokisi leri nge, “Loko Misava Yi Nga Si Lovisiwa.”) Xana wa va vona vanhu lava tilavelaka swa vona ntsena, lava nga ni makwanga, lava nga ni tihanyi ni lava nga rhandziki van’wana namuntlha? Leswi na swona i vumbhoni bya leswaku hi hanya ekusuhi swinene ni ku lovisiwa ka misava.

Masiku yo hetelela ma ta teka nkarhi wo tanihi kwihi? Hi ku ya hi Bibele, ma ta teka “nkarhi wo koma.” Kutani, Xikwembu xi ta lovisa “lava onhaka misava.”—Nhlavutelo 11:15-18; 12:12.

MISAVA LEYI NGA PARADEYISI YI LE KUSUHI!

Xikwembu se xi veke siku ni nkarhi lowu xi nga ta herisa misava leyi yo homboloka. (Matewu 24:36) Kambe, ku ni mahungu yo tala lamanene, Xikwembu a xi “naveli leswaku ku lova ni un’we.” (2 Petro 3:9) Xi nyika vanhu nkarhi wo dyondza hi ku rhandza ka xona va tlhela va xi yingisa. Hikwalahokayini? Hikuva xi lava leswaku hi pona loko ku lovisiwa misava leyi kutani hi ya hanya emisaveni ya xona leyintshwa, loko misava yi ta va yi ri paradeyisi.

Xikwembu xi le ku tiyisekeni leswaku vanhu emisaveni hinkwayo va dyondza ndlela ya leswaku va kota ku hanya emisaveni leyintshwa eka Mfumo wa xona. Yesu u vule leswaku mahungu lamanene ya Mfumo wa Xikwembu a ma ta chumayeriwa “emisaveni hinkwayo.” (Matewu 24:14) Hi 2019, Timbhoni ta Yehovha emisaveni hinkwayo ti hete tiawara to tlula tibiliyoni timbirhi ti ri karhi ti chumayela ni ku dyondzisa vanhu rungula ra le Bibeleni leri nyikaka ntshembo. Yesu u vule leswaku ntirho lowu wo chumayela a wu ta endliwa emisaveni hinkwayo makumu ma nga si fika.

Nkarhi wa leswaku vanhu va fuma wu le kusuhi ni ku hela. Kambe mahungu lamanene hileswaku u nga pona loko ku lovisiwa misava kutani u hanya eParadeyisini leyi Xikwembu xi yi tshembiseke. Nhlokomhaka leyi landzelaka yi ta hlamusela ndlela leyi u nga hanyaka ha yona emisaveni yoleyo leyintshwa.