Papalata Moya Lowu Vanhu Va Nga Na Wona Namuntlha Wo Khathala Hi Vona Ntsena

NAMUNTLHA vanhu vo tala va lava ku khomiwa hi ndlela yo hlawuleka ni ku va ni swikhundlha leswi tlakukeke. Hambiloko va khomiwa hi ndlela yo hlawuleka va vona swi nga enelanga. Vanhu lava ehleketaka hi ndlela yoleyo, va khathala hi vona ntsena naswona a va swi tlangeli leswi va nga na swona. Bibele yi vula leswaku vanhu va ta tikhoma hi ndlela yoleyo emasikwini yo hetelela.—2 Tim. 3:2.

Ku va vanhu va khathala hi vona ntsena a swi sungulanga namuntlha. Hi xikombiso, Adamu na Evha va lave ku tihlawulela leswinene ni leswi nga riki swinene naswona xiboho lexi va xi endleke xi endle leswaku hi xaniseka ninamuntlha. Xikombiso xin’wana i xa Hosi Uziya wa le Yuda loyi a a titwa a faneleka ku hisa murhi wo nun’hwela etempeleni kambe a a hoxisile swinene. (2 Tikr. 26:18, 19) Hilaha ku fanaka, Vafarisi ni Vasaduki a va tibyela leswaku Xikwembu xi fanele xi va khoma hi ndlela yo hlawuleka hileswi a va ri vatukulu va Abrahama.—Mat. 3:9.

Hi hanya ni vanhu lava khathalaka hi vona ntsena ni ku tikukumuxa naswona matikhomelo ya vona ma nga hi kucetela leswaku hi tikhoma ku fana na vona. (Gal. 5:26) Hi nga ha hetelela hi titwa hi faneriwa hi swikhundlha swo karhi kumbe ku khomiwa hi ndlela yo hlawuleka. I yini leswi nga hi pfunaka hi papalata ku ehleketa hi ndlela yoleyo? A hi rhangeni hi ku kambisisa milawu yimbirhi ya le Bibeleni leyi nga ta hi pfuna ku tiva langutelo ra Yehovha hi mhaka leyi.

Yehovha u tiva leswi hi faneleke. Xiya swikombiso swin’wana.

Eka lunghiselelo ra ndyangu, wanuna u lava ku titwa a xiximiwa hi nsati wakwe ni wansati u lava ku titwa a rhandziwa hi nuna wakwe. (Efe. 5:33) Vatekani va fanele va kombisana rirhandzu. (1 Kor. 7:3) Nakambe vatswari va langutele leswaku vana va vona va va yingisa. Hilaha ku fanaka ni vana va fanele ku rhandziwa ni ku seketeriwa hi vatswari va vona.—2 Kor. 12:14; Efe. 6:2.
Evandlheni vakulu va fanele va xiximiwa hileswi va tirhaka hi matimba. (1 Tes. 5:12) Hambiswiritano, a va fanelanga va lawula vamakwerhu.—1 Pet. 5:2, 3.
Xikwembu xi lava leswaku hi hakela vafumi swibalo ni ku tlhela hi va xixima.—Rhom. 13:1, 6, 7.

Yehovha u hi nyika swo tala ku tlula leswi hi faneleke hileswi a hi rhandzaka. Hi faneriwa hi ku fa hikwalaho ka leswi hi nga vadyohi. (Rhom. 6:23) Nilokoswiritano, Yehovha u hi nyika mikateko yo tala hileswi a hi rhandzaka. (Ps. 103:10, 11) Hi kuma mikateko yoleyo hikwalaho ka musa wakwe lowukulu.—Rhom. 12:6-8; Efe. 2:8.

NDLELA YO PAPALATA MOYA WO KHATHALA HI HINA NTSENA NI KU TIKUKUMUXA

Papalata ku anakanya ku fana ni vanhu va misava leyi. Handle ko swi xiya, hi nga ha sungula ku titeka hi antswa ku tlula van’wana. Yesu u tirhise xikombiso xa vatirhi lava holeriweke denari ku kombisa ndlela leyi swi nga olovaka hayona ku va ni moya wolowo. Vatirhi van’wana va sungule ku tirha ka ha ri nimixo naswona va tirhe siku hinkwaro edyambyini kasi van’wana va lo tirha awara yin’we ntsena. Lava tirheke siku hinkwaro a va ehleketa leswaku va ta kuma muholo wo nyawula. (Mat. 20:1-16) Yesu u tirhise xikombiso lexi ku pfuna valandzeri vakwe va eneriseka hileswi Xikwembu xi va nyikaka swona.

Vatirhi van’wana va ri karhi va gungula eka n’wini wa yindlu. — Vavanuna lava tirheke siku hinkwaro a va vona va faneriwa hi ku kuma muholo wo nyawula

Khensa u tlhela u eneriseka. (1 Tes. 5:18) Tekelela muapostola Pawulo loyi a nga kombelangiki ku pfuniwa hi vamakwerhu va le Korinto hambileswi a a ri ni mfanelo yo endla tano. (1 Kor. 9:11-14) Ematshan’weni yo langutela leswaku vanhu va hi endlela swilo, hi fanele hi tlangela leswi va kotaka ku hi endlela swona hi ku swi rhandza.

Muapostola Pawulo a ri karhi a tirha ni vavanuna vambirhi ku endla tende. — Muapostola Pawulo a nga kalanga a kombela mpfuno wa swa timali

Titsongahate. Loko hi tivona hi antswa ku tlula van’wana, hi nga sungula ku tivona hi faneriwa hi ku kuma swilo swo karhi. Kambe loko hi titsongahata hi ta papalata langutelo ro tano leri nga ni khombo.

Swifaniso: 1. Muprofeta Daniyele a dyuharile. 2. Muti wa khale wa Babilona. 3. Daniyele a ha ri muntshwa ni vanghana va yena vanharhu va Vaheveru. — Ku titsongahata ka Daniyele ku endle a va wa risima eka Yehovha

Muprofeta Daniyele i xikombiso lexinene xa ku titsongahata. A swi ta va swi n’wi oloverile ku tivona a antswa ku tlula van’wana kumbe a tibuma hikwalaho ka swikhundlha leswi a a ri na swona hikwalaho ka leswi a a huma eka ndyangu lowu a wu tiveka, a a ri mpohlo, a a tlharihile naswona a a ri ni vuswikoti. (Dan. 1:3, 4, 19, 20) Hambiswiritano, Daniyele u titsongahatile naswona sweswo swi n’wi endle a va wa risima eka Yehovha.—Dan. 2:30; 10:11, 12.

A hi papalateni moya wo tivona hi antswa ku tlula van’wana ni ku tikukumuxa ku nga leswi vanhu va swi endlaka namuntlha. Ku ri na sweswo, a hi yeni emahlweni hi tsaka hi mikateko leyi Yehovha a hi nyikaka yona hikwalaho ka musa wakwe lowukulu.