Xiviko Xa Misava Hinkwayo

Afrika

Edith, muntshwa la nga xichudeni le Côte d’Ivoire u xiye leswaku siku leri a nga ta khuvuriwa ha rona ri ta kotlana ni leri a nga ta tsala xikambelo ha rona. U kanye mbilu a ya kombela mpfumelelo eka mudyondzisi wa yena leswaku a xwa hi siku ra xikambelo, mudyondzisi u n’wi pfumelerile. Swichudeni-kulobye swi n’wi hlekurile, swi n’wi vitana Mariya, mana wa Yesu. Mufana un’wana u nyanyule swichudeni-kulobye hi ku swi byela leswaku a nga yanga eku khuvuriweke kambe u ye emphikizanweni wa ku hlambela. Edith u angule hi ku nyika mufana loyi xiphephana lexi hlamuselaka leswi Timbhoni ta Yehovha ti swi pfumelaka.

Endzhaku ka loko mufana loyi a xi hlayile, u nambe a ku swi thya swa ku n’wi hlekula, a vula leswaku na yena u lava ku va Mbhoni. U dyondze buku leyi nge Vutivi Lebyi Yisaka eVuton’wini Lebyi Nga Heriki, naswona u khuvuriwile hambileswi a a kanetiwa hi swirho swin’wana swa ndyangu. Edith wa tsaka hi leswi a rhangisaka ku tinyiketela ka yena eka Yehovha nileswi a pfuneke un’wana leswaku a endla tano na yena.

Murhumiwa wa le Afrika Vupela-dyambu u ri: “Wun’wana wa mikateko leyi humaka eka Yehovha i ku va xiphemu xa nhlengeletano leyi nga ni ndhuma leyinene, hambi ku ri eswimitanini leswitsongo ngopfu emisaveni. Leswi ndzi swi vone hi ya mina eGhana, laha Timbhoni ta Yehovha ti tivekaka ni ku xiximiwa swinene. A hi famba hi ri karhi hi siya mimphakelo ya minkandziyiso emavandlheni yo karhi etikweni. Exidorobanini xin’wana a hi n’wi kumanga loyi a a tolovele ku ta teka minkandziyiso. Hiloko ndzi vutisa muchayeri leswaku hi nga endla yini. U ndzi langutile, a n’wayitela kutani a ku: ‘U nga karhateki.’ Hiloko a yimisa lori emakete lowu a wu tele hi vanhu, a humesa nhloko hi fasitere kutani a vitana xinhwanyetana xin’wana lexi a xi ri karhi xi xavisa tinhlampfi etlhelo ka patu. U xi nyike bokisi ra minkandziyiso kutani a ku: ‘Ndzi kombela u ri nyika Timbhoni ta Yehovha.’ Handle ko vula nchumu, xinhwanyetana lexi xi teke bokisi rero xi ri rhwala enhlokweni kutani xi khoma ndlela. Loko hi ri endleleni leyi yaka edorobeni leri landzelaka, ndzi vutise muchayeri loko a xi tiva xinhwanyetana lexi. U tlhele a n’wayitela kutani a ku: ‘A ndzi xi tivi, kambe xona xa hi tiva.’ Ndzi tivutisile loko vamakwerhu va kale va yi kumile minkandziyiso yoleyo. A ndzo karhateka mahala. Va yi kume hi rona siku rero.”

Eximutanini lexi vuriwaka Gbolobo le Liberia, vamakwerhu va tsalele mulawuri wa doroba, va n’wi tivisa leswaku va ta khoma nhlangano lowu hlawulekeke wa vukhongeri, edorobeni ra yena, lowu khomiwaka kan’we hi lembe. U va nyike mpfumelelo wa ku tirhisa xitediyamu xa kwalaho a tlhela a endla leswaku tikereke hinkwato ta nkombo leti welaka ehansi ka doroba ra yena ti tivisiwa hi nhlangano lowu. Xitiviso xa kona a xi rhamba vanhu ku va kona eXitsundzuxweni. Timbhoni to tala ti tile eximutanini lexi, ti ta pfuneta ku aka pulatifomo ya ku tlangeriwa ka Xitsundzuxo, exikarhi ka xitediyamu. Ti tirhisane hi moya wa rirhandzu ni wa ntsako. Leswi swi tsakise vaaki va ximutana xexo. Hambileswi ku ngo va ni ntlhanu wa vahuweleri eGbolobo, ku ve ni vanhu va 636 eXitsundzuxweni xolexo!

Mufana un’wana wa le n’walungu wa Rwanda, la nga ni malembe ya khume hi vukhale, u fuwe ximbutana ku fikela loko xi va mbuti leyi velekeke swimbutana swinharhu. Ku nga ri khale wa ha ku rhumela xifaniso erhavini, lexi a xi tekeke a ri ni mbuti leyi. Eka papila leri a ri rhumeleke ni xifaniso xexo u te: “Yehovha u ndzi katekise ngopfu kutani hi yona mhaka leyi ndzi nyikelaka hi mbuti leyi eka ntirho wa ku chumayela wa misava hinkwayo, lowu boxiweke eka Matewu 24:14.” U kombele vakulu va kwalaho leswaku va xavisa mbuti yoleyo. Va endle tano kutani va rhumela mali yoleyo erhavini.

Phayona rin’wana ro hlawuleka eNigeria ri tilahlele emovheni loko muchayeri a pfumela ku ri khandziyisa. Loko munhu un’wana loyi a a khandziyile a ri nyizela leswaku ri tshamiseka, muchayeri u vone Xihondzo xo Rindza evokweni ra rona. Hiloko a ri byela leswaku ri hatla ri huma emovheni wa yena. Muchayeri a nga nyikanga xivangelo kambe u lo ri sindzisa ku huma. Loko vanhu lava a va ri ekusuhi ni kwalaho va vona movha wu ri siya, va byele phayona leri leswaku Xikwembu xa rona xi ri ponisile. Va te: “Vini va movha lowuya va tlhakisa vanhu!” Ndlela leyi phayona ri “titiviseke” ha yona yi ri tisele nsirhelelo wa Yehovha.

Grant, i muhuweleri la nga ni nhungu wa malembe hi vukhale eXifundzheni xa Copperbelt le Zambia. Loko a ha deya, a a kota ku swi hlamusela hi ku komisa swifaniso leswi nga ebukwini leyi nge Nghwazi Leyi Tshameke Yi Hanya. Vatswari va Grant va n’wi dyondzise ku nhloko-hata matsalwa yo karhi ya Bibele a nga si kota ni ku hlaya. Sweswi i muhuweleri la nga khuvuriwangiki. Grant u fambisa tidyondzo to tala ta Bibele, tin’wana ta tona u ti fambisa hi buku leyi nge Buku Yanga Ya Timhaka Ta Bibele kasi letin’wana u ti fambisa hi broxara leyi nge I Yini Leswi Xikwembu Xi Swi Languteleke Eka Hina? Hikwalaho ka ku hiseka ka yena, vana va kwalaho va thye Grant vito ra shimapepo mukalamba, leswi hi Xibemba swi vulaka “muprista lonkulu.”

Wanuna loyi a ha ku sungulaka ku dyondza Bibele eSenegal u hlaye eka Xalamuka! ya October 8, 1999 hi ta Mbhoni ya le Canada, leyi yona ni n’wana wa yona wa nhwanyana va tlheriseke mali yo ringana R4 200, leyi va yi kumeke eka xikhwama lexi va xi xaveke laha ku xavisiwaka kona swilo leswi tshameke swi tirhisiwa. Endzhakunyana ka loko wanuna loyi a ha ku hlaya xihloko lexi, u thumbhe xipachi exitaratini, lexi a xi ri makhadi yo hlayanyana ni mali leyi ringanaka R5 000. U anakanyisisile hi xihloko lexi a xi hlayeke naswona a nga etlelanga swa ku ya kwihi vusiku byebyo.

Mixo lowu landzelaka hi awara ya nhungu, u bele n’wini wa xipachi xexo riqingho kutani a hlela leswaku va hatla va hlangana leswaku a ta n’wi nyika xipachi ni mali hinkwayo leyi a yi ri endzeni ka xona. N’wini wa xipachi u hlamarisiwe ngopfu hi ku tshembeka ka xichudeni lexi xa Bibele lerova a xi nyika hafu ya mali leyi a yi ri endzeni ka xipachi—ku nga R2 500! Xichudeni lexi xa Bibele xi te: “Magazini wolowo wa Xalamuka! wu endle leswaku ndzi tikhoma hi ndlela leyi ndzi nga taka ndzi nga yi rivali evuton’wini bya mina hinkwabyo!” Ku sukela hi nkarhi wolowo, xi sungule ku dyondza Bibele hi ku tiyimisela lokukulu.

Kandole wa le tikweni ra le Afrika Vuxa ra Uganda, la nga ni malembe ya 12 hi vukhale a a tshamiseka ni ku rhiya ndleve loko mana wa yena a ri karhi a dyondza Bibele ni Timbhoni ta Yehovha. Hi ku famba ka nkarhi, mana wa yena u tshike ku dyondza, hikwalaho mufana loyi u lahlekeriwe hi ku twa Rito ra Xikwembu hiloko a vutisa laha Timbhoni ti khomelaka kona minhlangano ya tona. Hi Sonto wa vhiki leri landzelaka, u fambe tikhilomitara ta 11 ku ya eHolweni ya Mfumo naswona ku sukela hi nkarhi wolowo u ve kona eminhlanganweni minkarhi hinkwayo. Makwerhu la nga phayona u sungule ku dyondza Bibele na Kandole naswona u endle nhluvuko lowunene kutani a khuvuriwa loko a ri ni malembe ya 14 hi vukhale. Sweswi u ni malembe ya 17 naswona wa ha ku va phayona ra nkarhi hinkwawo. Pakani ya yena i ku va phayona ro hlawuleka. Hi ku famba ka nkarhi mana wa yena u tlhele a sungula ku dyondza naswona sweswi i makwerhu la khuvuriweke. Sweswi Kandole a nga ha fambi hi milenge loko a ya eminhlanganweni. U ni xikanyakanya lexi a khandziyisaka mana wa yena loko va ya eHolweni ya Mfumo.

Matiko Ya Amerika

Márcio u rhambiwe ku ta tirha eBethele ya le Brazil. Ndhawu leyi a humaka eka yona yi swerile naswona a nga kona ni un’we la nga Mbhoni endyangwini wa ka vona. Leswaku a kuma mali yo ya eBethele hi bazi, u xavise swilo swa yena, kutani a kota ku teka riendzo rero hi mali leyi a yi kumeke ku katsa ni leyi a yi nyikiweke hi Timbhoni ta kwalaho. Endzhaku ka loko ku hele masiku manharhu va ha ri endleleni, bazi ri yimisiwe hi swigevenga leswi a swi hlomile. Swigevenga leswi swi seche tinhundzu ta munhu un’wana ni un’wana kutani swi teka xin’wana ni xin’wana lexi swi xi lavaka. Loko swi pfula nkwama wa Márcio, swi vone Bibele ya yena kutani swi wu pfala swi nga tekanga nchumu. Loko bazi ri fika edorobeni leri landzelaka, vakhandziyi a va khomiwe hi ndlala, hambiswiritano vo tala a va nga ha ri na mali yo xava swakudya. Leswi swigevenga swi nga xi tekangiki xipachi xa Márcio, u xavele vakhandziyi lavan’wana swakudya naswona sweswo swi nyikele vumbhoni lebyinene.

Osvaldo wa le Chile, loyi a a dyondza ni Timbhoni ta Yehovha, va n’wi byele entirhweni leswaku u fanele ku sungula ku tirha na hi Sonto. U byele mulanguteri wa yena leswaku u twanane na yena leswaku u ta tirha ku sukela hi Musumbhunuku ku ya fika hi Ravuntlhanu. Osvaldo u engete a ku: “Ndza ha ku teka naswona ndzi lava ku heta nkarhi ni nsati wa mina. Nakambe, siku ra Sonto ndzi ri vekele ku tirhela Xikwembu.” Mulanguteri wa Osvaldo u n’wi byele leswaku u ta hlongoriwa loko n’hweti yi hela. Eka vatirhi va kwalomu ka 3 000, i Osvaldo ntsena loyi a nga ti entirhweni hi Sonto. Ku ri na sweswo, u hambete a ya eminhlanganweni, a tshembele eka Yehovha.

Ku nga ri khale, khamphani yoleyo yi endzeriwe hi mukongomisi lonkulu la humaka eFurwa. U fike a yima etafuleni ra Osvaldo leswaku a n’wi bumabumela hi ntirho lowunene lowu a wu endlaka. Mukongomisi loyi u te: “Hi wena ntsena la nga riki na mintlango yo hungatisa eka khompyuta ya wena naswona u tirha hi ndlela leyi hlelekeke.” Osvaldo u n’wi nkhensile hi xibumabumelo xexo ivi a n’wi byela leswaku u ta siya khamphani ku nga ri khale. Mukongomisi u vutisile: “Xana u kume ntirho wo antswa?” Osvaldo u vule leswaku a swi tano hiloko a n’wi hlamusela xivangelo xa kona.

Endzhaku ka masiku ma nga ri mangani, u rhambiwe ku ta hlangana ni mulanguteri ni mukongomisi. Xiyimo a xi nga dyisi byi rhelela. Mukongomisi u te: “Osvaldo, u nge tirhi hi Sonto naswona u to tshuka u tirhile hi Mugqivela. U ta tlhela u nyikiwa vutihlamuleri lebyi engetelekeke ekhamphanini.” Osvaldo u khuvuriwile hi rona vhiki rero. Sweswi yena ni nsati wa yena i maphayona ya nkarhinyana.

Le Ecuador, jaha rin’wana lera ha ku khuvuriwaka nan’waka, a ri fanele ri nyikela nkulumo ya rona yo sungula exikolweni xo sungula eHolweni ya Mfumo. Ri teke xiavelo xexo xi ri lunghelo lerikulu lerova ri sungula ku veka mali leswaku ri ta xava sudu. Loko se ri veke mali yo ringana $30 (R300), ri twe leswaku ku ni makwerhu un’wana wa xisati evandlheni la pfumalaka mali yo xava mirhi. Ri n’wi nyike $30 (R300) leyi a ri yi vekile, ri ku: “Loko ndzi nyikela nkulumo yoleyo hi sudu ya khale, Yehovha u ta ndzi rhandzisa xileswi a a ta ndzi rhandzisa xiswona loko ndzi yi nyikela hi leyintshwa!”

Makwerhu wa xisati wa le Guatemala a a ri karhi a chumayela exitarateni. Hiloko a vona wanuna la tshameke exitepisini xa nyangwa wa yindlu kambe a tibyela leswaku a nge n’wi chumayeli hikuva yindlu ya yena yi wela eka nsimu ya vandlha rin’wana. U hundzile kambe a titwa a susumeteleka ku vulavula na yena. Hiloko a tlhela a ya vulavula na yena hi Mfumo wa Yehovha. Wanuna loyi u rhiye ndleve. Kutani a ku: “Ndza ku nkhensa Manana ku va u tile u ta vulavula na mina hikuva ndzi tele ku ta dlaya wanuna un’wana la nga ta fika laha hi 7:45 a.m. A a ta ya endzhongweni mina ndzi ya ekhotsweni! Ndza swi tiva leswaku a wu titelanga hi wexe; i Xikwembu xi ku rhumeleke eka mina leswaku ndzi ta vona ndlela leyi xi ndzi rhandzaka ha yona. Ndzi tlhelela ekaya sweswi leswaku ndzi nga endli vugevenga lebyi. Onge Xikwembu xi nga ku katekisa!”

Hi December 2000 na January 2001, rhavi ra le Colombia ri hlele tsima ra ku ya chumayela emasin’wini lama nga ekule. Timbhoni ta tiko rero ti khutaziwe ku ya tshama emasin’wini wolawo nkarhi wo ringana vhiki ku ya eka tin’hweti timbirhi, swi ya hi swiyimo swa tona, leswaku ti ta chumayela ni ku hlakulela ku tsakela loku kumiweke.

Leswi makwerhu un’wana wa xisati la nga ha riki muntshwa wa le Bogotá a a lava ku hoxa xandla na yena, u ye edorobeni ra Guasca. Eka tin’hweti timbirhi leti a ti heteke a ri kwalaho u tsake lerova a kombela Yehovha a n’wi pfuna ku kuma ntirho kwalaho leswaku a ta tshama kona. U xave tikhokhonati kutani a endla makokisi ha tona naswona a famba a xavisa eswitarateni ni le switolo. Ku engetela kwalaho, u kume ntirho wa ku hlantswa ni ku ayina swiambalo a tlhela a dyondza ku senga tihomu. Hi ndlela yoleyo u kote ku tihanyisa naswona u hambete a va phayona ra nkarhi hinkwawo eGuasca. U fambisa tidyondzo ta Bibele ta 25.

N’wini un’wana wa muti u byele makwerhu un’wana wa xisati le Jamaica leswaku a ku na munhu la nga ta n’wi hundzula leswaku a va Mbhoni. Makwerhu u hlamusele leswaku xivangelo xa ku ta ka yena i ku byela vanhu rungula ra Bibele, ku katsa ni ntshembo wa vutomi lebyi nga heriki. Loko va ri karhi va bula, makwerhu u xiye leswaku wansati loyi u xixima Bibele swinene. Xin’wana lexi a xi xiyeke hi leswaku timhaka leti wansati loyi a a nga pfumelelani na tona nikatsongo a nga ti twisisa loko o hlayeriwa matsalwa lama faneleke eBibeleni. Leswi swi susumetele makwerhu ku tirhisa Bibele swinene loko a endzela wansati loyi niloko se a sungule ku dyondza na yena Bibele. Hiloko xichudeni lexi xa Bibele xi sungula ku va kona eminhlanganweni kutani xi va leswi xi hlambanyeke leswaku xi nge pfuki xi ve swona—ku nga ku va Mbhoni ya Yehovha leyi tinyiketeleke yi tlhela yi khuvuriwa.

Makwerhu wa xisati la vuriwaka Carol eBolivia, u dyondze ni wanuna un’wana swin’we ni nsati wa yena. A va tshama ekaya ra mana wa nsati, la nga Mukhatoliki la tinyiketeleke, loyi a a nga si tshama a xwa eka nkhuvo wa Masa kumbe wa vukhongeri. Yindlu ya yena a yi khavisiwe hi swifaniso leswi xin’wana ni xin’wana a xi ri ni khandlhela leri pfurhaka emahlweni ka xona. Siku rin’wana manana loyi u nghene ekamareni leri a va dyondzela eka rona hi xitshuketa, a khome Bibele ya Khatoliki evokweni kutani a tlhava Carol hi xivutiso lexi nge: “Hi kwihi laha Bibele yi vulaka leswaku Mariya a a ri ni vana van’wana?” Carol u n’wi kombe Matewu 12:46-50 na 13:55. Hiloko a huma a khomiwe hi tingana. Endzhakunyana ka nkarhi u vuyile, a khome Bibele yin’wana leyikulu, leyi khavisiweke hi nsuku ematlhelo naswona yi ri ni swifaniso, a vonaka a ri ni xivindzinyana. U tlhele a famba loko a kombiwe matsalwa lama fanaka. Swi n’wi tsone vurhongo kutani a tlhela a ta ni Bibele yin’wana kambe na yona a yi fana ni letin’wana. U nambe a pfaleka nomu.

Emavhikini lama landzeleke, u va kavanyetile. U vutise swivutiso kambe a sungula ku va ni xinghana. Tinhlamulo leti a a ti kuma a ti n’wi tsakisa. Ku nga ri khale u pfumele ku dyondzeriwa Bibele. U hisekele vugandzeri bya ntiyiso ku fana ni ndlela leyi a a hisekela Vukhatoliki ha yona. U sungule ku tisa vanghana va yena eHolweni ya Mfumo naswona hi ku famba ka nkarhi u khuvuriwile.

Asiya Na Middle East

Gary la tshamaka eSri Lanka, u fambisele wanuna un’wana la nga Mukhatoliki ni nsati wa yena la nga Mubudha broxara leyi nge U Nga Va Munghana Wa Xikwembu! Nsati wa yena u sindzise leswaku i nuna ntsena la nga tsakelaka ku tiva leswi engetelekeke hi Bibele. Hambiswiritano, loko Gary a vuya enkarhini lowu taka nsati yoloye u vule leswaku na yena u tsakela ku tiva ndlela leyi a nga vaka munghana wa Xikwembu ha yona. Vhiki leri landzeleke va sungule ku dyondza broxara leyi naswona mpatswa lowu wu kombele ku tiseriwa Bibele. Nsati u te: “Ndzi vona onge loko hi lava ku va vanghana va Xikwembu hi fanele ku va ni Bibele.”

Loko va dyondza dyondzo 3 eka broxara leyi nge Munghana Wa Xikwembu nsati u tsakisiwe ngopfu hi dyondzo yoleyo. Madyambu wolawo ku ni loyi a hlanganyeleke na vona edyondzweni yoleyo—i jaha leri hirheke ekaya ra vona. Gary u va tisele Bibele ka ha sele masiku ma nga ri mangani leswaku va dyondza dyondzo ya vumune. Hi ku hatlisa va khavise tafula hi yona ni hi broxara yoleyo. Hi madyambu lawa a va fanele ku dyondza dyondzo ya vumune ha wona, va teke Bibele leyi a yi funghiwe hi tintambu to tala ta wasi va tsake ngopfu. Nuna u te: “Hi lunghiselele dyondzo hinkwayo.” Va kume matsalwa hinkwawo lama kombisiweke eka dyondzo yoleyo kutani va fungha tluka ra ndzimana ha yin’we hi ntambhu ya wasi.

Rowena, mutswari la nga yexe wa malembe ya le ku sunguleni ka va–20 la tshamaka ePhilippines, u sungule ku tsakela ntiyiso. U sungule ku dyondzeriwa Bibele kutani ku nga ri khale a sungula ku va kona eminhlanganweni. Kambe hikwalaho ka swiphiqo swa timali u boheke ku famba edorobeni ra ka vona a ya lava ntirho ekule ni le kaya. U fike a hirhiwa tanihi mukorhoki endyangwini wa Makhatoliki lama tinyiketeleke. U kombele ndyangu wolowo leswaku wu n’wi komba laha Holo ya Mfumo ya le kusuhi yi nga kona edorobeni, kambe a wu nga tiyimiselanga leswaku a hlangana ni Timbhoni.

Ku hundze tin’hweti naswona Rowena u khongele Yehovha hi mbilu hinkwayo leswaku a n’wi pfumelela ku hlangana ni Timbhoni leswaku a ta yisa dyondzo ya yena ya Bibele emahlweni. Siku rin’wana ni mixo ku rile riqingho kutani a ri hlamula. Loyi a beke riqingho u te: “Xewani, xana hi le Holweni ya Mfumo kwalaho?”

Rowena u hlamule hi ku hatlisa a ku: “Ndzi lava laha Holo ya Mfumo yi nga kona. Xana u nga ndzi byela leswaku yi kwihi?” Hiloko ku endliwa malunghiselelo yo ya n’wi komba laha yi nga kona. Rowena u tlhele a sungula ku dyondza Bibele naswona sweswi u khuvuriwile.

Nhwanyana wa malembe ya 12 hi vukhale u tsalele rhavi ra le Rhaxiya papila. U te: “Ndzi titsongahatile. Ndzi tshama exifundzheni xa Tyumen eSiberia. Ha ha ku kuma magazini wa Xihondzo xo Rindza ro sungula eximutanini xa ka hina lexi ngo va xoxe. Ndzi wu vone elayiburari ya xikolo lexi ndzi nghenaka eka xona. Ndzi endle xiboho xo muka na wona ndzi ya wu hlaya. Ndzi dyondze swo tala leswintshwa ni leswi tsakisaka hi magazini lowu. Ndzi tsakisiwe ngopfu hi ku languta swifaniso ntsena. Ndzi rhandza ku kuma rungula leri engetelekeke. Ndzi lava ku dyondza buku ya Nhlavutelo ni Bibele naswona ndzi rhandza ku tiva swo tala hi nhlengeletano ya n’wina.” Ku endliwe malunghiselelo yo n’wi pfuna.

Loko Timbhoni timbirhi ti ri karhi ti chumayela hi yindlu ni yindlu eLebanon, ti fike emutini wun’wana. Endzhaku ka loko ti gongondzile ti vone mfungho lowu vulaka leswaku Timbhoni ta Yehovha a ti laviwi. Hiloko wanuna un’wana a pfula nyangwa. Timbhoni ti sungula ku bula na yena kutani a ti byela leswaku ti nghena endlwini. Loko a xiye leswaku i Timbhoni, u ti vutisile loko ti wu hlayile mfungho lowu nga enyangweni. Ti hlamule ti ku: “Ina, hi wu hlayile kambe hi wu hlaye endzhaku ka loko hi gongondzile.” Hiloko a hlamusela leswaku yindlu i ya vatswari va yena lava nga laviki no ti vona Timbhoni ta Yehovha. Hambiswiritano a a lava ku dyondza leswi engetelekeke naswona a a lava ku tiva ngopfu-ngopfu hi mimfungho leyi vekiweke eminyangweni, leyi a yi tele endhawini yoleyo.

Timbhoni ti endle malunghiselelo yo n’wi endzela ekaya rakwe. Ti sungule ku dyondza Bibele na yena ni nsati wa yena naswona ku nga ri khale va sungule ku va kona eminhlanganweni ni ku tirhisa milawu ya Bibele. Wanuna u vule leswaku a nga si tshama a pfula Bibele evuton’wini bya yena, kambe Timbhoni ti n’wi pfune leswaku a yi hlaya a tlhela a yi twisisa.

Makwerhu wa xisati la nga ni ndhawu yo khavisa vanhu eKorea u veka Bibele swin’we ni minkandziyiso ya Timbhoni ta Yehovha laha yi kokaka mahlo ya vanhu. Naswona u tala ku tlanga tikhasete ta buku leyi nge Nghwazi Leyi Tshameke Yi Hanya. Endzhaku ka ku va wansati un’wana a yingisele tikhasete leti, u tikombelele ta yena kutani a sungula ku dyondzeriwa Bibele. Nsati wa mufundhisi u lave ku tiva hi tikhasete leti, a vula leswaku ekerekeni ya yena a nga si tshama a twa swilo swo tano leswi tlhontlhaka mianakanyo. Na yena u tikombelele ta yena naswona u sungule ku dyondza ni Timbhoni. Hikwalaho ko veka tibuku laha ti kokaka mahlo ya vanhu, Mubudha na yena u sungule ku tsakela naswona u karhi u dyondza Bibele. Makwerhu loyi wa xisati u ve phayona ra nkarhi hinkwawo leswaku a ta khathalela swilaveko swa moya swa lava a va kumeke hi ku chumayela hi xitshuketa.

Mpatswa lowu nga maphayona yo hlawuleka le Malaysia wu chumayele wanuna loyi a a tifambela epatwini. Leswi wanuna loyi a a ri ni swivutiso swo tala, u rhambele mpatswa lowu ekaya rakwe. Mpatswa lowu wu fambe na yena kutani wu va ni bulo leri tsakisaka. Leswi a wu ya eDyondzweni ya Buku ya Vandlha, wu n’wi rhambile leswaku a famba na wona naswona u pfumerile. U wu tsakerile nhlangano wolowo. Endzhaku ka wona, mpatswa lowu wu n’wi nyike broxara leyi nge Leswi Xi Swi Languteleke kutani wu endla malunghiselo ya ku n’wi endzela hi siku leri tlhandlamaka. Loko wu fika, u wu byele leswaku loko a fika ekaya tolo nimadyambu endzhaku ka nhlangano lowuya, u fike a hlaya ku fikela hi 4:00 a.m a tlhela a khongela.

Wanuna loyi a a ri mufundhisi wa kereke ya Vujagana. Hambileswi a heteke malembe eswikolweni leswi dyondzisaka ta vukhongeri a nga yi twisisanga nikatsongo dyondzo ya Vunharhu-un’we. Broxara leyi nge Leswi Xi Swi Languteleke yi n’wi yise ematsalweni ya Bibele lama fikeke ma yi veka erivaleni dyondzo leyi leyi nga sekeriwangiki ematsalweni. Hi ku tsakisiwa hi ku tiva Xikwembu xa xiviri, u byele mpatswa lowu a ku: “A ndza ha pfumeli eka Vunharhu-un’we.” Ku sukela hi nkarhi wolowo u arile ku dyondzisa ha yona ekerekeni yakwe. Ku ri na sweswo u ye eminhlanganweni ya Timbhoni ta Yehovha.

U dyondze minkandziyiso ya Bibele leyi a yi kumeke eka Timbhoni kutani a yi pimanisa ni leswi a swi dyondzeke exikolweni xa vukhongeri. Endzhaku ka mavhiki mambirhi, u endle xiboho xa ku cinca vutomi bya yena hinkwabyo. U tile a huma eIndiya leswaku a ta yisa tidyondzo ta yena ta vukhongeri emahlweni eTrinity College le Singapore. Kambe u te: “Xana ndzi nga yisa ku yini ekholichini yoleyo? Ni vito ra yona i Trinity (Vunharhu-un’we)!” U tlhelele etikweni ra rikwavo a ku langutele hi mahlo-ngati ku hlangana ni Timbhoni. U vule a tsakile a ku: “Ndzi kume ntiyiso!”

Makwerhu un’wana wa xisati la nga muaka-tiko wa le Kazakhstan, a a chava ngopfu ku chumayela vaaki-kulobye va le Kazakhstan. Loko a sungula ku phayona u tirhe nsimu leyi ku tshamaka vanhu va tinxaka tin’wana eka yona. Kambe siku rin’wana loko a ri ensin’wini ya ka vona u hlangane ni wansati la nga muaka-tiko wa le Kazakhstan. U n’wi nyike kopi ya Xalamuka! kutani a yi amukela. Swi teke makwerhu loyi mavhiki mambirhi leswaku a va ni xivindzi xa ku tlhelela eka wansati yoloye. Lexi n’wi hlamariseke hi leswaku wansati loyi a a hlundzukisiwe hileswi makwerhu a hlweleke ku tlhelela eka yena. Hiloko a n’wi khoma hi voko a n’wi kokela endlwini yakwe, a n’wi komba buku leyi nge Vutivi, kutani a ku: “A hi dyondze Bibele!” Hi ku famba ka nkarhi, wansati loyi ni n’wana wa yena lonkulu wa jaha va khuvuriwile enhlengeletanweni ya xifundzha. Sweswi ni n’wana wa yena lontsongo wa jaha i muhuweleri la nga khuvuriwangiki, kasi lowa nhwanyana, n’wana wa sesi wa yena ni n’wana wa buti wa yena va karhi va dyondza Bibele.

Etikweni rin’wana ra le Middle East, phayona ro hlawuleka ri hlangane ni wanuna la vuriwaka Nkul. John, loyi a a lava ku pfuxeta xikhokhelo xa yena xa Xihondzo xo Rindza ni xa Xalamuka! Nkul. John u vule leswaku kokwa wa yena la tshamaka eIndiya, i khale a ri Mbhoni. Nkul. John a a ya eminhlanganweni ya Vukreste le Indiya kambe se ku hundze malembe ya 19 a nga ha tshami kona. A a nga swi tivi leswaku a nga hlangana njhani ni Timbhoni ta kwalaho.

Loko phayona ri n’wi khutaza leswaku a va kona enhlanganweni, Nkul. John u vule leswaku u khoma nhlangano endlwini yakwe hi nkarhi lowu fanaka, a engeta hi ku vula leswaku enhlanganweni wa kona “ku dyondziwa Bibele ku tlhela ku khongeriwa.” Nkul. John a a dyondza Bibele ni Maindiya-kulobye ya kwalomu ka 25 hi ku tirhisa minkandziyiso ya Xihondzo xo Rindza ni buku leyi nge Vutivi. Se ku hundze malembe yo hlayanyana va ri karhi va khoma minhlangano vhiki rin’wana ni rin’wana. Hi nkarhi lowu fanaka, ntlawa wa kwalaho wa lava vulavulaka Xinghezi wu ni vahuweleri va 12 ntsena. Ntlawa lowu wa Maindiya wu endzeriwile naswona ku karhi ku endliwa matshalatshala ya ku khathalela swilaveko swa wona swa moya.

Le Nepal ku ni nhwanyana loyi a a tshama evuhlayiselweni bya vana lava nga riki na vatswari, lebyi lawuriwaka hi vatirhi va ku tirhandzela va le Korea. Loko a ri karhi a dyondza exikolweni xa kwalaho, un’wana wa vadyondzisi va yena u vule leswaku u kume “Vakreste va ntiyiso.” Minkarhi hinkwayo n’wana loyi la nga riki na tatana a a titeka ku ri yena ntsena la nga Mukreste wa ntiyiso. Leswi ni vanhu lava lawulaka vuhlayiselo byebyo bya vana lava nga riki na vatswari a va tivula Vakreste, swi n’wi hlamarisile leswi mudyondzisi a swi vuleke. Leswaku a khorwiseka, u lave ku hlangana ni “Vakreste lava va ntiyiso.” Nkateko wa kona mudyondzisi wa yena a a dyondza ni Timbhoni ta Yehovha naswona a a va kona eminhlanganweni minkarhi hinkwayo. Nhwanyana loyi u vulavurisane ni mudyondzisi wakwe kutani a famba na yena enhlanganweni. U tsakisiwe ngopfu hi leswi a swi voneke lerova a hatla a amukela dyondzo ya Bibele. U hatle a endla nhluvuko kutani a khuvuriwa ku nga si hela mune wa tin’hweti. Endzhaku ka loko a khuvuriwile u sungule ku va phayona ra nkarhinyana.

Yuropa

Lembe rin’wana ni rin’wana eLondon, le Nghilandhi ku hleriwa leswaku ku endliwa nkombiso lowu pfunaka ku nyika rungula eka vanhu lava nga twiki. Timbhoni ta Yehovha ti ake xiyindlwana leswaku ti ta kombisa Tibibele ni minkandziyiso ti tlhela ti kombisa vhidiyo leyi nge I Yini Leswi Xikwembu Xi Swi Languteleke Eka Hina? hi Ririmi Ra Mavoko ra le Britain. Hi ku tsakisiwa hi ku vona nkombiso lowu, wansati la nga twiki u tshinerile kutani a vula leswaku a a ri karhi a lavana ni Timbhoni leti nga twiki hinkwako. U vule leswaku Mbhoni leyi nga twiki a yi hamba yi ta bula na yena loko a ha tshama eMongolia. Hambiswiritano, u sungule ku tlangela ntshembo wa ku pfuka ka vafi ni ku sungula ku dyondza Bibele endzhaku ka ku fa ka tata wa yena. Endzhaku ka tsevu wa tin’hweti u rhurhele eNghilandhi naswona hambileswi a kumeke Holo ya Mfumo a a nga twi nchumu eminhlanganweni naswona a nga vulanga leswaku a nga twi etindleveni. U khongele Yehovha leswaku a n’wi pfuna ku kuma Timbhoni ta Yehovha leti nga twiki kutani u ti kumile. Sweswi yena ni n’wana wa yena wa nhwanyana va dyondza Bibele naswona va va kona eminhlanganweni leyi fambisiwaka hi ririmi ra mavoko.

Andreia, Mbhoni ya malembe ya nhungu hi vukhale le Portugal, u vone mudyondzi-kulobye loyi a a ri ni gome hi leswi vatswari va yena va hambaneke. Endzhaku ka masiku ma nga ri mangani, Andreia u kume Xalamuka! ya January 8, 2001, leyi xifunengeto xa yona a xi ri ni nhloko-mhaka leyi nge “Xana Hi Nga Byi Ponisa Vukati Bya Hina?” U byele mana wa yena a tsakile leswaku swihloko leswi swi ta va mpfuno eka vatswari va mudyondzi-kulobye. Hiloko Andreia a endla malunghiselelo ya ku rhumela kopi ya magazini lowu eka tata wa mudyondzi-kulobye, kasi yin’wana a yi rhumela eka mana wa yena.

Hi ku hatlisa endzhaku ka sweswo, mudyondzi-kulobye wa Andreia u te: “Vatswari va mina va tshama swin’we nakambe naswona tatana u te ndzi ku byela leswaku magazini lowu u hi nyikeke wona wu endle leswaku hi tlhela hi tshama swin’we!” Endzhaku ka sweswo Andreia u nyike ndyangu wolowo buku leyi nge Xihundla Xa Ntsako eNdyangwini. Sweswi mana wa Andreia u dyondza Bibele ni mana wa mudyondzi-kulobye.

Loko Timbhoni timbirhi ti ri ensin’wini le Italiya, ti hlangane ni mukhalabye un’wana ivi ti n’wi fambisela magazini wa Xihondzo xo Rindza ni wa Xalamuka! Mukhalabye loyi u vule leswaku a nga koti ku hlaya. U vule leswaku loko a ri ni malembe ya nkombo hi vukhale u sungule ku risa. Endzhaku ka sweswo u hete malembe ya 15 a titshamela ni tinyimpfu etintshaveni. A nga si tshama a ri veka exikolweni. Loko a ri karhi a risa tinyimpfu u khongele hi mbilu hinkwayo leswaku a kota ku tiva Xikwembu ku antswa. U byele vamakwerhu lava a va n’wi endzerile a ku: “Loko ndzo kota ku hlaya timagazini ta n’wina ku ta va ku ri ku hetiseka ka milorho ya mina.”

Makwerhu un’wana u te: “Wa ha ri kona nkarhi wa leswaku u dyondza ku hlaya.” Hi siku leri tlhandlamaka murisi loyi u ye eHolweni ya Mfumo. Timbhoni ti n’wi dyondzise ku hlaya ni ku tsala. Namuntlha, mukhalabye loyi u hlaya Bibele minkarhi hinkwayo naswona u hisekela ku chumayela mahungu lamanene.

Eka xiviko lexi xa Yuropa, Greenland yi tekiwa yi ri xihlala lexikulu emisaveni hinkwayo hambileswi yi nga ni vaaka-tiko va kwalomu ka 56 000. Tiko hinkwaro ri ni mavandlha ya nkombo naswona man’wana ya wona i matsongo swinene.

Harald wa malembe ya 15 hi vukhale i muhuweleri la nga khuvuriwangiki eka rin’wana ra mavandlha wolawo. Loko vadyondzi va tlilasi ya yena va teka riendzo ro ya dyondza swo karhi, Harald a nga fambanga na vona. Ematshan’weni ya sweswo u ye eka tlilasi yin’wana leyi vadyondzi va yona a va nyikiwe xiavelo xa ku hlamusela hi ta vukhongeri bya vona. Hambileswi swichudeni a swi nyikiwe tin’hweti timbirhi leswaku swi lunghiselela, swo tala swa swona a swi pfumala leswi swi nga swi vulaka kasi leswi vulavuleke swi hatle swi heleriwa hi marito. Leswi a ka ha sele hafu ya awara leswaku swichudeni swi hangalaka, mudyondzisi u vutise a ku: “Xana hi ta endla yini hi nkarhi lowu seleke?” Harald—la nga muendzi—u tlakuse voko a vula leswaku a nga tsakela ku va byela hi ta vukhongeri bya yena.

Mudyondzisi u te: “Xana u ta swi kota? Phela a wu kumanga nkarhi wa ku lunghiselela.” Harald u vule leswaku u lunghiselerile kutani a nyikela vumbhoni lebyinene eka swichudeni sweswo. Loko mudyondzisi wa Harald a twa leswi a swi endleke, u kombele Harald leswaku a endla tano eka swichudeni swa tlilasi ya yena. Sweswi u nyikiwe vhiki leswaku a lunghiselela. U te ni minkandziyiso ya Bibele leswaku a ta komba swichudeni-kulobye ni mudyondzisi wa yena.

Pia la tshamaka eDenmark, a a lava leswaku n’wana wa yena la ha ku velekiwaka a khuvuriwa ekerekeni. Nuna wa yena a a nga pfumelelani ni ku khuvuriwa ka tincece, hiloko va koka-kokana hi mhaka leyi. Kutani va hetelele va endle xiboho xa ku ya bula ni mufundhisi hi yona. Mufundhisi u va byele leswaku mhaka ya ku khuvuriwa ka tincece a yi kona eMatsalweni. Pia u hlundzukele kereke ni vafundhisi hi ku va ku hundze malembe ya 32 a ri karhi a dyondzisiwa ku pfumela mavunwa. U rivale hi mhaka ya ku khuvula n’wana kutani a tiyimisela ku tihlayela Bibele leswaku a ta kota ku tiva leswinene ni leswo biha.

Hi May 2000, Mbhoni yi endzele Pia kutani a pfumela ku dyondzeriwa Bibele. Endzhaku ka ku va kona entsombanweni wa muganga u te: “A ndzi si twisisa swilo hinkwaswo kambe sweswi ndza swi tiva leswaku Kereke leyikulu eTikweni yi dyondzisa mavunwa.” Sweswi i muhuweleri la nga khuvuriwangiki naswona u ta khuvuriwa ku nga ri khale.

Makwerhu un’wana le Slovenia a a wisile ni n’wana wa yena ephakeni loko a xiya xichudeni lexi nga nhwanyana xi tihambanise ni swichudeni-kulobye. U sungule ku bula na xona hi timhaka ta moya. Hi ku famba ka nkarhi makwerhu loyi ni nsati wakwe va sungule ku dyondza Bibele ni xichudeni lexi, lexi vito ra xona ku nga Silvia. Xi rhambele xigangu xa xona edyondzweni ya Bibele kutani na xona se xi dyondza Bibele. Silvia u bule ni mana wa yena hi ntiyiso, kutani na yena a sungula ku dyondza. Sweswi hi vunharhu bya vona va va kona minkarhi hinkwayo eminhlanganweni ya le Holweni ya Mfumo. Silvia i muhuweleri la nga khuvuriwangiki. Lexi tsakisaka, Silvia u vula leswaku siku leri a hlanganeke ni makwerhu yoloye ephakeni u khongele Xikwembu leswaku xi n’wi pfuna ku twisisa leswaku ha yini vanhu va misava leyi va hanya vutomi lebyi nga riki na xikongomelo.

Emalembeni ya sweswinyana vanhu vo tala lava humaka eAmerika Dzonga ni le Xikarhi va luvele eSpaniya. Loko phayona ra xisati ri ri karhi ri chumayela hi yindlu ni yindlu ri vulavule ni wansati la humaka eColombia. U rhiye ndleve kutani a amukela dyondzo ya Bibele. Loko phayona ri tlhela ri vuya, ri kombele ku dyondza Bibele ni van’wana lava tshamaka emuakweni wolowo. Vo hlayanyana va pfumele ku dyondzeriwa. Leswi vanhu va muako wolowo a va tshamela ku rhurha, phayona leri ri chumayele un’wana ni un’wana loyi ri n’wi kumeke eka wona. Ku ta fikela sweswi, ri sungule ku dyondza Bibele ni vanhu va 20. Van’wana va vona va rhurhile naswona a swi tiveki loko va ya emahlweni ni ku dyondza. Kambe, sweswi ri dyondza ni vanhu va khume minkarhi hinkwayo naswona van’wana va vona se va va kona eminhlanganweni.

Hambileswi mukhegula un’wana wa le Crete wa malembe ya 82 hi vukhale se ku hundzeke malembe ya 40 a ri karhi a chumayeriwa, wa ha ku va muhuweleri la nga khuvuriwangiki. Xinakulobye lexi phayona ro hlawuleka ri n’wi kombeke xona, xi n’wi susumetele ku endla nhluvuko kutani a khuvuriwa.

Ku nga ri khale, swirho swin’wana swa ndyangu swi sungule ku endla hilaha a endleke hakona. Nuna wa yena la nga ni malembe ya 86 hi vukhale ni la heteke malembe ya 60 a ri karhi a dzaha, u sungule ku dyondza Bibele kutani a tshika ku dzaha ivi a va muhuweleri la nga khuvuriwangiki. N’wana wa vona wa nhwanyana la nga ni malembe ya 55 hi vukhale na yena u endla nhluvuko lowunene hi dyondzo yakwe. U va kona eminhlanganweni naswona u tshike ku dzaha. Xo hetelela, xin’wana xa switukulwana-xinguwe xa vona xi sungule ku dyondza Bibele naswona xi vule leswaku xi navela ku tsarisa eXikolweni xa Vutirheli bya le Tilweni.

Loko makwerhu wa xisati la nga murhumiwa le Estonia a ri karhi a chumayela emuakweni lowu nga ekusuhi ni lowu a tshamaka eka wona, u hlangane ni wansati la n’wi vutiseke loko nuna wa yena a n’wi rhandza. Makwerhu u hlamule a ku, ina wa n’wi rhandza. Hiloko wansati loyi a n’wi vutisa laha a tshamaka kona. Makwerhu u vule leswaku u tshama emuakweni lowu akelaneke ni lowu wansati loyi a tshamaka eka wona. Wansati loyi u sungule ku n’wayitela kutani a ku: “Kunene hi wena—ina hi wena. U tala ku dyela evhurandini, a swi tano?”

Makwerhu u te: “Ina, ndzi tala ku dyela kona ni nuna wa mina.”

Hiloko wansati loyi a ku: “Ndzi tshama ndzi ri karhi ndzi mi langutile. Nuna wa wena u ambala fasikoti naswona hi yena a talaka ku phamela swakudya. Ndza swi vona leswaku u hanya bya le ka byandlana! Ndza ku vona loko ndzi ri laha ndzi tshamaka kona kambe minkarhi hinkwayo ndzi ya evhurandini ra munghana wa mina leswaku ndzi ta ku vona kahle. Hi xiye leswaku minkarhi hinkwayo mi rhanga hi ku khongela mi nga si dya. A hi ku tsakisa ka swona ku mi vona. Xana u nga nghena?” Ku sukela hi nkarhi wolowo, makwerhu u n’wi endzela minkarhi hinkwayo.

Oceania

Xiyenge lexi xa misava xi katsa swihlala swa dzonga, swa vupela-dyambu ni swa le xikarhi ka Lwandle ra Pacific, leswi katsaka Melanesia, Micronesia na Polynesia. Australia, New Zealand, Malay Archipelago ni Swihlala swa Hawaii swa katseka eka xiviko lexi.

Siku rin’wana vamakwerhu vambirhi va xisati le New Zealand va vone wansati a ri karhi a tirha exirhapeni xa yena. Hiloko va yima leswaku va n’wi pfuna ku tsuvula musengele exirhapeni xakwe. Hi ku hlamarisiwa hi musa wa vona, u va chelele kofi ivi vona va n’wi chumayela. Hiloko a tsalela vahleri va phepha-hungu ra kwalaho hi leswi n’wi humeleleke. Vahleri va phepha-hungu va tivise vamakwerhu va vandlha ra kwalaho leswaku va wine swiluva hikwalaho ka musa wa vona.

Xihloko xa phepha-hungu xi te: “Loko Timbhoni ta Yehovha ti tsuvula musengele lowu a wu karhata wansati la nga noni, ti endle leswi ku nga tshamelo maxelo eka tona—ku nga ku pfuna munhu la lavaka mpfuno. Musa wa tona wu endle a va ni siku lerinene. Munhu Yoloye a a tsake ngopfu lerova a hi byela hi leswi n’wi humeleleke. Mhaka leyi yi hlawuriwe tanihi yona yi wineke swiluva swa August. Hi tshemba leswaku swiluva leswi swi ta va tisela ntsako hilaha musa wa vona wu endleke ha kona.”

Eka xin’wana xa swihlala swa Vanuatu, maphayona mambirhi ma chumayele xinhwanyetana xin’wana lexi a xi tirha exitolo. Xi amukele broxara leyi nge Leswi Xi Swi Languteleke kutani xi dyondzeriwa Bibele. Tata wa xona a a bava a khalakhasa, a a nga lavi no twa leswaku n’wana wa yena a dyondza ni Timbhoni. U handzulele minkandziyiso ya xona ya Bibele, a xi ba swinene kutani eku heteleleni a xi hlongola emutini wa yena. Hi nkarhi wolowo, xinhwanyetana lexi xi kume vutivi lebyi engetelekeke, xi va kona eminhlanganweni naswona xi hlakulela mihandzu ya moya. (Gal. 5:22, 23) Tata wa xona u kale a vohla hi ku vona xichavo lexi a xi ri na xona kutani a xi byela leswaku xi vuya ekaya. Xi tsarise eXikolweni xa Vutirheli bya le Tilweni naswona xi ve kona ro sungula eka nhlengeletano ya xifundzha, leyi khomeriweke exihlaleni xa le kusuhi ni kwalaho xa Santo. Loko xi vutisiwe leswaku xi swi kotise ku yini ku ta, xi hlamule xi ri karhi xi n’wayitela xi ku: “Tatana u ndzi xavele thikithi.”

Clarence a a ri wanuna la nga ni xinghana, loyi a a teka timagazini minkarhi hinkwayo loko vahuweleri va n’wi endzele ekaya rakwe le Hawaii. Phayona leri n’wi endzeleke siku rin’wana xi xiye leswaku Clarence u ni buku leyi nge U Nga Hanya Hi Masiku aParadeyisini eMisaveni, hiloko ri kombela ku dyondza na yena Bibele. Clarence a nga kalanga a tipfinyinga, u vule leswaku i khale a ri karhi a lava ku dyondza swo karhi hi Bibele. Clarence a a yi lunghiselela kahle dyondzo ya yena ya Bibele naswona ku nga ri khale u sungule ku va kona eminhlanganweni ya vandlha.

Kambe a ka ha ri ni swilo leswi Clarence a a fanele ku swi fularhela. Leswi a nga tshama a va socha ra Nyimpi ya Vumbirhi ya Misava, a a rhandza ku macha ni masocha-kulobye loko ku ri ni tiholideyi ta minkombiso yo tano. Kasi, hi nkarhi wa Khisimusi, a a rhandza ku ba xingelengele loko nhlengeletano ya Salvation Army yi famba yi kombela minyikelo. Swi teke nkarhi wo leha leswaku a xiya leswi ku nga vi xiphemu xa misava ya Sathana swi vulaka swona. Kambe, u hetelele a faneleka ku ya ensin’wini.

Clarence u khuvuriwe a ri ni malembe ya 85 hi vukhale naswona u ya emahlweni a hlanganyela hi ku hiseka evutirhelini. U nyikela tinkulumo eXikolweni xa Vutirheli bya le Tilweni. Sweswinyana, wa ha ku dyondza ku tirhisa khompyuta leswaku a ta kota ku endla ndzavisiso hi Watchtower Library leyi nga eka CD-ROM. Clarence u vule hi ku tiyiseka a ku: “Leswi ndzi kumeke ntiyiso, a xi kona lexi nga ta ndzi tshikisa ku tirhela Yehovha.”

Loko makwerhu wa xisati a ri karhi a chumayela hi riqingho le Australia, u vutise wanuna un’wana loko a nga swi kota ku va ni timinete ta 15 hi vhiki leswaku va ta bula hi Bibele. Wanuna loyi u vule leswaku a nge swi koti. Makwerhu u n’wi vutisile a ku: “Xana u nga swi kota ku va ni timinete ta ntlhanu?” U pfumerile a ri karhi a kanakana. Hi vhiki leri tlhandlamaka, va sungule ku dyondza hi timinete toleto ta ntlhanu. Ku nga ri khale, u sungule ku vutisa swivutiso leswi dzikeke. Leswi makwerhu a a nga lavi leswaku dyondzo yi tlula timinete ta ntlhanu, a a ku: “Xolexo i xivutiso lexinene kambe nkarhi wa hina wu herile, hi ta bula hi xona enkarhini lowu taka. Sala kahle.”

Loko wanuna loyi a vutisa leswaku a nga byi kumisa ku yini vukhongeri bya ntiyiso, xivutiso xexo a xi vekeriwa nkarhi lowu taka. Endzhaku ka dyondzo yoleyo, u te: “Timbhoni ta Yehovha ti fanele ti ri ni vukhongeri bya ntiyiso kambe a ndzi nge pfumeli hi ku olova ivi ndzi hundzuka. Ndzi anakanya leswaku ndzi fanele ku kuma vutivi lebyi engetelekeke.” Loko a ri karhi a tsakela, nkarhi wa dyondzo wu sungule ku engeteleka wu suka eka timinete ta 5 wu ya eka timinete ta 30.

Endzhaku ka loko va hete ku hlaya broxara leyi nge Leswi Xi Swi Languteleke, makwerhu wa xisati u vutise nuna loyi loko swi nga koteka leswaku yena ni nuna wakwe va n’wi endzela ekaya rakwe leswaku va ta bula hi leswi a swi dyondzeke ku ta fikela enkarhini wolowo. U pfumerile. Va n’wi endzerile kutani va nkhensa lunghelo leri va ri kumeke ra ku n’wi pfuna etin’hwetini ta tsevu leti hundzeke, va tlhela va n’wi khutaza ku ya emahlweni. Sweswi, nuna wa makwerhu loyi wa xisati u endzela nuna loyi kan’we hi vhiki leswaku a ya dyondza na yena.

Ka ha ri ni tindhawu to tala ta Papua New Guinea leti nga si fikeleriwaka hi mahungu lamanene hikwalaho ka leswi ku nga ni swimitana leswi swi tikaka ku fika eka swona. Ndlela yo olova yo vulavurisana ni vanhu lava humaka eswimitanini leswi hi loko va te edorobeni va ta xava swilo. Nuna un’wana la humaka eximutanini lexi nga le kule u kume Xihondzo xo Rindza hi yona ndlela yoleyo. Loko a hete ku xi hlaya, u tsalele rhavi leswaku a kuma rungula leri engetelekeke. Ku rhumeriwe murhumiwa leswaku a ya n’wi endzela. Ndlela leyi a yi olova ku fikelela vanhu a ku ri ku tsala papila, hikwalaho ka sweswo ku fambisiwe tidyondzo to tala hi papila ni vanhu lava tsakelaka.

Leswi varhumiwa van’wana a va tiyimisele ku endzela ndhawu leyi, va teke riendzo hi movha lowu kokaka hi mavhilwa hinkwawo. Riendzo ra kona a ri teka tsevu wa tiawara, hi xitalo u famba epatwini leri nga ni khombo emakhwatini ni leri jika-jikaka etintshaveni ri tlhela ri tsemakanya milambu. Kun’wana “patu” ra kona a ku ri nambu hi woxe. Loko va fika laha a va ya kona, va vone rivala ro xonga leri nga mpfhuka wa swikwere-khilomitara swa 10-12, leri rhendzeriweke hi tintshava leti nga ni makhwati lama tlhumeke, leti tinhlohlorhi ta tona ti funengetiweke hi mapapa. Onge a va ri emisaveni yin’wana leyi va nga si tshamaka va yi vona. Tindlu ta kona a ti akiwe hi musengele tanihi ku sukela khale ti ri karhi ti akisiwa xisweswo. Loko vanhu va twa leswaku varhumiwa va fikile, va hlengeletanile va tsakile. Hambileswi vo tala a va nga si tshama va hlangana ni Timbhoni ta Yehovha, ana se a va dyondza Xihondzo xo Rindza kambirhi hi vhiki naswona vo tala va vona se a va fularhele Kereke ya Lutere.

Varhumiwa va va kombise ndlela leyi minhlangano yi khomiwaka ha yona va tlhela va va tivisa leswaku ku ta va ni nkulumo ya le rivaleni siku leri tlhandlamaka hi 8:00 a.m. Hi siku leri tlhandlamaka, vavanuna van’wana va hubute hi 4:30 a.m. va ya eswimitanini swa le kusuhi ni kwalaho leswaku va ya rhamba vanhu ku ta yingisa nkulumo yoleyo. Lava saleke, va ake holo leyi ku nga ta khomeriwa minhlangano eka yona. Va endle mabenci hi marhavi lamakulu naswona va fulela hi marhavi lamatsongo. Kutani va endla pulatifomo hi musengele. Un’wana ni un’wana a a tsakile. Lava veke kona enhlanganweni wolowo a va ri 44 naswona vanhu va 11 lava a ku ri ro sungula va ta eminhlanganweni va siye mavito ya vona leswaku va ta dyondzeriwa hi ku tsaleriwa mapapila. Varhumiwa lava va tlhelele ekaya va karhele kambe va enerisekile hi leswi va swi endleke.

[Xifaniso lexi nga eka tluka 45]

Grant wa le Zambia la nga ni malembe ya nhungu hi vukhale u ni vanhu vo tala lava a va dyondzelaka Bibele

[Xifaniso lexi nga eka tluka 57]

Xiyindlwana lexi tirhisiweke enkombisweni lowu nyikaka rungula eka vanhu lava nga twiki eNghilandhi