Tekelela Ku Titsongahata Ka Yehovha

1. Hikwalahokayini ku titsongahata ka Yehovha ku hlamarisa?

XANA loko u languta vanhu lava fumaka namuntlha, u vona va titsongahata? A swi tano nikatsongo. Kambe Yehovha loyi a nga ni matimba hinkwawo wa titsongahata. (Ps. 113:​5-8) A ku na munhu loyi a titsongahataka ku fana na yena naswona a nga si tshama a tikukumuxa. Eka nhlokomhaka leyi, hi ta kambisisa swilo swa mune leswi kombisaka leswaku Yehovha wa titsongahata loko a ri karhi a tirhisana ni vanhu. Hi ta tlhela hi kambisisa ndlela leyi Yesu a tekeleleke ku titsongahata ka Tata wakwe. Loko hi kambisisa swilo leswi, swi ta hi pfuna leswaku hi tshinela eka Yehovha ni ku tekelela ku titsongahata kakwe hilaha hi nga kotaka hakona.

YEHOVHA WA NGHENEKA

2. Xana Pisalema 62:8 yi hi byela yini hi Yehovha? (Nakambe vona xifaniso )

² Vanhu lava tikukumuxaka hi ntolovelo a va ngheneki. Sweswo swi endla leswaku van’wana va kanakana ku ya eka vona kumbe va va papalata hi ku helela. Kambe Yehovha u hambanile swinene na vona. Leswi Tata wa hina wa le tilweni a titsongahataka, u hi rhamba leswaku hi ta eka yena ni ku n’wi phofulela ta le mbilwini. (Hlaya Pisalema 62:8.) Ku fana ni tatana loyi a tiyimiseleke ku yingisa swivilelo swa vana vakwe hileswi a khathalaka, Yehovha wa swi lava ku tiva leswi hi vilerisaka naswona wa swi yingisa swikhongelo swa vagandzeri vakwe. Entiyisweni, u endle leswaku swo tala swa swikhongelo swa malandza yakwe swi tsariwa eBibeleni. Sweswo swi kombisa ndlela leyi Yehovha a nghenekaka hayona. (Yox. 10:​12-14; 1 Sam. 1:​10-18) Kambe ku vuriwa yini loko mikarhi yin’wana hi titwa hi nga faneleki ku khongela eka Yehovha?

3. Hikwalahokayini u nga tiyisekaka leswaku Yehovha u lava leswaku u khongela eka yena nkarhi ni nkarhi?

³ Hi nga khongela eka Yehovha hambiloko hi twa onge a swi hi faneli ku rhandziwa hi yena. Hikwalahokayini hi vula sweswo? Eka xifaniso xa Yesu xa jaha leri a ri lahlekile, Yesu u fanise Yehovha ni tatana loyi a nga ni rirhandzu loyi n’wana wakwe wa jaha a a hundzukile naswona a a titwa a nga faneriwi ku tlhela a amukeriwa endyangwini. Xana tatana yoloye u endle yini loko n’wana wakwe a vuya ekaya? Yesu u vule leswaku hi ku hatlisa loko bava wakwe a n’wi vona, u ‘tsutsume a n’wi hlanganisa a fika a n’wi angarha a n’wi tswontswa.’ (Luka 15:​17-20) Yehovha u fana ni tatana yoloye. Hi ku hatlisa loko Yehovha a twa swikhongelo swa lava timbilu ta vona ti vavaka, va karhatiwaka hi ku titwa nandzu kumbe ku vilela, ku titsongahata ka yena ku n’wi susumetela leswaku a va yingisela. (Swir. 3:​19, 20) Yehovha u va twela vusiwana, a tlhela a ya eka vona leswaku a va chavelela ni ku va tiyisekisa leswaku u ni ntwelavusiwana naswona wa va rhandza. (Esa. 57:15) Xana Yehovha u swi endla njhani sweswo? Mikarhi yo tala, u endla tano hi ku tirhisa vakulu, swirho swa mindyangu leswi nga Timbhoni ni vamakwerhu. (Yak. 5:​14, 15) Yehovha u hi pfuna hi ndlela leyi hileswi a lavaka leswaku hi va ekusuhi na yena.

4. Xana Yesu u swi kombise njhani leswaku a a ngheneka?

⁴ Yesu u tekelela Tata wakwe. Ku fana ni Tata wakwe, Yesu wa titsongahata. Hikwalaho ka sweswo, loko Yesu a ha ri laha misaveni vanhu a swi va olovela ku vulavula na yena. A va nga chavi hambi ku ri ku n’wi vutisa swivutiso. (Mar. 4:​10, 11) Hikwalaho, loko a va kombela leswaku va n’wi byela mavonelo ya vona eka mhaka yo karhi, a va n’wi byela ndlela leyi a va titwa hayona. (Mat. 16:​13-16) Nakambe loko va endle swihoxo, a va nga chavi ku ya eka yena hikuva a va swi tiva leswaku Yesu u ni musa, tintswalo naswona u lehisa mbilu. (Mat. 17:​24-27) Hikwalaho ka leswi Yesu a tekeleleke Tata wakwe kwatsaa, valandzeri vakwe va kote ku n’wi tiva kahle Yehovha. (Yoh. 14:9) Va dyondze leswaku Yehovha a a nga fani ni varhangeri va vukhongeri va le nkarhini wolowo lava a va tikukumuxa naswona a va va khoma ku biha vanhu. Ku ri na sweswo, a a titsongahata naswona a a ngheneka.

5. Xana ku titsongahata swi hi pfuna njhani leswaku hi ngheneka?

⁵ Hi nga n’wi tekelela njhani Yehovha? Loko hi titsongahata swi ta endla leswaku hi ngheneka kambe loko hi nga titsongahati hi ta va ni mikhuva leyi endlaka leswaku vanhu va fambela ekule na hina ku nga mavondzo, ku tikukumuxa ni ku nga rivaleli. Ku ri na sweswo, loko hi titsongahata swi ta hi pfuna leswaku hi va ni musa, hi lehisa mbilu ni ku rivalela ku nga leswi endlaka leswaku vanhu va lava ku va vanghana va hina. (Kol. 3:​12-14) Vakulu va fanele va tikarhatela ku va lava nghenekaka. I ntiyiso leswaku ku va kota ku ngheneka, va fanele va heta nkarhi ni vamakwerhu. Leswi swi vula leswaku vakulu va fanele va tikarhatela ku va kona etidyondzweni hi xiviri, ku ri na ku va va tirhisa zoom kumbe endlelo rin’wana ra thekinoloji swi nga fanelanga. Nakambe loko swiyimo swa vona swi pfumela, va tikarhatela ku chumayela hi yindlu ni yindlu ni vamakwerhu. Loko vamakwerhu va va tiva kahle vakulu, swi ta va olovela ku vulavula na vona loko va lava mpfuno.

YEHOVHA WA ANAKANYELA

6-7. Nyika swikombiso swa ndlela leyi Yehovha a yingiseke swikombelo swa malandza yakwe.

⁶ Vanhu vo tala lava tikukumuxaka a va va anakanyeli van’wana. Kambe leswi Yehovha a titsongahataka, wa anakanyela hambileswi a tlakukeke swinene eka vanhu hi tindlela hinkwato. Ehleketa ndlela leyi a n’wi khomeke hayona Meriyamu sesi wa Muxe. Yena na Aroni va gungulele Muxe loyi a a ri muyimeri wa Yehovha. Entiyisweni, Meriyamu a a delela Yehovha. Hikwalaho ka sweswo, Yehovha u hlundzukele Meriyamu ivi a n’wi ba hi nhlokonho. Kambe xana Xikwembu xi endle yini loko Aroni a kombela Muxe leswaku a pfuna Meriyamu niloko Muxe a kombela Yehovha leswaku a horisa sesi wakwe? Leswi Yehovha a titsongahataka, u cince xiboho lexi a a xi tekile ivi a horisa Meriyamu.—Tinhl. 12:​1-15.

⁷ Yehovha u tlhele a kombisa leswaku wa titsongahata loko a yingisa Hosi Hezekiya. Hi ku tirhisa muprofeta Wakwe, Yehovha u tivise hosi leswaku a yi ta fa. Hezekiya u rile hi xiviti, a kombela Yehovha leswaku a n’wi horisa. Hikwalaho, Yehovha u n’wi kombe tintswalo ivi a n’wi engetelela malembe ya 15. (2 Tih. 20:​1, 5, 6) Hakunene Yehovha u va twela vusiwana vanhu naswona leswi a titsongahataka u lava ku va yingisela.

8. Hi swihi swikombiso leswi kombisaka leswaku Yesu wa anakanyela? (Mar. 3:​1-6)

⁸ Yesu u tekelela Tata wakwe. Loko a ha ri laha misaveni, Yesu u endlele vanhu swilo leswinene loko ku ri ni xilaveko xa leswaku a endla tano. Hi xikombiso, u horise vanhu hi Savata hambileswi vanhu lava a va ri ni timbilu to biha naswona a va n’wi kaneta a va nga swi tsakeli leswi a a swi endla. (Hlaya Marka 3:​1-6.) Ni sweswi Yesu wa ha ya emahlweni a va nhloko ya vandlha ra Vukreste leyi anakanyelaka. Hi xikombiso, loko un’wana evandlheni a endla xidyoho lexikulu, u n’wi lehisela mbilu ni ku tlhela a n’wi pfuna leswaku a hundzuka.—Nhlav. 2:​2-5.

9. Hi nga endla yini ku kombisa leswaku ha anakanyela? (Nakambe vona swifaniso.)

⁹ Hi nga n’wi tekelela njhani Yehovha? Hi fanele hi tikarhatela ku tekelela ndlela leyi Yehovha a ehleketaka ni ku endla swilo hayona. (Yak. 3:17) Hi xikombiso, vatswari lava anakanyelaka a va langutelanga leswaku vana va vona va endla swilo leswi nga ehenhla ka matimba ya vona. Xikombiso lexinene xa sweswo, i xa Yakobo loyi a a anakanyela vana vakwe hilaha hi swi vonaka hakona eka Genesa 33:​12-14. Vatswari lava titsongahataka naswona va anakanyelaka, va fanele va papalata ku ringanisa vana va vona. Vakulu na vona va fanele va anakanyela. Ndlela yin’wana yo endla tano, i ku seketela xiboho lexi vo tala eka huvo ya vakulu va yimaka na xona ntsena loko xi nga lwisani ni misinya ya milawu ya Bibele. (1 Tim. 3:​2, 3) Nakambe hinkwerhu hi nga ringeta ku twisisa mavonelo ya van’wana hambiloko hi nga voni swilo hi ndlela leyi fanaka. (Rhom. 14:1) Hinkwerhu evandlheni hi fanele hi tikarhatela ku endla leswaku ‘ku anakanyela ka hina ku tiviwa hi vanhu hinkwavo.’—Filp. 4:5.

YEHOVHA U LEHISA MBILU

10. Yehovha u kombise leswaku u lehisa mbilu hi tindlela tihi?

¹⁰ U nga va u swi xiyile leswaku vanhu lava tikukumuxaka a va swi lavi ku rindza. Ku tikukumuxa ka vona ku endla leswaku va tsandzeka ku lehisa mbilu. Ku hambana na vona, Yehovha u lehisa mbilu swinene ku tlula munhu wihi ni wihi. Hi xikombiso, emasikwini ya Nowa, Yehovha u vule leswaku A A ta rindza malembe ya 120 A nga si lovisa lavo homboloka. (Gen. 6:3) Nowa u ve ni nkarhi wo kurisa vana vakwe ni ku tlhela a aka ngalava hi ku pfuniwa hi ndyangu wakwe. Hi ku famba ka nkarhi, ntsumi leyi yimelaka Yehovha yi lehisele Abrahama mbilu loko a ri karhi a yi vutisa swivutiso mayelana ni ku lovisiwa ka Sodoma na Gomora. Munhu loyi a tikukumuxaka a a ta va a te, ‘Wo va mani wena u ndzi vutisaka swivutiso leswi!’ Kambe leswi ntsumi yoleyo a yi tekelela Yehovha, yi lehisele Abrahama mbilu.—Gen. 18:​20-33.

11. Hilaha 2 Petro 3:9 yi vulaka hakona, hikwalahokayini Yehovha a hi lehisela mbilu namuntlha?

¹¹ Leswi Yehovha a titsongahataka, ninamuntlha u hi lehisela mbilu. U yimele nkarhi lowu a wu vekeke leswaku a tisa makumu. Kambe hikwalahokayini a lehisa mbilu? “Hikuva a nga naveli leswaku ku lova ni un’we, u lava leswaku vanhu hinkwavo va hundzuka.” (Hlaya 2 Petro 3:9.) Xana ku lehisa mbilu ka Yehovha i ka hava? Nikatsongo! Hikwalaho ka leswi a lehisaka mbilu, vanhu va timiliyoni lava nga ni timbilu letinene va kote ku va ni vuxaka lebyinene na yena. Nakambe hi tshemba leswaku ni van’wana vo tala va ta endla tano. Nilokoswiritano, Yehovha a nge lehisi mbilu hilaha ku nga heriki. U rhandza vanhu kambe a nga pfumeleli xin’wana ni xin’wana. A nge swi pfumeleli leswaku vanhu lavo homboloka va va kona hilaha ku nga heriki.—Hab. 2:3.

12. Yesu u tekelela ku lehisa mbilu ka Yehovha hi ndlela yihi?

¹² Yesu u tekelela Tata wakwe. Ku ringana malembe yo tala, u tekelele ku lehisa mbilu ka Yehovha. Yesu u vone Sathana a hembela Yehovha ni vanhu vakwe vo tshembeka. (Gen. 3:​4, 5; Yobo 1:11; Nhlav. 12:10) Yesu u tlhele a vona vanhu vo tala va xaniseka swinene. Ehleketa ndlela leyi a swi lavaka hayona ku “herisa mitirho ya Diyavulosi”! (1 Yoh. 3:8) I yini lexi pfunaka Yesu leswaku a rindzela Yehovha leswaku a n’wi byela ku se i nkarhi wa leswaku a herisa mitirho ya Diyavulosi hi ku helela? Hi leswi a titsongahataka ni leswi a tshembaka leswaku Yehovha u ta lulamisa timhaka hi nkarhi lowu faneleke.—Mit. 1:7.

13. Xana Yesu u lehisele vaapostola vakwe mbilu hi ndlela yihi naswona hikwalahokayini?

¹³ Loko Yesu a ri laha misaveni, u lehisele vaapostola vakwe mbilu. Hi xikombiso, loko hi ku phindhaphindha va phikizana hi leswaku i mani lonkulu exikarhi ka vona, Yesu a nga va kwatelanga, ematshan’weni ya sweswo u ye emahlweni a va lehisela mbilu. (Luka 9:46; 22:​24-27) A a tshemba leswaku hi ku famba ka nkarhi va ta dyondza ku titsongahata. Xana u tshame u endla xihoxo lexi fanaka hi ku phindhaphindha? Loko swi ri tano, xana a wu swi tlangeli ku va ni Hosi leyi titsongahataka naswona yi ku lehiselaka mbilu?

14. I yini leswi nga hi pfunaka hi ya emahlweni hi lehisa mbilu?

¹⁴ Hi nga n’wi tekelela njhani Yehovha? Loko hi tikarhatela ku “anakanya ku fana na Kreste,” swi ta hi pfuna leswaku hi ehleketa ni ku endla swilo ku fana na Yehovha. (1 Kor. 2:16) I yini leswi nga hi pfunaka leswaku hi ehleketa ku fana na Kreste? A ku na xin’wana lexi nga hi pfunaka handle ka ku hlaya Tievhangeli. Kutani hi tinyika nkarhi wo ehleketa hi ndlela leyi leswi hi swi hlayaka swi hi dyondzisaka swona hi ndlela leyi Yesu a ehleketa hayona eka timhaka to karhi. Nakambe hi fanele hi kombela Yehovha leswaku a hi pfuna hi titsongahata ni ku lehisa mbilu ku fana na Yesu. Loko hi tikarhatela ku anakanya ku fana na Kreste, hi ta ya hi tekelela Xikwembu hi ku va hi lehisela vamakwerhu mbilu ku katsa na hina vini.—Mat. 18:​26-30, 35.

YEHOVHA WA VA VONA LAVA TITSONGAHATAKA

15. Yehovha u swi endle njhani leswi boxiweke eka Pisalema 138:6?

¹⁵ Hlaya Pisalema 138:6. I nkateko loko lava va titsongahataka va tiviwa hi Hosi leyi tlakukeke ya vuako hinkwabyo! Xiya swikombiso swi nga ri swingani swa vanhu lava a va nga tekeriwi enhlokweni kambe Yehovha a a va teka va ri va nkoka swinene. Van’wana va vona swi nga endleka hi nga va tsundzuki hi ku olova kambe Yehovha u endle leswaku va tsariwa eBibeleni. Yehovha u huhutele Muxe leswaku a tsala vito ra muongori Debora, loyi a hanyeke khale swinene. U tirhele ndyangu wa Isaka na Yakobo hi ku tshembeka ku ringana malembe ya 125. Hambileswi hi nga tiveki swo tala hi wansati loyi wo tshembeka, Yehovha u endle leswaku eRitweni rakwe leri huhuteriweke ku tsariwa hi yena ni ndlela leyi a a rhandzeka hayona. (Gen. 24:59; 35:​8, nhlamuselo ya le hansi) Hi ku famba ka nkarhi, Yehovha u hlawule Davhida jaha leri a ri ri murisi leswaku ri va hosi ya tiko ra Israyele. (2 Sam. 22:​1, 36) Endzhakunyana ka loko Yesu a velekiwile, hi ku tirhisa tintsumi, Xikwembu xi endle leswaku varisi lava titsongahataka ku va vona vo sungula ku tiva leswaku Mesiya u velekiwile eBetlehema. (Luka 2:​8-11) Nakambe loko Yosefa na Mariya va yisa Yesu etempeleni, Yehovha u katekise Simiyoni loyi a a kurile na Ana hi ku va a va komba N’wana Wakwe. (Luka 2:​25-30, 36-38) I ntiyiso leswaku “hambileswi Yehovha a tlakukeke, wa n’wi vona la titsongahataka”!

16. Xana Yesu u yi tekelele njhani ndlela leyi Tata wakwe a khomaka van’wana hayona?

¹⁶ Yesu u tekelela Tata wakwe. Ku fana ni Tata wakwe, Yesu u va teka va ri va nkoka vanhu lava tekeriwaka ehansi. U dyondzise vanhu lava “a va nga dyondzekanga kambe a va ri vanhu lava tolovelekeke” ntiyiso mayelana ni Mfumo wa Xikwembu. (Mit. 4:13; Mat. 11:25) Yesu u tlhele a horisa lava vabyaka ni ku va khoma hi ndlela leyi endleke va titwa va rhandziwa ni ku xiximiwa. (Luka 5:13) Hi siku rakwe ro hetelela a nga si fa, Yesu u endle ntirho lowu a wu endliwa hi nandza hi ku va a hlambisa vaapostola vakwe milenge. (Yoh. 13:5) Nakambe loko a nga si ya etilweni, u nyike valandzeri vakwe lava titsongahataka ku katsa na hina ntirho wa nkoka swinene wo pfuna vanhu leswaku va kuma vutomi lebyi nga heriki.—Mat. 28:​19, 20.

17. Hi nga swi kombisa njhani leswaku hi va teka va ri va nkoka van’wana? (Nakambe vona xifaniso.)

¹⁷ Hi nga n’wi tekelela njhani Yehovha? Hi kombisa leswaku hi teka vanhu va ri va nkoka loko hi chumayela hinkwavo lava yingisaka mahungu lamanene, swi nga ri na mhaka leswaku va huma kwihi, i va nhlonge ya njhani kumbe leswaku va dyondzeke ku fikela kwihi. Nakambe hi kombisa leswaku hi va teka va ri va nkoka vamakwerhu loko hi va teka va tlakukile eka hina, swi nga ri na mhaka vuswikoti kumbe vutihlamuleri lebyi hi nga na byona. (Filp. 2:3) Yehovha wa tsaka loko hi titsongahata hi va vo “rhanga eku xiximaneni” ni ku kombana rirhandzu.—Rhom. 12:10; Sof. 3:12.

18. Hikwalahokayini u lava ku tekelela ku titsongahata ka Yehovha?

¹⁸ Loko hi ri karhi hi tirha hi matimba leswaku hi tekelela ku titsongahata ka Tata wa hina wa le tilweni loyi a nga ni rirhandzu, swi ta hi pfuna leswaku hi ya hi ngheneka, hi anakanyela ni ku ya emahlweni hi lehisa mbilu. Nakambe hi ta rhandza van’wana ni ku tlhela hi va xixima hilaha Yehovha a endlaka hakona. Onge matshalatshala ya hina yo tshinela eka Xikwembu xa hina lexi titsongahataka, ma nga endla leswaku un’wana ni un’wana wa hina a ya a va wa risima ematihlweni ya xona!—Esa. 43:4.