Vadyuhari Mi Va Nkoka Swinene eVandlheni

Kumbexana na wena a wa ha koti ku endla swo tala hikwalaho ka leswi u dyuhaleke. Hambileswi u tirheleke Yehovha hi ku tshembeka ku ringana malembe yo tala, u nga ehleketa leswaku a wu pfuni nchumu hikwalaho ka leswi u nga ha kotiki ku endla swo tala. Hi xikombiso, u nga ha ringanisa leswi u swi endlaka sweswi ni leswi a wu kota ku swi endla khale. Loko swi ri tano, u nga pfuniwa hi yini leswaku u tsaka hambiloko u pfa u ehleketa hi ndlela yoleyo?

LESWI YEHOVHA A SWI LANGUTELEKE EKA WENA

Tivutise, ‘Yehovha u langutele yini eka mina?’ U nga kuma nchavelelo eka marito lama nga eka Deteronoma 6:​5, lama nge: “U fanele u rhandza Yehovha Xikwembu xa wena hi mbilu ya wena hinkwayo ni hi vutomi bya wena hinkwabyo ni hi matimba ya wena hinkwawo.”

Hi ku ya hi tsalwa leri, Yehovha u langutele leswaku u n’wi tirhela hi mbilu ya wena hinkwayo, hi vutomi bya wena hinkwabyo ni hi matimba ya wena hinkwawo. Ku tsundzuka sweswo swi ta ku pfuna leswaku u papalata ku tiringanisa ni van’wana kumbe ku pimanisa leswi u kotaka ku swi endla sweswi ni leswi a wu swi endla khale.

Ehleketa hi leswi: Loko wa ha ri muntshwa, a wu n’wi tirhela njhani Yehovha? Vanhu vo tala lava tirhelaka Yehovha va nga vula leswaku va n’wi tirhele hilaha va nga kotaka hakona. Na wena, loko wa ha ri muntshwa a wu endla leswi nga ematimbeni ya wena. Sweswi se u kuleke u n’wi tirhela njhani Yehovha? Swi nga endleka leswaku hambileswi se u kuleke, wa ha kota ku endla leswi nga matimbeni ya wena. Loko u languta swilo hi ndlela yoleyo, u ta swi xiya leswaku wa ha tirhela Yehovha hilaha a wu endla hakona khale. Loko wa ha ri muntshwa a wu endla hinkwaswo leswi nga matimbeni ya wena leswaku u n’wi tirhela, na sweswi hambileswi u dyuhaleke, wa ha endla tano.

U NGA VA PFUNA SWINENE VAN’WANA

Hileswi swin’wana leswi nga ku pfunaka: Ematshan’wini yo ehleketa hi leswi u tsandzekaka ku swi endla, ehleketa hi leswi u kotaka ku swi endla sweswi. I ntiyiso leswaku leswi se u nga mudyuhari, u nga kota ku endla swilo leswi a wu nga ta kota ku swi endla loko wa ha ri muntshwa. Hi xikombiso, u nga endla leswi landzelaka:

Byela van’wana leswi u swi dyondzeke evuton’wini bya wena. Twana marito lama landzelaka lama vuriweke hi malandza yo karhi ya le Bibeleni:

Hosi Davhida: “A ndzi ri jaha sweswi se ndzi dyuhele, kambe a ndzi si tshama ndzi vona munhu la lulameke a fularheriwa, kumbe vana vakwe va lavana na xinkwa.”—Ps. 37:25.

Yoxuwa: “Sweswi yingisani! Ndzi ta fa ku nga ri khale naswona mi swi tiva kahle hi mbilu ya n’wina hinkwayo ni hi vutomi bya n’wina hinkwabyo leswaku a ku wanga ni rito ni rin’we eka switshembiso leswinene hinkwaswo leswi Yehovha Xikwembu xa n’wina a mi tshembiseke swona. Hinkwaswo swi hetisekile eka n’wina. A ku wanga ni rito ni rin’we eka swona.”—Yox. 23:14.

Kumbexana na wena u ve na ntokoto lowu fanaka. Davhida na Yoxuwa va vulavule hi swilo leswi va langutaneke na swona evuton’wini. Hikwalaho ka leswi malandza lawa yo tshembeka ya Yehovha ma vulavuleke hi swilo leswi ma swi voneke ni ku swi twa eka malembe yo tala lawa ma ma heteke ma tirhela Yehovha, leswi ma swi vuleke a swi ri ni ntikelo swinene.

Loko ku ve u tirhele Yehovha malembe yo tala, na wena u nga byela van’wana hi mikateko leyi u yi kumeke loko u ri karhi u n’wi tirhela. Xana ku ni xiendlakalo xo karhi lexi u nga xi rivaliki xa ndlela leyi u voneke Yehovha a katekisa vanhu vakwe? Loko xi ri kona, byela van’wana hi xona! Ntokoto wolowo wu nga va khumba hilaha swi veke hakona ni le ka wena. Hikwalaho, loko van’wana va twa mitokoto leyi u veke na yona loko u ri karhi u tirhela Yehovha, swi nga va khutaza swinene.—Rhom. 1:​11, 12.

Ndlela yin’wana leyi u nga khutazaka van’wana hayona, i ku va kona etinhlengeletanweni ta vandlha hi xiviri loko swi koteka. Loko u ri kwalaho u ta khutaza vamakwerhu naswona na wena u ta khutazeka. Connie loyi hi buleke hi yena eku sunguleni u ri: “Ku va kona etidyondzweni swi endla leswaku ndzi nga heli matimba. A swi koteki leswaku ndzi hela matimba, ndzi ri karhi ndzi kombiwa rirhandzu eHolweni ya Mfumo. Nakambe ndzi kombisa leswaku ndza swi tlangela leswi vamakwerhu va ndzi endlelaka swona hi ku va ndzi va nyika tinyiko. Naswona ndza tiyiseka leswaku ndza katseka eka mitirho ya vugandzeri swin’we ni vamakwerhu.”

YEHOVHA WA SWI TLANGELA LOKO U N’WI TIRHELA HI KU TSHEMBEKA

Matsalwa ma vulavula hi vanhu vo tala lava hikwalaho ka swiyimo swa vona a va nga koti ku endla swilo leswi a va lava ku swi endla kambe a va rhandziwa hi Yehovha. Ehleketa hi mukhalabye wa Muisrayele loyi a vitaniwaka Simiyoni, loyi a ha hanya loko Yesu a velekiwa. Swi nga endleka leswaku loko Simiyoni a ya etempeleni, u vone majaha ma ri karhi ma endla ntirho wa nkoka kwalaho. Kambe yena a a ta endla yini? Hi ku ya hi langutelo ra vanhu, Simiyoni a ta va a vone onge a ka ha ri na lexi a nga ta xi endla entirhweni wa Yehovha hikwalaho ka leswi a a dyuharile. Kambe Yehovha a a nga swi voni hi ndlela yoleyo. U vone Simiyoni “a lulamile naswona a chava Xikwembu” naswona u n’wi nyike nkateko wo vona Yesu loyi a ha ri ricece. Yehovha u tlhele a tirhisa Simiyoni leswaku a vula vuprofeta lebyi vulavulaka hi Mesiya loyi a tshembisiweke. (Luka 2:​25-35) Swi le rivaleni leswaku Yehovha a a nga languti ntsena ku dyuhala ka Simiyoni kambe a a vona wanuna loyi a nga ni ripfumelo leri tiyeke ‘naswona a nga ni moya lowo kwetsima.’

Na wena u nga tiyiseka leswaku Yehovha wa swi tlangela loko u n’wi tirhela hi ku tshembeka hambiloko u ri na swiyimo leswi ku sivelaka ku n’wi tirhela hilaha u lavaka hakona. Eka Yehovha, ntirho lowu munhu a n’wi endlelaka wona wa “amukeleka, hi ku ya hi leswi munhu a nga na swona, ku nga ri leswi a nga riki na swona.”—2 Kor. 8:12.

Ehleketa hi leswi u nga swi endlaka. Hi xikombiso, hi tihi tindlela to chumayela leti u nga kotaka ku ti tirhisa hambiloko u chumayela swa xinkarhana? Kumbexana u nga pfuna van’wana hi ku va fonela kumbe u va rhumela khadi. Swilo switsongo swo komba van’wana rirhandzu, swi nga va khumba vamakwerhu ngopfungopfu loko swi endliwa hi nandza loyi ku nga khale a tirhela Yehovha.

Van’wana va na swiphiqo swa rihanyo. Xiya ntokoto wa le Vuxeni bya Afrika eka bokisi leri nge, “Bulo Leri N’wi Poniseke.”

Tsundzuka leswaku ku tshembeka ka wena ku nga khutaza van’wana. U xikombiso lexinene xa ku tiyisela naswona u nga tiyiseka leswaku ‘Xikwembu xi lulamile naswona a xi nge wu rivali ntirho wa wena ni rirhandzu leri u ri kombiseke hikwalaho ka vito ra xona, hi ku tirhela vakwetsimi naswona wa ha ya emahlweni u va tirhela.’—Hev. 6:10.

TIKARHATELE KU PFUNA VAN’WANA HILAHA U NGA KOTAKA HAKONA

Vulavisisi byi komba leswaku vadyuhari vo tala lava rhandzaka ku pfuna van’wana va ni rihanyo lerinene, va ehleketa kahle naswona va hanya nkarhi wo leha.

I ntiyiso leswaku ku endlela van’wana leswinene a swi nge endli leswaku ku suka swilo hinkwaswo leswi fambisanaka na ku dyuhala. I Mfumo wa Xikwembu ntsena lowu nga ta susa xidyoho lexi hi velekiweke na xona, ku nga xona xi endlaka hi dyuhala ni ku tlhela hi fa.—Rhom. 5:12.

Na sweswi, ntirho lowu u wu endlelaka Yehovha lowu katsaka ku pfuna van’wana va n’wi tiva, wu endla leswaku u va ni ntshembo lowu tiyeke ni ku tlhela u va ni rihanyo lerinene. Vadyuhari, swi tiveni leswaku Yehovha wa swi tlangela leswi mi n’wi endlelaka swona entirhweni wakwe naswona vandlha ra vuyeriwa hikwalaho ka leswi mi yaka emahlweni mi kombisa ripfumelo.