Xana Wa Ha Tsundzuka?
Xana u ti hlaye hi vukheta tinhlokomhaka ta Xihondzo xo Rindza ta lembe leri? Loko swi ri tano, vona loko u ta kota ku hlamula swivutiso leswi landzelaka:
Xana i yini lexi hi susumetelaka ku dzunisa Yehovha?
Hi endla tano hikuva ha n’wi xixima naswona ha n’wi rhandza swinene Yehovha. Nakambe ha n’wi dzunisa hileswi hi lavaka van’wana va n’wi tiva.—w25.01, tl. 3.
Loko un’wana a hi khunguvanyisa, i yini leswi nga hi pfunaka leswaku hi n’wi rivalela?
Hambileswi hi nga taka hi nga yi honisi ndlela leyi hi titwaka hayona kambe loko hi tshika ku hlundzuka ni xikhomela swi ta hi pfuna leswaku hi papalata switandzhaku leswi vangiwaka hi ku hlundzuka.—w25.02, matl. 15-16.
Hikwalahokayini mudyondzisiwa Marka a ri xikombiso lexinene eka vantshwa va xinuna?
Hi ku swi rhandza Marka u amukele xiavelo lexi a a nyikiwe xona. Hambileswi ku veke ni xiyimo lexi kumbexana xi n’wi twiseke ku vava ni ku tlhela xi n’wi heta matimba, a nga lan’wanga. U ye emahlweni a va ni vuxaka lebyinene na Pawulo ni vamakwavo van’wana.—w25.04, tl. 27.
Xana Yesu a a vula yini loko a khongela a ku: “Ndzi va tivise vito ra wena”? (Yohane 17:26)
Vadyondzisiwa vakwe se a va ri tiva vito ra Xikwembu. Kambe Yesu u endle leswaku va tiva N’wini wa vito rero ku katsa ni swikongomelo Swakwe, vumunhu Byakwe ni leswi A swi endleke.—w25.05, matl. 20-21.
Hi kota ku xiya yini loko hi titsongahata?
Hi kota ku xiya leswaku a hi swi tivi swilo swin’wana. Hi xikombiso, a hi swi tivi leswaku makumu ma ta fika rini kumbe leswaku Yehovha u ta endla yini hi nkarhi wolowo. Nakambe a hi swi tivi leswaku ku ta endleka yini mundzuku kumbe leswaku Yehovha u hi tiva ku fikela kwihi.—w25.06, matl. 15-18.
I yini leswi nga hi pfunaka leswaku hi vuyeriwa eka nhlokomhaka yo karhi kumbe mbulavulo wa le rivaleni?
Hi nga tivutisa leswi: ‘Hi byihi vumbhoni lebyi tirhisiweke ku khorwisa vayingiseri kumbe vahlayi? Xana ku ni xifaniso lexinene lexi ndzi nga xi tirhisaka loko ndzi ri karhi ndzi dyondzisa? I vamani lava nga tsakelaka nhlokomhaka leyi?’—w25.07, tl. 19.
Hi nga dyondza yini hi ku rivalela ka Xikwembu eka ndlela leyi xi khomeke Davhida hayona?
Hambileswi Davhida a endleke swidyoho leswikulu, loko a handzukile Yehovha u n’wi rivalerile. (1 Tih. 9:4, 5) Loko Xikwembu xi rivalela, a xa ha swi tsundzuki leswi mudyohi a swi endleke hambi ku ri ku tlhela xi swi pfuxa enkarhini lowu taka.—w25.08, tl. 17.
Loko xichudeni xa Bibele xi tikeriwa ku twisisa yinhla yo karhi, u nga endla yini?
Loko swi xi tikela ku twisisa yinhla leyi u xi hlamuseleke kahle hi ku tirhisa Bibele, hundzani kutani endzhaku mi tlhelela eka yona.—w25.09, tl. 24.
Hikwalahokayini Bibele yi vula leswaku xidyoho xi ni “matimba lama kanganyisaka”? (Hev. 3:13)
Xidyoho xi nga endla leswaku hi endla swilo swo biha. Xi nga tlhela xi endla hi kanakana loko Xikwembu xi hi rhandza hakunene.—w25.10, tl. 16.
Hi swihi swilo swinharhu leswi nga hi pfunaka hi antswisa swikhongelo swa hina?
(1) Hi nga ehleketisisa hi vumunhu bya Yehovha. (2) Hi nga ehleketa hileswi hi langutaneke na swona ivi hi swi vula, ku fana niloko hi fanele hi rivalela munhu un’wana. (3) Hi nga heta nkarhi wo leha hi ri karhi hi khongela. Leswi swi ta hi pfuna hi kota ku phofula ndlela leyi hi titwaka hayona.—w25.10, matl. 19-20.
Hi nga va pfuna njhani vadyuhari?
Hi nga va vhakela kumbe hi va fonela. Hi nga tlhela hi va heleketa eka dokodela. Kumbe hi nga tirha na vona nsimu hi tirhisa tindlela to hambanahambana to chumayela.—w25.11, matl. 6-7.
Hi swihi swilo swa nkoka leswi nga endlaka mucato wa Mukreste wu xiximeka?
Landzelela milawu ya mfumo ya swa micato. Tiyiseka leswaku mucato ni nkhuvo lowu va ka kona endzhaku ka wona wu kombisa leswaku u hanya hi mihandzu ya moya wa Xikwembu. Ambala hi ndlela leyi xiximekaka naswona u papalata mikhuva leyi nga sekeriwangiki ematsalweni. Bulani hi ndlela leyinene loko mi ri karhi mi lunghiselela mucato.—w25.12, matl. 21-24.