Ku Hundzuluxeriwa Ka Buku Ya Nkoka Ku Tlula Tibuku Hinkwato

“Ndzi ni malembe ya 19 ndzi swi langutele hi mahlongati leswi!” I yini leswi makwerhu a a swi languterile? A a langutele Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi ririmi rakwe ra Xibengali. Vanhu vo tala va titwa hi ndlela leyi fanaka loko Vuhundzuluxeri Bya Misava Leyintshwa byi humesiwa hi ririmi ra vona. Kambe, xana u tshame u tivutisa leswaku i yini leswi katsekaka loko Bibele yi hundzuluxeriwa ni loko yi kandziyisiwa?

Xo sungula, ntlawa wo hundzuluxela wu hlawuriwa hi ku ya hi nkongomiso wa Komiti Ya Vatsari Ya Huvo Leyi Fumaka. Xana swi teka nkarhi wo tanihi kwihi leswaku va hundzuluxela Bibele? Nicholas Ahladis, loyi a tirhaka ni Ndzawulo ya Vuhundzuluxeri eWarwick le New York, u ri: “Leswaku ku hundzuluxeriwa Bibele, swi fanele swi tiveka leswaku i vahundzuluxeri vangani lava nga eka projeke yoleyo, ndlela leyi ririmi ri tikaka hayona, ndlela leyi vahlayi va byi twisisaka hayona vutomi bya le nkarhini wa ku tsariwa ka Bibele ni ndlela leyi ririmi ri hambanaka hayona hi ku ya hi tindhawu. Hi xiringaniso, ntlawa wo hundzuluxela wu nga heta lembe ku ya eka manharhu ku hundzuluxela Matsalwa Ya Vukreste Ya Xigriki ntsena naswona wu nga heta malembe ya mune kumbe ku tlula ku hundzuluxela Bibele hinkwayo. Ku hundzuluxela Bibele ya ririmi ra mavoko swi teka nkarhi wo leha swinene.”

A hi vahundzuluxeri ntsena va lavekaka leswaku Bibele yi hundzuluxeriwa. Mitlawa ya vahlayi vo hambanahambana lava mikarhi yin’wana va humaka ematikweni yo hambanahambana va kambisisa vuhundzuluxeri naswona va endla sweswo handle ko hakeriwa. Swiringanyeto swa vona swi pfuna vahundzuluxeri leswaku va hundzuluxela rungula ra le Bibeleni hi ndlela leyi baka nhloko ya mhaka, yi twala kahle yi tlhela yi twisiseka. Phela, muleteri wa vahundzuluxeri va Bibele wa le Afrika Dzonga u ri, “vahundzuluxeri va titwa va ri ni vutihlamuleri lebyikulu eka Yehovha ni le ka vahlayi va Rito rakwe.”

Endzhaku ka loko va hete ku hundzuluxela, Bibele yi fanele yi kandziyisiwa yi tlhela yi hlanganisiwa. Leswaku va endla tano, vakandziyisi va tirhisa kwalomu ka khume wa swilo, ku nga: phepha, inki, xifunengeto xa le handle, swo namarheta, xifunengeto xa le ndzeni, tluka ra silivhere, rhiboni, swilapana leswi hlanganisaka matluka ya Bibele, swo tiyisa nhlana wa Bibele ni leswi endlaka leswaku Bibele hinkwayo yi hlangana. Hi 2019, ku tirhisiwe tidolara to tlula 20 wa timiliyoni ta le Amerika eka swilo leswi leswaku ku endliwa Bibele. Lava tirhaka eka Ndzawulo yo Kandziyisa, va tirhe tiawara to tlula 300 000 hi lembe rero leswaku ku kandziyisiwa Tibibele ti tlhela ti rhumeriwa.

Hikwalahokayini ku hetiwa nkarhi ni mali yo tala eka mitirho yoleyo? Joel Blue wa le ka Ndzawulo ya Misava Hinkwayo yo Kandziyisa u ri: “Bibele i buku ya nkoka swinene leyi hi yi kandziyisaka. Kutani hi lava leswaku ndlela leyi yi langutekaka hayona yi vangamisa Xikwembu lexi hi xi gandzelaka ni rungula leri hi ri chumayelaka.”

A hi hundzuluxeli Tibibele leti tolovelekeke ntsena ta Matsalwa Yo Kwetsima Ya Misava Leyintshwa hi tlhela hi hundzuluxela ni ta vahlayi lava nga ni swilaveko swo hlawuleka. Hi xikombiso, Bibele ya braille ya Matsalwa Yo Kwetsima Ya Misava Leyintshwa ya kumeka hi tindzimi ta khume. Bibele ya braille leyi heleleke yi nga teka kwalomu ka tiawara ta nhungu ku yi endla naswona tivholomu ta yona to tala ti lava ndhawu leyi ringanaka kwalomu ka timitara ta 2.3. Hi tlhela hi endla Tibibele to hlawuleka ta vakhotsiwa, laha makhotso ya kona ma pfumelelaka tibuku leti nga ni swifunengeto swa phepha ntsena.

Bibele ya Matsalwa Yo Kwetsima Ya Misava Leyintshwa yi khumba vutomi bya vahlayi va yona. Xiya vandlha leri vulavulaka Xikiluba leri nga eTombe, le Democratic Republic of the Congo. Loko u ya eTombe, u famba tikhilomitara to tlula 1 700 hi gondzo leri sukaka edorobankulu. Timbhoni ta kwalaho a ti ri ni Bibele yin’we naswona a yi ri hi ririmi ra khale ra Xikiluba. Vamakwerhu a va cincana hi Bibele yoleyo leswaku va kota ku lunghiselela swiyenge swa tinhlengeletano ta vandlha. Ku sukela hi August 2018, un’wana ni un’wana evandlheni a a ri ni Bibele leyi heleleke ya ririmi ra manguva lawa ya Vuhundzuluxeri Bya Misava Leyintshwa hi Xikiluba.

Makwerhu wa xisati loyi a vulavulaka Xijarimani u vule leswi hi Vuhundzuluxeri Bya Misava Leyintshwa lebyi pfuxetiweke hi ririmi ra yena: “A ndza ha vuli leswaku ndzi fanele ndzi hlaya Bibele. Ematshan’weni ya sweswo, ndzi tivutisa leswaku ‘Hi rini laha ndzi faneleke ndzi hlaya leswi engetelekeke?’” Xivochwa xin’wana xi vule xi ku: “Ndzi nyikiwe kopi ya Bibele ya Matsalwa Yo Kwetsima Ya Misava Leyintshwa naswona yi le ku cinceni ka vutomi bya mina. A ndzi nga ri twisisi Rito ra Xikwembu kukondza ndzi sungula ku hlaya Bibele leyi. Ndzi lava ku tiva leswi engeteleke hi Timbhoni ta Yehovha naswona ndzi lava ku va un’wana wa vona.”

Vahlayi hinkwavo va Bibele ya Vuhundzuluxeri Bya Misava Leyintshwa va yi tlangela minyikelo leyi seketelaka ku kandziyisiwa ka yona. Minyikelo ya ntirho wa misava hinkwayo yi nyikeriwa hi ku tirhisa donate.jw.org. Ha ku khensa ku hanana ka n’wina.