Minongonoko Ya Tinhlengeletano Ta Xifundzha Leyi “Twiwaka Yi Tlhela Yi Voniwa”

Se swi ni malembe yo tlula 130 Timbhoni Ta Yehovha ta manguva lawa ti ri karhi ti hlengeletana eka tinhlengeletano ta xifundzha ta lembe ni lembe. Sweswi minongonoko leyi yi katsa mimbulavulo yo tlula 40, vuyimbeleri, mimbulavurisano ni tivhidiyo. Nongonoko wu fanele wu ‘twala ni ku vonaka’ kahle leswaku vayingiseri va vuyeriwa ni ku khutazeka. (Luka 2:20) Xana minyikelo ya wena yi tirhisiwa njhani ku tiyiseka leswaku vanhu hinkwavo va vuyeriwa eka tinhlengeletano leti, swi nga ri na mhaka leswaku va tshama kwihi?

Switirhisiwa Swa Mpfumawulo Ni Tivhidiyo Swi Lunghiseleriwa Nhlengeletano Ha Yin’we Ya Xifundzha Hi Ku Ya Hi Swilaveko Swa Ndhawu

Ematikweni yo tala ya le vupeladyambu, switediyamu swo tala ni tindhawu leti ku hlanganiwaka eka tona se swi na swona switirhisiwa swa mpfumawulo ni tivhidiyo. Kutani loko hi hakela tindhawu toleto leswaku hi khoma tinhlengeletano ta xifundzha, hikwalahokayini hi ta ni switirhisiwa swa hina? David loyi a tirhaka eka Ndzawulo Ya Vuhaxi Ya Le Ntsindza Wa Misava Hinkwayo u ri: “Tin’wana ta tindhawu leti hi ti hakelelaka ti endliwe hi xikongomelo xa leswaku vayingiseri va kota ku heta tiwara to tlula tsevu va lo tshama loko va yingisela nongonoko lowu ngo vulavuriwa kunene. Hi xikombiso, tindhawu ta mitlangu ti tirhisa switirhisiwa swa mani na mani leswaku ti tivisa switiviso ni ku tlanga swiphemu swo karhi swa vuyimbeleri. Swikrini swa vona swi kombisa mikutlunya ya ntlangu lowu nga eku tlangeni, swinavetiso ni ku kombisa leswi endlekeke. Ku hambana ni sweswo, hi lava leswaku vayingiseri va hlalela tivhidiyo to leha, va twa ni ku twisisa kahle rito rin’wana ni rin’wana leri vulavuriwaka exitejini.”

Tindhawu leti ku khomeriwaka eka tona tinhlengeletano ta xifundzha ta hambana, hikwalaho switirhisiwa swa mpfumawulo ni tivhidiyo swi lunghisiwa hi ku ya hi swilaveko swa ndhawu. Endzhaku ka loko ndhawu yo khomela nhlengeletano yi hlawuriwile, Ndzawulo Ya Vuhaxi emarhavini ya hina hi yona yi endlaka xiboho xa leswaku vayingiseri va ta va va tshame tlhelo rihi hi ku ya hi nhlayo leyi languteriweke ni makulele ya ndhawu. Vamakwerhu va languta laha swikrini ni swipikara swi nga ta tshama kona kutani va endla xiboho xa leswaku swi ta koneketiwa njhani ni ku tsala swilo hinkwaswo leswi lavekaka ku tiyiseka leswaku vanhu hinkwavo va kota ku vona ni ku wu twa kahle nongonoko.

Switirhisiwa swa mpfumawulo ni tivhidiyo swi rharhangane ngopfu etinhlengeletanweni ta xifundzha laha nongonoko wu khomiwaka hi tindzimi to hambanahambana. Loko ku ri leswaku nongonoko wu ta tolokiwa hi ririmi rin’wana, vatoloki va fanele va twa mpfumawulo ni ku vona tivhidiyo naswona leswi tolokiwaka swi ta yisiwa eka xitichi xa rhadiyo xa vanhu lava va twisisaka ririmi rolero. Hi khensa switirhisiwa swo hlawuleka leswi endlaka swi koteka ku tlanga vhidiyo hambiloko yi tlangiwa hi tindzimi ta nhungu hi nkarhi wun’we. David u tlhele a ku: “switirhisiwa leswi swi rharhanganile. Hikwalaho, vatirhi va ku tirhandzela lava tirhaka hi swona va fanele va leteriwa swi twala.”

Marhavi yo tala ma na swona switirhisiwa swa mpfumawulo ni tivhidiyo leswi tirhisiwaka lembe ni lembe. Emarhavini wolawo vamakwerhu va hlela leswaku swi yisiwa eka nhlengeletano ha yin’we. Rhavi ra le United States ntsena ri tirhisa kwalomu ka 200 000a wa tidolara lembe ni lembe ku fambisa switirhisiwa swa nhlengeletano ya xifundzha. Loko hi endla tano hi tirhisa mali ya le hansi ku tlula leyi a hi ta yi tirhisa loko a hi xava switirhisiwa swin’wana. Steven loyi a pfuneteke ku langutela mpfumawulo ni tivhidiyo enhlengeletanweni ya xifundzha u ri: “Ntlawa wa hina wa mpfumawulo ni tivhidiyo wu endle hinkwaswo leswi wu nga swi kotaka ku tiyiseka leswaku switirhisiwa hinkwaswo hambi ku ri leswitsongo swa hlayisiwa ni ku khathaleriwa, swi tlhela swi pakiwa leswaku swi famba swi hlayisekile naswona swi lunghekele nongonoko lowu landzelaka.”

Ku Kuma Ni Ku Hlayisa Switirhisiwa

Ku lomba switirhisiwa swa mpfumawulo ni tivhidiyo swa durha swinene naswona a swi le ka xiyimo lexinene hileswi swi nga khathaleriwiki. Hikwalaho ka sweswo hi xava switirhisiwa leswi hi swi lavaka. Sweswi mavoni lama tirhisiwaka ku kombisa tivhidiyo ekhumbini ra le ndzeni ka yindlu leri leheke ntlhanu wa timitara ri anama timitara tinharhu ma durha kwalomu ka 24 000 wa tidolara naswona hambi ku ri ntambhu yin’we ya 15 wa timitara ya xikurisamarito yi durha kwalomu ka 20 wa tidolara. Hikwalaho Ndzawulo Ya Vuhaxi yi tirhisana ni Ndzawulo Yo Xava ku “hlayela swilo hinkwaswo leswi lavekaka” ku nga si xaviwa switirhisiwa. (Luka 14:28) Hi xikombiso, va tivutisa leswaku i vanhu vangani lava nga ta vuyeriwa eka switirhisiwa leswi? Xana ku xava switirhisiwa leswintshwa i ndlela yo antswa yo enerisa xilaveko? Xana hi ni ndhawu leyi ringaneke yo veka switirhisiwa swa hina, swilo leswi lavekaka leswaku swi tshama swi ri eka xiyimo lexinene ni vatirhi va ku tirhandzela lava leteriweke kahle leswaku va swi khathalela?

Leswaku switirhisiwa swa mpfumawulo ni tivhidiyo swi tirhisiwa nkarhi wo leha naswona hi hlayisa minyikelo, ha swi khathalela ni ku swi lunghisa nkarhi ni nkarhi. Leswaku nhundzu ya hina yi hlayiseka, hi yi fambisa hi mabokisi lamakulu lama tiyeke naswona mabokisi wolawo ya khathaleriwa ni ku hlayisiwa hilaha ku faneleke.

Ku Chumayela Ni Nongonoko Lowu Vuyerisaka

Vanhu lava nga riki Timbhoni va tsakisiwa hi ndlela leyi tivhidiyo ti vonakaka hayona etinhlengeletanwini ta hina ta xifundzha. Hi xikombiso muhaxi un’wana loyi a nga ni ntokoto u vulavule hi ndlela leyi tivhidiyo ta hina ti vonakaka kahle hayona ni ndlela leyi ti humelerisiweke hayona. Jonathan, loyi a pfunetaka ku koneketa ni ku tirhisa switirhisiwa swa mpfumawulo ni tivhidiyo etinhlengeletanweni ta xifundzha u ri: “Swi n’wi hlamarisile loko a twa leswaku vatirhi va ntlawa wa hina hinkwawo a ku ri vatirhi va ku tirhandzela naswona a va nga ri na ntokoto.” U vule leswaku loko a ku ri khampani yakwe a swi ta va swi teke masiku ya ntlhanu ku endla ntirho hinkwawo lowu hi koteke ku wu endla hi siku rin’we ni hafu. Eka nhlengeletano yin’wana ya xifundzha, mininjhere wa ndhawu yoleyo u te, “Ku te vanhu vo tala lava nga ni ntokoto hi swa vuyimbeleri ni tivhidiyo kambe a ndzi si tshama ndzi vona vanhu lava tirhaka hi ndlela leyi, lava tivaka leswi va swi endlaka!”

Xana u vuyeriwe njhani eka switirhisiwa swa mpfumawulo ni tivhidiyo enhlengeletanweni ya xifundzha? Kumbexana u titwa ku fana na David loyi a tshamaka eEngland. U ri: “Ndzi na 88 wa malembe naswona a ndzi si tshama ndzi nga vi kona enhlengeletanweni ya xifundzha. Kambe sweswi swa olova swinene ku yingisela ni ku vona swilo hinkwaswo. Hi khensa tivhidiyo leti endliweke kahle, ti endla leswaku nongonoko wu famba hi ku hatlisa naswona rungula ra tona ra twisiseka naswona ri veketeriwe kahle. Micheal loyi a tshamaka eNigeria u xiye leswaku, “Vamakwerhu a va ha karhateki hi mpfumawulo kumbe ku vona tivhidiyo, sweswi va kota ku yingiserisisa kahle va nga kavanyeteki hi nkarhi wa nongonoko.”

Loko u ya eka nhlengeletano ya xifundzha ni yo hlawuleka ya lembe leri leyi nge, “Chumayela Mahungu Lamanene”! hi kombela u tinyika nkarhi wo anakanyisisa hi ntirho lowu endliweke leswaku u kota ku twa ni ku vona nongonoko lowu kahle. Hi khensa swinene leswi minyikelo ya n’wina ku katsa ni leyi nyikeriweke hi ku tirhisa donate.jw.org yi pfuneke leswaku sweswo swi koteka. Hi ba mandla hi vuyelela.