A A Wu Rhandza Ntiyiso

HI May 1963, ku tlhekeke madzolonga yo lwisana ni Machayina etikweni hinkwaro ra West Java. Doroba leri a ri hlaseriwa swinene a ku ri Sukabumi laha ndyangu wa ka hina a wu ri na bindzu ra tilori. Magidi ya vanhu ku katsa ni van’wana va vaakelani va hina, va tshove va nghena ekaya ra hina. Hi fumbane endhawini yin’we hikwalaho ko chava, loko va ri karhi va tshova kaya swin’we ni ku teka nhundzu ya hina.

Loko ntshungu wa vapfukeri wu fambile, vaakelani van’wana va tile leswaku va ta hi chavelela. Tatana u tshame na vona ekamareni ro wisela eka rona. Eka nhundzu ya hina leyi onhakeke, u kume Bibele yakwe leyikulu ya Xisundane. U yi pfurile kutani a byela vaakelani va hina leswaku swiphiqo leswi ku profetiwe ha swona. U tlhele a hlamusela ntshembo lowu tsakisaka hi Mfumo wa le nkarhini lowu taka.

Tatana a a nga swi rhandzi ku tihlayisela xuma emisaveni. Hakanyingi a a tshamela ku hi byela leswi: “Hi fanele hi rhangisa swilo swa moya!” Ku hiseka kakwe ku endle leswaku, nsati wakwe, vana vakwe va tsevu, tata wakwe loyi a a ri ni malembe ya 90, maxaka yakwe yo tala swin’we ni vaakelani va amukela ntiyiso.