Bibele Leyi Endliweke Yi Tiya

TIMBHONI TA YEHOVHA ti rhandza Bibele ku tlula tibuku letin’wana hinkwato. Hi yi dyondza nkarhi ni nkarhi naswona ha yi tirhisa ku dyondzisa van’wana mahungu lamanene ya Mfumo wa Xikwembu. (Mat. 24:14) Hikwalaho, vamakwerhu va endle matshalatshala ya leswaku Bibele ya Vuhundzuluxeri Bya Misava Leyintshwa Bya Matsalwa Yo Kwetsima leyi pfuxetiweke ya 2013 ya Xinghezi, yi va leyi kokaka mahlo yi tlhela yi tiya.

Loko vamakwerhu lava tirhaka ku kandziyisa eWallkill, New York, le U.S.A. va burisane ni mulanguteri wa khampani yin’wana yo endla tibuku hi Bibele leyintshwa leyi va lavaka ku yi endla u te, “A swi koteki ku endla Bibele leyi mi yi lavaka.” U tlhele a ku, “Swi twisa ku vava ku vona Tibibele to tala leti endleriweke ku khavisa ha tona, kambe ti nga tiyanga.”

Tibibele tin’wana to sungula ta Vuhundzuluxeri Bya Misava Leyintshwa a ti nga tiyanga. Hikokwalaho, vamakwerhu lava tirhaka ku kandziyisa eWallkill va swi kambisise hi vukheta swifunengeto swa Tibibele, swilo swo namarheta ha swona ni tindlela to endla Bibele leyi nga ta tshama yi ri eka xiyimo lexinene hambiloko yi tirhisiwa hi ndlela yo biha etindhawini to hambana-hambana. Hi ku ya hi ndzavisiso wa vona, va endle Tibibele ti nga ri tingani kutani va ti rhumela Timbhoni ta le matikweni yo hambana-hambana lawa ku hisaka swinene eka wona ni lawa ku titimelaka swinene leswaku va ti ringeta.

Endzhaku ka tin’hweti ta tsevu Tibibele leti ti tlherisiwile kutani vamakwerhu va antswise ndlela leyi va tiendlaka ha yona ivi va rhumela tin’wana leswaku ti ya ringetiwa. Ku ringetiwe Tibibele to tlula 1 690. A ku ri Tibibele ti nga ri tingani leti onhakeke. Hi xikombiso, yin’wana yi kandziyiwe hi movha, yin’wana yi tshikiwe ehandle vusiku hinkwabyo yi neriwa hi mpfula naswona yin’wana yi funengetiwe hi mati ya ndhambi.

Hi 2011, loko ta ha ringetiwa, ku xaviwe michini leyintshwa ya rivilo lerikulu leyi endlaka tibuku leswaku yi tirhisiwa eWallkill ni le Ebina, le Japani. A ku ngo va ni xilaveko xo kandziyisa Tibibele leti eneleke ntsena leti a ti ta humesiwa enhlanganweni wa lembe ni lembe, kambe a ti fanele ti languteka ku fana hambiloko ti endliwe etindhawini to hambana.

Swifunengeto Leswi Petsekaka

Eku sunguleni ka 2012, michini yoleyo yi sungule ku kandziyisa Bibele leyi humesiweke hi 1984 ya Vuhundzuluxeri Bya Misava Leyintshwa leyi nga ni xifunengeto lexintshwa. Hambiswiritano, michini leyintshwa yi tirhise glu ku hlanganisa xifunengeto xa dzovo lexi a xi nga si ringetiwa kutani swifunengeto sweswo swi petsekile. Hikwalaho ka sweswo, va tshike ku yi kandziyisa.

Vaendli va swin’wana swa swifunengeto leswi va xiye leswaku ku petseka ka swona i xiphiqo lexi tolovelekeke eka tikhampani to endla tibuku naswona a swi olovi ku xi lulamisa. Ematshan’weni yo va va tirhisa xifunengeto xo tsindziyela, vamakwerhu a va tiyimisele ku endla Bibele leyi nga ni xifunengeto xo olova, lexi tiyeke xi tlhela xi saseka. Endzhaku ka tin’hweti ta mune ku ri karhi ku ringetiwa ti-glu ni madzovo yo hambana-hambana, va hetelele va kume ndlela leyinene yo endla swifunengeto swo olova swa Tibibele leswi a swi nga ta petseka kutani va tlhele va sungula ku ti kandziyisa.

A ku hleriwe leswaku Bibele ya Vuhundzuluxeri Bya Misava Leyintshwa leyi pfuxetiweke yi humesiwa hi October 5, 2013, eka nhlangano wa lembe ni lembe wa Watch Tower Bible and Tract Society of Pennsylvania. Ku rhumeriwe rungula ra Bibele hi ku tirhisa endlelo ra elektroniki etindhawini to kandziyisa hi Ravuntlhanu, August 9, 2013 kutani hi siku leri landzelaka yi sungule ku kandziyisiwa. Bibele yo sungula leyi heleleke yi kandziyisiwe hi August 15. Eka mavhiki ya nkombo lama landzeleke, tindzawulo to kandziyisa ta le Wallkill ni le Ebina ti tirhe vusiku ni nhlikanhi leswaku ti kandziyisa ni ku rhumela Tibibele to tlula 1 600 000 leswaku vanhu hinkwavo lava va teke eka nhlangano wa lembe ni lembe va ti kuma.

Hambileswi Bibele leyi yi endliweke yi saseka yi tlhela yi tiya, kambe rungula leri nga eka yona leri ponisaka vutomi i ra risima swinene. Hi siku leri landzeleke leri makwerhu wa xisati un’wana wa le United States a kumeke Bibele yakwe leyintshwa ha rona, u te: “Sweswi ndzi kota ku yi twisisa kahle Bibele leyintshwa leyi hi yi kumeke.”