Xana Muxe A Ri Mufembi Wa Mati?

“MUXE la nga humesa mati hi ku ba ribye hi nhonga (Tinhlayo 20:9-11), u vitaniwe mufembi wa mati wo sungula.” (The Encyclopedia Americana) Leyi i mianakanyo leyi tshamelaka ku humelela loko ku buriwa hi mhaka ya ku femba mati. Sweswinyana magazini wa National Wildlife hi ku kongoma wu vule leswaku nhonga ya Muxe i “nhonga yo hlahluva.” Naswona vafembi van’wana va tshemba leswaku matimba ya vona ma huma eka Muxe.

Kambe ku hambana ni sweswo, Muxe hi yena a nga tsala nawu lowu lwisanaka ni ku vhumba! (Deteronoma 18:10) Naswona hlori ra le Meriba i nchumu lowu nge kule ni ku femba mati. Vafembi vo tala va tshembela eka nhonga ya vona leswaku yi va lavela mati lama tumbeleke; va yi landzelela, va yimela leswaku yi tsekatseka kumbe ku tlulatlula. Kambe Muxe a nga kalanga a landzela nhonga yakwe a yimela leswaku yi tlulatlula; entiyisweni, a nga kalanga a lava mati ni kan’we. Yehovha, Mutumbuluxi wa misava ni swihlovo swa yona swa mati leswi tumbeleke u byele Muxe ndhawu leyi hi ku kongoma a ta kuma mati eka yona: “Mi ta v̌ulav̌ula ni ribye,” ku lerisa Xikwembu, “kutani ri ta humesa mati ya rona.”—Tinhlayo 20:8.

Ku tlula kwalaho, vafembi hakanyingi vo byela vanhu laha va faneleke ku cela kona. Loko nhonga ya Muxe yi hima ribye, maboboma ya mati ya hume hi matimba—ya tele ya kota ku tima torha ra tiko hinkwaro. Muxe u hlundzukise Xikwembu loko a endla onge na yena u hoxe xandla eka hlori leri. Vona ndlela leyi swi hlundzukisaka ku tlurisa ha yona ku xixima nhonga yakwe—nhonga ntsena leyi nga riki na mianakanyo!