Voko Leri Hlamarisaka Ra Octopus

Van’wasayense lava endlaka michini leyi tirhaka bya munhu, va karhi va endla xitirhisiwa lexi nga ta pfuna madokodela leswaku ma kota ku endla vuhandzuri eswirhweni leswi nyenyelaka swa le ndzeni kambe va nga handzulanga ngopfu. Va kopela eka mavoko lama petsekaka hi ku olova ya octopus.

Xiya: Octopus yi kota ku haka, ku khoma ni ku manya swilo hambi swi ri endhawini leyitsongo ngopfu hi voko ra yona. Ya swi kota ku petsa mavoko ya yona kun’wana na kun’wana naswona loko yi swi lava ya ma tiyisa.

Valavisisi va tshemba leswaku michini yoleyo leyi tirhaka hi khomphyuta leyi petsekaka ku fana ni mavoko ya octopus, yi nga pfuna loko ku endliwa vuhandzuri eka swirho swa le ndzeni. Switirhisiwa leswi swi ta va pfuna ngopfu vanhu lava a va ta boheka ku endliwa vuhandzuri lebyikulu lebyi rharhanganeke.

Vona mavoko ya octopus lama petsekaka hi ku olova

Xitirhisiwa xo tano se xi endliwile naswona xa tirhisiwa loko ku endliwa vuhandzuri. Xiphemu xin’wana xa voko ra xitirhisiwa lexi nga leha 135 wa timilimitara xi kota ku tlakula ni ku khoma swirho swa le ndzeni xi nga swi vavisi, loko xiphemu lexin’wana xi ri karhi xi endla vuhandzuri. Hi ku ya hi Dokodela Tommaso Ranzani un’wana wa ntlawa wa vaendli va xitirhisiwa lexi u ri: “Ha tshemba leswaku xitirhisiwa lexi lexintshwa lexa ha ku endliwaka xi ta pfuna hi tindlela to tala.

U anakanya yini? Xana mavoko ya octopus ya lo tiendlekela? Kumbe, xana ya lo endliwa?