Ndlela Yo Lunghiselela Mucato Lowu Nga Ta Yisa Ku Dzuneka Eka Yehovha

1-2. Xana Yehovha u yi languta njhani micato?

XANA u vutile kumbe u vutiwile? Loko swi ri tano ha ku khensisa! A swi kanakanisi leswaku sweswi u khomekile hi ku pulana mucato wa wena naswona Yehovha u ku navelela leswinene. U lava leswaku mi tsakela siku ra mucatoa wa n’wina ni ku tlhela mi tiphina hi vutomi swin’we.—Swiv. 5:18; Risim. 3:11.

² I swa nkoka leswaku u xixima Yehovha emucatweni wa wena. Hikwalahokayini hi vula tano? Naswona u nga swi endla njhani sweswo? Hambileswi nhlokomhaka leyi yi kongomisiweke eka lava nga eku pulaneni ka mucato, misinya ya milawu leyi hi nga ta bula hayona eka nhlokomhaka leyi yi ta hi pfuna hinkwerhu leswaku hi xixima Yehovha hambiloko hi lo rhambiwa kumbe loko lava va lavaka ku tekana va kombela mavonelo ya hina.

HIKWALAHOKAYINI U FANELE U XIXIMA YEHOVHA?

3. Xana Vakreste lava vutaneke va fanele va tsundzuka yini loko va ri eku pulaneni ka mucato naswona hikwalahokayini?

³ Vakreste lava lavaka ku tekana naswona va nga eku pulaneni ka mucato, va fanele va tirhisa misinya ya milawu leyi Yehovha a hi nyikeke yona eRitweni rakwe. Hikwalahokayini? Hikuva Yehovha hi yena Musunguri wa vukati. U endle mucato wo sungula ku nga wa Adamu na Evha. (Gen. 1:28; 2:24) Hikwalaho lava va nga eku pulaneni ka mucato va fanele va tiyiseka leswaku mucato wa vona wu kombisa leswaku va xixima Yehovha.

4. Hi xihi xivangelo lexi endlaka lava lavaka ku tekana va fanele va xixima Yehovha hi siku ra vona ra mucato?

⁴ Ku ni xivangelo xa nkoka xo va u ehleketa hileswi Yehovha a lavaka u swi endla hi siku ra wena ra mucato, phela i Tata wa wena wa le tilweni naswona i Munghana wa wena lonkulu. (Hev. 12:9) A swi kanakanisi leswaku u lava ku tshama u ri ni vuxaka lebyinene na yena. A wu nge lavi leswaku hi siku rero kumbe rin’wana ku endleka nchumu lowu nga ta twisa Munghana wa wena ku vava. (Ps. 25:14) Loko u ehleketa hi swilo hinkwaswo leswi Yehovha a swi endleke ni leswi a nga ta ku endlela swona, xana a wu pfumeli leswaku mucato wa wena wu fanele wu kombisa leswaku wa n’wi xixima?—Ps. 116:12.

U NGA SWI KOMBISA NJHANILESWAKU WA N’WI XIXIMA YEHOVHA?

5. Xana Bibele yi nga va pfuna njhani lava va nga eku lunghiseleleni ka mucato?

⁵ Bibele a yi hi nyiki milawu ya ndlela leyi micato ya Vakreste yi faneleke yi endliwa hayona. Hikwalaho, lava lavaka ku tekana va nga hlela mucato ya vona hi ku ya hi leswi va swi tsakelaka, ndhavuko kumbe leswi swi tolovelekeke endhawini ya ka vona. Vagandzeri va ntiyiso va tlhela va xixima milawu leyi yi vekiweke hi mfumo loko swi ta eka mucato. (Mat. 22:21) Nilokoswiritano, mucato lowu pulaniweke hi ku ya hi misinya ya milawu ya Bibele wu ta yisa ku dzuneka eka Yehovha ni ku n’wi tsakisa. Hi yihi misinya ya milawu leyi u faneleke u yi tekela enhlokweni?

6. Hikwalahokayini swi ri swa nkoka leswaku lava lavaka ku tekana va landzela milawu ya mfumo loko swi ta eka mucato?

⁶ Yingisa milawu ya mfumo. (Rhom. 13:​1, 2) Ematikweni yo tala, lava lavaka ku tekana va fanele va landzelela milawu ya mfumo va nga si cata. Nakambe va fanele va tiva milawu ya laha va tshamaka kona. Loko u ri ni swivutiso swa ndlela leyi u nga swi endlaka hayona sweswo, kombela vakulu leswaku va ku pfuna.b

7. Mucato wu fanele wu va njhani naswona u nga swi endla njhani sweswo?

⁷ Endla leswaku mucato wa wena wu xiximeka. (1 Kor. 10:​31, 32) Tiyiseka leswaku mucato wa wena wu kombisa leswaku u hanya hi mihandzu ya moya wa Xikwembu ku nga ri moya wa misava. (Gal. 5:​19-26) Leswi wanuna a nga ta va nhloko ya ndyangu, u fanele a tiyiseka leswaku mucato wa xiximeka naswona wa tsakisa. Xana i yini leswi nga n’wi pfunaka ku endla tano? Mbulavulo wa mucato lowu sekeriweke eBibeleni lowu nyikeriwaka hi rirhandzu ni hi xichavo, wu ta endla leswaku lava wu twaka va tlangela lunghiselelo ra Xikwembu ra vukati, wu tlhela wu pfuna ni lava rhambiweke va twisisa nkoka wa mucato. Hikwalaho ka sweswo, vatekani vo tala lava nga Vakreste loko swi koteka va hlawula leswaku mbulavulo wolowo wu va eHolweni ya Mfumo. Loko u lava ku tirhisa Holo ya Mfumo, u fanele u tsalela huvo ya vakulu papila ra xikombelo ka ha ri ni nkarhi.

8. I yini leswi nga ku pfunaka u tiyiseka leswaku mucato wa wena wu yisa ku dzuneka eka Yehovha? (Varhoma 13:13)

⁸ Hlaya Varhoma 13:13. Loko u hlawula ku va ni nkhuvo wa mucato, u nga endla yini leswaku wu nga kombisi moya wa misava? Rito ra Xigriki leri hundzuluxeriweke ri va ‘mikhuvo leyi nga lawulekiki,’ ri kombetela eka mikhuvo leyi katsaka ku nwa ku tlula mpimo ni ku tlanga vunanga kukondza ku va vusiku. (Vona ‘mikhuvo leyi nga lawulekiki’ eka study note xa Xinghezi lexi nga eka Varhoma 13:13.) Loko u hlawula leswaku emucatweni wa wena ku va ni byala, tiyiseka leswaku a nga kona loyi a nwaka ku tlula mpimo.c Loko ku ri ni vunanga lebyi nga eku chayiweni, tiyiseka leswaku vholumo a yi le henhla ngopfu lerova vanhu va nga ha twanani loko va ri karhi va bula. Nakambe, kambisisa muxaka wa tinsimu leti u nga ta ti tirhisa hi vutlhari ku katsa ni leswi ti vulaka swona leswaku u nga khunguvanyisi van’wana.

9. Xana lava vutaneke va fanele va tsundzuka yini hi mavulavulelo kumbe swilo swin’wana swo nyanyula lava rhambiweke?

⁹ Xana emucatweni wa wena ku ta va ni lava nga ta vula swo karhi, tivhidiyo kumbe swin’wana swo nyanyula lava va rhambiweke? Hi ntolovelo, swilo leswi swi endla leswaku mucato wu tsakisa. Nilokoswiritano, tiyiseka leswaku hinkwaswo swa khutaza. (Filp. 4:8) Tivutise: ‘Xana swi ta kombisa leswaku ndza va hlonipha van’wana? Xana swi ta kombisa leswaku ndza ri xixima lunghiselelo ra vukati?’ Nakambe xa nkoka swinene, tivutise: ‘Xana swi ta yisa ku dzuneka eka Yehovha?’ Hambileswi mafenya man’wana ma nga kahle kambe papalata nchumu wun’wana ni wun’wana lowu nga endlaka leswaku van’wana va ehleketa hi timhaka ta masangu. (Efe. 5:3) Tiyiseka leswaku swirho swa ndyangu ni vanghana lava nga ta vula swin’wana emucatweni, va swi tiva leswaku a va fanelanga va vula swilo leswi nga fambisaniki ni leswi u swi lavaka.

10. Hikwalahokayini lava lavaka ku tekana va fanele va titsongahata loko va ri karhi va pulana mucato wa vona? (1 Yohane 2:​15-17)

¹⁰ U nga tikokeli matihlo ya vanhu. (Hlaya 1 Yohane 2:​15-17.) Yehovha wa swi tlangela loko vagandzeri vakwe va yisa ku dzuneka eka yena ematshan’weni ya vona vini. Hikwalaho, Vakreste lava titsongahataka va papalata ku tirhisa mali yo tala swinene ni “ku bombisa rifuwo.” Xana u ta vuyeriwa hi yini loko mucato wa wena wu nga ku kokeli matihlo ya vanhu? Kumbexana wu ta fana ni wa Mike makwerhu wa le Norway. U ri: “A hi va nga ni swikweleti naswona hi kote ku ya emahlweni hi phayona. A hi endlanga mucato wo durha kambe a wu sasekile wu tlhela wu tsakisa.” Tabitha makwerhu waxisati wa le Indiya u ri: “Hi endle mucato lowu nga durhiki naswona sweswo swi hi pfune leswaku hi nga vileli ngopfu. Hikwalaho, a hi bohekanga ku endla swilo swo tala naswona a ku nga ri na timholovo.”

11. Xana ndlela leyi muteki na mutekiwa va ambalaka ni ku tisasekisa hayona yi nga swi kombisa njhani leswaku va titsongahata? (Nakambe vona swifaniso.)

¹¹ Xana se wa swi tiva leswi u nga ta ambala swona emucatweni wa wena? A swi kanakanisi leswaku u lava ku va u sasekile swinene. Hambi ku ri emikarhini ya ku tsariwa ka Bibele, muteki na mutekiwa a va lava ku languteka kahle swinene. (Esa. 61:10) I ntiyiso leswaku leswi u nga ta swi ambala emucatweni wa wena swi nga ha va swi hambanile ni leswi a wu ta swi ambala eka mikhuvo yin’wana, hambiswiritano swi fanele swi xiximeka. (1 Tim. 2:9) U nga pfumeleli leswi u nga ta swi ambala kumbe ndlela leyi u nga ta va u languteka hayona, ku va swona swa nkoka emucatweni wa wena.—1 Pet. 3:​3, 4.

12. Hikwalahokayini lava vutaneke va fanele va papalata mikhuva leyi nga humiki ematsalweni leyi tolovelekeke endhawini leyi va tshamaka eka yona?

¹² Papalata mikhuva leyi nga fambisaniki ni matsalwa. (Nhlav. 18:4) Namuntlha Sathana u endle leswaku emicatweni ku endliwa mihivahivani leyi fambisanaka ni vungoma ni swilo swin’wana leswi nga fambisaniki ni ku rhandza ka Xikwembu. Yehovha u hi lemukisa leswaku hi swi papalata hi ku helela swilo sweswo leswi nga basangiki. (2 Kor. 6:​14-17) Loko ku ve endhawini ya ka n’wina ku endliwa mikhuva leyi solekaka, kambisisa lomu yi humaka kona ni misinya ya milawu ya Bibele leyi tirhaka eka xiyimo xexo u nga si endla xiboho xa loko u lava ku yi katsa emucatweni wa wena.

13. Xana lava lavaka ku tekana va nga ri tekelela njhani langutelo ra Yehovha loko swi ta eka ku amukela tinyiko?

¹³ Xana swi tolovelekile laha u tshamaka kona leswaku lava teke emucatweni va nyika lava tekanaka tinyiko? Eka van’wana xiyimo xa timali xi nga khumba ndlela leyi va nyikelaka hayona. I ntiyiso leswaku Vakreste va khutaziwa leswaku va nyika naswona swi endla leswaku va tsaka loko va endla tano. (Swiv. 11:25; Mit. 20:35) Hambiswiritano, a hi swi lavi ku endla lava rhambiweke va titwa onge va boheka ku nyika; hambi ku ri ku endla va twa onge nyiko leyi nga durhiki a yi nge tlangeriwi. Hi tekelela Yehovha loko hi tikarhatela ku tlangela xin’wana ni xin’wana lexi vanhu va hi nyikaka xona, ku nga ri hileswi va bohekaka ku endla tano kambe hileswi va swi endlaka swi huma embilwini.—2 Kor. 9:7.

NDLELA YO PAPALATA NI KU HLULA MITLHONTLHO

14. Xana vanhu van’wana lava lavaka ku tekana va langutana ni mitlhontlho yihi?

¹⁴ U nga langutana ni mitlhontlho loko u ri karhi u pulana mucato lowu wu nga ta yisa ku dzuneka eka Yehovha. Hi xikombiso, swi nga ku tikela ku pulana mucato lowu nga durhiki. Charlie loyi a humaka eXihlaleni xa Solomon u ri: “A swi hi tikela ku endla xiboho xa leswaku hi ta rhamba mani emucatweni. Hi ni vanghana vo tala naswona hi ku ya hi ndhavuko wa hina, un’wana ni un’wana u langutele ku rhambiwa.” Tabitha loyi hi buleke ha yena eku sunguleni u ri: “Laha ndzi tshamaka kona, swi tolovelekile leswaku emucatweni ku tala ngopfu. Swi va tekele nkarhi vatswari va hina ku amukela leswaku a hi lava ku rhamba vanhu va 100 ntsena.” Sarah loyi a humaka eIndiya u ri: “Vanhu van’wana va endla swilo hi leswi va lavaka ku voniwa kumbe hi ku ya hi ku enta ka xikhwama xa vona. Maxaka ya mina ya le kusuhi ma ve ni micato ya manyunyu, hikwalaho na mina a ndzi twa onge ndzi fanele ndzi va ni mucato wa manyunyu swinene ku tlula ya vona.” U nga pfuniwa hi yini leswaku u papalata swiphiqo swo fana ni leswi kumbe swin’wana?

15. Hikwalahokayini xikhongelo xi ri xa nkoka loko vanhu va ri karhi va lunghiselela mucato?

¹⁵ Nkarhi ni nkarhi khongelani loko mi ri karhi mi pulana mucato. U nga byela Yehovha swiphiqo leswi ku karhataka kumbe ndlela leyi u titwaka hayona. (Filp. 4:​6, 7 ni study note xa Xinghezi “eka hinkwaswo”) U nga n’wi kombela leswaku a ku pfuna u endla swiboho leswinene, u va ni ku rhula loko u titwa u karhatekile ni ku kombisa xivindzi loko swi lava leswaku u endla tano. (1 Pet. 5:7) Ndlela leyi u tshembaka Yehovha hayona yi ta kula loko u vona ndlela leyi a ku pfunaka hayona. Tabitha loyi hi buleke ha yena eku sunguleni u ri: “Mina ni jaha ra mina a hi vilela leswaku hi ta pfa hi holova ku katsa ni mindyangu ya hina. Hikwalaho, nkarhi ni nkarhi loko hi fanele hi bula hi malunghiselelo ya mucato, a hi sungula hi ku khongela. Hi yi vonile ndlela leyi Yehovha a hi pfuneke hayona naswona a hi vulavurisana hi ndlela leyinene.”

16-17. Xana ku vulavurisana lokunene ku nga pfuna hi ndlela yihi loko ku endliwa malunghiselelo ya mucato?

¹⁶ Bulani hi ndlela ya xichavo naswona mi veka timhaka erivaleni. (Swiv. 15:22) Leswi mi lavaka ku tekana, mi ta boheka ku endla swiboho swo tala leswi khumbaka mucato wa n’wina. Leswi swi katsa siku leri mi nga ta cata ha rona, mali leyi mi nga ta yi tirhisa, nhlayo ya vanhu lava mi nga ta va rhamba ni swin’wana swo tala. Kambe loko mi nga si endla xiboho, kambisisani swilo leswi hinkwaswo swin’we ni ku tlhela mi bula hi misinya ya milawu ya Bibele leyi tirhaka eka xiyimo xa n’wina ku katsa ni switsundzuxo leswi mi swi kumaka eka Vakreste lava wupfeke. Loko u ri karhi u hlamusela leswi u swi lavaka, endla tano hi ndlela ya musa, u anakanyela ni ku tiyimisela ku cinca loko swi fanerile. Loko swirho swa ndyangu swo fana ni vatswari va ri ni swikombelo leswi twalaka, swi tekeni. Lexi i xiendlakalo xo hlawuleka ni le ka vona. Loko ku ve u nge swi koti ku endla leswi va swi kombelaka, hlamusela swivangelo swa wena hi ndlela ya xichavo. (Kol. 4:6) Swi veke erivaleni eka swirho swa ndyangu leswaku xikongomelo nkulu i ku va ni mucato lowu tsakisaka naswona wu yisaka ku dzuneka eka Yehovha.

¹⁷ Ku hlamusela vatswari swilo leswi mi swi lavaka swi nga tika, ngopfungopfu loko va nga ri Timbhoni kambe mi nga swi kota. Makwerhu Santhosh wa le Indiya u ri: “Mindyangu ya hina a yi lava hi katsa mihivahivani ya Xihindu. Swi hi tekele nkarhi mina ni ntombhi ya mina ku va hlamusela leswaku hikwalahokayini hi teke xiboho lexi hi xi tekeke. Hi pfumele ku endla swin’wana swa leswi vatswari va hina va swi ringanyeteke hileswi a swi nga lwisani ni matsalwa. Hi xikombiso, hi teke xiringanyeto xa vona xa swakudya leswi nga ta dyiwa emucatweni ematshan’weni ya leswi hina a hi swi lava ni ku tlhela hi nga yimbeleli hambi ku ri ku cina tanihi leswi va nga swi tolovelangiki swilo swo tano.”

18. I yini leswi mi nga swi endlaka leswaku mi tiyiseka ku mucato wu famba kahle? (1 Vakorinto 14:40) (Nakambe vona xifaniso.)

¹⁸ Lunghiselela kahle. Loko swilo swa wena swi hlelekile, a wu nge vileli ngopfu hi siku ra wena ra mucato. (Hlaya 1 Vakorinto 14:40.) Wayne loyi a humaka eTaiwan u ri: “Loko ku sale masikunyana leswaku hi cata, hi hlangane ni hinkwavo lava a va ta hi pfuna hi swin’wana emucatweni wa hina. Hi bule hi malunghiselelo ya siku rero ni ku tlhela hi praktisa swiphemu swin’wana leswi nga ta endliwa leswaku hi tiyiseka ku mucato wu famba kahle.” Ku kombisa leswaku ma va xixima lava mi va rhambeke, endlani hinkwaswo leswi mi nga swi kotaka leswaku mi khoma nkarhi.

19. I yini leswi nga ku pfunaka leswaku swilo swi famba hi ku hleleka emucatweni wa wena?

¹⁹ Loko mi pulana ka ha ri na nkarhi swi ta mi pfuna leswaku mi papalata swiphiqo swo tala. (Swiv. 22:3) Hi xikombiso, loko u tshama endhawini leyi swi tolovelekeke leswaku vanhu va ta emucatweni va nga rhambiwanga, ehleketa hileswi u nga swi endlaka leswaku sweswo swi nga endleki. Tiyiseka leswaku maxaka ya wena lama nga riki Timbhoni ma tiva leswi ma faneleke ma swi langutela ni ndlela leyi mucato wu nga ta famba hayona. U nga tlhela u va komba nhlokomhaka leyi nge, “Ku Endleka Yini eMucatweni wa Timbhoni Ta Yehovha?” leyi kumekaka eka jw.org. Leswaku swilo swi famba kahle emucatweni wa wena, u nga kombela makwerhu loyi a wupfeke leswaku ku va yena “mufambisi wa nkhuvo.” (Yoh. 2:8) Loko u n’wi byela ndlela leyi u lavaka mucato wa wena wu famba hayona, u ta ku pfuna leswaku wu famba hilaha u navelaka leswaku wu famba ha kona ni ku tlhela wu xiximeka.

20. Lava lavaka ku tekana va fanele va tsundzuka yini hi mucato wa vona?

²⁰ Loko u ri karhi u endla malunghiselelo ya mucato wa wena u nga ha vilela. Hambiswiritano, tsundzuka leswaku mucato i wa siku rin’we. I masungulo ya nchumu wa nkoka, ku nga ku va mi tirhela Yehovha swin’we. Endla hinkwaswo leswi u nga swi kotaka leswaku mucato wa wena wu xiximeka wu tlhela wu olova. Tshemba Yehovha. Hi ku pfuniwa hi yena, u ta swi kota ku pulana mucato lowu xiximekaka, wu tsakisaka naswona u nga ta ka u nga tisoli.—Ps. 37:​3, 4.